ନନ୍ଦିଘୋଷ ବ୍ୟୁରୋ : କଣ୍ଟ ପୂରି ବର୍ଷ ପୂରିବାକୁ ଯାଉଛି। ପ୍ରତିଶୃତି ପାଳନ ପାଣିର ଗାର ପାଲଟିଛି। ସରକାର ଗଠନର ୨୪ ଘଣ୍ଟାରେ କ୍ଷତିଗସ୍ତଙ୍କୁ ନାଁ ମିଳିଲା ଚିଟଫଣ୍ଡ ଟଙ୍କା କି ଶାସନର ୧୦ମାସ ପରେ ବି ଲୋକଙ୍କ ମିଳିଲାନି ମାଗଣାରେ ୩୦୦ ୟୁନିଟ ବିଜୁଳି। ବରଂ ପୂର୍ବ ସରକାରଙ୍କ ଯୋଜନାର ନାଁ ପରିବର୍ତ୍ତନ କରି ବାହାବା ନେବା ସହ ରଙ୍ଗ ବଦଳାଇବା ନୀତିରେ ସଫଳ ହୋଇଛି ଡବଲ ଇଞ୍ଜିନ ସରକାର । ୨୦୨୪ ସାଧାରଣ ନିର୍ବାଚନରେ ଓଡିଶାବାସୀଙ୍କୁ ମଥ୍ୟା ପ୍ରତିଶୃତି ଦେଇ ବିଜେପି କ୍ଷମତା ଦଖଲ କଲା। ଶହେ ଦିନରେ ନିର୍ବାଚନୀ ପ୍ରତିଶୃତି ପାଳନ କରିବା ନାରା ଦେଇ ଲୋକଙ୍କୁ ଠକିଦେଇଛନ୍ତି ରାଜ୍ୟ ସରକାର ।
ସରକାର କେବଳ ମିଥ୍ୟା ପ୍ରଚାର ଓ ପ୍ରସାରରେ ମାତିଛନ୍ତି ବୋଲି ମୁଖ୍ୟ ବିରୋଧୀ ବିଜେଡି ଅଭିଯୋଗ କରିଛି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଅଭିଯୋଗ କରିଛନ୍ତି ଯେ ବିଜେପି ସରକାର ହେଉଛି ମିଛର ସରକାର। ବିଦେଶରୁ କଳା ଟଙ୍କା ଆଣି ପ୍ରତ୍ୟେକ ଲୋକଙ୍କ ଖାତାକୁ ୧୫ ଲକ୍ଷ ଟଙ୍କା ଦେବା ପରି ଓଡିଶାରେ ବିଜେପି ନିର୍ବାଚନୀ ପ୍ରତିଶୃତି ଦେଇଥିଲା । ବର୍ଷ ପୂର୍ତ୍ତିରେ ବିଜେପି ଦେଇଥିବା ନିର୍ବାଚନୀ ପ୍ରତିଶୃତି କେତେ ପାଳନ କରିଛି ତାହାର ଶ୍ବେତପତ୍ର ଜାରୀ କରିବାକୁ ବିଜେଡି ଦାବି କରିଛି । ପ୍ରମିଳା ମଲ୍ଲିକ ଯୁକ୍ତି ହେଉଛି ବିଜେପି ଶାସନ କରିବା ଦିନଠାରୁ ଗାଁ ଗାଁରେ ବିକାଶ କାମ ସଂପୂର୍ଣ୍ଣ ଠପ ହୋଇଯିବା ସହ ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇପଡ଼ିଛି । ଦରଦାମରେ ଆକାଶ ଛୁଆଁ ହୋଇଥିବାରୁ ଲୋକେ ହନ୍ତସନ୍ତ ହେଉଛନ୍ତି ।
ସେପଟେ କଂଗ୍ରେସ ମଧ୍ୟ ବିଜେପିର ଡବଲ ଇଂଜିନ ସରକାର ଉପରେ ବର୍ଷଛି । ଓଡିଆ ଅସ୍ମିତାର ନାରା ଦେଇ ସରକାରକୁ ଆସିଥିବା ବିଜେପି ଓଡିଆମାନଙ୍କ ମନକୁ କଠୋର ଆଘାତ ଦେଉଛି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ପ୍ରଶ୍ନ କରିଛନ୍ତି ଓଡ଼ିଆ ଅସ୍ମିତା ଆଜି କେଉଁଠି ? ଓଡ଼ିଶାରେ ଓଡ଼ିଆ ଲୋକ ରହିବାକୁ ଚାହୁଛନ୍ତି । ହେଲେ ପଡୋଶୀ ରାଜ୍ୟ ସେ ଅଧିକାର ଛଡ଼ାଇ ନେଉଛନ୍ତି । ବିଜେପି ସରକାରରେ ମହିଳା ଓ ନାବାଳିକାମାନେ ଅସୁରକ୍ଷିତ ହୋଇ ପଡିଥିବା ବେଳେ ସୁଭଦ୍ରା ଯୋଜନାରେ ଲୋଭ ଦେଖାଇ ମହିଳାଙ୍କୁ ଠକିଛନ୍ତି ରାଜ୍ୟ ବିଜେପି ସରକାର । ତେଣୁ ବର୍ଷପୂର୍ତ୍ତିରେ ଓଡ଼ିଶାବାସୀଙ୍କ ପାଖରେ ଶ୍ୱେତପତ୍ର ଜାରି କରନ୍ତୁ ବୋଲି କଂଗ୍ରେସ ଦାବି କରିଛି । ବିଜେଡି ବିଧାୟକ ମାଧବ ଧଡା କହିଛନ୍ତି ବିଜେପି ସରକାର କେବଳ କଥା କୁହା ସରକାର । ଯାହାର ଜବାବ ଦେଇଛି ବିଜେପି ।
