କଟକ: ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀଙ୍କୁ ହାଇକୋର୍ଟଙ୍କ ଝଟକା । ଝାରସୁଗୁଡା ବିଧାନସଭା ନିର୍ବାଚନ ମାମଲାରେ ଲାଗିଛି ଶକ୍ତ ଧକ୍କା । ବିଧାୟକ ଟଙ୍କଧର ତ୍ରିପାଠୀଙ୍କ ବିରୋଧରେ ମାମଲା ଚାଲିବ ବୋଲି କହିଛନ୍ତି ହାଇକୋର୍ଟ । ବିନା ଶୁଣାଣିରେ ମାମଲା ଖାରଜ କରିବାକୁ ଟଙ୍କଧର ଆବେଦନ କରିଥିଲେ ଯାହାକୁ ହାଇକୋର୍ଟ ଖାରଜ କରିଦେଇଛନ୍ତି । ଟଙ୍କଧରଙ୍କ ବିରୋଧରେ ଅପରାଧିକ ମାମଲା ପ୍ରସଙ୍ଗରେ ସତ୍ୟପାଠ ଦାଖଲ କରିବାକୁ ଦୀପାଳି ଦାସଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଅପରାଧିକ ମାମଲା ସମ୍ପର୍କରେ ତଥ୍ୟ ଲୁଚାଇବା ଅସାଧୁ ଉପାୟ ବୋଲି ହାଇକୋର୍ଟ କହିବା ସହିତ ଆସନ୍ତା ୨୪ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ ବୋଲି କହିଛନ୍ତି ।
ଡିଭୋର୍ସ ମାମଲାରେ ଗୁଜୁରାଣ ଅର୍ଥ କିପରି ନିର୍ଦ୍ଧାରଣ କରାଯାଏ: କେଉଁ ସ୍ଥିତିରେ ପୁରୁଷ ପାଇଥାନ୍ତି ଏଲିମନୀ?
କ୍ରିକେଟର ୟୁଜବେନ୍ଦ୍ର ଚହଲ ଓ ଧନଶ୍ରୀ ବର୍ମାଙ୍କ ତଲାକ ହୋଇଯାଇଛି । ଗତକାଲି ଦୁହେଁ ବାନ୍ଦାର ଫ୍ୟାମିଲି କୋର୍ଟରେ ପହଞ୍ଚିଥିଲେ ଓ ଦୁହିଁଙ୍କ ତଲାକ ହୋଇଥିବା ନେଇ ଓକିଲ ସୂଚନା ଦେଇଥିଲେ । ତଲାକ ଉପରେ ରହିଥିବା ସହମତି ସର୍ତ୍ତ ମୁତାବକ, ଚହଲ ନିଜର କୋରିଓଗ୍ରାଫର ପତ୍ନୀ ଧନଶ୍ରୀଙ୍କୁ ୪.୭୫ କୋଟି ଟଙ୍କା ଏଲିମନୀ ଦେବେ । ବର୍ତ୍ତମାନ ସୁଦ୍ଧା ଚହଲ ୨ କାଟି ୩୭ ଲକ୍ଷ ଓ ୫୫ ହଜାର ଟଙ୍କା ଦେଇ ସାରିଛନ୍ତି । ଆଗକୁ ସେ ଅବଶିଷ୍ଟ ଅର୍ଥ ଧନଶ୍ରୀଙ୍କୁ ପ୍ରଦାନ କରିବେ । ଦେଶର ଏଭଳି କିଛି ତଲାକ ମାମଲା ଦେଖିବାକୁ ମିଳିଛି, ଯେଉଁ କ୍ଷେତ୍ରରେ ପତିଙ୍କୁ ଏଲିମନୀ ଭାବେ ବଡ଼ ରାଶି ଦେବାକୁ ପଡ଼ିଛି । ଏପରି ସ୍ଥିତିରେ ତଲାକ ମାମଲାରେ ଏଲିମନୀ ବା ଗୁଜୁରାଣ ଭତ୍ତା କିପରି ଧାର୍ଯ୍ୟ ହୋଇଥାଏ, ସେନେଇ ପ୍ରଶ୍ନ ଉଠିବା ସ୍ବାଭାବିକ ।
ସୁପ୍ରିମକୋର୍ଟର ଜଣେ ଆଇନଜୀବୀଙ୍କ ମୁତାବକ, ଭାରତୀୟ ଆଇନରେ ତଲାକ ମାମଲାରେ ଗୁଜୁରାଣ ଭତ୍ତା ଦେବାର କୌଣସି ଫିକ୍ସ ଫର୍ମୂଲା ନାହିଁ । ଗୁଜୁରାଣ ଭତ୍ତା ସ୍ଥିର କରିବା ନେଇ କିଛି ଦିଗ ପ୍ରତି ଧ୍ୟାନ ଦିଆଯାଇଥାଏ, ସେହି ଆଧାରରେ କୋର୍ଟ ଏକ ରାଶି ସ୍ଥିର କରିଥାନ୍ତି । ଗୁଜୁରାଣ ଭତ୍ତା ସ୍ଥିର କରିବା ସମୟରେ ପତି-ପତ୍ନୀଙ୍କ ଆର୍ଥିକ ସ୍ଥିତି, ରୋଜଗାରର କ୍ଷମତା ଆଦି ଫ୍ୟାକ୍ଟର୍ସ ଉପରେ ବିଚାର କରାଯାଇଥାଏ । ଯଦି ଜଣେ ମହିଳା ୧୦ ବର୍ଷ ଧରି ଗୃହିଣୀ ଅଛନ୍ତି ଓ ସେ ତାଙ୍କ ପତିଙ୍କୁ ତଲାକ ଦିଅନ୍ତି, ତେବେ ଏଲିମନୀ ସ୍ଥିର କରିବା ସମୟରେ କୋର୍ଟ ପତିଙ୍କ ଆୟକୁ ଧ୍ୟାନରେ ରଖିଥାନ୍ତି । ମହିଳା ଜଣଙ୍କ କେବଳ ଗୃହିଣୀ ଓ ସନ୍ତାନ-ପରିବାରର ଦେଖାଶୁଣା କରିବା ପାଇଁ ଚାକିରି ନକରି ନିଜର କ୍ୟାରିୟରକୁ ତ୍ୟାଗ କରିଥିଲେ । ସେଥିପାଇଁ ସାମାନ୍ୟ ଜୀବନ ଚଳିବା ଭଳି ଏଲିମନୀ ସ୍ଥିର କରାଯାଇଥାଏ ।
ଯଦି ପତି-ପତ୍ନୀ ମାସକୁ ୫୦-୫୦ ହଜାର ରୋଜଗାର କରିଥାନ୍ତି, ତେବେ ଗୁଜୁରାଟ ଭତ୍ତା ଦେବାର ଆଦେଶ ଦେବା ଜରୁରୀ ହୋଇନଥାଏ । ଯିଏ ପିଲାଙ୍କୁ ସମ୍ଭାଳିବେ, ତାଙ୍କୁ ଆର୍ଥିକ ସହାୟତା ଦେବାକୁ କୋର୍ଟ କହିଥାନ୍ତି । ବିବାହ ସମୟରେ କେଉଁ ପ୍ରକାରର ଜୀବନ ସ୍ତର ରହିଥିଲା, ପାରିବାରିକ ଦାୟିତ୍ବ ବହନ କରିବା ପାଇଁ ମହିଳା କ’ଣ ତ୍ୟାଗ କରିଥିଲେ ତାହାକୁ ଧ୍ୟାନରେ ରଖାଯାଇଥାଏ । ଗୁଜୁରାଣ ଭତ୍ତା ଆଶ୍ରିତ ପତି ବା ପତ୍ନୀଙ୍କ ସହାୟତା ପାଇଁ ପ୍ରଯୁଜ୍ୟ ଅଟେ, ଦ୍ବିତୀୟ ପକ୍ଷଙ୍କୁ ଦଣ୍ଡିତ କରିବା ପାଇଁ ନୁହେଁ ବୋଲି କୋର୍ଟ ପୂର୍ବରୁ କହିସାରିଛନ୍ତି । ତଲାକର ଅଧିକାଂଶ ମାମଲାରେ ଭାରତୀୟ ଆଇନରେ ପୁରୁଷଙ୍କୁ ଏଲିମନୀ ଦେବାକୁ ପଡ଼ିଥାଏ । ତେବେ ହିନ୍ଦୁ ବିବାହ ଅଧିନିୟମ, ୧୯୫୫ର ଧାରା ୨୪ ଓ ୨୫ ଅନୁସାରେ ପତି ଗୁଜୁରାଣ ଭତ୍ତା ମାଗି ପାରିବେ । ବିକଳାଙ୍ଗତା ବା ଅନ୍ୟ କୌଣସି କାର୍ଯ୍ୟ କରିବାକୁ ଅକ୍ଷମତା ସ୍ଥିତିରେ ପତ୍ନୀଙ୍କୁ ଏଲିମନୀ ଦେବାକୁ ପଡ଼ିପାରେ ।
ବନ୍ଧା ହେଲେ ସରପଞ୍ଚ: ୩୦ ଲକ୍ଷ ଟଙ୍କା ସମ୍ପୂର୍ଣ୍ଣ ଚଳୁ କରିଦେଇଥିବା ଅଭିଯୋଗ
କାମାକ୍ଷାନଗର: ବନ୍ଧା ହେଲେ ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ କଙ୍କିଳି ପଞ୍ଚାୟତର ସରପଞ୍ଚ ମକର ଚାନ୍ଦ ସାହୁ। ସିଏଫସି ଫଣ୍ଡ ଟଙ୍କା ହଡପ ଅଭିଯୋଗରେ ବାନ୍ଧିଛି ପୋଲିସ। ୭ଟି ଚେକରେ ୩୦ ଲକ୍ଷ ଟଙ୍କା ସମ୍ପୂର୍ଣ୍ଣ ଚଳୁ କରିଥିବା ଅଭିଯୋଗରେ ସେ ଗିରଫ ହୋଇଛନ୍ତି। ଏ ନେଇ ପଞ୍ଚାୟତର ନିର୍ବାହୀ ଅଧିକାରୀ ପ୍ରତାପ ଚନ୍ଦ୍ର ସାମଲଙ୍କ ଅଭିଯୋଗ ଆଧାରରେ ପରଜଙ୍ଗ ବିଡ଼ିଓ ସୌଭାଗ୍ୟ କୁମାର ବେହେରା ଏକ ଟିମ ଗଠନ କରି ତଦନ୍ତ କରିଥିଲେ । ଯାହାକୁ ନେଇ ପଞ୍ଚାୟତିରାଜ ବିଭାଗ ପକ୍ଷରୁ ଆକ୍ସନ ନିଆଯାଇଛି। ବିନା କାମରେ, ବିନା ଦସ୍ତାବିଜରେ ମନଇଚ୍ଛା ଟଙ୍କା ଉଠାଇବା ଏବଂ ଏ ନେଇ ନୂତନ ଭାବେ ନିଯୁକ୍ତ ନିର୍ବାହୀ ଅଧିକାରୀଙ୍କୁ କୌଣସି ତଥ୍ୟ କିମ୍ବା ହିସାବ ନଦେବା ସନ୍ଦେହ ସୃଷ୍ଟି କରିଥିଲା। ଯାହାକୁ ନେଇ ନିର୍ବାହୀ ଅଧିକାରୀ ପ୍ରତାପ ଚନ୍ଦ୍ର ସାମଲ ବିଡ଼ିଓଙ୍କ ଦୃଷ୍ଟି ଆକର୍ଷଣ କରିଥିଲେ।
ବଢ଼ିବାରେ ଲାଗିଛି ଟାଟା ପାୱାରର ଅତ୍ୟାଚାର: ଲୋକଙ୍କ ସୁବିଧା ପାଇଁ ଆନ୍ଦୋଳନରେ ସାମିଲ ହେଲା ବିଜେଡି
ଭୁବନେଶ୍ବର: ଟାଟା ପାୱାର ବିରୋଧରେ ଆନ୍ଦୋଳନ। ଓଡ଼ିଶା ବିଦ୍ୟୁତ ଉପଭୋକ୍ତା ମହାସଂଘ ଲୋୟର ପିଏମଜିରେ ସର୍ବଦଳୀୟ ଜନ ଆନ୍ଦୋଳନ କରିଛି । ଏଥିରେ ବିଜେଡି ମଧ୍ୟ ଯୋଗଦେଇଛି। ଟାଟା ପାୱାର ପାଇଁ ଦିନକୁ ଦିନ ଲୋକଙ୍କ ସମସ୍ୟା ବଢୁଛି । ଚୁକ୍ତିରେ ଯାହା ଥିଲା ତାର ଓଲଟା କାର୍ଯ୍ୟ କରୁଛି ଟାଟା ପାୱାର । ଲୋକଙ୍କୁ ନ ଜଣାଇ ବିଦ୍ୟୁତ ସେବା କାଟି ଦେଉଛି। ଘର ଭିତରେ ପଶି ଟାଟା ପାୱାର କମ୍ପାନୀର କର୍ମଚାରୀ ଫାଇନ୍ ଆଦାୟ କରୁଛନ୍ତି । ଜୋର ଜବରଦସ୍ତି ସ୍ମାର୍ଟ୍ ମିଟର ବସାଉଛନ୍ତି । ସାଧାରଣ ମିଟର ଠାରୁ ସ୍ମାର୍ଟ୍ ମିଟରରେ ଅଧିକ ବିଲ୍ ଆସୁଛି । ଶୀଘ୍ର ଲାଗୁ କରିବାକୁ ଯାଉଥିବା ପ୍ରିପେଡ ବ୍ୟବସ୍ଥାକୁ ମଧ୍ୟ ବିରୋଧ କରିଛି ବିଜେଡି। । ସ୍ମାର୍ଟ୍ ମିଟର ବର୍ଜନ, ୩୦୦ ୟୁନିଟ୍ ମାଗଣା ବିଦ୍ୟୁତ ଯୋଗାଇବା, ବିଦ୍ୟୁତ ଦରବୃଦ୍ଧିକୁ ହ୍ରାସ କରିବା ଆଦି ଦାବିରେ ଲଢେଇ ହେବ । ୩୦୦ ୟୁନିଟ୍ ମାଗଣା ଦେବାକୁ ବିଜେପି ସରକାର ପ୍ରତିଶ୍ରୁତି ଦେଇ ଭୋଟ ନେଇଥିଲେ । ଏହା ଭିତରେ ଦୁଇଟି ବିଧାନସଭା ଅଧିବେଶନ ଗଲାଣି । ଏପର୍ଯ୍ୟନ୍ତ ୩୦୦ ୟୁନିଟ୍ ମାଗଣା ଦେଲେ ନାହିଁ । କୃଷି କ୍ଷେତ୍ରକୁ ମାଗଣା ବିଦ୍ୟୁତ ଯୋଗାଇବା ଦେବାର ପ୍ରତିଶ୍ରୁତି ଦେଇଥିଲେ । ଟାଟା ପାୱାର ଏକ ପାଖିଆ ଭାବେ ଉପଭୋକ୍ତାଙ୍କୁ ଭାରାକ୍ରାନ୍ତ କରୁଛି ।
କର୍ଣ୍ଣାଟକ ମନ୍ତ୍ରୀଙ୍କ ବିସ୍ଫୋରକ ବୟାନ: ରାଜ୍ୟର ୪୮ ରାଜନେତା ହନିଟ୍ରାପର ଶିକାର
କର୍ଣ୍ଣାଟକ ମନ୍ତ୍ରୀଙ୍କ ବିସ୍ଫୋରକ ବୟାନ। ରାଜ୍ୟର ୪୮ ରାଜନେତା ହନିଟ୍ରାପର ଶିକାର। କେବଳ ରାଜ୍ୟର ନୁହେଁ, କେତେକ କେନ୍ଦ୍ରୀୟ ନେତା ବି ହନିଟ୍ରାପରେ ଫସିଥିବା କହିଛନ୍ତି ସମବାୟ ମନ୍ତ୍ରୀ କେ.ଏନ. ରାଜାନ୍ନା। ମନ୍ତ୍ରୀଙ୍କ ଏହି ବୟାନ ପରେ ସାରା ରାଜ୍ୟରେ ଝଡ଼ ସୃଷ୍ଟି ହୋଇଛି। ଗତକାଲି ବିଧାନସଭାରେ ମନ୍ତ୍ରୀ ଏହି ବିବୃତି ଦେବା ପରେ ରାଜନୈତିକ ହଟଚମଟ ସୃଷ୍ଟି ହୋଇଛି। ଏହାର ଏକ ଉଚ୍ଚସ୍ତରୀୟ ତଦନ୍ତ ବି ଦାବି ହୋଇଛି। ସେ ଆହୁରି କହିଛନ୍ତି- ରାଜ୍ୟର ଦୁଇ ଜଣ ପ୍ରତିପତ୍ତିଶାଳୀ ମନ୍ତ୍ରୀ ହନିଟ୍ରାପର ଶିକାର ହୋଇଛନ୍ତି। ଏପରିକି ସେ ନିଜେ ଓ ଅନ୍ୟ ଜଣେ ମନ୍ତ୍ରୀ ଜି. ପରମେଶ୍ବର ବି ଏହାର ଶିକାର ହୋଇଛନ୍ତି ବୋଲି ସେ କହିଛନ୍ତି। ଏପ୍ରସଙ୍ଗରେ ସେ ଗୃହମନ୍ତ୍ରୀଙ୍କୁ ଲିଖିତ ଭାବେ ଜଣାଇବେ। ଏସବୁ ସ୍କାଣ୍ଡାଲରେ କେଉଁମାନେ ପ୍ରଚ୍ଛଦରେ ରହିଛନ୍ତି ତାହାର ଦଦନ୍ତ ହେବା ଦରକାର ବୋଲି ସେ କହିଛନ୍ତି। ସେପଟେ ରାଜାନ୍ନାଙ୍କ ପୁଅ ତଥା ଏମଏଲସି ସଦସ୍ୟ ରାଜେନ୍ଦ୍ର ବି ଉଠାଇଛନ୍ତି ସମାନ ଅଭିଯୋଗ। ଗତ ୬ ମାସ ଧରି ରାଜ୍ୟରେ ହନିଟ୍ରାପ ଲାଗି ଉଦ୍ୟମ ହେଉଛି ବୋଲି ସେ କହିଛନ୍ତି। ସେହିପରି କର୍ଣ୍ଣାଟକ ପୂର୍ତ୍ତ ମନ୍ତ୍ରୀ ସତୀ ଜାରିକହୋଲି ବି ସମାନ ଅଭିଯୋଗ କରିଛନ୍ତି।
ବିଧାନସଭାରେ ଏମିତି କ’ଣ ଗୁପ୍ତ କଥା ଚାଲିଛି ଯେ ତାହା ସାଧାରଣ ଲୋକେ ଦେଖିପାରିବେନି: ଅରୁଣ ସାହୁ
ଭୁବନେଶ୍ବର: ଆଜି ବିଧାନସଭା ଅଧିବେଶନରେ ବିରୋଧୀଙ୍କ ତରଫରୁ ହଟ୍ଟେଗାଳ କରାଯାଇଥିଲା । ନାରୀ ନିର୍ଯାତନା, ନାବାଳିକ ଗର୍ଭବତୀ ପ୍ରସଙ୍ଗରେ ବିଧାନସଭାରେ ପ୍ରବଳ ହଟ୍ଟଗୋଳ କରିଥିଲେ ବିରୋଧୀ ବିଜେଡି ଓ କଂଗ୍ରେସ । ଘଣ୍ଟ, ସାହାନାଇ, ବଂଶୀ ବଜାଇ ବିରୋଧୀଙ୍କ ପ୍ରତିବାଦ ଦେଖିବାକୁ ମିଳିଥିଲା । ସରକାରଙ୍କ ଏକଛତ୍ରବାଦୀ ନୀତିକୁ ବିରୋଧ କରିଥିଲେ ବିରୋଧୀ । କଂଗ୍ରେସ ବିଧାୟକମାନେ କଳାପୋଷାକ ପିନ୍ଧି ପ୍ରତିବାଦ କରିଥିଲେ । ବିରୋଧୀଙ୍କ ସ୍ବର ଚାପିଦେବା ଲାଗି ଉଦ୍ୟମକୁ ବିରୋଧ କରାଯିବା ସହ ବିଧାନସଭାରେ ସରକାରଙ୍କୁ ଘେରିଥିଲେ ବିରୋଧୀ । ଗୃହରେ ଗଣମାଧ୍ୟମର କଣ୍ଠରୋଧ କରାଯାଉଛି ଓ ଗଣମାଧ୍ୟମ ପ୍ରତିନିଧିଙ୍କ ମୋବାଇଲ ବାରଣକୁ ତୀବ୍ର ବିରୋଧ କରାଯାଇଥିଲା । ସରକାର ଏକଛତ୍ରବାଦ ଓ ଅଗଣତାନ୍ତ୍ରିକ ଶାସନ ଚଳାଇଛନ୍ତି ବୋଲି ବିରୋଧୀ କହିଥିଲେ ।
ଆଜି ବିଧାନସଭା ଆରମ୍ଭରୁ ବିରୋଧୀଙ୍କ ହଟ୍ଟେଗାଳ ଦେଖିବାୁ ମିଳିଥିଲା । ଗୃହରେ ବିରୋଧୀଙ୍କ ପକ୍ଷରୁ ହଟ୍ଟେଗାଳ କରାଯିବାରୁ ବାଚସ୍ପତି ଗୃହକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ମୁଲତବୀ ରଖିଥିଲେ । ବିଜେଡି ସଦସ୍ୟମାେନ ବିଧାନସଭା ଗୃହର ମଧ୍ୟଭାଗକୁ ଆସି ପ୍ରତିବାଦ ରିଥିଲେ । ଲାଇଭ୍ ଭିଜୁଆଲ ନ ଦିଆଯିବା ଅଭିଯୋଗରେର ପ୍ରତିବାଦ କରିଥିଲା ବିଜେଡି । ଗତ କିଛି ଦିନ ହେଲା ବିଧାନସଭାରେ ବିରୋଧୀଙ୍କ ଭିଜୁଆଲ ବାରଣ କରାଯାଉଛି । କିଛି ଦିନ ତଳେ ଗଣମାଧ୍ୟମର ମୋବାଇଲ ବାରଣ କରାଯାଇଥିଲା । କଣ ଏମିତି ଗୁପ୍ତ କାମ ଚାଲିଛି ଯେ ଭିଡିଓ ଦେଖା ଯାଉନି । ଆମ ଅଞ୍ଚଳ ଲୋକ ଜାଣି ପାରୁ ନାହାନ୍ତି ଆମ କାର୍ଯ୍ୟକ୍ରମ । କେବଳ ସରକାରୀ ଦଳ ବିଧାୟକ ଓ ମନ୍ତ୍ରୀଙ୍କ ଭିଜୁଆଲ ଦେଖାଯାଉଛି । ଏହା ଅଗଣତାନ୍ତ୍ରିକ, ଏକଛତ୍ରବାଦ ବୋଲି କହିଥିଲେ ବିଜେଡି ବିଧାୟକ ଅରୁଣ ସାହୁ ।
ଚଳିତ IPLର ପ୍ରଥମ ମ୍ୟାଚ ବାତିଲ ହେବ? ସାମ୍ନାକୁ ଆସିଲା ଏକ ବଡ଼ ସଙ୍କଟ
କୋଲକତା: ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ର ଚଳିତ ସିଜିନ ଆସନ୍ତା ୨୨ ତାରିଖରୁ ଆରମ୍ଭ ହେବ । ପ୍ରଥମ ମ୍ୟାଚରେ ଚାମ୍ପିୟନ କୋଲକତା ନାଇଟ ରାଇଡର୍ସକୁ କଡ଼ା ଟକ୍କର ଦେବା ପାଇଁ ପ୍ରସ୍ତୁତି ଚଳାଇଛି ରୟାଲ ଚାଲେଞ୍ଜର୍ସ ବେଙ୍ଗାଲୁରୁ । ଓପନିଂ ସେରିମନୀ ପାଇଁ ସମସ୍ତ କାର୍ଯ୍ୟକ୍ରମ ସ୍ଥିରୀକୃତ ହୋଇସାରିଛି । ଏହି କାର୍ଯ୍ୟକ୍ରମରେ ବଲିଉଡ ଅଭିନେତ୍ରୀ ଦିଶା ପଟାନୀ ଓ ଶ୍ରେୟସ ଘୋଷାଲଙ୍କ ପରି କଳାକାରମାନେ ଦର୍ଶକଙ୍କୁ ମନୋରଞ୍ଜନ କରାଇବେ । ତେବେ ଆଇପିଏଲର ଉଦଘାଟନୀ ମ୍ୟାଚ ପାଇଁ ମାତ୍ର ଗୋଟିଏ ଦିନରୁ କମ୍ ସମୟ ଥିବାବେଳେ ଏହା ମଧ୍ୟରେ ସାମ୍ନାକୁ ଆସିଛି ଏକ ବଡ଼ ଖବର । ଏହି ସିଜିନର ପ୍ରଥମ ମ୍ୟାଚ ସମ୍ପୂର୍ଣ୍ଣ ଭାବେ ରଦ୍ଦ ହେବାର ଆଶଙ୍କା ଦେଖାଯାଇଛି । କାରଣ ମୌସୁମୀ ବିଭାଗ ପକ୍ଷରୁ ଅରେଞ୍ଜ ଆଲର୍ଟ ଜାରି କରାଯାଇଛି ।
ଭାରତୀୟ ମୌସୁମୀ ବିଭାଗ (IMD) ଗୁରୁବାର ଠାରୁ ରବିବାର ପର୍ଯ୍ୟନ୍ତ ଦକ୍ଷିଣ ବଙ୍ଗରେ ଝଡ଼ ଓ ବର୍ଷାର ଭବିଷ୍ୟବାଣୀ କରିଛି । ଆଇପିଏଲ ୨୦୨୫ର ପ୍ରଥମ ଦିନ ୨୨ ମାର୍ଚ୍ଚ ପାଇଁ ଅରେଞ୍ଜ ଆଲର୍ଟ ମଧ୍ୟ ଜାରି କରାଯାଇଛି । ରବିବାର ପାଇଁ ୟେଲୋ ଆଲର୍ଟ ଜାରି କରାଯାଇଛି । ଏକ ରିପୋର୍ଟ ମୁତାବକ, ଶନିବାର ଦିନ କୋଲକତାରେ ବର୍ଷାର ସମ୍ଭାବନା ୭୪ ପ୍ରତିଶତ ରହିଛି । ସେହିପରି ବାଦଲ ଛାଇ ରହିବାର ସମ୍ଭାବନା ୯୭ ପ୍ରତିଶତ ରହିଛି । ସନ୍ଧ୍ୟାରେ ବର୍ଷା ହେବାର ସମ୍ଭାବନା ୯୦ ପ୍ରତିଶତ ପର୍ଯ୍ୟନ୍ତ ରହିଛି । ସେଥିପାଇର୍ ୧୮ତମ ସଂସ୍କରଣର ପ୍ରଥମ ମ୍ୟାଚ ସମୟରେ ଇଡେନ ଗାର୍ଡନ୍ସରେ ଖୁବ୍ ବର୍ଷା ହେବ । ତେଣୁ କୋଲକତା ଓ ବେଙ୍ଗାଲୁରୁ ପର୍ଯ୍ୟପ୍ତ ଓଭର ଖେଳିପାରିବେ କି ନା ତାହା କହିବା ଏବେ ମୁସ୍କିଲ ହୋଇପଡ଼ିଛି ।
UPS ନୋଟିଫିକେସନ ଜାରି: ଏପ୍ରିଲ ପହିଲାରୁ ଆରମ୍ଭ ହେବ ଆବେଦନ, କ’ଣ ରହିଛି ପ୍ରକ୍ରିୟା?
ନୂଆଦିଲ୍ଲୀ: କେନ୍ଦ୍ର କର୍ମଚାରୀଙ୍କୁ ଗ୍ୟାରେଣ୍ଟି ପେନସନ ଦେବା ପାଇଁ ଏକୀକୃତ ପେନସନ ଯୋଜନା (UPS)ର ଘୋଷଣା କରାଯାଇଥିଲା । ଆସନ୍ତା ମାସ ପହିଲାରୁ ଏଥିପାଇଁ ଆବେଦନ ଆରମ୍ଭ ହେବ । ବର୍ତ୍ତମାନର ଓ ନୂଆ ଭର୍ତ୍ତି ହେବାକୁ ଥିବା କର୍ମଚାରୀମାନେନ ଏହି ଯୋଜନାରେ ସାମିଲ ହେବା ପାଇଁ ଆବେଦନ କରିପାରିବେ । ପେନପସନ ଫଣ୍ଡ ନିୟାମକ ଓ ବିକାଶ ପ୍ରାଧିକରଣ (PFRDA) ଏନେଇ ନୋଟିଫିକେସନ ଜାରି କରିଛି । କେନ୍ଦ୍ର କର୍ମଚାରୀମାନେ ଏପ୍ରିଲ ୧ରୁ ପୋର୍ଟାଲରେ ଆବେଦନ କରିପାରିବେ । ଯଦି କର୍ମଚାରୀ ୟୁପିଏସ ଅଧିନରେ ପେନସନ ପାଇବାକୁ ଚାହାନ୍ତି, ତେବେ ତାଙ୍କୁ ୟୁପିଏସର ଅପ୍ସନ ସିଲେକ୍ଟ କରି କ୍ଲେମ ଫର୍ମ ଭରିବାକୁ ପଡ଼ିବ । ଯଦି ସେ ୟୁପିଏସର ଚୟନ କରିବାକୁ ଚାହାନ୍ତି ନାହିଁ, ତେବେ ଏନପିଏସର ବିକଳ୍ପ ବାଛି ପାରିବେ । ୨୩ ଲକ୍ଷ କେନ୍ଦ୍ର କର୍ମଚାରୀଙ୍କୁ ୟୁପିଏସ ଓ ଏନପିଏସ ମଧ୍ୟରୁ କୌଣସି ଗୋଟିଏ ବିକଳ୍ପ ବାଛିବାକୁ ପଡ଼ିବ । ୟୁପିଏସ ଅଧୀନରେ ସର୍ବନିମ୍ନ ପେନସନ ପ୍ରତି ମାସରେ ୧୦ ହଜାର ଟଙ୍କା ହେବ, ଯାହା ୟୁପିଏସ ଦ୍ବାରା ସର୍ବନିମ୍ନ ୧୦ ବର୍ଷର ସେବାକୁ ପୂରା କରିବା ପରେ ଦିଆଯିବ । https://npscra.nsdl.co.in ଓ୍ବେବସାଇଟକୁ ଯାଇ ସବୁ ବର୍ଗର କର୍ମଚାରୀମାନେ ଆବେଦନ କରିପାରିବେ ।
କେଉଁମାନେ UPS ପାଇଁ ଆବେଦନ କରିପାରିବେ?
- ୨୦୨୫ ମସିହା ଏପ୍ରିଲ ୧ ତାରିଖ ସୁଦ୍ଧା କେନ୍ଦ୍ର ସରକାରଙ୍କ କର୍ମଚାରୀ ହୋଇଥିବା ବ୍ୟକ୍ତି, ଯେ କି ପୂର୍ବରୁ ଏନପିଏସ ଅଧିନରେ ଆସୁଥିବେ ।
- ଉପରୋକ୍ତ ତାରିଖରେ ବା ତା’ପରେ କେନ୍ଦ୍ର ସରକାରଙ୍କ ସେବାରେ ଭର୍ତ୍ତି ହୋଇଥିବା ନୂଆ କର୍ମଚାରୀ ସାମିଲ ହେବାର ୩୦ ଦିନ ଭିତରେ ଏହାର ବିକଳ୍ପ ବାଛିବାକୁ ପଡ଼ିବ ।
- କେନ୍ଦ୍ର ସରକାରଙ୍କ କୌଣସି କର୍ମଚାରୀ ଯିଏ ଏନପିଏସ ଅଧୀନରେ ଆସୁଥିବେ ଓ ରିଟାୟାର୍ଡ ହୋଇସାରିଥିବେ ବା ସ୍ବେଚ୍ଛାକୃତ ଅବସର ନେଇସାରିଥିବେ ।
- ଆଇନଗତ ଭାବେ ବିବାହିତ ଜୀବନସାଥୀ ଯେ କି ରିଟାୟାର ହୋଇସାରିଥିବେ ବା ୟୁପିଏସର ବିକଳ୍ପର ଉପଯୋଗ କରିବା ପୂର୍ବରୁ ତାଙ୍କର ମୃତ୍ୟୁ ହୋଇସାରିଥିବ ।
ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଏସଓପି ଜାରି କଲା ଉଚ୍ଚଶିକ୍ଷା ବିଭାଗ: ସକାଳ ସମୟରେ କ୍ଲାସ ଓ ପରୀକ୍ଷା କରିବାକୁ ପରାମର୍ଶ
ଭୁବନେଶ୍ବର: ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ସମସ୍ତ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟମାନଙ୍କୁ ଉଚ୍ଚଶିକ୍ଷା ବିଭାଗର ପତ୍ର। ଏଥିପାଇଁ ଜାରି ହୋଇଛି ଏସଓପି। ସକାଳ ସମୟରେ ହିଁ ଉଚ୍ଚଶିକ୍ଷା ପ୍ରତିଷ୍ଠାନଗୁଡ଼ିକର କ୍ଲାସ ଓ ପରୀକ୍ଷା କରିବାକୁ ପରାମର୍ଶ ଦିଆଯାଇଛି। ଆଉଟଡୋର କାର୍ଯ୍ୟକଳାପ ଉପରେ କଟକଣା ଜାରି ସହ ଉପରବେଳା ଏସବୁ କାମ କରିବା ଲାଗି କୁହାଯାଇଛି। ସମସ୍ତ ପ୍ରତିଷ୍ଠାନରେ ପାନୀୟ ଜଳ ଓ ଓଆରଏସ ବ୍ୟବସ୍ଥା କରାଯିବ। ପ୍ରତିଷ୍ଠାନ ଭିତରେ ଥିବା ନଳକୂପ ଓ ପମ୍ପର ମରାମତି କରାଯିବ। କଲେଜ ଓ ପରୀକ୍ଷା କେନ୍ଦ୍ରରେ ଫାଷ୍ଟ ଏଡ ସୁବିଧା ରଖାଯିବ। ହିଟ ୱେଭ ସମ୍ପର୍କରେ ଛାତ୍ରଛାତ୍ରୀଙ୍କୁ ସଚେତନ କରାଯିବ। ସମସ୍ତ ନିଷ୍ପତ୍ତିର କାର୍ଯ୍ୟକାରିତାର ଅନୁଧ୍ୟାନ ଲାଗି ଏକ ସ୍କ୍ବାଡ ଗଠନ କରିବାକୁ ନିର୍ଦ୍ଦେଶଦିଆଯାଇଛି।
କ’ଣ ଏହି ’ଗିଲୋଟିନ’, ଏହା ମାଧ୍ୟମରେ ସାଧାରଣ ବଜେଟ କିପରି ପାସ୍ ହୋଇଥାଏ?
ନୂଆାଦିଲ୍ଲୀ: ସଂସଦର ଚଳିତ ବଜେଟ ଅଧିବେଶନରେ ଆଜି କେନ୍ଦ୍ର ସରକାର ଅର୍ଥମନ୍ତ୍ରୀଙ୍କ ଦ୍ବାରା ଆଗତ ହୋଇଥିବା ବଜେଟକୁ ପାସ୍ କରିପାରନ୍ତି । ଏହାକୁ ନେଇ ବିଜେପି ନିଜର ସାଂସଦମାନଙ୍କ ପାଇଁ ହ୍ବିପ ଜାରି କରିଛି । ଅନ୍ୟପକ୍ଷରେ କଂଗ୍ରେସ ମଧ୍ୟ ଲୋକସଭାରେ ଥ୍ରି ଲାଇନ ହ୍ବିପ ଜାରି କରି ସମସ୍ତ ସାଂସଦଙ୍କୁ ଗୃହରେ ଉପସ୍ଥିତ ରହିବାକୁ କହିଛି । ସରକାର ବଜେଟକୁ ନେଇ ଆଗକୁ ଚର୍ଚ୍ଚା ନକରି ଗିଲୋଟିନ ମାଧ୍ୟମରେ ଏହାକୁ ପାସ କରିପାରନ୍ତି ବୋଲି କଂଗ୍ରେସ ଆଶଙ୍କା କରୁଥିବା ଏକ ସୂତ୍ରରୁ ଜଣାପଡ଼ିଛି । ସରକାର ଚର୍ଚ୍ଚାରୁ ଦୂରେଇ ଯାଉଥିବା କଂଗ୍ରେସ କହିଛି ।
ଅନ୍ୟପକ୍ଷରେ ବିଜେପି ତରଫରୁ ସମସ୍ତ ଲୋକସଭା ସାଂସଦଙ୍କ ପାଇଁ ତିନି ଲାଇନର ହ୍ବିପ ଜାରି କରାଯାଇଛି । ବଜେଟ ପାରିତ ହେବା ପାଇଁ ଲୋକସଭାରେ ଉପସ୍ଥିତ ରହିବାକୁ ସମସ୍ତ ସାଂସଦଙ୍କୁ କୁହାଯାଇଛି । ପ୍ରକୃତ କଥା ହେଉଛି, ଗିଲୋଟିନ ଏକ ସଂସଦୀୟ ରଣନୀତିର ଅଂଶ । କୌଣସି ବିଧେୟକକୁ ବିନା କୌଣସି ଚର୍ଚ୍ଚାରେ ପାରିତ କରିବା ପାଇଁ ଏହାକୁ ବ୍ୟବହାର କରାଯାଇଥାଏ । ଯେତେବେଳେ ସରକାର କୌଣସି ବିଧେୟକକୁ ଜଲଦୀ ଜଲଦୀ ପାରିତ କରିବାକୁ ଚାହାନ୍ତି, ସେତେବେଳେ ଏହାର ବ୍ୟବହାର କରାଯାଇଥାଏ । କେନ୍ଦ୍ର ଅର୍ଥମନନ୍ତ୍ରୀ ନିର୍ମଳା ସୀତାରମଣ ଫେବୃଆରୀ ୧ରେ ବଜେଟ ଆଗତ କରିଥିଲେ । ସରକାରଙ୍କ ତରଫରୁ ଆଗତ ହୋଇଥିବା ବଜେଟକୁ ନେଇ ବିପକ୍ଷ କ୍ରମାଗତ ଭାବେ ବର୍ଷୁଛନ୍ତି । ଅଧିବେଶନର ପ୍ରତ୍ୟେକ ଦିନ ହଙ୍ଗାମାରେ ବିତୁଛି । ତେଣୁ ଏପରି ସ୍ଥିତିରେ ସରକାର ଗିଲୋଟିନ ମାଧ୍ୟମରେ ବଜେଟକୁ ପାସ କରିବା ପାଇଁ ପ୍ରସ୍ତୁତ ହେଉଛନ୍ତି । ଅନ୍ୟପକ୍ଷରେ ସରକାରଙ୍କୁ ଘେରିବା ପାଇଁ ବିରୋଧୀ ନିଜର ସାଂସଦଙ୍କ ପାଇଁ ହ୍ବିପ ଜାରି କରିଛନ୍ତି ।