ନନ୍ଦିଘୋଷ ବ୍ୟୁରୋ: ବିଧାନସଭାରେ ବ୍ୟୟ ମଞ୍ଜୁରୀ ବିଲ ପାରିତ ପୂର୍ବରୁ ମୋହନ ସରକାରଙ୍କୁ ଗୃହରେ ଘେରିବା ପାଇଁ ରଣନୀତି ପ୍ରସ୍ତୁତ କରିଛି ମୁଖ୍ୟ ବିରୋଧୀ ବିଜେଡ଼ି। ବିପର୍ଯସ୍ତ ଆଇନ ଶୃଙ୍ଖଳା ପରିସ୍ଥିତି, ବିଧାନସଭାରେ ଶାସକ ଦଳର ଏକଛତ୍ରବାଦ ନୀତି, ବଜେଟ ଅର୍ଥ ଖର୍ଚ୍ଚ ନହେବା, SC,St,OBC ପାଇଁ ସଂରକ୍ଷଣ , ସୁଭ୍ରଦା ଯୋଜନାରେ ମୋହନ ସରକାର ଓଡ଼ିଶାର ମହିଳାମାନଙ୍କୁ ପ୍ରତାରଣା ଦେଇଥିବା କଥା ଉଠାଇବା ସହ ମହିଳାଙ୍କ ଅସୁରକ୍ଷିତ ପ୍ରସଙ୍ଗ ଉଠାଇବ ବିଜେଡି । ଏହାସହ ନିର୍ବାଚନରେ ଦିଆଯାଇଥିବା ପ୍ରତିଶୃତି ପାଳନ କରିବାକୁ ଦଳ ଦାବି କରିବ। ଅନ୍ୟପଟେ ଶାଗମାଛ ଦଳରେ ବକ୍ସସାଇଟ ବଡ଼ ବଡ଼ କମ୍ପାନୀକୁ ବିକ୍ରି କରିବାକୁ ଷଡଯନ୍ତ୍ର, କୋଟିଆ, ପୋଲାଭରମ, ମହାନଦୀ ଜଳ ସମସ୍ୟା କଥା ଆଦି ପ୍ରସଙ୍ଗକୁ ବ୍ୟୟ ମଞ୍ଜୁର ବିଲ ଆଲୋଚନାରେ ଉଠାଇ ସରକାରଙ୍କୁ ଜବାବ ମାଗିବ ବିଜେଡି। ଆଜି ମହିଳା ଶିଶୁବିକାଶ, ନିର୍ମାଣ, ପର୍ଯ୍ଯଟନ, ଅବକାରୀ, ମିଶନଶକ୍ତି ଓ ଆଇନ ବିଭାଗର ପ୍ରଶ୍ନକାଳ ରହିଛି। ଶୂନ୍ଯକାଳରେ ଗୁରୁତ୍ବପୂର୍ଣ୍ଣ ପ୍ରସଙ୍ଗକୁ ବିରୋଧୀ ଉଠାଇପାରନ୍ତି। ଆଜି ବିଧାନସଭାରେ ବ୍ୟୟ ମଞ୍ଜୁରୀ ବିଲ ପାରିତ ହେବ । ପୂର୍ବରୁ ବିଭିନ୍ନ ବିଭାଗର ଖର୍ଚ୍ଚ ଦାବି ଆଲୋଚନା ହୋଇସାରିଛି । ଯେଉଁସବୁ ବିଭାଗରେ ଖର୍ଚ୍ଚ ଦାବି ଆଲୋଚନା ହୋଇନାହିଁ ତାହା ଗିଲୋଟିନରେ ପାରିତ କରାଯାଇଛି । ୨ ଲକ୍ଷ ୯୦ ହଜାର କୋଟି ଟଙ୍କାର ବଜେଟକୁ ବ୍ୟୟ ମଞ୍ଜୁରୀ ବିଲ ଜରିଆରେ ଗୃହରେ ପାରିତ କରାଯିବ । ଯାହାକୁ ନେଇ ଗୃହରେ ସରଗରମ ଆଲୋଚନା ହେବ ।
କୁନାଲ ପାଣ୍ଡ୍ୟାଙ୍କ ଉପରେ ରାଗିଗଲେ କି ଧୋନୀ ? ଜାଣନ୍ତୁ ପଡ଼ିଆରେ କାହିଁକି ହେଲା ଏମିତି..
ନନ୍ଦିଘୋଷ ବ୍ୟୁରୋ: ଶୁକ୍ରବାର ଆଇପିଏଲ ୨୦୨୫ର ଏକ ଗୁରୁତ୍ବପୂର୍ଣ୍ଣ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ଏବଂ ରୟାଲ ଚ୍ୟାଲେଞ୍ଜର ବାଙ୍ଗାଲୋର ମଧ୍ୟରେ ଖେଳାଯାଇଥିଲା । ଏହି ମ୍ୟାଚଟି ଆରସିବି ୫୦ ରନରେ ବିଜୟ ହାସଲ କରିଛି । ତେବେ ଉଭୟ ଦଳର ଫ୍ୟାନ ଅଧିକ ରହିଥିବାବେଳେ ମ୍ୟାଚ ଆରମ୍ଭରୁ ଶେଷ ପର୍ଯ୍ୟନ୍ତ ଖେଳରେ ମଧ୍ୟ ରୋମାଞ୍ଚକ ଦେଖିବାକୁ ମିଳିଥିଲା । ତେବେ ଏହି ମ୍ୟାଚରେ ଆଗ୍ରେସିଭ୍ ମୁଡରେ ନଜର ଆସିଥିଲେ ଧୋନୀ । ଧୋନୀ ଏହି ମ୍ୟାଚରେ ୧୬ ବଲରୁ ୩୦ ରନର ପାଳି ଖେଳିଥିଲେ । ଏଥିରେ ୨ଟି ଛକା ଏବଂ ୨ଟି ଚୌକା ରହିଛି । ତେବେ କେବଳ କୁନାଲ ପାଣ୍ଡ୍ୟାଙ୍କ ଓଭରରେ ହିଁ ୨ଟି ଯାକ ଛକା ମାରିଥିବା ଦେଖିବାକୁ ମିଳିଥିଲା ।
ତେବେ କୁନାଲଙ୍କ ବଲରେ ଧୋନୀ ୨ଟି ଛକା ମାରିଥିବାବେଳେ ସେ ଏହା ବଦଲା ନେଇଛନ୍ତି ବୋଲି ଫ୍ୟାନ୍ସମାନେ ସୋସିଆଲ ମିଡିଆରେ ଦାବି କରିବା ସହ ବିଭିନ୍ନ ପୋଷ୍ଟ କରୁଥିବା ଦେଖିବାକୁ ମିଳିଛି । ତେବେ ଧୋନୀ ଯେତେବେଳେ ମଇଦାନକୁ ଆସିଥିଲେ ସେତେବେଳକୁ ପ୍ରାୟ ଚେନ୍ନାଇ ହାତରୁ ମ୍ୟାଚ ଚାଲି ଯାଇଥିଲା । ଧୋନୀ ୯ ନମ୍ବରରେ ବ୍ୟାଟିଂ ଆସିଥିବାବେଳେ ଏକ ରୋମାଞ୍ଚକର ପାଳି ଖେଳିଥିଲେ । ତେବେ ଧୋନୀ ବ୍ୟାଟିଂ କରୁଥିବାବେଳେ କୁନାଲ ପାଣ୍ଡ୍ୟା ପ୍ରଥମ ବଲଟି ବିଟ୍ କରିଥିଲେ । ଏହାପରେ ଦ୍ବିତୀୟ ବଲରେ ଏକ ବାଉନ୍ସର ମାରିଥିଲେ । ସ୍ପିନର ମାନେ ପ୍ରାୟତଃ ବାଉନ୍ସର ମାରିନଥାନ୍ତି । ତେବେ କୁନାଲ ବାଉନ୍ସର ମାରିଥିବାବେଳେ ଧୋନୀଙ୍କ ବ୍ୟାଟିଂ ସମୟରେ ସମସ୍ତେ ଚାହିଁଥିଲେ । ଆଉ ଏହାପରେ ଧୋନୀ କୁନାଲଙ୍କୁ ଉଚିତ୍ ଜବାବ ଦେଇଥିବା ଦେଖିବାକୁ ମିଳିଥିଲା । ସେ କୁନାଲଙ୍କ ଓଭରରେ ୨ଟି ଛକା ଏବଂ ଗୋଟିଏ ଚୌକା ମାରିଥିଲେ ।
ଭୁବନେଶ୍ୱର ଆଚାର୍ଯ୍ୟ ବିହାର ଓଭର ବ୍ରିଜ ଉପରେ ଭୟଙ୍କର ଦୁର୍ଘଟଣା
ଭୁବନେଶ୍ବର: ଭୁବନେଶ୍ୱର ଆଚାର୍ଯ୍ୟ ବିହାର ଓଭର ବ୍ରିଜ ଉପରେ ଭୟଙ୍କର ଦୁର୍ଘଟଣା । ଦୁର୍ଘଟଣା ସମୟର ଏକ ଭିଜୁଆଲ ସାମ୍ନାକୁ ଆସିଛି। ଟ୍ରକ ସହ ଦାମୀ ଅଡି କାର ମଧ୍ୟରେ ହୋଇଛି ଭୟଙ୍କର ଦୁର୍ଘଟଣା । ଦୁର୍ଘଟଣାରେ ଅଡି କାର ସାମ୍ନା ସମ୍ପୂର୍ଣ୍ଣ ଭାଙ୍ଗିଯାଇଛି। ସମସ୍ତ ଏୟାର ବେଲୁନ ବାହାରି ଯାଇଛି। ସୌଭାଗ୍ୟ ବଶତଃ ସୁରକ୍ଷା ବେଲୁନ ପାଇଁ ଚାଳକଙ୍କୁ ଅଧିକ କ୍ଷତି ପହଞ୍ଚିନାହିଁ। ଗାଡିଟି ଖଣ୍ଡଗିରି ଅଞ୍ଚଳର ବୋଲି ଜଣାପଡିଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ କରିବା ସହ ଆହତ ଚାଳକଙ୍କୁ ହସ୍ପିଟାଲ ପଠାଇଛି ।
ଚେନ୍ନାଇକୁ ୫୦ ରନରେ ପରାସ୍ତ କଲା ଆରସିବି
ଚେନ୍ନାଇ: ଆଜି ଆଇପିଏଲରେ ଚେନ୍ନାଇ ବିପକ୍ଷରେ ୫୦ ରନରେ ବିଜୟ ହାସଲ କରିଛି ଆରସିବି । ୧୯୭ ରନର ଟାର୍ଗେଟକୁ ପିଛା କରିବାକୁ ଯାଇ ଚେନ୍ନାଇ ୮ ଓ୍ବିକେଟ ହରାଇ ୧୪୬ ରନ୍ ସଂଗ୍ରହ କରିବାକୁ ସକ୍ଷମ ହୋଇଥିଲା । ମହେନ୍ଦ୍ର ସିଂହ ଧୋନୀ ୩୦ ରନ କରି ଶେଷ ପର୍ଯ୍ୟନ୍ତ ଅପରାଜିତ ଥିଲେ । ଦଳ ପକ୍ଷରୁ ରଚିନ୍ଦ୍ର ରବିନ୍ଦ୍ର ସର୍ବାଧିକ ୪୧ ରନ୍ ସଂଗ୍ରହ କରିଥିଲେ । ମଧ୍ୟମକ୍ରମ ବ୍ୟାଟ୍ସମ୍ୟାନଙ୍କ ଦୁର୍ବଳତା ଦଳର ବ୍ୟାଟିଂ ବିପର୍ଯ୍ୟର କାରଣ ସାଜିଥିଲା । ଓପନର ରାହୁଲ ତ୍ରିପାଠୀ ୫, ଅଧିନାୟକ ଋତୁରାଜ ଗାଏକ୍ବାଡ ୦ ଓ ଦୀପକ ହୁଡା ୪ ରନ୍ କରିବା ଦଳ ପାଇଁ ମହଙ୍ଗା ସାବ୍ୟସ୍ତ ହୋଇଥିଲା । ଆରସିବି ପକ୍ଷରୁ ଜୋସ ହାଜଲେଉଡ ସର୍ବାଧିକ ୩ଟି ଓ୍ବିକେଟ ଅକ୍ତିଆର କରିଥିବା ବେଳେ ୟଶ ଦୟାଲ ଓ ଲିଆମ ଲିଭିଂଷ୍ଟୋନ ୨ଟି ଲେଖାଏଁ ଓ୍ବିକେଟ ନେଇଥିଲେ ।
ଏହା ପୂର୍ବରୁ ଆରସିବି ଅଧିନାୟକ ରଜତ ପାଟୀଦାରଙ୍କ ଅର୍ଦ୍ଧଶତକୀୟ ଇନିଂସ ବଳରେ ୭ ଓ୍ବିକେଟ ହରାଇ ୧୯୬ ରନ୍ ସଂଗ୍ରହ କରିଥିଲା । ଅନ୍ୟମାନଙ୍କ ମଧ୍ୟରେ ଫିଲିପ ସଲ୍ଟ ୩୨, ବିରାଟ କୋହଲି ୩୧ ରନ୍ ସଂଗ୍ରହ କରିଥିଲେ । ଟିମ୍ ଡେଭିଡ ୮ଟି ବଲରୁ ୨୨ ରନ୍ ସଂଗ୍ରହ କରିଥିବା ବେଳେ ଦେବତତ୍ତ ପାଡିକଲ ୧୪ଟି ବଲରୁ ୨୭ ରନ୍ ସଂଗ୍ରହ କରିଥିଲେ । ଦଳର ପ୍ରାରମ୍ଭିକ ବ୍ୟାଟିଂ ଭଲ ରହିବା ଫଳରେ ଦଳ ଏକ ବଡ଼ ସ୍କୋର କରିବାକୁ ସକ୍ଷମ ହୋଇଥିଲା । ଚେନ୍ନାଇ ପକ୍ଷରୁ ନୁର ଅହମଦ ସର୍ବାଧିକ ୩ଟି ଓ୍ବିକେଟ ହାସଲ କରିଥିବା ବେଳେ ମାଥିଶା ପାଥିରଣା ୨ଟି, ଖଲିଲ ଅହମଦ ୨ଟି ଓ ରବିଚନ୍ଦ୍ରନ ଅଶ୍ବିନ ୧ଟି ଓ୍ବିକେଟ ଅକ୍ତିଆର କରିଥିଲେ ।
ଆଉଟସୋର୍ସିଂ କର୍ମଚାରୀଙ୍କ ସ୍ଥାୟୀ ନିଯୁକ୍ତି ନେଇ ପୁଣି ସମୟ ମାଗିଲେ ସରକାର
ଭୁବନେଶ୍ବର: ଆଉଟସୋର୍ସିଂ କର୍ମଚାରୀଙ୍କ ସ୍ଥାୟୀ ନିଯୁକ୍ତି ନେଇ ପୁଣି ସମୟ ମାଗିଲେ ସରକାର । ଆଜି ବିଧାନସଭା ପ୍ରକୋଷ୍ଠରେ ଓଡ଼ିଶା ସରକାରୀ ଆଉଟସୋର୍ସିଂ କର୍ମଚାରୀ ମହାସଂଘର ୧୦ ଜଣିଆ ପ୍ରତିନିଧିଙ୍କ ସହ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଆଲୋଚନା କରିଛନ୍ତି । ପ୍ରାୟ ଦେଢ଼ଘଣ୍ଟା ଧରି ଚାଲିଥିବା ଆଲୋଚନାରେ ଛଟେଇ ବନ୍ଦ କରିବାକୁ ସରକାର ମହାସଂଘକୁ ପ୍ରତିଶ୍ରୁତି ଦେଇଛନ୍ତି । ଏହାସହିତ ସ୍ଥାୟୀ ନିଯୁକ୍ତି ନେଇ ସରକାର ବିଭିନ୍ନ ଦିଗକୁ ଅନୁଧ୍ୟାନ କରୁଥୁବା ପ୍ରତିନିଧିମଣ୍ଡଳୀ ସଦସ୍ୟଙ୍କୁ ଜଣାଇଥିବା କହିଛନ୍ତି ମହାସଂଘ ଅଧ୍ୟକ୍ଷ । ଆଉଟସୋର୍ସିଂ କର୍ମଚାରୀଙ୍କ ଦାବି ପୂରଣ ନେଇ ଏକ ମନ୍ତ୍ରୀସ୍ତରୀୟ କମିଟି ଗଠନ କରାଯାଇଛି । ଏଣିକି ନିୟମିତ ଭାବେ କମିଟି ମହାସଂଘ ସହ କର୍ମଚାରୀଙ୍କ ବିଭିନ୍ନ ଦାବି ସମ୍ପର୍କରେ ଆଲୋଚନା କରିବ । ଆଲୋଚନା ପରେ ସ୍ଥାୟୀ ନିଯୁକ୍ତି ଦେବା ନେଇ ସରକାର ପ୍ରତିଶ୍ରୁତି ଦେଇଥିବା ମହାସଂଘ କହିଛି । ଗତ ୨୬ ତାରିଖରୁ ସାରା ରାଜ୍ୟରୁ ହଜାର ହଜାର କର୍ମଚାରୀ ଆନ୍ଦୋଳନରୁ ଓହ୍ଲାଇଥିଲେ ।..
ଆହତଙ୍କ ଆଶୁ ଆରୋଗ୍ୟ କାମନା ପାଇଁ ଦୀପଦାନ କଲା କଂଗ୍ରେସ
ଭୁବନେଶ୍ବର: କଂଗ୍ରେସର ନାରୀ ସୁରକ୍ଷା ସମାବେଶ ବେଳେ କଂଗ୍ରେସ କର୍ମୀ, ପୋଲିସ ଓ ସାଧାରଣ ଲୋକ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ସେମାନଙ୍କ ଆସୁ ଆରୋଗ୍ୟ କାମନା କରିବା ପାଇଁ ଦୀପଦାନ କଲା କଂଗ୍ରେସ । କଂଗ୍ରେସ ଭବନରୁ ବାହାରି ସମସ୍ତ ବିଧାୟକ ଘଣ୍ଟ ବାଡେଇ ପଦଯାତ୍ରା କରି ଆର୍ଯ୍ୟ ସଂସ୍କୃତି ମନ୍ଦିର ଦୀପ ଜାଳିଥିଲେ । ସମସ୍ତ ଆହତ ବ୍ୟକ୍ତିଙ୍କ ଆସୁ ଅରୋଗ୍ୟ କାମନା କରିଥିଲେ । ବିଜେପି ସରକାର ନାରୀ ମାନେ ଅସୁରକ୍ଷିତ ହୋଇଛନ୍ତି । ଭଗବାନ ବିଜେପି ସରକାରଙ୍କୁ ସଦବୁଦ୍ଧି ଦିଅନ୍ତୁ ବୋଲି ସେମାନେ ପ୍ରାର୍ଥନା କରିଥିବା କହିଛନ୍ତି । ସମାବେଶରେ ୮୦ ପ୍ଲାଟୁନ ପୋଲିସ ଫୋର୍ସ ନିୟୋଜିତ ନ କରି ନାରୀ ସୁରକ୍ଷା ଓ ଅପରାଧୀଙ୍କ ବିରୋଧରେ ପୋଲିସକୁ ସରକାର ଲଗାନ୍ତୁ ବୋଲି ଦଳ ପରାମର୍ଶ ଦେଇଛି ।
ଛାତ୍ରୀ ନିବାସରେ ଅଗ୍ନିକାଣ୍ଡ: ଡେଇଁ ପଡ଼ିବାରୁ କିଛି ଛାତ୍ରୀ ଆହତ ସୂଚନା
ନୋଏଡ଼ା: ଗ୍ରେଟର ନୋଏଡାରେ ଏକ ଛାତ୍ରୀ ନିବାସରେ ଅଗ୍ନିକାଣ୍ଡ। କୋଠାର ଉପର ମହଲାରେ ଲାଗିଥିଲା ନିଆଁ। ନିଆଁ ଲାଗିବା ପରେ ଭୟରେ ବାଲକନି ଦେଇ ଛାତରୁ ତଳକୁ ଓହ୍ଲାଇଥିଲେ ଏକାଧିକ ଛାତ୍ରୀ। ହଷ୍ଟେଲରେ ଲାଗିଥିବା ଏସିରେ ବିସ୍ଫୋରଣ ଘଟିବାରୁ ଲାଗିଥିଲା ନିଆଁ। ଜୀବନ ବଂଚାଇବାକୁ ଯାଇ ଦ୍ଵିତୀୟ ମହଲାରୁ ତଳକୁ ଡେଇଁ ପଡିଥିଲେ ଅନେକ ଛାତ୍ରୀ। ବାଲକନିରୁ ଡେଇଁ କିଛି ଛାତ୍ରୀ ଆହତ ହୋଇଛନ୍ତି। ହଷ୍ଟେଲ ମଧ୍ୟରେ ଥିବା ୧୬୦ ଜଣ ଛାତ୍ରୀଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ଜଣାପଡିଛି। ଗ୍ରେଟର ନୋଏଡାର ପାର୍କ-୩ ଅଂଚଳରେ ଥିବା ଅନ୍ନପୂର୍ଣ୍ଣା ଛାତ୍ରୀ ନିବାସରେ ଲାଗିଥିଲା ନିଆଁ। ଛାତ୍ରୀମାନେ ଛାତ ଉପରକୁ ତଳକୁ ଡେଉଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଅଗ୍ନିକାଣ୍ଡର ଖବର ପାଇ ବିଳମ୍ବରେ ପହଞ୍ଚିଥିଲା ଅଗ୍ନିଶମବାହିନୀର ଟିମ। ତେବେ ହଷ୍ଟେଲକୁ ଅଗ୍ନିଶମ ବାହିନୀର ଏନଓସି ମିଳିଥିଲା କି ନାହିଁ ଜଣାପଡିନାହି। କୌଣସି ପ୍ରକାର ଅବହେଳା ସାମନାକୁ ଆସିଲେ ହଷ୍ଟେଲ ମାଲିକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।
ପ୍ରାଥମିକ ସ୍କୁଲ ମିଶ୍ରଣ ଓ ବନ୍ଦ ପ୍ରସଙ୍ଗରେ ଗଣଶିକ୍ଷା ମନ୍ତ୍ରୀଙ୍କ ଦୋମୁହାଁ ଉତ୍ତର
ଭୁବନେଶ୍ବର: କମ ପିଲା ଥିବା ସ୍କୁଲ ମିଶ୍ରଣ ବା ବନ୍ଦ ନିଷ୍ପତ୍ତି କାହାର ଥିଲା ? ନବୀନ ପଟ୍ଟନାୟକ ସରକାରଙ୍କ ନା ତତ୍କାଳୀନ କେନ୍ଦ୍ର ସରକାରଙ୍କର। ପ୍ରଶ୍ନକାଳରେ ନବୀନ ସରକାରଙ୍କ ଉପରେ ପ୍ରାଥମିକ ସ୍କୁଲ ମିଶ୍ରଣ ଓ ବନ୍ଦ ନେଇ ଦୋଷ ଲଦିବାକୁ ଚେଷ୍ଟା କଲେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ। ହେଲେ ଗୃହ ବାହାରେ ତାଙ୍କ ଉତ୍ତର ସମସ୍ତଙ୍କୁ ଚକିତ କରିଦେଲା।୫ ବର୍ଷ ପୂର୍ବରୁ କମ ପିଲା ଥିବା ସ୍କୁଲକୁ ପାଖ ସ୍କୁଲରେ ମିଶ୍ରଣ କରିବାକୁ ନୀତି ଆୟୋଗ କରିଥିଲେ ସୁପାରିସ। ଯାହାକୁ NDA ସରକାର କାର୍ଯ୍ୟକାରୀ କରିବାକୁ ସବୁ ରାଜ୍ୟକୁ ନିର୍ଦ୍ଦେଶ ଦେଇଥିଲେ। ଯାହାକୁ ସେ ସମୟରେ ତତ୍କାଳୀନ ରାଜ୍ୟ ସରକାର କାର୍ଯ୍ୟକାରୀ କରିଥିଲେ। ହେଲେ ବାରମ୍ବାର ନବୀନ ସରକାରଙ୍କୁ ଟାର୍ଗେଟ କରି ଚାଲିଲେ ନୂଆ ସରକାର।
୨୦୨୪ ନିର୍ବାଚନରେ କ୍ଷମତାକୁ ଆସିଲେ ବନ୍ଦ ସ୍କୁଲ ଖୋଲିବାକୁ ଘୋଷଣା କରିଥିଲା ବିଜେପି। ହେଲେ ଏ ଯାଏଁ ପ୍ରତିଶୃତି ପାଳନ ହୋଇନି। ଏହାକୁ ନେଇ ସରକାରଙ୍କୁ ଘେରିଥିଲେ ବିଜେଡି ବିଧାୟକ ଗଣେଶ୍ୱର ବେହେରା। ପ୍ରଶାସନ କହୁଛି ସ୍କୁଲ ଖୋଲିବାକୁ ସରକାର ନିର୍ଦ୍ଦେଶ ଦେଇନାହାନ୍ତି। ପୁଣି କେଉଁଠି ଖୋଲିବାକୁ ଆବେଦନ କରାଯିବ ବୋଲି ସେ ପ୍ରଶ୍ନ କରିଛନ୍ତି। ଗୃହ ଭିତରେ ଗଣଶିକ୍ଷା ମନ୍ତ୍ରୀ କହିଲେ ସଂରକ୍ଷିତ ଅଞ୍ଚଳରେ ୨୦ ଓ ଅଣସଂରକ୍ଷିତ ଅଞ୍ଚଳରେ ୪୦ ପିଲା ଥିଲେ ସ୍କୁଲ ଖୋଲିବାକୁ ବିଚାର କରାଯିବ। ଏହି ପ୍ରକ୍ରିୟା ଅନୁସାରେ ଆବେଦନ କରାଯିବ। ହେଲେ ଏ ଯାଏଁ ବନ୍ଦ ପଡିଥିବା ପ୍ରାଥମିକ ସ୍କୁଲ ପୁଣି ଖୋଲିବାକୁ ପ୍ରସ୍ତାବ ଆସିନଥିବା କହିଛନ୍ତି।
ପ୍ରସ୍ତାବ ଆସିଲେ ପ୍ରଥମେ ଜିଲ୍ଲା କମିଟି ଯାଞ୍ଚ କରି ରାଜ୍ୟ ସ୍ତରୀୟ କମିଟିକୁ ଯାଞ୍ଚ ପାଇଁ ପଠାଇବ। ରାଜ୍ୟ ସ୍ତରୀୟ କମିଟି ସ୍କୁଲ ଖୋଲିବାକୁ ସୁପାରିସ କରିବେ। ସ୍କୁଲରେ ପିଲା କମ ଥିବାରୁ ପାଖ ସ୍କୁଲରେ ୫,୬୩୨ ସ୍କୁଲ ମିଶ୍ରଣ ହୋଇଛି। ଏ ନେଇ ୧୧ ମାର୍ଚ୍ଚ ୨୦୨୦ରେ ବିଜ୍ଞପ୍ତି ପ୍ରକାଶ ପାଇଥିଲା। ସେହିପରି ୨, ୧୫୨ ସାଟେଲାଇଟ ସ୍କୁଲ ଶହେ ମିଟର ପାଖ ଥିବା ସ୍କୁଲରେ ମିଶ୍ରଣ କରାଯାଇଛି।ଗୃହରେ ଏହା ଅବଗତ କରିଛନ୍ତି ବିଦ୍ଯାଳୟ ଓ ଗଣଶିକ୍ଷାମନ୍ତ୍ରୀ। ତେବେ ଗୃହ ବାହାରେ ମିଶ୍ରଣର ଆବଶ୍ୟକତା ଥିବା ନେଇ ଓକିଲାତି ଗଣଶିକ୍ଷା ମନ୍ତ୍ରୀଙ୍କ ଦୋମୁହାଁ ନୀତି ସ୍ପଷ୍ଟ ହୋଇଛି ।
ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥା ନେଇ ବିଜେପି ବିଧାୟକ ବି ସରକାରଙ୍କୁ ଘେରିଛନ୍ତି। ଚିକିଟି ବିଧାୟକ ମନୋରଞ୍ଜନ ଦ୍ୟାନସାମନ୍ତରାୟଙ୍କ ଗୁରୁତର ଅଭିଯୋଗ। ଗୋଡିପଦର ଓ ବଳରାମପୁର ପଂଚାୟତରେ ସ୍କୁଲ ନଥିବାରୁ ସୀମାନ୍ତ ଆନ୍ଧ୍ରପ୍ରଦେଶକୁ ପଢିବାକୁ ଯାଉଛନ୍ତି ପିଲା। ବ୍ଲକ ଗ୍ରାଣ୍ଟ ଓ ଅନୁଦାନପ୍ରାପ୍ତ ସ୍କୁଲରେ ବି ଶିକ୍ଷକ ନାହାନ୍ତି। ତେବେ ଓଡ଼ିଆ ପିଲାଙ୍କ ଆନ୍ଧ୍ର ମୁହାଁ ପ୍ରସଙ୍ଗରେ ଉତ୍ତର ନ ଦେଇ ରଖିଥିଲେ ଦ୍ଵିତୀୟ ପ୍ରଶ୍ନର ଉତ୍ତର। ସ୍କୁଲ ମ୍ୟାନେଜମେଣ୍ଟ ଶିକ୍ଷକ ନିଯୁକ୍ତି କରୁଥିଲେ। ସରକାର କେବଳ ଅନୁଦାନ ଦେଉଥିଲେ। ଏବେ ଯେଉଁଠି ଶିକ୍ଷକ ନାହାନ୍ତି ଅତିଥି ଶିକ୍ଷକ ଜରିଆରେ ପଢା ଯାଉଛି ବୋଲି କହିଥିଲେ ମନ୍ତ୍ରୀ । ସରକାର ଯେତେ ମୌଖିକ ଭାବେ କହିଲେ ମଧ୍ୟ ଲିଖିତ ଭାବେ ମାନିଛନ୍ତି ଯେ ନବୀନ ପଟ୍ଟନାୟକଙ୍କ ସରକାର ସମୟରେ ଶିକ୍ଷାର ବିକାଶ ସହ ଡ୍ରପଆଉଟ କମିଛି। ପ୍ରାଥମିକ ସ୍ତରରେ ଡ୍ରପଆଉଟ ହାର ଶୂନ। ଉଚ୍ଚ ପ୍ରାଥମିକ ସ୍ତରରେ ୨ ପ୍ରତିଶତ, ଉଚ୍ଚ ମାଧ୍ୟମିକ ସ୍ତରରେ ୧୨.୮ ପ୍ରତିଶତ ଡ୍ରପ ଆଉଟ ହାର ରହିଛି। ଯାହା ଜାତୀୟ ହାର ତୁଳନାରେ ରାଜ୍ୟର ଡ୍ରପ ଆଉଟ ହାର କମ।
ବିଧାୟକଙ୍କ ଦରମା ବୃଦ୍ଧି ପାଇଁ ବିଧାନସଭାରେ ଶାସକ ଓ ବିରୋଧୀଙ୍କ ସ୍ବର ଏକ: କମିଟି ସୁପାରିଶକୁ କାର୍ଯ୍ୟକାରୀ କରିବାକୁ ଦାବି
ଭୁବନେଶ୍ବର: ବଢ଼ାଅ ବିଧାୟକଙ୍କ ଦରମା । ବିଧାନସଭାରେ ଶାସକ ଓ ବିରୋଧୀଙ୍କ ସ୍ବର ଏକ । ବିଧାୟକ କହିଲେ ଦରମା ଅଣ୍ଟୁନି । ବିଧାନସଭା କମିଟି ସୁପାରିଶକୁ କାର୍ଯ୍ୟକାରୀ କରିବାକୁ ଦାବି । ବଜାର ଦର ବୃଦ୍ଧି ପାଇଁ ଜୁନ ମାସରୁ ପିଛିଲା ଭାବେ ଲାଗୁ କରିବା ଦାବି । ସାଂସଦଙ୍କ ଦରମା ବୃଦ୍ଧି ହେବା ପରେ ବିଧାୟକ ଓ ପୂର୍ବତନ ବିଧାୟକଙ୍କ ପେନସନ୍ ଓ ଭତ୍ତା ବୃଦ୍ଧି କରିବାକୁ ବିଧାନସଭାରେ ଉଠିଲା ସ୍ବର । ଶୂନ୍ୟକାଳରେ ଏକ ହୋଇଛି ଶାସକ ଓ ବିରୋଧୀଙ୍କ ସ୍ବର। ବିରୋଧୀ ଦଳ ମୁଖ୍ୟ ସଚେତକ ଏହି ପ୍ରସଙ୍ଗ ଉଠାଇ କହିଛନ୍ତି ଯେ, ବର୍ତ୍ତମାନ ବଜାର ଦର ବଢ଼ିଛି। ପେନସନ ବଢ଼ାଇବାକୁ ଦାବି କରୁଛନ୍ତି ଅନେକ ପୂର୍ବତନ ବିଧାୟକ। ପେନସନ ବାବଦକୁ ଯେତିକି ଟଙ୍କା ମିଳୁଛି, ତାହା ମେଡିସିନ ଖର୍ଚ୍ଚ ହେଉ କି ବଜାର ଦର ଆଗରେ ଯଥେଷ୍ଟ ନୁହେଁ। ବିଜେପି ବିଧାୟକ ଭାସ୍କର ମଢେଇଙ୍କ ଅଧ୍ୟକ୍ଷତାରେ ଗଠନ ହୋଇଥିବା କମିଟି ସରକାରଙ୍କୁ ଦରମା ବୃଦ୍ଧି ପାଇଁ ସୁପାରିଶ କରିଛି। ତେଣୁ ସେହି ସୁପାରିଶକୁ କାର୍ଯ୍ୟକାରୀ କରିବାକୁ ବାଚସ୍ପତି ସରକାରଙ୍କୁ ନିର୍ଦ୍ଦେଶ ଦିଅନ୍ତୁ ବୋଲି ଦାବି କରିଛନ୍ତି ପ୍ରମିଳା ମଲ୍ଲିକ। ସେହିପରି ପୂର୍ବତନ ବିଧାୟକ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ସରକାରୀ କର୍ମଚାରୀଙ୍କ ପାଇଁ ବେତନ କମିଶନ ଅଛି, କିନ୍ତୁ ବିଧାୟକଙ୍କ ପାଇଁ କିଛି ନାହିଁ। ତେଣୁ ଜୁନ ମାସରୁ ପିଛିଲା ଭାବେ ଦରମା ବୃଦ୍ଧି କରିବାକୁ ଦାବି କରିଛନ୍ତି ବିଜେପି ବିଧାୟକ ପୂର୍ଣ୍ଣଚନ୍ଦ୍ର ସେଠୀ। ସେହିପରି ବରିଷ୍ଠ ବିଧାୟକ ଜୟ ନାରାୟଣ ମିଶ୍ର ମଧ୍ୟ ଦରମା ବୃଦ୍ଧି ସପକ୍ଷରେ ଯୁକ୍ତି ବାଢିଛନ୍ତି।
ବର୍ତ୍ତମାନ ରାଜ୍ୟର ବିଧାୟକଙ୍କୁ ଦରମା ବାବଦରେ ୩୫ ହଜାର ଟଙ୍କା ଓ ବିଭିନ୍ନ ଭତ୍ତା ବାବଦକୁ ୬୫ ହଜାର ଟଙ୍କା ମିଳୁଛି। ଯେଉଁଥିରେ କନଭିନିଏନ୍ସ ବାବଦକୁ ୧୫ ହଜାର, ମେଡିକାଲ ପାଇଁ ୫ ହଜାର, ଟେଲିଫୋନ ବାବଦକୁ ୮ ହଜାର ଟଙ୍କା ପ୍ରଦାନ କରାଯାଉଛି। ବିଧାୟକଙ୍କ ଦରମା ବୃଦ୍ଧି କରିବାକୁ ପୂର୍ବରୁ ରାଜ୍ୟ ସରକାରଙ୍କୁ ସୁପାରିଶ କରି ସାରିଛି ବିଧାନସଭା ଦ୍ବାରା ଗଠିତ କମିଟି। ଯାହା କି ସରକାରଙ୍କ ବିଚାରାଧୀନ ରହିଛି। ପୂର୍ବ ଅଧିବେଶନରେ ମଧ୍ୟ ବିଧାୟକଙ୍କ ପେନସନ ଓ ଭତ୍ତା ବୃଦ୍ଧି ନେଇ ଗୃହରେ ଉଭୟ ଶାସକ ଓ ବିରୋଧୀଙ୍କ ସ୍ବର ଏକ ହୋଇଥିଲା। ଦେଶର ଅନେକ ରାଜ୍ୟ ତୁଳନାରେ ଓଡ଼ିଶାର ବିଧାୟକଙ୍କ ଦରମା ସବୁଠୁ କମ୍ । ରାଜ୍ୟର ବିଧାୟକଙ୍କ ଦରମା ୨୭ ନମ୍ବରରେ ରହିଛି। ୨୦୧୭ରେ ଶେଷ ଥର ପାଇଁ ବଢିଥିଲା ବିଧାୟକଙ୍କ ଦରମା ।
ପାଟୀଦାରଙ୍କ ଅର୍ଦ୍ଧଶତକ ବଳରେ ଚେନ୍ନାଇକୁ ୧୯୭ ରନର ଟାର୍ଗେଟ ଦେଲା ବେଙ୍ଗାଲୁରୁ
ଚେନ୍ନାଇ: ଆଜି ଆଇପିଏଲରେ ଦୁଇ ଅନ୍ୟତମ ଶକ୍ତିଶାଳୀ ଟିମ ବେଙ୍ଗାଲୁରୁ ଓ ଚେନ୍ନାଇ ମଧ୍ୟରେ କଡ଼ା ମୁକାବିଲା ଚାଲିଛି । ପ୍ରଥମେ ବ୍ୟାଟିଂ କରି ଆରସିବି ଅଧିନାୟକ ରଜତ ପାଟୀଦାରଙ୍କ ଅର୍ଦ୍ଧଶତକୀୟ ଇନିଂସ ବଳରେ ୭ ଓ୍ବିକେଟ ହରାଇ ୧୯୬ ରନ୍ ସଂଗ୍ରହ କରିଛି । ଅନ୍ୟମାନଙ୍କ ମଧ୍ୟରେ ଫିଲିପ ସଲ୍ଟ ୩୨, ବିରାଟ କୋହଲି ୩୧ ରନ୍ ସଂଗ୍ରହ କରିଥିଲା । ଟିମ୍ ଡେଭିଡ ୮ଟି ବଲରୁ ୨୨ ରନ୍ ସଂଗ୍ରହ କରିଥିବା ବେଳେ ଦେବତତ୍ତ ପାଡିକଲ ୧୪ଟି ବଲରୁ ୨୭ ରନ୍ ସଂଗ୍ରହ କରିଥିଲେ । ଦଳର ପ୍ରାରମ୍ଭିକ ବ୍ୟାଟିଂ ଭଲ ରହିବା ଫଳରେ ଦଳ ଏକ ବଡ଼ ସ୍କୋର କରିବାକୁ ସକ୍ଷମ ହୋଇଥିଲା । ଅନ୍ୟପକ୍ଷରେ ଚେନ୍ନାଇ ପକ୍ଷରୁ ନୁର ଅହମଦ ସର୍ବାଧିକ ୩ଟି ଓ୍ବିକେଟ ହାସଲ କରିଥିବା ବେଳେ ମାଥିଶା ପାଥିରଣା ୨ଟି, ଖଲିଲ ଅହମଦ ୨ଟି ଓ ରବିଚନ୍ଦ୍ରନ ଅଶ୍ବିନ ୧ଟି ଓ୍ବିକେଟ ଅକ୍ତିଆର କରିଥିଲେ ।