ଭୁବନେଶ୍ୱର : ଲୋକସେବା ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିଛନ୍ତି ନବନିଯୁକ୍ତ ଡିଜିପି ଅଭୟ । ଆଜି ପୂର୍ବାହ୍ନରେ ସେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଆସି ତାଙ୍କୁ ସାକ୍ଷାତ କରିଥିଲେ । ଦାୟିତ୍ୱ ନେବା ପରେ ସେ ପ୍ରଥମ କରି ସାକ୍ଷାତ କରିଛନ୍ତି ।
ଏହି ଅବସରରେ ମୋ ସରକାର କାର୍ଯ୍ୟକ୍ରମ ଓ ‘୫-ଟି’କୁ କାର୍ଯ୍ୟାନ୍ଵିତ କରିବାକୁ ଏବଂ ଲୋକ କୈନ୍ଦ୍ରିକ ସେବା ପ୍ରଦାନକୁ ପ୍ରାଥମିକତା ଦେବାକୁ ମୁଖ୍ୟମନ୍ତ୍ରୀ ଡିଜିପିଙ୍କୁ ପରାମର୍ଶ ଦେଇଛନ୍ତି । ରାଜ୍ୟରେ ମହିଳା ସୁରକ୍ଷା, ଆଇନ ଶୃଙ୍ଖଳା ନିୟନ୍ତ୍ରଣ ପ୍ରଭୃତି ଉପରେ ଗୁରୁତ୍ୱ ଦେବାକୁ କହିଥିଲେ ନୂଆ ଡିଜିପି ।
ଅନୁଗୋଳ : ରେଳ ଧାରଣାରୁ ଖସିଲା ମାଲ ବୋଝେଇ ଟ୍ରେନ୍ । ଏଭଳି ଏକ ଘଟଣା ଘଟିଛି ଅନୁଗୋଳ ବଅଁରପାଳ ହାଟ ନିକଟରେ । ନାଲକୋର ଏକ ଟ୍ରେନ ଲାଇନ ଚ୍ୟୁତ ହୋଇଥିବା ଜଣା ପଡ଼ିଛି ।
ଦାମନଯୋଡିରୁ ନାଲକୋ ସ୍ମେଲଟର ପ୍ଲାଣ୍ଟକୁ ଆଲୁମିନା ଆଣୁଥିବା ବେଳେ ବଅଁରପାଳ ହାଟ ନିକଟରେ ଟ୍ରେନଟି ଲାଇନଚ୍ୟୁତ ହୋଇଛି । ଟ୍ରେନର ଇଞ୍ଜିନ ସହିତ ପ୍ରାୟ ୩ ଟି ମାଲବାହୀ ବଗି ଧାରଣାରୁ ଖସି ଯାଇଛି ।
ତେବେ ଏଥିରେ କୌଣସି କ୍ଷୟକ୍ଷତି ହୋଇ ନାହିଁ । ନାଲକୋ ରେଳ କର୍ମଚାରୀ ମାନେ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ କରିବା ସହ ଟ୍ରେନକୁ ଧାରଣାକୁ ଆଣିବାକୁ ଚେଷ୍ଟା କରୁଛନ୍ତି । ମାଲବାହୀ ଟ୍ରେନଟି ଧାରଣା ତଳକୁ ଖସିଲା କେମିତି ସେମେଇ ତଦନ୍ତ ଚାଲିଛି ।
ନୂଆଦିଲ୍ଲୀ : ସଂସଦର ଶୀତକାଳୀନ ଅଧିବେଶର ସରି ଆସିବା ବେଳକୁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ଦଳୀୟ ସାଂସଦଙ୍କ ପାଇଁ ଦିଲ୍ଲୀରେ ଏକ ନୈଶ ଭୋଜିର ଆୟୋଜନ କରିଥିଲେ । ଗତକାଲି ରାତିରେ ଆୟୋଜିତ ଏହି ଡିନରରେ ସମସ୍ତ କଂଗ୍ରେସ ସାଂସଦ ଯୋଗଦେଇଥିଲେ ।
ରାଜ୍ୟସଭାରେ ନାଗରିକତା ସଂଶୋଧନ ବିଲ୍ ଆଗତ ହେବା ପୂର୍ବରୁ କଂଗ୍ରେସ ଏହି ଡିନର ଡିପ୍ଲୋମାସି କରିଥିଲା । ଏଥିରେ ସାଂସଦଙ୍କ ସହ ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖଡଗେ, ହରିଶ ରାଓ୍ୱତ, ରଣଦୀପ ସୁରଜେଓ୍ୱାଲା, କେସି. ଭେନୁଗୋପାଳ ପ୍ରମୁଖ ଉପସ୍ଥିତ ଥିଲେ । ପାର୍ଲାମେଣ୍ଟ ହାଉସ୍ ପରିସରରେ ଏହାର ଆୟୋଜନ କରାଯାଇଥିଲା ।
ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂହ, ଗୁଲାମନବୀ ଆଜାଦ ପ୍ରମୁଖ ଉପସ୍ଥିତ ଥିବା ବେଳେ ରାହୁଲ ଗାନ୍ଧିଙ୍କୁ ଏଥିରେ ଦେଖିବାକୁ ମିଳିନଥିଲା ।
ସୁବର୍ଣ୍ଣପୁର: ଧନୁଯାତ୍ରାରେ ଦୋଳି ଖେଳ ବେଳେ ଅଘଟଣ । ରାମଦୋଳିରେ ବସି ସେଲ୍ଫି ନେବାବେଳେ ଖସି ପଡ଼ି ଚାଲିଗଲା ଜୀବନ । ଅସାବଧନତା, କ୍ଷଣିକ ଖୁସି ଡାକି ଆଣିଲା ମୃତ୍ୟୁ । ଏଭଳି ଅଭାନୀୟ ଘଟଣା ଘଟିଛି ଡୁଙ୍ଗୁରିପାଲି ବ୍ଲକ ଏସ.ରାମପୁର ଧନୁଯାତ୍ରାରେ ।
ମଙ୍ଗଳବାର ସନ୍ଧ୍ୟାରେ ୨ ଯୁବକ ଜଗା ବାରିକ ଓ ମାଧ ଛତ୍ରିଆ ରାମଦୋଳିରେ ବସି ସେଲ୍ଫି ନେଉଥିଲେ । ହଠାତ୍ ଭାରସାମ୍ୟ ହରାଇ ତଳେ ପଡ଼ି ଯାଇଥିଲେ । ଉଭୟଙ୍କୁ ଗୁରୁତର ଅବସ୍ଥାରେ ଡୁଙ୍ଗୁରିପାଲି ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଅବସ୍ଥା ସଙ୍କଟାପନ୍ନ ହେବାରୁ ଜଗାକୁ ବୁର୍ଲା ସ୍ଥାନାନ୍ତର କରାଯାଇଥିଲା । ଆଜି ଚିକିତ୍ସାଧୀନ ଅବସ୍ଥାରେ ଜଗାର ମୃତ୍ୟୁ ହୋଇଛି ।
ବିଶ୍ୱରେ ବର୍ଷକୁ ହାରାହାରି ସେଲ୍ଫି ଯୋଗୁ ୨୫୯ ଜଣଙ୍କ ମୃତ୍ୟୁ ହେଉଛି । ଭାରତରେ ଏହି ସଂଖ୍ୟା ୧୫୨ । ଅସାବଧନତା ସେଲ୍ଫି ଯୋଗୁଁ ଅକାଳରେ ଅନେକ ଜୀବନ ଚାଲି ଯାଉଛି । ଯାହାକି ଏବେ ଚିନ୍ତାର କାରଣ ।
ଆନ୍ଧ୍ରପ୍ରଦେଶ: ମହାକାଶରେ ଭାରତ ଆଉ ଏକ ଉପଲବ୍ଧି ହାସଲ କରିବାକୁ ଯାଉଛି । ମହାକାଶକୁ ରିସାଟ-2BR1 ପଠାଇବ ଇସ୍ରୋ । ଶ୍ରୀହରିକୋଟା ସତୀଶ ଧାୱନ ମହାକାଶ ଗବେଷଣା କେନ୍ଦ୍ରରୁ ଅପରାହ୍ଣରେ ଉତକ୍ଷେପଣ ହେବ । ଭାରତର ରାଡାର ଆମେଜିଙ୍ଗ ପୃଥିବୀ ଉପରେ ନଜର ରଖୁଥିବା ଉପଗ୍ରହ ରିସାଟ-2BR1କୁ ପିଏସଏଲଭି-C48 ରକେଟ ମାଧ୍ୟମରେ ଉତକ୍ଷେପଣ କରାଯିବ ।
ଏହା ପିଏସଏଲଭିର ୫୦ ତମ ଉତକ୍ଷେପଣ ହେବ । କୃଷି ଓ ବିପର୍ଯ୍ୟୟ ମୁକାବିଲା କରିବାରେ ସହାୟତା ଉପଲବ୍ଧ କରିବା ଉଦ୍ଦେଶ୍ୟରେ ଏହା ପ୍ରସ୍ତୁତ କରାଯାଇଛି । ୬୨୮ କେଜିର ଏହି ଉପଗ୍ରହ ସହ ଅନ୍ୟ ୯ଟି କର୍ମସିଆଲ ସାଟେଲାଇଟକୁ ଅନ୍ତରୀକ୍ଷକୁ ପଠାଯିବ । ଏଥିରେ ଇସ୍ରାଏଲ, ଇଟାଲି, ଜାପାନର ଗୋଟିଏ ଗୋଟିଏ ଏବଂ ଆମେରିକାର ୬ଟି ଉପଗ୍ରହ ସାମିଲ ଅଛି ।
