ନୂଆଦିଲ୍ଲୀ: ବିଲ୍ ପ୍ରସଙ୍ଗରେ ସୁପ୍ରିମକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ। ରାଜ୍ୟପାଳ ପଠାଉଥିବା ବିଲ ସମ୍ପର୍କରେ ୩ ମାସରେ ମଧ୍ୟରେ ବିଚାର କରିବେ ରାଷ୍ଟ୍ରପତି। ପ୍ରଥମ ଥର ଲାଗି ସୁପ୍ରିମକୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ବିଲ୍ ସମ୍ପର୍କରେ ତାମିଲନାଡୁ ରାଜ୍ୟପାଳଙ୍କୁ ପୂର୍ବରୁ ଭର୍ତ୍ସନା କରିଥିଲେ ସର୍ବୋଚ୍ଚ ଅଦାଲତ।  ବିଧାନସଭାରେ ଗୃହୀତ ବିଲକୁ ରାଜ୍ୟପାଳ ପକାଇ ରଖିପାରିବେ ନାହିଁ ବୋଲି କହିଥିଲେ ସୁପ୍ରିମକୋର୍ଟ।

ଜଷ୍ଟିସ ଜେ.ବି. ପାର୍ଦ୍ଦିବାଲା ଓ ଆର. ମହାଦେବନଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି- ଧାରା ୨୦୧ ଅନୁସାରେ ରାଷ୍ଟ୍ରପତି ବିଭିନ୍ନ ବିଲ୍ ସମ୍ପର୍କରେ ନିଷ୍ପତ୍ତି ନେବା ଜରୁରୀ। ସୁପ୍ରିମକୋର୍ଟ ଆହୁରି କହିଛନ୍ତି- ରାଷ୍ଟ୍ରପତିଙ୍କ ନିକଟରେ ପକେଟ ଭିଟୋ କ୍ଷମତା ନାହିଁ ଏବଂ କୌଣସି ବିଲକୁ ସେ ଅନୁମତି ଦେବେ କିମ୍ବା ଏହାକୁ ସ୍ଥଗିତ ରଖିବେ।

ନନ୍ଦିଘୋଷ ବ୍ୟୁରୋ: ଉତ୍ତରପୂର୍ବାଞ୍ଚଳ ରାଜ୍ୟ ମଣିପୁରରେ ତେଜିଲା ୱାକଫଜନିତ ଅସ୍ଥିରତା। ଇମ୍ଫାଲ ଇଷ୍ଟ ସମେତ ଅନ୍ୟାନ୍ୟ ସ୍ଥାନରେ ବ୍ୟାପକ ଅସ୍ଥିରତା। ରାଜରାସ୍ତାକୁ ଓହ୍ଲାଇଲେ ହଜାର ହଜାର ମୁସଲିମ। ଏହି ଆଇନକୁ ଅସାମ୍ବିଧାନିକ ଦର୍ଶାଇବା ସହ ଏହାକୁ ପ୍ରତ୍ୟାହାର କରିବା ଲାଗି ଦାବି କରିଛନ୍ତି ଆନ୍ଦୋଳନକାରୀ। ରାଜ୍ୟରେ ଜାତିଗତ ହିଂସାକୁ କେନ୍ଦ୍ର କରି ରାଷ୍ଟ୍ରପତି ଶାସନ ଜାରି ହୋଇଥିବା ସତ୍ତ୍ବେ ଲୋକମାନେ ଉତ୍ତ୍ୟକ୍ତ ହୋଇ ରାଜରାସ୍ତାକୁ ଆସିଛନ୍ତି।

ଲୋକମାନେ ମସଜିଦ, ମଦ୍ରାସା, କବରସ୍ଥାନର ସୁରକ୍ଷା ସଂକାନ୍ତ ପ୍ଲାକାର୍ଡ ଧରି ବିକ୍ଷୋଭ କରିଛନ୍ତି। ମୁସଲିମମାନଙ୍କ ସମ୍ପତ୍ତିଗତ ଅଧିକାର ଛଡାଇବା ଲାଗି ଚେଷ୍ଟା କରାଯାଉଛି ବୋଲି ଆନ୍ଦୋଳନକାରୀ କହିଛନ୍ତି। କେନ୍ଦ୍ର ସରକାର ମୁସଲିମମାନଙ୍କ ଭାବନା ଉପରେ ଆଘାତ ଆଣିଛନ୍ତି ବୋଲି କହିଛନ୍ତି ନେତା। ଆସନ୍ତା ୧୬ ତାରିଖରେ ୱାକଫ ପ୍ରସଙ୍ଗରେ ସୁପ୍ରିମକୋର୍ଟ ଶୁଣାଣି କରିବାକୁ ଯାଉଥିବାବେଳେ ଦେଶର ବିଭିନ୍ନ ସ୍ଥାନରେ ପ୍ରତିବାଦ ଆନ୍ଦୋଳନ ଜାରି ରହିଛି।..

ଚେନ୍ନାଇ: ଖୋଲୁଛି କେନ୍ଦ୍ର ସରକାରଙ୍କ ସଂଖ୍ୟାଲଘୁ ପ୍ରୀତିର ଅସଲ ମୁଖା। ବହୁଚର୍ଚ୍ଚିତ ୱାକଫ ବିଲ ବିରୋଧରେ ରାଜ୍ୟସଭାରେ ତାମିଲନାଡୁ ଏଆଇଏଡିଏମକେର ୪ ଜଣ ସାଂସଦ ଭୋଟ ଦେଇଥିଲେ। ହେଲେ ଗତ ୧୧ ତାରିଖରେ ଏଆଇଏଡିଏମକେ ସହ ମେଣ୍ଟ ଘୋଷଣା କରିଥିଲା ବିଜେପି। ଏପରିକି ଚେନ୍ନାଇରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସହ ମଞ୍ଚରେ ଆସନ ଅଳଙ୍କୃତ କରିଥିଲେ ଏଆଇଏଡିଏମକେ ନେତା ଇକେ ପାଲାନିସ୍ବମୀ ବା ଇପିଏସ । ଗତ ୧୧ ତାରିଖରେ ତାମିଲନାଡୁରେ ଘୋଷିତ ହୋଇଥିଲା ବିଜେପି-ଏଆଇଏଡିଏମକେ ମେଣ୍ଟ। ଏଆଇଏଡିଏମକେର ଦୁଇଟି ସର୍ତ୍ତକୁ ପାଳନ କରିଥିଲା ବିଜେପି।

ପ୍ରଥମଟି ହେଉଛି ଏଆଇଏଡିଏମକେର ଦାବି ଅନୁସାରେ ବିଜେପିର ରାଜ୍ୟସଭାପତି କେ. ଆନ୍ନାମଲାଇଙ୍କୁ ହଟାଇ ତାଙ୍କ ସ୍ଥାନରେ ନାଇନାର ନାଗେନ୍ଦ୍ରନଙ୍କୁ ରାଜ୍ୟସଭାପତି କରିବା। ଦ୍ବିତୀୟଟି ହେଉଛି- ସୀମା ପୁନଃନିର୍ଦ୍ଧାରଣରେ ଯେପରି ତାମିଲନାଡୁର  କିଛି କ୍ଷତି ହେବ ନାହିଁ ସେଥିପାଇଁ କେନ୍ଦ୍ର ଦୃଷ୍ଟି ଦେବ। କେବଳ ଏତିକି ନୁହେଁ ଇପିଏସଙ୍କୁ ତୁଷ୍ଟ କରିବା ଲାଗି ଆମ୍ମା ମକ୍କଲ ମୁନେତ୍ର କାଜାଗମ ନେତ୍ରୀ ଶଶୀକଳା ଓ ଟିଟିଭି ଦିନାକରନଙ୍କୁ ଦୂରେଇ ରଖିବା ଲାଗି ବି ବିଜେପି ସହମତି ହୋଇଥିବା ସୂଚନା ମିଳିଛି। ବିଜେପି ଓ ଏଆଇଏଡିଏମକେ ମେଣ୍ଟ ଯୋଗୁ ରାଜ୍ୟର ୩ଟି ଅଞ୍ଚଳରେ ଏବଂ ବିଶେଷ କରି ଗ୍ରାମାଞ୍ଚଳରେ ଏନଡିଏ ନିଜ ଆଧିପତ୍ୟ ବିସ୍ତାର କରିବ ।

ନୂଆଦିଲ୍ଲୀ: ଦିଲ୍ଲୀରେ ଭୟଙ୍କର ଝଡ଼ ତୋଫାନ ଯୋଗୁ ଅଟକି ରହିଲା ଅନେକ ବିମାନ । ଯାତ୍ରାରେ ବିଳମ୍ବ ହେବାରୁ ବିମାନ ବନ୍ଦରରେ ଅଟକି ରହିଲେ ଶହ ଶହ ଯାତ୍ରୀ । ରାତିସାରା ଯାତ୍ରୀମାନେ କୁଆଡେ ଯାଇ ନପାରି ହନ୍ତସନ୍ତ ହୋଇଛନ୍ତି । ବିମାନବନ୍ଦରରେ ଏତେ ଯାତ୍ରୀ ହୋଇଗଲେ ଯେ, ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଛି ।

ସୂଚନା ଅନୁସାରେ, ଗତକାଲି ରାତିରେ ଦିଲ୍ଲୀରେ ପ୍ରବଳ ଝଡ଼ ତୋଫାନ ଯୋଗୁ କିଛି ସମୟ ପାଇଁ ଠପ୍ ହୋଇଯାଇଥିଲା ସହର । ଏହାର ପ୍ରଭାବ ଯାତାୟତରେ ପଡ଼ିଥିଲା । ଦିଲ୍ଲୀ ଇନ୍ଦିରାଗାନ୍ଧୀ ବିମାନବନ୍ଦରରେ ଏହାର ଏତେ ପ୍ରଭାବ ପଡ଼ିଥିଲା ଯେ, ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଥିଲା । ବିମାନବନ୍ଦର ଟର୍ମିନାଲ ୩ର ଗେଟ ନଂ ୪୨ଏରେ ଏପରି ପରିସ୍ଥିତି ସୃଷ୍ଟି ହୋଇଥିଲା । ଯାତ୍ରୀଙ୍କ ସଂଖ୍ୟା ଏତେ ବଢ଼ି ଯାଇଥିଲା ଯେ, ପରିସ୍ଥିତି ଅସମ୍ଭାଳ ହୋଇଥିଲା । ଆଜି ସକାଳୁ ଫସି ରହିଥିବା ଯାତ୍ରୀଙ୍କୁ ୨ରୁ ୮ଟି ବିମାନ ବୋର୍ଡିଂ କରୁଛି ।

ଶୁକ୍ରବାର ରାତିରୁ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ଏଭଳି ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରାଯାଉଛି ବୋଲି କହିଛି ଏୟାର ଇଣ୍ଡିଆ ।