ବାରିପଦା: କାଚଫ୍ୟାକ୍ଟ୍ରିରେ ଭୟାବହ ଅଗ୍ନିକାଣ୍ଡ। ବାରିପଦା ମଞ୍ଚାବନ୍ଧା ସ୍ଥିତ ଏକ କାଚ କମ୍ପାନୀ “ଜୁହି ଇଣ୍ଟରନ୍ୟାସନାଲ ପ୍ରାଇଭେଟ ଲିମିଟେଡ୍‌” ରେ ଅଗ୍ନିକାଣ୍ଡ । ଦୀର୍ଘ ୮ ଘଣ୍ଟା ଧରି ନିଆଁକୁ ଆୟତ୍ତ କରିବା ପାଇଁ ଆପ୍ରାଣ ଉଦ୍ୟମ କରୁଛି ଅଗ୍ନିଶମ ବିଭାଗ । ଏନେଇ ଅଗ୍ନିଶମ ବିଭାଗର ୩ଟି ଟିମ ନିୟୋଜିତ ଅଛନ୍ତି ।

ଗତକାଲି ରାତି ପ୍ରାୟ ଗୋଟେ ବେଳେ ଅଗ୍ନିକାଣ୍ଡ ଘଟିଥିଲା । ଖବରପାଇ ଘଟଣାସ୍ଥଳରେ ପହଞ୍ଚିଥିଲା ଅଗ୍ନିଶମ ବାହିନୀ । ତେବେ ଏ ଯାଏଁ ନିଆଁ କୁ ଲିଭାଇବାରେ ସଫଳ ହୋଇପାରିନି ଅଗ୍ନିଶମ ବାହିନୀ । ବର୍ତ୍ତମାନ ସୁଦ୍ଧା କାଚ ଫ୍ୟାକ୍ଟ୍ରିରେ ଭିତରେ ଥିବା କାଚ ଗୋଦାମ୍‌ର ଭିତରେ ଥିବା ଲକ୍ଷାଧିକ ଟଙ୍କାର କାଚ ଓ ପେଟି ଜଳି ଜାଇଥିବା ସୂଚନା ମିଳିଛି । ନିଆଁ ଲାଗିବା ଫଳରେ କାଚ ବୋତଲ ଗୁଡିକ ଠୋ ଠୋ ହୋଇ ଫାଟିବାରୁ ଗୋଦାମ ଭିତରକୁ ପଶି ନିଆଁ କୁ ଆୟତ୍ତ କରିବା ଅସମ୍ଭବ ହେଉଥିବା ଅଗ୍ନିଶମ ବିଭାଗ ଅଧିକାରୀ କହିଛନ୍ତି।

କମ୍ପାନୀର ଗୋଦାମ ଭିତରେ ନିଆଁ ଲାଗିବାର ପ୍ରକୃତ କାରଣ ଜଣା ପଡିନଥିବା ବେଳେ ସଟସର୍କିଟ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି।

ପିପିଲ: ସତ୍ୟବାଦୀ ଥାନା ଅନ୍ତର୍ଗତ ଡେଲାଙ୍ଗ ବ୍ଳକ୍‌ ଅଞ୍ଚଳରେ ଲଜ୍ଜା । ବାପାଙ୍କ ଭତ୍ତା ଟଙ୍କା ନେଇ ଫେରୁଥିବା ବେଳେ ସେହି ଗାଁର ଜଣେ ଯୁବକ ଟାଣି ନେଇ ଦୁଷ୍କର୍ମ କରିଥିବା ଅଭିଯୋଗ । ସତ୍ୟବାଦୀ ଥାନା ଅନ୍ତର୍ଗତ ଡେଲାଙ୍ଗ ବ୍ଳକ ଅଞ୍ଚଳର ଯୁବତୀଙ୍କୁ ସେହି ଗ୍ରାମର ଜଣେ ବିବାହିତ ଯୁବକ ଘରକୁ ଡାକି ନେଇ ଦୁଷ୍କର୍ମ କରିଥିବା ଅଭିଯୋଗ । ଗୋଡ଼ହାତ ବାନ୍ଧି ଦୁଷ୍କର୍ମ କରିଥିବା ସତ୍ୟବାଦୀ ଥାନାରେ ଅଭିଯୋଗ କରିଛନ୍ତି ପୀଡ଼ିତାଙ୍କ ପରିବାର ।

ସୂଚନା ଅନୁସାରେ, ଯୁବତୀ ଜଣଙ୍କ ବାପାଙ୍କ ଭତ୍ତା ଟଙ୍କା ନେବାକୁ ଗ୍ରାମ ମୁଣ୍ତକୁ ଆସିଥିଲେ । ଭତ୍ତା ନେଇ ଫେରୁଥିବା ବେଳେ ଉକ୍ତ ଯୁବକ ଜଣଙ୍କ ଅତି ଚତୁରତାର ସହ ଯୁବତୀଙ୍କୁ ATM ବାବଦରେ କିଛି ପଚାରି ବୁଝିବାକୁ ଘରକୁ ଡାକି ନେଇଥିଲେ । ଯୁବତୀ ଜଣଙ୍କ ଘରକୁ ନଯାଇ ଘର ବାହାରେ ଠିଆ ହୋଇ ଯୁବକଙ୍କୁ ATM ସମ୍ପର୍କରେ ବୁଝାଇଥିଲେ । ଯୁବତୀ ଫେରୁଥିବା ବେଳେ ଯୁବକ ଜଣଙ୍କ ପଛପଟୁ ଏକ ଗାମୁଛା ପକାଇ ଯୁବତୀଙ୍କୁ ଘର ଭିତରକୁ ଘୋଷାରି ନେଇ କବାଟ ବନ୍ଦ କରିଦେଇଥିଲା । ଯୁବତୀ ଏହାକୁ ବିରୋଧ କରିବାରୁ ଯୁବକ ଜଣଙ୍କ ପାଟିରେ ଗାମୁଛା ବାନ୍ଧି ଦେବା ସହ ଗୋଡ଼ ହାତ ବାନ୍ଧି ଦେଇ ଦୁଷ୍କର୍ମ କରିଥିବା ଯୁବତୀ ଜଣଙ୍କ ବୟାନ ଦେଇଛନ୍ତି ।

ମାତ୍ର ଯୁବତୀଙ୍କ ପାଟି ଶୁଣି ଗ୍ରାମର କେତେକ ଯୁବକମାନେ ସତ୍ୟବାଦୀ ଥାନାକୁ ଖବର ଦେଇଥିଲେ । ସତ୍ୟବାଦୀ ପୋଲିସ ଓ ଗ୍ରାମବାସୀଙ୍କ ସହଯୋଗରେ ଯୁବତୀ ଜଣଙ୍କ ବନ୍ଦ କୋଠରୀରୁ ଉଦ୍ଧାର କରାଯାଇଛି । ଏ ସମ୍ପର୍କରେ ସତ୍ୟବାଦୀ ଥାନାରେ ଅଭିଯୋଗ ହୋଇଛି । ପିପିଲି ଏସଡିପିଓ ଖବର ପାଇ ସତ୍ୟବାଦୀ ଥାନାରେ ପହିଞ୍ଚି ସମସ୍ତ ଦିଗ ପ୍ରତି ଅନୁଧ୍ୟାନ କରୁଥିବା ବେଳେ ଘଟଣାପରଠୁ ଫେରାର ଅଛି ଅଭିଯୁକ୍ତ ।

ସୂଚନାଯୋଗ୍ୟ ଯେ ଯୁବକ ଜଣଙ୍କ ପୂର୍ବରୁ ବହୁବାର ଏଭଳି କାଣ୍ଡ ଭିଆଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି ।

ଯାଜପୁର: ଅସଲି ଖୋଳ ଭିତରେ ନକଲି ଅଟା । ‘ଆଶୀର୍ବାଦ’ , ‘ପରିବାର’ ଭଳି ବ୍ରାଣ୍ଡେଣ୍ଡ୍‌ ଅଟା ଖୋଳ ଭିତରେ ଚାଲିଥିଲା ନକଲି ଅଟାର କାରାବାର । ଏଭଳି ଏକ ନକଲି ଅଟା କାରଖାନାକୁ ଯାଜପୁର ପୋଲିସ ସହାୟତାରେ ଠାବ କରିଛି କଲିକତାର ଡିଟେକ୍ଟିଭ୍‌ ଟିମ୍‌ ।

ଯାଜପୁର ସହର ଦେବୀଦ୍ୱାର ଅଞ୍ଚଳର  କେଶବ ଚନ୍ଦ୍ର ପାଣିଙ୍କର ଏକ ଅଟାକଳ ରହିଛି।  ସେଠାରେ ସେ ସ୍ଥାନୀୟ ଲୋକଙ୍କ ଗହମ ପେସାଇ  ଅଟା ପ୍ରସ୍ତୁତ କରୁଥିଲେ। ତେବେ  କିଛି ମାସ ହେବ ‘ପରିବାର’ ଅଟା କମ୍ପାନୀ ପ୍ୟାକେଟ୍‌ରେ ଅଟା ପ୍ୟାକିଂ କରି ବଜାରକୁ ଛାଡୁଥିଲା । ଆଉ ଏହି ଘଟଣା ବିଷୟରେ ଜାଣିପାରିଥିଲେ କୋଲକାତା ସ୍ଥିତ‘ପରିବାର’ ଅଟା କମ୍ପାନୀ କର୍ତ୍ତୃପକ୍ଷ ।

ସେ ସ୍ଥାନୀୟ ଏକ ଡିଟେକ୍ଟିଭ ସଂସ୍ଥା ଯୋଗେ ଆଜି ଏହି ଅସଲି ଖୋଳ ଭିତରେ ‘ନକଲି  ଅଟା ବିକୁଥିବା ମାଲିକଙ୍କୁ ଧରିବାରେ ସକ୍ଷମ ହୋଇଛନ୍ତି । ତେବେ ଯାଜପୁର ଥାନା ଅଧିକାରୀ ଆଶିଷ ସାହୁଙ୍କ ସହଯୋଗକୁ ପ୍ରଶଂସା କରିଛନ୍ତି  କୋଲକାତାର ଟିମ । ଯାଜପୁର ପୋଲିସ ସଙ୍ଗେ ସଙ୍ଗେ ଅଟାକଳ ଉପରେ ଚଢ଼ାଉ କରିବା ସହ ମାଲିକଙ୍କୁ ଅଟକ ରଖିଛି ।

ଘଟଣାସ୍ଥଳରୁ ‘ପରିବାର’ କମ୍ପାନୀର ଖୋଳରେ ଅଟା ଭର୍ତ୍ତି ହୋଇଥିବା ୧ କେଜି ବିଶିଷ୍ଟ ୫୦ଟି ପ୍ୟାକେଟ ଓ ୨୨୦ ପିସ ଖାଲି ପ୍ୟାକେଟ, ଅର୍ଶୀବାଦ କମ୍ପାନୀ ନାଁରେ ୨୮୦ ପ୍ୟାକେଟର ୧କେଜିଆ  ନକଲି ଅଟା,  ୫ କେଜି ବିଶିଷ୍ଟ ୬୫ ପ୍ୟାକେଟ ଅଟା ସହ ଅଟା ପ୍ୟାକିଂ କରୁଥିବା ମେସିନ ଜବତ କରାଯାଇଛି।

ଭୁବନେଶ୍ୱର: ମହିଳାଙ୍କ ସୁରକ୍ଷା ନେଇ ଆଉ ପାଦେ ଆଗକୁ ବଢ଼ିଛି କମିଶନରେଟ ପୋଲିସ । ଶିକ୍ଷାନୁଷ୍ଠାନ, କଲ୍ ସେଣ୍ଟର, ଆଇଟି ସେଣ୍ଟର ଗୁଡିକରେ ନିୟୋଜିତ ହେବେ SPO । କର୍ମଜୀବୀ ମହିଳା ଓ ଶିକ୍ଷାନୁଷ୍ଠାନର ଛାତ୍ରୀମାନଙ୍କୁ  ନେଇ ଗଠନ ହେବ ଏସ୍‌ପିଓ । ଅପରାଧ ଓ ଅପରାଧୀଙ୍କ ଉପରେ ନଜର ରଖିବାକୁ ଏହି ନୂଆ ଉଦ୍ୟମ ଆରମ୍ଭ କରିବ କମିଶନରେଟ ପୋଲିସ ।

କଲେଜ ହେଉକି ବିଶ୍ୱବିଦ୍ୟାଳୟ । ଆଇଟି ହେଉକି କର୍ପୋରେଟ ସେକ୍ଟର । ମହିଳାଙ୍କ ସୁରକ୍ଷା ପାଇଁ କାମ କରିବେ ସ୍ପେଶାଲ ପୋଲିସ ଅଫିସର ବା ଏସ୍‌ପିଓ । ଦୁଷ୍କର୍ମ, ଅସଦାଚରଣ, ଅତ୍ୟାଚାର ଓ ନିର୍ଯାତନା ଭଳି ଅଭିଯୋଗ ନେଇ ରହିବନି ଥାନାର ଭୟ । ମହିଳାଙ୍କ ପ୍ରତି ହେଉଥିବା ଯେ କୈାଣସି ପ୍ରକାର ଅଭିଯୋଗ, ଏସପିଓ ଜାଣିବେ । ଟୁଇନସିଟିରେ କଲେଜ, ଶିକ୍ଷାନୁଷ୍ଠାନ ଓ ବିଭିନ୍ନ ସେକ୍ଟରରେ କାମ କରୁଥିବା ମହିଳାଙ୍କ ସୁରକ୍ଷାକୁ ନେଇ କର୍ତ୍ତୃପକ୍ଷଙ୍କ ସହ ଆଲୋଚନା କରିଛି କମିଶନରେଟ ପୋଲିସ । ପ୍ରତ୍ୟେକ ଅନୁଷ୍ଠାନରୁ ମହିଳା ଓ ଛାତ୍ରୀଙ୍କୁ ଚୟନ କରି ପୋଲିସ ବାଛିବ ମହିଳା ଏସପିଓ ଟିମ ।

ରାଜଧାନୀରେ ମହିଳାଙ୍କ ପ୍ରତି ଦୁଷ୍କର୍ମ, ଅସଦାଚରଣ, ଦୁବ୍ୟବହାର ଭଳି ଘଟଣାରେ ବଢ଼ିବାରେ ଲାଗିଛି । ଏ ସବୁ ରୋକିବାକୁ ନିଯୁକ୍ତ ହେବେ ଏସ୍‌ପିଓ । ଟୁଇନ୍‌ସିଟର ୪୧ଟି ଅନୁଷ୍ଠାନକୁ ଅବଗତ କରିଛି କମିଶନରେଟ୍‌ ପୋଲିସ । ପ୍ରଥମ ପର୍ଯ୍ୟାୟରେ ରାଜଧାନୀ କଲେଜ ସମେତ ଅନ୍ୟ କଲେଜ କର୍ତ୍ତୃପକ୍ଷ ଛାତ୍ରୀଙ୍କ ତାଲିକା କମିଶନରେଟ୍‌ ପୋଲିସକୁ ଦେଇଛନ୍ତି । ଅନେକ ସମୟରେ କର୍ମଜୀବୀ ମହିଳା ଓ ଛାତ୍ରୀଙ୍କ ପ୍ରତି ହେଉଥିବା ଅଭିଯୋଗ ପୋଲିସ ପାଖରେ ପହଞ୍ଚି ପାରୁନି । ଅଭିଯୋଗ କରିବାକୁ ସଙ୍କୋଚିତ ଅବା ଭୟ କରୁଛନ୍ତି ପୀଡ଼ିତା । ଏଭଳି ଘଟଣା ଏସପିଓଙ୍କ ନଜରକୁ ଆସିଲେ ସେମାନେ ପୋଲିସ ନିକଟରେ ପହଞ୍ଚାଇ ପାରିବେ । ଯାହା ଦ୍ଵାରା ପୋଲିସ ଘଟଣା ଉପରେ ଦୃଷ୍ଟି ରଖିବ । ଅନ୍ୟପଟେ ପୋଲିସର ଏସପିଓ ପଦକ୍ଷେପକୁ ସ୍ୱାଗତ କରିଛନ୍ତି ଛାତ୍ରୀ ଓ କର୍ମଜୀବୀ ମହିଳା ।

ଜାନୁୟାରୀ ୨ ଠାରୁ ରାଜଧାନୀରେ ଏହି କାର୍ଯ୍ୟକ୍ରମକୁ ଆରମ୍ଭ କରିବାକୁ ନିଷ୍ପତ୍ତି ନିଆଯାଇଥିବା ବେଳେ ଜାନୁଆରୀ ୧୫ରୁ କଟକରେ ମଧ୍ୟ ଏହାକୁ ଆରମ୍ଭ କରାଯିବ । ଏହା ଫଳରେ କିଛି ପରିମାଣରେ ମହିଳାଙ୍କ ପ୍ରତି ଘଟୁଥିବା ଅସଦାଚରଣ, ଦୁର୍ବ୍ୟବହାର, ବଳାକ୍ରାର ପରି ଘଟଣା ହ୍ରାସ ପାଇବ ବୋଲି ପୁଲିସ ଆଶା ରଖିଛି ।
ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଜଣେ ମହିଳା ଇନିସ୍ପେକ୍ଟର ରାଜଧାନୀରେ ଏହି କାର୍ଯ୍ୟକ୍ରମର ପରିଚଳନା ଦାୟିତ୍ୱ ନେବେ । ତାଙ୍କ ନେତୃତ୍ୱରେ କଲେଜର ସ୍ୱତନ୍ତ୍ର ପୁଲିସ ଅଫିସରମାନେ କାମ କରିବେ ।
ପୂର୍ବରୁ ଭୁବନେଶ୍ୱର କଲେଜ ଛାତ୍ରୀଙ୍କୁ ରୋଡ ରୋମିଓ ଦୁବ୍ୟବହାରର ଶିକାର ହୋଇଛନ୍ତି। ଏପରିକି ରୋଡ ରୋମିଓ ଙ୍କୁ ଯୁବତୀ ମାନେ ମଧ୍ୟ ପାନେ ଚାଖିଛନ୍ତି।