ନୂଆପଡା: ଜୁଆ ଆଡ୍ଡା ଉପରେ ଚଢାଉ । ଘଟଣାସ୍ଥଳରୁ ୨୩ ଜୁଆଡି ଗିରଫ ହୋଇଛନ୍ତି । ନୂଆପଡା ଜିଲ୍ଲା କୋମନା ଥାନା ଜେଠୁପାଲି ଗାଁରେ ଜୁଆଖେଳ ଚାଲିଥିଲା । ବିଶେଷ ସୂତ୍ରରୁ ଖବର ପାଇ କୋମନା ପୋଲିସ ଜୁଆ ଆଡ୍ଡା ଉପରେ ଚଢ଼ଉ କରିଥିଲା । ସେଠାରୁ ନଗଦ ୪୮ହଜାର ୨୨୫ ଟଙ୍କା, ୧୬ ଗୋଟି ମୋବାଇଲ୍, ୧୨ ଗୋଟି ଯାନବାହାନ ଜବତ ଶହ, ୨୩ ଜଣ ଯୁଆଡିଙ୍କୁ ଗିରଫ କରିଛି ପୋଲିସ ।
କୋମନା ଥାନାରେ ପୋଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଛି । ନୂଆପଡ଼ା ଏସପି ସାମ୍ବାଦିକ ସମ୍ମିଳନୀରେ ଏନେଇ ସୂଚନା ଦେଇଛନ୍ତି ।
ଗଞ୍ଜାମ: ଅଂଶୁଘାତରେ ମୃତ୍ୟୁ ଅଭିଯୋଗ । ସାଇକେଲ୍ ଯୋଗେ ହିଞ୍ଜିଳିକାଟୁ ଆସୁଥିବା ବେଳେ ଟଳି ପଡ଼ିଲେ ଚାଷୀ । ମୃତ ଚାଷୀ ହିଞ୍ଜିଳିକାଟୁ ବ୍ଲକ ଖରିଡ଼ା ଗ୍ରାମର ୬୦ ବର୍ଷୀୟ ଦୀନବନ୍ଧୁ ବେହେରା ବୋଲି ଜଣାପଡିଛି । ସୂଚନା ଅନୁଯାୟୀ, ଟାଣ ଖରା ଦୀନବନ୍ଧୁ କୀଟନାଶକ କିଣିବା ପାଇଁ ସାଇକେଲ୍ ଯୋଗେ ହିଞ୍ଜିଳିକାଟୁ ଆସୁଥିଲେ । ଏହି ସମୟରେ ସେ ଟଳି ପଡ଼ିଥିଲେ । ସ୍ଥାନୀୟ ଲୋକେ ଉଦ୍ଧାର କରି ହିଞ୍ଜିଳି ମେଡିକାଲରେ ଭର୍ତ୍ତି କରିଥିବା ବେଳେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ପରିବାର ଲୋକେ ତାଙ୍କର ଅଂଶୁଘାତ ଜନିତ ମୃତ୍ୟୁ ଘଟିଥିବା ଆଶଙ୍କା କରୁଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି କହିଛନ୍ତି ହିଞ୍ଜିଳି ମେଡିକାଲ ଅଧୀକ୍ଷକ।
ଜାମ୍ମୁ କାଶ୍ମୀର: ମଙ୍ଗଳବାର ଦିନ ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀମାନେ ପର୍ଯ୍ୟଟକଙ୍କୁ ଟାର୍ଗେଟ କରିଥିଲେ। ଏହି ଆକ୍ରମଣରେ ୨୮ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି। ଆତଙ୍କବାଦୀମାନେ କେବଳ ପୁରୁଷମାନଙ୍କୁ ଟାର୍ଗେଟ କରିଥିଲେ। ମହାରାଷ୍ଟ୍ରର ଡୋମ୍ବିଭାଲିର ତିନି ଜଣ ଏବଂ ପାନଭେଲର ଦୁଇଜଣ ପର୍ଯ୍ୟଟକ ମଧ୍ୟ ଆତଙ୍କବାଦୀ ଆକ୍ରମଣର ଶିକାର ହୋଇଛନ୍ତି।
ସୂଚନା ଅନୁଯାୟୀ, ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ମହାରାଷ୍ଟ୍ରର ଡୋମ୍ବିଭଲି ଅଞ୍ଚଳର ତିନି ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଛି। ମୃତକମାନେ ହେଲେ ହେମନ୍ତ ଜୋଶୀ, ସଞ୍ଜୟ ଲେଲେ ଏବଂ ଅତୁଲ ମୋନେ । ଏହି ଖବର ପ୍ରକାଶ ପାଇବା ମାତ୍ରେ ଡୋମ୍ବିଭାଲି ସହରରେ ଶୋକର ଲହରୀ ଖେଳିଗଲା।
କୁହାଯାଉଛି ଯେ ଏହି ତିନି ବନ୍ଧୁ ବୁଲିବାକୁ ଜମ୍ମୁ-କାଶ୍ମୀର ଯାଇଥିଲେ। ବୁଲୁଥିଲାବେଳେ ହଠାତ୍ ଆତଙ୍କବାଦୀମାନେ ତାଙ୍କ ଉପରେ ଆକ୍ରମଣ କଲେ। ଏହି ଗୁଳିକାଣ୍ଡ ଘଟଣାରେ ଘଟଣାସ୍ଥଳରେ ହିଁ ତିନି ଜଣଙ୍କର ମୃତ୍ୟୁ ହୋଇଥିଲା।
ଅତୁଲ ଶ୍ରୀକାନ୍ତ ମୋନେ ତାଙ୍କ ପରିବାର ଏବଂ ବନ୍ଧୁମାନଙ୍କ ସହିତ କାଶ୍ମୀରର ବେଲଗାମକୁ ବୁଲିବାକୁ ଯାଇଥିଲେ। ସୂଚନା ଅନୁଯାୟୀ, ତାଙ୍କ ସ୍ତ୍ରୀ ଏବଂ ଝିଅ ସମେତ ମୋଟ ତିନୋଟି ପରିବାର ସେଠାକୁ ଯାଇଥିଲେ। ଅତୁଲ ମୋନେ ରେଳବାଇର ପାରେଲ ୱାର୍କସପରେ ସେକ୍ସନ ଇଞ୍ଜିନିୟର ଭାବରେ କାର୍ଯ୍ୟ କରୁଥିଲେ।
ହାଇଦ୍ରାବାଦ: ପହଲଗାମ ଆତଙ୍କବାଦୀ ଆକ୍ରମଣରେ ମୃତକଙ୍କ ପ୍ରତି ଶୋକ ପ୍ରକାଶ କରିବା ପାଇଁ କଳା ପଟି ପିନ୍ଧିବେ ଆଇପିଏଲ୍ ଖେଳାଳି । ଆଜି ସନରାଇଜର୍ସ ହାଇଦ୍ରାବାଦ ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ମ୍ୟାଚ ରହିଛି । ଏହି ଦୁଇ ଦଳର ଖେଳାଳିମାନେ କଳା ପଟି ପିନ୍ଧି ମ୍ୟାଚ୍ ଖେଳିବେ । ଆଜିର ମ୍ୟାଚରେ କୌଣସି ଆତସବାଜୀ ହେବ ନାହିଁ କି ଚିୟରଲିଡର ଦେଖାଯିବେ ନାହିଁ । ମୃତକଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇବା ପାଇଁ ଆଜି ମ୍ୟାଚ ଆରମ୍ଭ ହେବା ପୂର୍ବରୁ ଏକ ମିନିଟ ନୀରବ ପ୍ରାର୍ଥନା ହେବ ।
ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ କହିଛି ଯେ, ଉଭୟ ଦଳର ଖେଳାଳି ଆଜି କଳା ବ୍ୟାଚ୍ ପିନ୍ଧି ଖେଳିବେ ଏବଂ ପ୍ରାଣ ହରାଇଥିବା ଲୋକଙ୍କ ସ୍ମୃତିରେ ନୀରବ ପ୍ରାର୍ଥନା ହେବ ।
ଦକ୍ଷିଣ କାଶ୍ମୀରର ଲୋକପ୍ରିୟ ପର୍ଯ୍ୟଟନ ସ୍ଥଳି ଭାବେ ଜଣାଶୁଣା ପହଲଗାମରେ ଗତକାଲି ଆତଙ୍କବାଦୀ ଗୁଳି ଚଳାଇଥିଲେ । ସେଠାରେ ବୁଲିବାକୁ ଆସିଥିବା ୨୬ ଜଣ ପର୍ଯ୍ୟଟକ ମୃତ୍ୟୁ ବରଣ କରିଛନ୍ତି । ପାକିସ୍ତାନ ଲସ୍କର ଏ ତୋଏବାର ଆତଙ୍କବାଦୀ ଗୋଷ୍ଠୀ ରେଜିଷ୍ଟାନ୍ସ ଫ୍ରଣ୍ଟ ଏହି ଆକ୍ରମଣ ପାଇଁ ଦାୟୀ ବୋଲି କହିଛି । ସାରା ବିଶ୍ବରେ ଏହାକୁ ତୀବ୍ର ନିନ୍ଦା କରାଯାଇଛି ।
ଭୁବନେଶ୍ବର: ବର୍ତ୍ତମାନ ନୂଆ ସରକାରକୁ ୧୧ ମାସ ଚାଲିଲା । ଏହି ୧୧ ମାସରେ ସାରା ରାଜ୍ୟରେ ଶିଶୁ ଅପହରଣ, ଆଦିବାସୀ ଛାତ୍ରୀ ଅପହରଣ ହେଉଛନ୍ତି । ଶିଶୁ ଓ ଆଦିବାସୀ ଅଧ୍ୟୁଷିତ ଅଞ୍ଚଳରୁ ନିର୍ଯାତନା ଖବର ଆସୁଛି । କୁଚିଣ୍ଡା, ରାଉରକେଲା, ମୟୂରଭଞ୍ଜରୁ ମାଲକାନଗିରି ଯାଏଁ ଶିଶୁ ନିର୍ଯାତନାର କାହାଣୀ । କୁଚିଣ୍ଡାରେ ଲୋକେ ପ୍ରତିବାଦ କରିବା ପରେ ମାମଲା ହେଲା । ଡେଲାଙ୍ଗ ରତନପୁର ଘଟଣା ଅତ୍ୟନ୍ତ ହୃଦୟବିଦାରକ ।
ଏସବୁ ବିଫଳ ଆଇନ ଶୃଙ୍ଖଳା ପରିସ୍ଥିତିକୁ ଅଙ୍ଗୁଳି ଉଠାଉଛି । ପୋଲିସର ଆଭିମୁଖ୍ୟ ଦୁର୍ଭାଗ୍ୟ ଓ ଚିନ୍ତାଜନକ । ବିଜେଡି ଏହାକୁ କଡ଼ା ଭାଷାରେ ନିନ୍ଦା କରିଛି । ଗତ ୧୫ ତାରିଖରେ ଘଟଣା ଘଟିଥିଲା । ଥାନାରେ ନିଖୋଜ ମାମଲା ହେଲା । ଶିଶୁର ବାପା ଯାହାକୁ ସନ୍ଦେହ କରୁଥିଲେ ତାକୁ ପୋଲିସ ପଚରାଉଚରା କରି ଛାଡିଦେଲା । ଏହାପରେ ଗାଁ ଲୋକ ପ୍ରତିବାଦ କରିବାରୁ ୪୬ ଜଣଙ୍କ ନାଁରେ ମାମଲା ହୋଇଛି । ପୂର୍ବରୁ ପିପିଲିରେ ୭ ବର୍ଷର ଝିଅକୁ ଦୁଷ୍କର୍ମ କରାଗଲା । ଏହା ଘୋର ନିନ୍ଦନୀୟ । ପୋଲିସ କେମିତି ତଦନ୍ତ କରୁଛି । ପୁରୀ ଜିଲ୍ଲା ବିଜେଡି ସଭାପତି ଉମାକାନ୍ତ ସାମନ୍ତରାୟଙ୍କ ନେତୃତ୍ୱରେ ବିଜେଡି ରତନପୁର ଯାଉଛି । ପରିବାର ଓ ଲୋକଙ୍କୁ ଟିମ ଭେଟିବ । କାହିଁକି ତଦନ୍ତରେ ବିଳମ୍ବ ହେଲା ? ୪୬ ଜଣଙ୍କ ବିରୋଧରେ କାହିଁକି ମାମଲା ହେଲା ? ସେ ନେଇ ଆଲୋଚନା କରାଯିବ । ଆବଶ୍ୟକ ପଡିଲେ ପୁରୀ ଏସପିଙ୍କୁ ଭେଟିବୁ ବୋଲି କହିଛନ୍ତି ବିଜେଡି କାର୍ଯ୍ୟକ୍ରମ ରୂପାୟନ କମିଟି ଆବାହକ ସଂଜୟ ଦାସବର୍ମା । ସେହିପରି ତଦନ୍ତରେ କାହିଁକି ଅବହେଳା ହେଲା ଏକ ଟିମ ଗଠନ କରି ତଦନ୍ତ କରିବାକୁ ଦାବି କରିଛନ୍ତି ପୂର୍ବତନ ପିପିଲି ବିଧାୟକ ତଥା ବିଜେଡି ନେତା ରୁଦ୍ର ମହାରଥୀ । ଏହାସହ ମାମଲାର ବିଚାର ଫାଷ୍ଟ ଟ୍ରାକ କୋର୍ଟରେ କରାଯାଉ ବୋଲି ସେ ଦାବି କରିଛନ୍ତି । କାରଣ କ୍ରାଇମବ୍ରାଞ୍ଚ ତଦନ୍ତ ଦାବି କରାଯାଇଥିଲା ହେଲେ ଗୃହ ବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ଏ ନେଇ କିଛି କହିଲେ ନାହିଁ । ପ୍ରତିବାଦ ସମୟରେ ଜିଲ୍ଲାପାଳଙ୍କୁ ବାରମ୍ବାର ଫୋନ କରିଥିଲେ ବି ସେ ଫୋନ ଅଫ ରଖିଥିଲେ । ମୃତଦେହ ଆସିବା ପରେ ବି ସେ ଆସିନଥିଲେ । ଏହା ନିନ୍ଦନୀୟ । ସରକାର କ୍ଷତିପୂରଣ ବାବଦରେ ଆଶୀର୍ବାଦଙ୍କ ପରିବାରକୁ ଏକ କୋଟି ଟଙ୍କା ଦିଅନ୍ତୁ ।
ନୟାଗଡ଼: ସ୍ତ୍ରୀର ଚରିତ୍ରକୁ ସନ୍ଦେହ କରି ନୃଶଂସ ଭାବେ ହତ୍ୟା କଲା ଜହ୍ଲାଦ ସ୍ୱାମୀ। ବିବାହକୁ ବର୍ଷେ ନପୁରୁଣୁ ଘର ଭିତରୁ ଝୁଲନ୍ତା ଅବସ୍ଥାରେ ମିଳିଲା ନବବଧୂର ମୃତଦେହ। ନୟାଗଡ଼ ଫତେଗଡ ଥାନା ମାରଡ଼ା କେନ୍ଦୁପଲ୍ଲୀ ଗାଁରେ ହତ୍ୟାକାଣ୍ଡ।
ମୃତକ ହେଲେ ପ୍ରିୟଦର୍ଶିନୀ ବାରିକ। ଚରିତ୍ର ସନ୍ଦେହରୁ ଝିଅକୁ ହତ୍ୟା କରଯାଇଥିବା ଅଭିଯୋଗ ଆଣିଛନ୍ତି ପରିବାର ଲୋକ। ଝିଅର ତଣ୍ଟିଚିପି ଫ୍ୟାନରେ ଲୁଗାରେ ଟାଙ୍ଗି ଦେଇଥିବା ଅଭିଯୋଗ କରିଛନ୍ତି ବାପା। ଅନ୍ୟପଟେ ବୋହୂ ଆତ୍ମହତ୍ୟା କରିଥିବା କହିଛନ୍ତି ପୁଅଘର ଲୋକେ । ଘଟଣାସ୍ଥଳରେ ଫତେଗଡ ପୋଲିସ ପହଂଚି ତଦନ୍ତ ଜାରି ରଖିଛି। ସ୍ୱାମୀ ସୁବାସ ବସନ୍ତରାକୁ ଅଟକ ରଖି ପଚରାଉଚରା ଚଳାଇଛି ପୋଲିସ।ଓଳାସ ଗ୍ରାମର ପବିତ୍ର ମୋହନ ବାରିକଙ୍କ ଝିଅ ପ୍ରିୟଦର୍ଶିନୀ କେନ୍ଦୁପଲ୍ଲୀ ଗାଁର ସୁବାସ ଚନ୍ଦ୍ର ବସନ୍ତରାକୁ ବିବାହ କରିଥିଲେ। ଯୌତୁକ ନେବା ପରେ ମଧ୍ୟ ସୁନା ଚେନ ପାଇଁ ବାରମ୍ବାର ଦାବି କରିଆସୁଥିଲେ ଶାଶୁଘର ଲୋକେ। ଏଥିପାଇଁ ନିର୍ଯାତନା ଦେଇଆସୁଥିଲେ ବୋଲି କହିଛନ୍ତି ମୃତକଙ୍କ ପରିବାର।
ନନ୍ଦିଘୋଷ ବ୍ୟୁରୋ: ପହଲଗାମ ଆକ୍ରମଣ ପରେ ପାକିସ୍ତାନର ପ୍ରତିକ୍ରିୟା ଆସିଛି । ପାକିସ୍ତାନର ପ୍ରତିରକ୍ଷାମନ୍ତ୍ରୀ ଖଓ୍ବାଜା ଆସିଫ କହିଛନ୍ତି ଯେ, ଏହି ଆକ୍ରମଣ ସହିତ ପାକିସ୍ତାନର କୌଣସି ସମ୍ପର୍କ ନାହିଁ । ସେ କହିଛନ୍ତି, ଆକ୍ରମଣଗୁଡ଼ିକ ସ୍ଥାନୀୟ ଅଞ୍ଚଳରେ ଘଟୁଛି । ଲୋକମାନେ ନିଜର ଅଧିକାର ମାଗୁଛନ୍ତି । ହିନ୍ଦୁତ୍ବବାଦୀ ଶକ୍ତିମାନେ ଲୋକଙ୍କୁ ଶୋଷଣ କରୁଛନ୍ତି । ଏହା ତା’ ବିରୁଦ୍ଧରେ ଏକ ବିପ୍ଳବ ।
ସେ ଆହୁରୀ କହିଛନ୍ତି, ଏଥିରେ ପାକିସ୍ତାନର କୌଣସି ସମ୍ପର୍କ ନାହିଁ । ଏ ସବୁ ତାଙ୍କ ନିଜ ଘରେ ଘଟୁଛି । ବିଭିନ୍ନ ରାଜ୍ୟରେ ଭାର ବିରୁଦ୍ଧରେ ବିପ୍ଳବ ଘଟୁଛି । ନାଗାଲାଣ୍ଡରୁ କାଶ୍ମୀର ପର୍ଯ୍ୟନ୍ତ, ଦକ୍ଷିଣରେ, ଛତିଶଗଡ଼ରେ ଏବଂ ମଣିପୁରରେ ମଧ୍ୟ । ଏ ସମସ୍ତ ସ୍ଥାନରେ ଭାରତ ସରକାର ବିରୋଧରେ ବିପ୍ଳବ ଘଟୁଛି ।
ଏଠାରେ ଆପଣଙ୍କୁ କହିରଖିବାକୁ ଚାହୁଁଛୁ ଯେ, ଖଓ୍ବାଜା ଆସିଫ ପାକିସ୍ତାନର ଶାସକ ବିଏମଏଲ-ଏନ ଦଳର ଜଣେ ବରିଷ୍ଠ ନେତା ଏବଂ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ଜଣେ ଘନିଷ୍ଠ ସହଯୋଗୀ । ଏହି ଆକ୍ରମଣ ପାଇଁ ସେ ଘରୋଇ ଶକ୍ତିକୁ ଦାୟୀ କରିଛନ୍ତି ।
ଜାମ୍ମୁ କାଶ୍ମୀର: ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ସାରା ଦେଶରେ ଶୋକର ଛାୟା ଖେଳିଯାଇଛି । ଏ ନେଇ ସମସ୍ତଙ୍କ ଆଖିରେ ଲୁହ ଥିଲାବେଳେ ଝାଡ଼ଖଣ୍ଡର ଜଣେ ବ୍ୟକ୍ତି ଏ ନେଇ ଖୁସି ଅଛନ୍ତି । ସେ ସୋସିଆଲ ମିଡିଆରେ ଏପରି ପୋଷ୍ଟ କରୁଛନ୍ତି ଯାହା ଭାରତୀୟଙ୍କ ମନରେ କ୍ରୋଧ ସୃଷ୍ଟି କରିଛି ।
ଏହି ବ୍ୟକ୍ତିଙ୍କ ନାଁ ହେଉଛି ମହମ୍ମଦ କାସିମ । ସେ ତାଙ୍କ ପୋଷ୍ଟରେ ପାକିସ୍ତାନ ଏବଂ ଲସ୍କର ଏ ତୋଏବାକୁ ଧନ୍ୟବାଦ ଜଣାଇଛନ୍ତି । ଏହି ପୋଷ୍ଟ ଦେଖି ଭାରତୀୟ କ୍ରୋଧରେ ଜଳୁଛନ୍ତି । ପୋଷ୍ଟଟି ଉର୍ଦ୍ଦୁରେ ଲେଖାଯାଇଛି । ଏହି ପୋଷ୍ଟ ଉପରେ ପୋଲିସର ନଜର ଏ ଯାଏ ପଡ଼ିନାହିଁ । ବିଜେପି ଏହାକୁ ହେମନ୍ତ ସୋରେନ ସରକାରଙ୍କ ତୁଷ୍ଟିକରଣର ଫଳାଫଳ ବୋଲି କହୁଛି । ଏ ନେଇ ଝାଡ଼ଖଣ୍ଡ ପୋଲିସ କାର୍ଯ୍ୟାନୁଷ୍ଠାନ ଦାବି କରାଯାଇଛି । ଏହି ବ୍ୟକ୍ତିଙ୍କୁ ଶୀଘ୍ର ଧରାଯାଇ ତା ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ଝାଡ଼ଖଣ୍ଡର ପୂର୍ବତନ ରାଜ୍ୟ ମନ୍ତ୍ରୀ ସିପି ସିଂହ ସୋସିଆଲ ମିଡିଆରେ ପୋଷ୍ଟ କରି କହିଛନ୍ତି । ଏପରି ମାନସିକତା ଭାରତ ପାଇଁ ବିପଦ ଏବେ କୋମଳତା ନୁହେଁ କଠୋରତା ଆବଶ୍ୟକ ବୋଲି ସେ କହିଛନ୍ତି ।
ଜାମ୍ମୁ କାଶ୍ମୀର: ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭୟଭୀତ ହୋଇପଡ଼ିଛନ୍ତି ସେଠାକୁ ଯାଇଥିବା ପର୍ଯ୍ୟଟକ । ସେମାନେ କିପରି ନିଜ ଘରକୁ ଫେରିବେ ସେ ନେଇ ଚିନ୍ତିତ ଅଛନ୍ତି । ଏହାରି ଭିତରେ ଜାମ୍ମୁ କାଶ୍ମୀର ବିମାନ ବନ୍ଦରରେ ଆଜି ପ୍ରବଳ ଭିଡ଼ ଦେଖିବାକୁ ମିଳିଛି । ଭିଡ଼କୁ ଦୃଷ୍ଟିରେ ରଖି ବିଭିନ୍ନ ବିମାନ କମ୍ପାନୀ ଗୁଡ଼ିକ ଭଡ଼ାରେ ଅହେତୁକ ବୃଦ୍ଧି କରିଛନ୍ତି । ଭଡ଼ା ପ୍ରାୟ ୩ ଗୁଣ ବଢ଼ିଥିବା ଯାତ୍ରୀମାନେ ଅଭିଯୋଗ କରିଛନ୍ତି । ସଙ୍କଟ ସମୟରେ ଏପରି ଭଡ଼ା ବଢ଼ାଇଥିବାରୁ ଯାତ୍ରୀମାନଙ୍କ ଭିତରେ ଅସନ୍ତୋଷ ଦେଖିବାକୁ ମିଳିଛି ।
ଏବେ ଏୟାର ଇଣ୍ଡିଆ ଏବଂ ଇଣ୍ଡିଗୋ ଏୟାରଲାଇନ୍ସର ଅତିରିକ୍ତ ୪ଟି ବିମାନ ଚଳାଚଳ କରୁଛି । ଦୁଇଟି ଦିଲ୍ଲୀ ଏବଂ ଆଉ ଦୁଇଟି ମୁମ୍ବାଇ ଯିବାଆସିବା କରୁଛି । ଆବଶ୍ୟକ ପଡ଼ିଲେ ଅଧିକ ବିମାନ ପ୍ରସ୍ତୁତ ରଖାଯାଇଛି ବୋଲି ମନ୍ତ୍ରଣାଳୟ କହିଛି ।
Just look at how Private Airlines are charging 3 times more fare from the panick stricken tourists of Sri Nagar. pic.twitter.com/uFyc3TTgr5
— Manish RJ (@mrjethwani_) April 23, 2025
ତେବେ ଅନ୍ୟପକ୍ଷରେ କମ୍ପାନୀଗୁଡ଼ିକ ଭଡ଼ା ବୃଦ୍ଧି ନ କରିବାକୁ ଚେତାବନୀ ଦେଇଛନ୍ତି କେନ୍ଦ୍ର ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ । ଏହି କଷ୍ଟ ସମୟରେ ଯାତ୍ରୀଙ୍କ ଉପରେ ଯେପରି ବୋଝ ନ ପଡ଼େ ସେଥିପାଇ: ଭଡ଼ା ସ୍ବାଭାବିକ ରଖିବାକୁ କମ୍ପାନୀ ଗୁଡ଼ିକୁ ନିର୍ଦ୍ଦେଶ ରହିଛି ।
ଜାମ୍ମୁ କାଶ୍ମୀର: ପହଲଗାମ ଆତଙ୍କବାଦୀ ଆକ୍ରମଣ ଘଟଣାରେ ୩ ଆତଙ୍କବାଦୀଙ୍କ ସ୍କେଚ ଜାରି ହୋଇଛି । ତଦନ୍ତକାରୀ ସଂସ୍ଥା ପକ୍ଷରୁ ଏହି ସ୍କେଚ ଜାରି କରାଯାଇଛି । ଆକ୍ରମଣ ସ୍ଥଳରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପହଞ୍ଚି ସ୍ଥିତିର ସମୀକ୍ଷା କରିଛନ୍ତି । ଆଜି ସନ୍ଧ୍ୟା ୬ଟାରେ ଦିଲ୍ଲୀରେ CCS ବୈଠକ ଅନୁଷ୍ଠିତ ହେବ ।
ଅନ୍ୟପଟେ ଆତଙ୍କୀ ହମଲା ପଛରେ ଲସ୍କର-ଏ-ତଏବାର ରେଜିଷ୍ଟାନ୍ସ ଫ୍ରଣ୍ଟର ହାତ ଥିବା ଜଣାଯାଇଛି। ଆତଙ୍କୀ ହମଲାର ମାଷ୍ଟରମାଇଣ୍ଡ ସୈଫୁଲ୍ଲା କାସୁରୀ ଓରଫ ଖାଲିଦ ବୋଲି ସୂଚନା ମିଳିଛି। ଏହା ସହ ପାକ୍ ଅଧିକୃତ କାଶ୍ମୀରର ଆଉ ୨ ଆତଙ୍କୀ ବି ସାମିଲ ଥିବା ଜଣାଯାଇଛି।
