ଭୁବନେଶ୍ବର: ଢେଙ୍କାନାଳ, ଯାଜପୁର ଓ କେନ୍ଦୁଝର ଜିଲ୍ଲାରେ ମାଓ ଗତିବିଧି ନେଇ ଖବର ଆସୁଛି । ଏହା ଏକ ଚିନ୍ତାଜନକ ଓ ସମ୍ବେଦନଶୀଳ ପ୍ରସଙ୍ଗ କହି ଉଦବେଗ ପ୍ରକାଶ କରିଛି ବିଜେଡି । ଏଥିରେ ରାଜ୍ୟର ସୁରକ୍ଷା ଜଡ଼ିତ ଥିବାରୁ ବିଜେଡି ଉଦବେଦ ପ୍ରକାଶ କରିବା ସହିତ ସଂପୃକ୍ତ ତିନି ଜିଲ୍ଲାରେ ଲୋକେ ଆତଙ୍କିତ ଥିବା ଅଭିଯୋଗ କରିଛି ବିଜେଡି । ୨୦୧୩ରେ ଏହି ତିନି ଜିଲ୍ଲା ଜିରୋ ମାଓବାଦୀ ଜିଲ୍ଲା ଭାବେ ଘୋଷଣା ହୋଇଥିଲା । ହେଲେ ଏବେ ସେଠି ଦାଦାବଟି ମାଗିବା ସହିତ ଅସ୍ତ୍ରଶସ୍ତ୍ର ଧରି ଖୋଲାରେ ବୁଲୁଛନ୍ତି । ଲୋକଙ୍କ ସୁରକ୍ଷା ଓ ଆଇନଶୃଙ୍ଖଳାରେ ତ୍ରୁଟି ରହିଛି ବୋଲି ତାହା ଆଜି ପ୍ରମାଣିତ ହୋଇଛି । ଓଡ଼ିଶା ପୋଲିସର ଏହା ବଡ଼ ବିଫଳତା ।

ସେମାନେ ଏହାକୁ ଅନୁମାନ କରିବାରେ ବିଫଳ ହୋଇଛନ୍ତି । ରାଜ୍ଯବାସୀଙ୍କୁ ସୁରକ୍ଷା ଦେବାରେ ଗୃହ ବିଭାଗ ଆଜି ସମ୍ପୂର୍ଣ୍ଣ ବିଫଳ ହୋଇଛି ବୋଲି ବିଜେଡି ଅଭିଯୋଗ କରିଛି । ମୁଖ୍ୟମନ୍ତ୍ରୀ ନିଜେ ବିଧାନସଭାରେ ଉତ୍ତର ଦେଇଛନ୍ତି ଯେ ରାଜ୍ୟରେ ୧୦୦ ରୁ ୧୨୦ ମାଓବାଦୀ ଅଛନ୍ତି । ସରକାର ଓ ଏସପିଙ୍କ ମଧ୍ଯରେ ସମନ୍ୱୟ ନାହିଁ । ଏସପି ଫୋନରେ ଲୋକଙ୍କ ଅଭିଯୋଗ ଶୁଣୁ ନାହାନ୍ତି । ତେଣୁ ମାଓବାଦୀ ଜନ୍ମ ନେଉଛନ୍ତି । ଯେଉଁଠି ସରକାରୀ ଯୋଜନା ପହଞ୍ଚୁନାହିଁ ସେଠି ମାଓବାଦୀ ଜନ୍ମ ନେଉଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାଓବାଦୀ ଦମନ କରି ନିଯୁକ୍ତି ଓ ରୋଜଗାର ମାଧ୍ଯମ ବାହାର କରିଥିଲେ । ବର୍ତ୍ତମାନର ସରକାର ସେହି କାର୍ଯ୍ୟକ୍ରମ ସବୁକୁ ଆଗକୁ ନେଇ କର୍ମନିଯୁକ୍ତି ଦେଉ । ଯେଉଁ ୧୨୦ ମାଓବାଦୀଙ୍କୁ ସରକାର ଚିହ୍ନଟ କରିଛନ୍ତି, ସେ ଦିଗରେ କଣ ପଦକ୍ଷେପ ନିଆଯାଇଛି ? ନା କେବଳ ଗଣିକି ଓ ଚିହ୍ନିକି ରଖିଛନ୍ତି ବୋଲି ପ୍ରଶ୍ନ କରିଛନ୍ତି ବିଜେଡି ନେତା ପ୍ରୀତିରଞ୍ଜନ ଘଡେଇ ।

ଜଗତସିଂହପୁର: ଆୟୁଷ୍ମାନ ଯୋଜନା ଶୁଭାରମ୍ଭ ବେଳେ ଜଗତସିଂହପୁର ଜିଲ୍ଲା ରଘୁନାଥପୁର ତରିକୁନ୍ଦ ପଞ୍ଚାୟତ ଅଫିସ ଆଗରେ ମହିଳା ପ୍ରଶାସନିକ ଅଧିକାରୀଙ୍କୁ ବିଜେପି ଗୁଣ୍ଡାମାନେ ଗୋଡାଇ ଗୋଡାଇ ଆକ୍ରମଣ କରିବା ଘଟଣା। ଜଗତସିଂହପୁର ଥାନାରେ ଏତଲା ଦେଲେ ମହିଳା ପ୍ରଶାସନିକ ଅଧିକାରୀ ପ୍ରଦୀପ୍ତା ଖୁଣ୍ଟିଆ । ଏହା ସହ ତରିକୁନ୍ଦ ପଂଚାୟତର ସରପଞ୍ଚ ଏବଂ ପିଏସ ମେମ୍ବର ଏହାକୁ ନିନ୍ଦା କରି ଆକ୍ରମଣକାରୀଙ୍କ ବିରୋଧରେ ଜଗତସିଂହପୁର ଥାନାରେ ଅଭିଯୋଗ କରିଛନ୍ତି । ବିଜେପି ନେତା ଓ ୨୦ରୁ ଅଧିକ କର୍ମୀଙ୍କ ନାମରେ ଥାନାରେ ମାମଲା ହୋଇଛି ।

ଓବିସି ମୋର୍ଚ୍ଚା ଜିଲ୍ଲା ସଭାପତି ସୁବୋଧ ବାରିକଙ୍କ ସହ ୨୦ରୁ ଅଧିକ କର୍ମୀଙ୍କ ନାଁରେ ସଙ୍ଗୀନ ଦଫା ଲାଗିଛି । ରଘୁନାଥପୁର ବ୍ଲକ ମହିଳା କନିଷ୍ଠ ଯନ୍ତ୍ରୀଙ୍କୁ ଆକ୍ରମଣ, ସରକାରୀ ସମ୍ପତ୍ତି ନଷ୍ଟ, ଅଶାଳୀନ ବ୍ଯବହାର, ଅସଦାଚରଣ, ଟଣାଓଟରା କରିବା ସହ ଏସସି, ଏସଟି ଆକ୍ଟରେ ମାମଲା ରୁଜୁ ହୋଇଛି । ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରାଯାଇଛି । ଗତକାଲି ଆୟୁଷ୍ମାନ ଯୋଜନା ଶୁଭାରମ୍ଭବେଳେ ୨୫ରୁ ୩୦ ଜଣ ବିଜେପି କର୍ମୀ ସୁବୋଧ ବାରିକଙ୍କ ନେତୃତ୍ୱରେ ହଠାତ କାର୍ଯ୍ୟକ୍ରମ ଭିତରକୁ ପଶି ଆସି ଚୌକି ଟେବୁଲ ଫୋପଡା ଫୋପଡି କରି ବ୍ୟାନର ଚିରି ଅଶାଳୀନ ଭାଷା ପ୍ରୟୋଗ କରିଥିଲେ । ଏତିକିରେ ସେମାନେ ଅଟକିଯାଇନଥିଲେ । ସେଠାରେ ଉପସ୍ଥିତ ମହିଳା କନିଷ୍ଠ ଯନ୍ତ୍ରୀଙ୍କୁ ଗୋଡାଇ ଗୋଡାଇ ଆକ୍ରମଣ କରିଥିଲେ । ଆକ୍ରମଣର ଦୃଶ୍ଯ ଏପରି ଭୟାନକ ଥିଲା ଯେ ସାରା ଜିଲ୍ଲାରେ ଭୟର ବାତାବରଣ ଖେଳିଯାଇଛି । ସେପଟେ ଆକ୍ରମଣ ଘଟଣାକୁ ତିର୍ତ୍ତୋଲ ବିଜୁ ଜନତାଦଳର ବିଧାୟକ ରମାକାନ୍ତ ଭୋଇ ଏହାକୁ ଦୃଢ଼ ନିନ୍ଦା କରିବା ସହିତ ତୁରନ୍ତ ଆକ୍ରମଣ କାରୀଙ୍କୁ ଗିରଫ କରାଯିବାକୁ ଦାବି କରିଛନ୍ତି । ଗତକାଲି ବିଳମ୍ବିତ ରାତିରେ ଜଗତସିଂହପୁର ଏସପି, ଜିଲ୍ଲାପାଳ ଏବଂ ଥାନାକୁ ଯାଇ ୨୪ ଘଣ୍ଟା ଭିତରେ ଆକ୍ରମଣ କରିଥିବା ବିଜେପି ଗୁଣ୍ଡାମାନଙ୍କୁ ଗିରଫ କରିବାକୁ ସେ ଦାବି କରିଛନ୍ତି । ଦାବି ପୂରଣ ନହେଲେ  ତିର୍ତ୍ତୋଲ ବିଜୁ ଜନତା ଦଳ ପଷରୁ ଜଗତସିଂହପୁର ଥାନା ଘେରାଉ କରାଯିବା ସହିତ ବିଜେଡି ରାଜରାସ୍ତାକୁ ଓହ୍ଲାଇବ ବୋଲି ବିଧାୟକ ଚେତାବନୀ ଦେଇଛନ୍ତି।

ଚିତ୍ରକୋଣ୍ଡା: ଚିତ୍ରକୋଣ୍ଡା ସହକାରୀ ଯନ୍ତ୍ରୀ ପବିତ୍ର ପାଣିଗ୍ରାହୀଙ୍କ ଠାରୁ ବିପୁଳ ଟଙ୍କା ଜବତ ହେବା ଘଟଣା। ଆଜି ସକାଳୁ ଚିତ୍ରକୋଣ୍ଡା ବ୍ଲକ କାର୍ଯ୍ୟାଳୟରେ ଥିବା ବାସଭବନ ଓ ଅଫିସରେ ରେଡ କରୁଛି ଭିଜିଲାନ୍ସର ପାଞ୍ଚ ଜଣିଆ ଟିମ। ଗାଡ଼ିରେ ଟଙ୍କା ନେଇ ଯିବା ବେଳେ ଧରିଥିଲା ଭିଜିଲାନ୍ସ ଟିମ୍। ଗାଡ଼ିରୁ ମିଳିଥିଲା ୫ ଲକ୍ଷ ୭ ହଜାର ଟଙ୍କା। ଭୁବନେଶ୍ୱର ବାସଭବନ ଓ ଚିତ୍ରକୋଣ୍ଡା କ୍ୱାର୍ଟର୍ସରେ ରେଡ୍ ହୋଇଥିଲା। ଉଭୟ ସ୍ଥାନରୁ ୧୩ ଲକ୍ଷ ୫୦ ହଜାର ଜବତ କରିଥିଲା ଭିଜିଲାନ୍ସ। ରେଡ ବେଳେ ଜବତ ହୋଇଥିବା ମୋଟ ୧୮ଲକ୍ଷ ୫୭ହଜାର ଟଙ୍କାର ହିସାବ ଦେଇପାରୁନାହାନ୍ତି ସହକାରୀ ଯନ୍ତ୍ରୀ। ଘଟଣାରେ ଯନ୍ତ୍ରୀ ପବିତ୍ର ମୋହନ ପାଣିଗ୍ରାହୀଙ୍କୁ ଅଟକ ରଖି ପଚରାଉଚରା କରୁଛି ତଦନ୍ତକାରୀ ଟିମ୍।