ମୁମ୍ବାଇ : ୨୬/୧୧ ମୁମ୍ବାଇ ଆକ୍ରମଣର ଅନ୍ୟତମ ମୁଖ୍ୟ ଷଡ଼ଯନ୍ତ୍ରକାରୀ ତହଉର ରାଣାକୁ ଭାରତ ଅଣାଯାଉଛି। ଏକ ସ୍ଵତନ୍ତ୍ର ବିମାନରେ ତାକୁ ଭାରତ ଅଣଯାଉଛି। ଏହି ବିମାନ ଆଜି ରାତିରେ କିମ୍ଵା ଆସନ୍ତାକାଲି ଭୋର୍ ରେ ଦିଲ୍ଲୀରେ ପହଞ୍ଚିବାର ସମ୍ଭାବନା ଅଛି। ଦୁଇ ଦିନ ତଳେ ପ୍ରତ୍ୟର୍ପଣ ବିରୋଧରେ ରାଣାର ଆବେଦନକୁ ଆମେରିକାର ସୁପ୍ରିମକୋର୍ଟ ଖାରଜ କରିଥିଲେ। ଏହା ପରେ ଭାରତକୁ ଆଣିବାରେ ପଥ ପରିଷ୍କାର ହୋଇଥିଲା। ଏହା ଆଗରୁ ମାର୍ଚ୍ଚରେ ମଧ୍ୟ ତାର ଏକ ଆବେଦନକୁ ଆମେରିକାର ଏକ କୋର୍ଟ ଖାରଜ କରିଥିଲେ। ୬୪ ବର୍ଷୀୟ ତହଉର ରାଣା ଜଣେ ପାକିସ୍ତାନୀ ବଂଶୋଦ୍ଭବ କାନାଡିଆନ ନାଗରିକ। ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ଷଡ଼ଯନ୍ତ୍ରକାରୀଙ୍କ ମଧ୍ୟରୁ ସେ ହେଉଚି ଜଣେ । ରାଣା ଭାରତରେ ଆତଙ୍କବାଦୀ କାର୍ଯ୍ୟକଳାପ ଚଳାଇବାରେ ପାକିସ୍ତାନୀ ଆତଙ୍କବାଦୀ ଡେଭିଡ୍ କୋଲମ୍ୟାନ୍ ହେଡଲିକୁ ସାହାଯ୍ୟ କରିଥିଲା। ହେଡଲି ପୂର୍ବରୁ ଆମେରିକାରେ ସଜା କାଟୁଛି । ତଦନ୍ତ ବେଳେ ଭାରତ ଉପରେ ଆକ୍ରମଣରେ ରାଣାର ଭୂମିକା ପଦାକୁ ଆସିଥିଲା । ଲସ୍କର ଇ ତୋଇବା ଓ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇକୁ ମୁମ୍ଵାଇ ଆତଙ୍କବାଦୀ ଆକ୍ରମଣରେ ସାହାଯ୍ୟ କରିଥିଲା। ଭାରତ ଦୀର୍ଘ ଦିନ ଧରି ରାଣାଙ୍କ ପ୍ରତ୍ୟର୍ପଣ ପାଇଁ ଦାବି କରିଆସୁଥିଲା । ତାହା ସଫଳ ହୋଇଛି। ଏବେ ଭାରତରେ ତାର ବିଚାର ହେବ ।
ସମ୍ବଲପୁର ସ୍ଥିତ ଓଡିଶା ପରିବହନ ନିଗମର ମୂଖ୍ୟ କାର୍ଯ୍ୟାଳୟର ସମ୍ପତ୍ତି ଆଟାଚ୍ ଲାଗି କୋର୍ଟଙ୍କ ନିର୍ଦ୍ଦେଶ
ସମ୍ବଲପୁର : ସମ୍ବଲପୁର ସ୍ଥିତ ଓଡିଶା ପରିବହନ ନିଗମର ମୂଖ୍ୟ କାର୍ଯ୍ୟାଳୟ ସମ୍ପତ୍ତି ଆଟାଚ୍ ଲାଗି କୋର୍ଟଙ୍କ ନିର୍ଦ୍ଦେଶ । ଅସ୍ଥାବର ସମ୍ପତ୍ତି ଜବତ ନେଇ ସିନିୟର ସିଭିଲ୍ ଜଜ କୋର୍ଟ ନିର୍ଦ୍ଦେଶ ଦେଇଛନ୍ତି। ବସ୍ ପରିବହନ ସକାଶେ ପୂର୍ବରୁ ରଖିଥିବା ଜମା ପଇସା ନଫେରାଇବାରୁ ହୋଇଥିଲା ମାମଲା । ୧୯୯୯ ମସିହାରେ ସରୋଜ ତ୍ରିପାଠୀ ନାମକ ବ୍ୟକ୍ତି ପରିବହନ ନିଗମକୁ ୫୦ ହଜାର ଟଂକା ସିକ୍ଯୁରିଟି ଟଙ୍କା ଦେଇ ଏକ ବସ ଲିଜରେ ନେଇଥିଲେ । ହେଲେ ପରିବହନ ବିଭାଗ ତାଙ୍କୁ ଏକ ଖରାପ ବସ ଲିଜ଼ରେ ଦେଇଥିଲେ । ଯେଉଁ ବସକି ସବୁବେଳେ ଖରାପ ହେଉଥିଲା । ହେଲେ ଯେହେତୁ ଏକ ବର୍ଷ ପାଈଁ ଚୁକ୍ତି ଥିଲା ତେଣୁ ବସକୁ ଚଲାଇ ଦୁଇ ପଇସା ଲାଭ କରିବା ପାଈଁ ନିଜ ହାତରୁ ଟଙ୍କା ଖର୍ଚ୍ଚା କରିଥିଲେ ଲିଜ ନେଇଥିବା ବ୍ୟକ୍ତି । ହେଲେ ପରିବହନ ବିଭାଗ ୬ ମାସ ପରେ ଆଉ ବସ ଚଳାଇବା ପାଈଁ ଅନୁମତି ଦେଲେ ନାହିଁ । ଯାହାଫଳରେ ଲିଜ ନେଇଥିବା ବ୍ୟକ୍ତି ପରିବହନ ବିଭାଗକୁ ଦେଇଥିବା ସିକ୍ୟୁରିଟି ଟଙ୍କା ମାଗିଥିଲେl କିନ୍ତୁ ବିଭାଗ ଟଙ୍କା ଫେରାଇ ନଥିଲା । ଯାହାକୁ ନେଇ ୨୦୦୦ ମସିହାରେ ସମ୍ବଲପୁର ସିଭିଲ କୋର୍ଟ ରେ ମାମଲା ଦାୟର କରିଥିଲେ । ଦୁଇଥର କୋର୍ଟଙ୍କ ନିର୍ଦ୍ଦେଶ ପରେ ମଧ୍ୟ ପାଇଥିଲେ ମଧ୍ୟ ବିଭାଗ ଟଙ୍କା ଫେରାଇ ନଥିଲେl ଶେଷରେ କୋର୍ଟ ସୁଧ ମୂଳ ମିଶି ୩ ଲକ୍ଷ ଟଙ୍କା ଦେବା ପାଈଁ ନିର୍ଦ୍ଦେଶ ଦେଇଛନ୍ତି ।
ପାନ ଦୋକାନରୁ ଗଞ୍ଜେଇ ସିଗାରେଟ୍ ଜବତ, ଜଣେ ଅଟକ
ଭୁବନେଶ୍ଵର : ଭୁବନେଶ୍ଵର ଇନଫୋସିଟି ଥାନା ଅଞ୍ଚଳରେ ସ୍ପେସିଆଲ କ୍ରାଇମ ୟୁନିଟର ଚଢାଉ। ବିଭିନ୍ନ ପାନ ଦୋକାନରୁ ଗଞ୍ଜେଇ ସିଗାରେଟ ଜବତ। ରାଜଧାନୀକୁ ନିଶାମୁକ୍ତ କରିବା ଅଭିଯାନରେ ଏହି ଚଢ଼ାଉ କରାଯାଉଛି। ଜଣକୁ ଅଟକ ରଖିଛି ପୋଲିସ। ବିଭିନ୍ନ ଶିକ୍ଷାନୁଷ୍ଠାନ ପାଖରେ ଥିବା ଦୋକାନକୁ ଟାର୍ଗେଟ କରି ଏହି ରେଡ୍ କରିଛି ସ୍ପେସିଆଲ କ୍ରାଇମ ୟୁନିଟ। ସ୍ପେଶାଲ କ୍ରାଇମ ୟୁନିଟ ମୁଖ୍ୟ ଅନୁପ କାନୁନଗୋଙ୍କ ନେତୃତ୍ୱରେ ଏହି ଚଢ଼ାଉ ଜାରି ରହିଛି । କିଛିଦିନ ତଳେ ଜୟଦେବ ବିହାର ଛକରେ ମଧ୍ୟ ଚଢ଼ାଉ ହୋଇଥିଲା।
ପାନୀୟଜଳ ସମସ୍ୟାକୁ ନେଇ ହାଣ୍ଡି, ମାଠିଆ ରଖି ରାସ୍ତା ଅବରୋଧ
କାଶୀପୁର : ପାନୀୟଜଳ ସମସ୍ୟାକୁ ନେଇ ରାସ୍ତାରୋକ। ରାସ୍ତାରେ ହାଣ୍ଡି, ମାଠିଆ ରଖି ରାସ୍ତା ଅବରୋଧ କଲେ ମହିଳା। ରାୟଗଡା ଜିଲ୍ଲା କାଶୀପୁର ବ୍ଲକ ଅନ୍ତର୍ଗତ ଗୋରଖପୁର ଠାରେ ପାନୀୟଜଳ ସମସ୍ୟାକୁ ନେଇ ରାସ୍ତାରେ ହାଣ୍ଡି ମାଠିଆ ରଖି ମୁଖ୍ୟ ରାସ୍ତା ଅବରୋଧ କଲେ ମହିଳା।ଫଳରେ ରାସ୍ତାର ଉଭୟ ପାର୍ଶ୍ବରେ ଅଟକି ରହିଛି ଅନେକ ଯାନବାହାନ। ଯାନବାହନ ଚଳାଚଳ ସମ୍ପୂର୍ଣ୍ଣ ଠପ ହୋଇ ଯାଇଛି। ପାନୀୟଜଳ ପାଇଁ ଗ୍ରାମବାସୀମାନେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଥିବା ବେଳେ ବାରମ୍ବାର ପ୍ରଶାସନକୁ ଅବଗତ କରିବାପରେ ମଧ୍ୟ କୌଣସି ବ୍ୟବସ୍ତା କରାଯାଉନାହିଁ। ଫଳରେ ବାଧ୍ୟ ହୋଇ ରାସ୍ତାକୁ ଓ୍ବହ୍ଲାଇଛନ୍ତି ଲୋକେ।ଏନେଇ ଖବରପାଇ ଘଟଣାସ୍ଥଳରେ ଟିକିରି ପୁଲିସ ପହଞ୍ଚି ଉକ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛନ୍ତି।
ମନରେଗା ଦୁର୍ନୀତି ପରେ ରାସନ କାର୍ଡ ମାମଲା, ଫସିଲେ କ୍ରିକେଟର ଶାମିଙ୍କ ଭଉଣୀଙ୍କ ଶାଶୂ
ନନ୍ଦିଘୋଷ ବ୍ୟୁରୋ ; କ୍ରିକେଟର ମହମ୍ମଦ ଶାମିଙ୍କ ଭଉଣୀଙ୍କ ଶାଶୂ ଗୁଲେ ଆୟେଶା ଉତ୍ତର ପ୍ରଦେଶର ଆମରୋହାର ପାଲୌଲା ଗାଁର ମୁଖିଆ। ତାଙ୍କ ବିରୁଦ୍ଧରେ ଗୁରୁତର ଅଭିଯୋଗ ଆସିଛି। ପରିବାର ସଦସ୍ୟଙ୍କ ନାମରେ ଜବ କାର୍ଡ ତିଆରି କରି ମଜୁରୀ ହଡ଼ପ କରିବାର ଅଭିଯୋଗ ଆସିଥିଲା। ଏବେ ଗୁଲେ ଆୟେଶା ମଧ୍ୟ ରାସନ କାର୍ଡ ମାମଲାରେ ଛନ୍ଦି ହୋଇ ଯାଇଛନ୍ତି। ଡିଏମ୍ ସେମାନଙ୍କ ବିରୋଧରେ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଗାଁ ମୁଖିଆ ଗୁଲେ ଆୟେଶାଙ୍କ ପରିବାରର ଆଠ ଜଣ ସଦସ୍ୟଙ୍କ ସମେତ ୧୮ ଜଣ ମନରେଗାରେ ଠକେଇ କରି ମଜୁରୀ ନେଇଥିବା ଏକ ମାମଲା ସାମ୍ନାକୁ ଆସିଥିଲା। ମାମଲା ବଢ଼ିବା ପରେ ସରକାର ଏକ ରିପୋର୍ଟ ମାଗିଲେ। ଜିଲ୍ଲା ଡିଏମ୍ ନିଧି ଗୁପ୍ତା ବସ୍ତ ତଦନ୍ତ ନିର୍ଦ୍ଦେଶ ଦେଇଥିଲେ। ଏହା ପରେ, ପ୍ରକଳ୍ପ ନିର୍ଦ୍ଦେଶକ ଅମରେନ୍ଦ୍ର ପ୍ରତାପ ସିଂହ ସମ୍ପୂର୍ଣ୍ଣ ମାମଲାର ତଦନ୍ତ କରିଥିଲେ। ତା’ପରେ ଗ୍ରାମ ମୁଖିଆଙ୍କୁ ବିଭାଗକୁ ମୋଟ ୮.୬୮ ଲକ୍ଷ ଟଙ୍କା ଫେରାଇବାକୁ ପଡିଲା।
ମନରେଗା ମାମଲାରେ ଦୋଷୀ ବିଡିଓ, ସଚିବ ଏବଂ ଅନ୍ୟାନ୍ୟ କର୍ମଚାରୀଙ୍କ ବିରୁଦ୍ଧରେ ମାମଲା ରୁଜୁ ହୋଇଥିଲା। ସମାନ ମାମଲାରେ, ୩ ଜଣ ପଞ୍ଚାୟତ ସଚିବ, ଜଣେ ଏପିଓଙ୍କ ସମେତ ୮ ଜଣ ଅଧିକାରୀ ଏବଂ କର୍ମଚାରୀଙ୍କୁ ମଧ୍ୟ ନିଲମ୍ବିତ କରାଯାଇଛି। ଗୁଲେ ଆୟେଶାଙ୍କ ବିରୋଧରେ ଠକେଇ କରି ତାଙ୍କ ପରିବାରର ଅଧିକାଂଶ ସଦସ୍ୟଙ୍କୁ ମନରେଗା ଶ୍ରମିକ କରାଇବାର ଅଭିଯୋଗ ଆସିଥିଲା। ଏହା ପରେ, ଲକ୍ଷ ଲକ୍ଷ ଟଙ୍କା ମଜୁରୀ ଠକେଇ ଭାବରେ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତର କରାଯାଇଥିଲା। ଯେଉଁ ମନରେଗା ଶ୍ରମିକମାନଙ୍କ ନାମରେ ଏହି ଠକେଇ କରାଯାଇଥିଲା ସେମାନଙ୍କ ମଧ୍ୟରେ ମହମ୍ମଦ ଶାମିଙ୍କ ଭଉଣୀ ଶବୀନା ଏବଂ ଭାଇ ଗଜନବୀ ସାମିଲ ଅଛନ୍ତି।
ଏହି ସମୟରେ, ଗୁଲେ ଆୟେଶାଙ୍କ ବିରୁଦ୍ଧରେ ଆଉ ଏକ ଠକେଇ ଅଭିଯୋଗ ଆସିଛି। ପ୍ରକାଶ ପାଇଛି ଯେ ଗୁଲେ ଆୟେଶା ମୁଖିଆ ହୋଇ ମଧ୍ୟ ଜଣେ ବିପିଏଲ୍ କାର୍ଡଧାରୀ। ଏହା ସାହାଯ୍ୟରେ, ସେ ଏକ ରାସନ କାର୍ଡ ତିଆରି କରିଛନ୍ତି, ଯେଉଁଥିରେ ମୋଟ ଚାରୋଟି ୟୁନିଟ୍ ପଞ୍ଜିକୃତ ହୋଇଛି। ଯେତେବେଳେ ଏହି ମାମଲା ଡିଏମଙ୍କ ପାଖରେ ପହଞ୍ଚିଲା, ସେ ଏହାର ତଦନ୍ତ ସିଡିଓଙ୍କୁ ହସ୍ତାନ୍ତର କଲେ। ରାସନ କାର୍ଡ ତିଆରି କରିବା ପରେ ମୁଖିଆ କେତେ ଖାଦ୍ୟ ସାମଗ୍ରୀ ନେଇଛନ୍ତି ତାହା ଜାଣିବାକୁ ଏବେ ଅଧିକାରୀମାନେ ଚେଷ୍ଟା କରୁଛନ୍ତି।
କୋଟି କୋଟି ଲୋକଙ୍କୁ ଆରବିଆଇ ଦେଲା ଆଶ୍ୱସ୍ତି, ଋଣ ଶସ୍ତା ହେବା ନେଇ ଫିଟିଲା ବାଟ
ନନ୍ଦିଘୋଷ ବ୍ୟୁରୋ : ଭାରତୀୟ ରିଜର୍ଭ ବ୍ୟାଙ୍କ ରେପୋ ରେଟ ହ୍ରାସ କରିଛି। ଦେଶର ବ୍ୟାଙ୍କିଙ୍ଗ ନିୟାମକ, ଭାରତୀୟ ରିଜର୍ଭ ବ୍ୟାଙ୍କର ମୁଦ୍ରା ନୀତି କମିଟି, ଦେଶର କୋଟି କୋଟି ଲୋକଙ୍କୁ ଋଣ ଇଏମଆଇରେ ରିହାତି ଦେଇଛି। ଆରବିଆଇର ଏମପିସି ଲଗାତାର ଦ୍ୱିତୀୟ ଥର ପାଇଁ ରେପୋ ରେଟରେ ୦.୨୫ ପ୍ରତିଶତ ହ୍ରାସ କରିଛି। ଯାହା ପରେ ରେପୋ ହାର ୬.୨୫ ପ୍ରତିଶତରୁ ହ୍ରାସ ପାଇ ୬ ପ୍ରତିଶତ ହୋଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ଲାଗୁ ନେଇ ଦେଶ ଆଶ୍ଚର୍ଯ୍ୟ ଏବଂ ଚିନ୍ତିତ ଥିବା ସମୟରେ ଆରବିଆଇର ଏହି ନିଷ୍ପତ୍ତି ଆସିଛି। ଏହି ନିଷ୍ପତ୍ତି ପରେ, ବିଶ୍ୱରେ ମୁଦ୍ରାସ୍ଫୀତି ଏବଂ ମାନ୍ଦାବସ୍ଥାର ସମ୍ଭାବନା ବୃଦ୍ଧି ପାଇଛି। ବିଶ୍ୱ ଅର୍ଥନୀତି ମାନ୍ଦାବସ୍ଥା ଆଡ଼କୁ ଯିବାର ସମ୍ଭାବନାକୁ ବିଚାରକୁ ନେଇ, ଆରବିଆଇର ଏହି ନିଷ୍ପତ୍ତିକୁ ବହୁତ ଭଲ ବୋଲି ବିବେଚନା କରାଯାଉଛି। ଆରବିଆଇ ଏମପିସିର ଅଧିକାଂଶ ସଦସ୍ୟ ୦.୨୫ ପ୍ରତିଶତ ହ୍ରାସ ପାଇଁ ସୁପାରିଶ କରିଥିଲେ । ଯାହା ପରେ ରେପୋ ରେଟରକୁ ଏତେ ହ୍ରାସ କରିବାର ନିଷ୍ପତ୍ତି ନିଆଯାଇଥିଲା।
ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ଲଗାତାର ଦ୍ୱିତୀୟ ଥର ପାଇଁ ଆରବିଆଇ ନୀତି ହାର ହ୍ରାସ କରିଛନ୍ତି। ଫେବୃଆରୀ ମାସର ନୀତି ବୈଠକରେ ମଧ୍ୟ ସୁଧ ହାର ୦.୨୫ ପ୍ରତିଶତ ହ୍ରାସ କରାଯାଇଥିଲା। ଏହି ହ୍ରାସ ପ୍ରାୟ ୫ ବର୍ଷ ଅର୍ଥାତ୍ ୫୬ ମାସ ପରେ ଦେଖାଯାଇଥିଲା। ଏହି ହ୍ରାସ ପରେ ସାଧାରଣ ଲୋକଙ୍କୁ ବଡ଼ ଆଶ୍ୱସ୍ତି ମିଳିବ ବୋଲି ଆଶା କରାଯାଉଛି। ବ୍ୟାଙ୍କିଙ୍ଗ କ୍ଷେତ୍ରର ଗୃହ ଋଣ, କାର ଋଣ ଏବଂ ଖୁଚୁରା ଋଣର ମୂଲ୍ୟ ହ୍ରାସ ପାଇବ। ଏହା ଦ୍ୱାରା ପ୍ରକୃତ କ୍ଷେତ୍ର ବହୁତ ଲାଭବାନ ହୋଇପାରିବ। ଗତ କିଛି ମାସ ଧରି ମାନ୍ଦାବସ୍ଥାର ସମ୍ମୁଖୀନ ହେଉଥିବା ଏହି କ୍ଷେତ୍ରରେ ଘରର ଚାହିଦା ବଢ଼ିପାରେ।
ଯଦିଓ ମାର୍ଚ୍ଚ ମାସର ମୁଦ୍ରାସ୍ଫୀତି ସଂଖ୍ୟା ପ୍ରକାଶ କରାଯାଇ ନାହିଁ, ତଥାପି ଫେବୃଆରୀ ମାସରେ ଦେଶର ମୁଦ୍ରାସ୍ଫୀତି ୪ ପ୍ରତିଶତ ତଳେ ଥିଲା। ଯଦି ଆମେ ସଂଖ୍ୟାଗୁଡ଼ିକ ଉପରେ ନଜର ପକାଇବା, ତେବେ ଦେଶର ଖୁଚୁରା ମୁଦ୍ରାସ୍ଫୀତି ୩.୬ ପ୍ରତିଶତ ରହିଛି। ଯାହା ୭ ମାସ ମଧ୍ୟରେ ସର୍ବନିମ୍ନ ସ୍ତରରେ ରହିଛି। ଏହାର ମୁଖ୍ୟ କାରଣ ଖାଦ୍ୟ ମୁଦ୍ରାସ୍ଫୀତି ହ୍ରାସ ବୋଲି କୁହାଯାଉଛି। ବିଶେଷଜ୍ଞଙ୍କ ମତରେ, ଏପ୍ରିଲ ମାସରେ ମଧ୍ୟ ଖୁଚୁରା ମୁଦ୍ରାସ୍ଫୀତି ୪ ପ୍ରତିଶତ ତଳେ ରହିପାରେ। ସମସ୍ୟାଟି ଆଗାମୀ ଦିନ ପାଇଁ। ଏହାର ଏକ କାରଣ ଅଛି। ଏଥର ଗରମ ଅଧିକ ପ୍ରବଳ ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଯାହା ଯୋଗୁଁ ଏହା ଫସଲକୁ ପ୍ରଭାବିତ କରିପାରେ। ଯାହା ଯୋଗୁଁ ପନିପରିବା ଏବଂ ଶସ୍ୟର ମୂଲ୍ୟ ବୃଦ୍ଧି ପାଇପାରେ। ଯାହାର ପ୍ରଭାବ ଖାଦ୍ୟ ମୁଦ୍ରାସ୍ଫୀତି ଉପରେ ଦେଖିବାକୁ ମିଳୁଛି। ଦ୍ୱିତୀୟତଃ, ଟ୍ରମ୍ପଙ୍କ ଶୁଳ୍କ ଯୋଗୁଁ ଟଙ୍କାର ମୂଲ୍ୟ ହ୍ରାସ ପାଇପାରେ ଏବଂ ମୁଦ୍ରାସ୍ଫୀତି ଯୋଗୁଁ ଆମଦାନୀ ମୁଦ୍ରାସ୍ଫୀତି ବୃଦ୍ଧି ପାଇପାରେ।
ଆରବିଆଇର ଆକଳନ ବିଷୟରେ କହିବାକୁ ଗଲେ, ଚଳିତ ଆର୍ଥିକ ବର୍ଷରେ ମୁଦ୍ରାସ୍ଫୀତି ୪.୮ ପ୍ରତିଶତ ରହିବ ବୋଲି ଆଶା କରାଯାଉଛି। ତଥାପି, ଚତୁର୍ଥ ତ୍ରୈମାସିକରେ ମୁଦ୍ରାସ୍ଫୀତି ୧୦ ବେସିସ୍ ପଏଣ୍ଟ ବୃଦ୍ଧି ପାଇଛି। ଯାହାକୁ ପୂର୍ବ ୪.୪ ପ୍ରତିଶତରୁ ୪.୫ ପ୍ରତିଶତକୁ ବୃଦ୍ଧି କରାଯାଇଛି। ସେହିପରି, ୨୦୨୬ ଆର୍ଥିକ ବର୍ଷରେ ମୁଦ୍ରାସ୍ଫୀତି ୪.୨ ପ୍ରତିଶତ ରହିବ ବୋଲି ଆକଳନ କରାଯାଇଛି। ଯେତେବେଳେ ପ୍ରଥମ ତ୍ରୈମାସିକରେ ଏହା ୪.୬ ପ୍ରତିଶତ ରହିପାରେ। ପୂର୍ବରୁ ଏହା ୪.୫ ପ୍ରତିଶତ ହେବ ବୋଲି ଆକଳନ କରାଯାଇଥିଲା। ଦ୍ୱିତୀୟ ତ୍ରୈମାସିକରେ ଏହା ୪ ପ୍ରତିଶତ, ତୃତୀୟ ତ୍ରୈମାସିକରେ ୩.୮ ପ୍ରତିଶତ ଏବଂ ଚତୁର୍ଥ ତ୍ରୈମାସିକରେ ୪.୨ ପ୍ରତିଶତ ହେବ ବୋଲି ଆକଳନ କରାଯାଇଛି।
ଫେବୃଆରୀରେ ଅନୁଷ୍ଠିତ ବୈଠକରେ, ଆରବିଆଇ ଗଭର୍ଣ୍ଣର ୨୦୨୬ ଆର୍ଥିକ ବର୍ଷ ପାଇଁ ଦେଶର ଅଭିବୃଦ୍ଧି ପୂର୍ବାନୁମାନକୁ ୭ ପ୍ରତିଶତରୁ କମ୍ ଅର୍ଥାତ୍ ୬.୭୫ ପ୍ରତିଶତକୁ ବୃଦ୍ଧି କରିଥିଲେ। ବିଶେଷଜ୍ଞଙ୍କ ମତରେ, ଶୁଳ୍କ ଯୁଦ୍ଧ ମଧ୍ୟରେ ଏହି ଆକଳନକୁ ଆହୁରି ହ୍ରାସ କରାଯାଇପାରିବ। ସେ ପ୍ରଥମ ତ୍ରୈମାସିକ ପାଇଁ ଅଭିବୃଦ୍ଧି ହାର ୬.୭ ପ୍ରତିଶତ, ଦ୍ୱିତୀୟ ତ୍ରୈମାସିକ ପାଇଁ ୭ ପ୍ରତିଶତ, ତୃତୀୟ ଏବଂ ଚତୁର୍ଥ ତ୍ରୈମାସିକ ପାଇଁ ୬.୫ ପ୍ରତିଶତ ଆକଳନ କରିଥିଲେ।
ଭୂମିକମ୍ପରେ ଥରିଲା ଦୁଇ ଦେଶ, ୫.୪ ଓ ୫.୮ ତୀବ୍ରତାର ଭୂମକମ୍ପ ଅନୁଭୂତ
ନନ୍ଦିଘୋଷ ବ୍ୟୁରୋ : ଦୁଇ ଦେଶରେ ଭୂମକମ୍ପ । ଜାପାନଓ ଇଣ୍ଡୋନେସିଆରେ ଭୂମିକମ୍ପ ଅନୁଭୂତ ହୋଇଛି। ଜାପାନରେ ହୋଇଥିବା ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୫.୪ ଥିଲା । ଯାହା ଜାପାନର ଓକିନାୱା ସହରକୁ ଥରାଇ ଦେଇଥିଲା। ଏହି ଭୂମିକମ୍ପର କେନ୍ଦ୍ରସ୍ଥଳ ୟୋନାଗୁନିରୁ ୪୮ କିଲୋମିଟର ଦୂରରେ, ଭୂପୃଷ୍ଠର ୧୨୪ କିଲୋମିଟର ତଳେ ଅବସ୍ଥିତ। ଯଦିଓ ଏହି ଭୂମିକମ୍ପ ଯୋଗୁଁ ସୁନାମି ଚେତାବନୀ ଜାରି କରାଯାଇ ନାହିଁ, ତଥାପି ଲୋକଙ୍କ ମଧ୍ୟରେ ଆତଙ୍କର ବାତାବରଣ ରହିଛି । କାରଣ ଜାପାନ ସରକାର ପୂର୍ବରୁ ଏକ ରିପୋର୍ଟ ଜାରି କରିଛନ୍ତି, ଯେଉଁଥିରେ ଜାପାନରେ ଏକ ବଡ଼ ଭୂମିକମ୍ପ ହେବା ସହ ଏହା ବ୍ୟାପକ ଧ୍ୱଂସ ଘଟାଇବ । ପ୍ରାୟ ୩ ଲକ୍ଷ ଲୋକ ମୃତ୍ୟୁବରଣ କରିବେ ଓ ପୁଣି ଥରେ ସୁନାମି ଆସିବ। ଏଥିରେ ଜାପାନ ସରକାର ନାଗରିକମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି । ଏହା ସହିତ ଏଜେନ୍ସିଗୁଡ଼ିକୁ ମଧ୍ୟ ସତର୍କ କରାଯାଇଛି ।
ଅନ୍ୟପକ୍ଷରେ, ଇଣ୍ଡୋନେସିଆରେ ଭୂକମ୍ପର ଝଟକା ଅନୁଭୂତ ହୋଇଛି। ଇଣ୍ଡୋନେସିଆରେ ୫ ଦିନ ମଧ୍ୟରେ ଦ୍ୱିତୀୟ ଥର ପାଇଁ ଭୂମିକମ୍ପ ଅନୁଭୂତ ହୋଇଛି। ଇଣ୍ଡୋନେସିଆର ପଶ୍ଚିମ ଆଚେ ପ୍ରଦେଶରେ ରିକ୍ଟର ସ୍କେଲରେ ୫.୮ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା। ଏହି ଭୂମିକମ୍ପର କେନ୍ଦ୍ରସ୍ଥଳ ସିମେଉଲୁ ରିଜେନ୍ସିର ସିନାବୁଙ୍ଗ ସହରରୁ ୬୨ କିଲୋମିଟର ଦକ୍ଷିଣ-ପୂର୍ବରେ ସମୁଦ୍ର ପତ୍ତନରୁ ୩୦ କିଲୋମିଟର ତଳେ ଅବସ୍ଥିତ ଥିଲା। ତଥାପି, ଏହି ଭୂମିକମ୍ପରେ କୌଣସି ଜୀବନ କିମ୍ବା ସମ୍ପତ୍ତିର କ୍ଷତି ହୋଇନାହିଁ କିମ୍ବା କୌଣସି ସୁନାମି ସତର୍କତା ଜାରି କରାଯାଇ ନାହିଁ।
ମହୁଲ ମାଫିଆଙ୍କ ଗୁଣ୍ଡାରାଜ୍, ଅଟକାଇ ଛଡାଇ ନେଲେ ଜବତ ମହୁଲ ବୋଝେଇ ପିକଅପ
ଉଦଳା : ମୟୂରଭଞ୍ଜ ଉଦଳାରେ ମହୁଲ ମାଫିଆଙ୍କ ଗୁଣ୍ଡାରାଜ୍। ଫିଲ୍ମ ଷ୍ଟାଇଲରେ ରାସ୍ତାରେ ଅଟକାଇ ଛଡାଇ ନେଲେ ଜବତ ମହୁଲ ବୋଝେଇ ପିକଅପ। ଡ୍ରାଇଭରଙ୍କୁ ମାଡ଼ ମାରି ଓହ୍ଲାଇ ଦେଲେ। ଗାଡିରେ ବସିଥିବା ମହିଳା ଅଧିକାରୀଙ୍କୁ ପିକଅପରେ ବସାଇ ଖସାଇ ନେଲେ ଜବତ ୧୬ କୁଇଣ୍ଟାଲ ମହୁଲ। ମହିଳା ସବଇନ୍ସପେକ୍ଟରଙ୍କୁ ଧମକାଇ ଅଧିକାରୀଙ୍କ ଉପସ୍ଥିତିରେ ଖସାଇ ନେଲେ ଜବତ ପିକଅପ। ଆଉ ଜଳକା ହୋଇ ଚାହିଁ ରହିଲେ ଅବକାରୀ ସବଇନ୍ସପେକ୍ଟର। କପ୍ତିପଦା ଥାନା ଜାରଡା ଗ୍ରାମରେ ଘଟିଛି ଏଭଳି ଘଟଣା। ବିପୁଳ ପରିମାଣର ମହୁଲ ବେଆଇନ ଭାବେ ଚାଲାଣ ହେଉଥିବା ଖବର ପାଇ କପ୍ତିପଦାରେ ଚଢ଼ାଉ କରିଥିଲା ଉଦଳା ଅବକାରୀ ବିଭାଗ । କପ୍ତିପଦା ଛକ ନିକଟରେ ମହୁଲ ବୋଝେଇ ପିକଅପକୁ ଜବତ କରିଥିବା ବେଳେ ଗାଡ଼ିରେ ଥିବା ୪ ଜଣଙ୍କୁ ଅବକାରୀ ବିଭାଗ ଗିରଫ କରି ଆଣୁଥିଲା । ଅବକାରୀ ସବଇନ୍ସପେକ୍ଟର ଶୁଭଦର୍ଶିନୀ ସାହୁ ମହୁଲ ବୋଝେଇ ପିକଅପ ଜବତ କରିବା ପରେ ଡ୍ରାଇଭର ସହିତ ବସି ଉକ୍ତ ଗାଡିକୁ ଉଦଳା କାର୍ଯ୍ୟାଳୟ ଆଣୁଥିଲେ। ଜାରଡା ଛକ ନିକଟରେ ମହୁଲ ମାଫିଆ ବାବୁଲି ପ୍ରଧାନ ନିଜ ସହଯୋଗୀଙ୍କ ସହିତ ସେଠାରେ ପହଞ୍ଚି ବିଚ ରାସ୍ତାରେ ଜବତ ଗାଡିକୁ ଅଟକାଇଥିଲା। ଡ୍ରାଇଭରକୁ ମାଡ଼ ମାରି ଜବତ ଗାଡିକୁ ନିଜ ଘରକୁ ନେଇ ଯାଇଥିଲେ ମାଫିଆ। ଅଧିକାରୀଙ୍କ ସାମ୍ନାରେ ଜବତ ମହୁଲକୁ ଅନଲୋଡ଼ କରିବା ସହିତ ଜବତ ପିକଅପକୁ ଖସାଇ ଦେଇଥିଲା। ପରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ଉପସ୍ଥିତିରେ ମାଫିଆ ଘରୁ ଜବତ ହୋଇଛି ୧୬ କୁଇଣ୍ଟାଲ ମହୁଲ । ଘଟଣାରେ ୪ ଜଣଙ୍କୁ ଗିରଫ କରାଯାଇଥିବାବେଳେ ମାଫିଆ ଚମ୍ପଟ ମାରିଛି। ଜବତ ମହୁଲର ମୂଲ୍ୟ ୫୦ ହଜାର ଟଙ୍କା ହେବ।
ସୈଫଅଲ୍ଲୀଙ୍କୁ ଛୁରାମାଡ଼ ଘଟଣା : ହଜାରେ ପୃଷ୍ଠାର ଚାର୍ଜସିଟ ଦାଖଲ କଲା ମୁମ୍ବାଇ ପୋଲିସ
ମୁମ୍ବାଇ ; ବଲିଉଡ ଅଭିନେତା ସୈଫ ଅଲ୍ଲୀ ଖାନଙ୍କୁ ଛୁରାମାଡ଼ ମାମଲାରେ ଚାର୍ଜସିଟ ଦାଖଲ। ହଜାରେ ପୃଷ୍ଠାର ଚାର୍ଜସିଟ ଦାଖଲ କଲା ମୁମ୍ବାଇ ପୋଲିସ। ଅଭିଯୁକ୍ତ ଶରିପୁଲ ଇସଲାମଙ୍କ ବିରୋଧରେ ମିଳିଥିବା ସମସ୍ତ ପ୍ରମାଣ ସହ ବ୍ରାନ୍ଦ୍ରା କୋର୍ଟରେ ଅଭିଯୋଗପତ୍ର ଦାଖଲ କରିଛି ମୁମ୍ବାଇ ପୋଲିସ। ଚାର୍ଜସିଟରେ ଗିରଫ ଅଭିଯୁକ୍ତ ସରିଫୁଲ ଇସଲାମ ବିରୋଧରେ ପୋଲିସ ପାଇଥିବା ଅନେକ ପ୍ରମାଣ ରହିଛି। ଚାର୍ଜସିଟରେ ଫରେନସିକ୍ ଲ୍ୟାବ ରିପୋର୍ଟ ମଧ୍ୟ ଉଲ୍ଲେଖ କରାଯାଇଛି। ଅପରାଧ ସ୍ଥଳରୁ ସୈଫ ଅଲ୍ଲୀ ଖାନଙ୍କ ଶରୀର ଏବଂ ଅଭିଯୁକ୍ତଙ୍କଠାରୁ ମିଳିଥିବା ଛୁରୀ ଖଣ୍ଡଗୁଡ଼ିକ ସମାନ ଛୁରୀର ତିନୋଟି ଖଣ୍ଡ ବୋଲି ମୁମ୍ବାଇ ପୋଲିସ ଦର୍ଶାଇଛି। ତଦନ୍ତ ସମୟରେ ପୋଲିସକୁ ମିଳିଥିବା ଅଭିଯୁକ୍ତଙ୍କ ବାମ ହାତର ଫିଙ୍ଗରପ୍ରିଣ୍ଟ ରିପୋର୍ଟ ମଧ୍ୟ ଉଲ୍ଲେଖ କରାଯାଇଛି। ଜାନୁଆରୀ ୧୬ ତାରିଖରେ ସୈଫ ଅଲ୍ଲୀ ଖାନଙ୍କ ଉପରେ ଆକ୍ରମଣ ହୋଇଥିଲା। ଅଭିଯୁକ୍ତ ଶେହଜାଦ ଡକାୟତି ଉଦ୍ୟମ କରୁଥିବା ଅଭିଯୋଗରେ ଅଭିନେତାଙ୍କ ବାନ୍ଦ୍ରାସ୍ଥିତ ବାସଭବନରେ ପଶିଯାଇଥିଲେ। ଆକ୍ରମଣରେ ସୈଫଅଲ୍ଲୀ ଖାନ ଗୁରୁତର ଆହତ ହୋଇଥିଲେ। ତାଙ୍କ ଛାତିର ମେରୁଦଣ୍ଡ ଏବଂ ଶରୀରର ଅନ୍ୟାନ୍ୟ ସ୍ଥାନରେ ଆଘାତ ହୋଇଥିଲା। ଅଭିନେତାଙ୍କୁ ତୁରନ୍ତ ଲୀଳାବତୀ ହସ୍ପିଟାଲକୁ ନିଆଯାଇଥିଲା। ପାଞ୍ଚ ଦିନ ଧରି ଚିକିତ୍ସା ପରେ ଜାନୁଆରୀ ୨୧ରେ ଡିସଚାର୍ଜ ହୋଇଥିଲେ। ଅଭିଯୁକ୍ତ ଜଣକ ବାଂଲାଦେଶରୁ ଭାରତରେ ପ୍ରବେଶ କରିଥିଲେ ଏବଂ ଶେଷରେ ମୁମ୍ବାଇ ଯିବା ପୂର୍ବରୁ କୋଲକାତାର ଅନେକ ସ୍ଥାନରେ ରହିଥିଲେ ବୋଲି ପୋଲିସ ଚାର୍ଜସିଟରେ ଉଲ୍ଲେଖ କରିଛି।
ଦୁଇ ବାଇକ୍ ମୁହାଁମୁହିଁ ଧକ୍କା, ଜଣେ ମୃତ, ୩ ଗୁରୁତର
ଭଦ୍ରକ ଧାମନଗର ଦୋବଲ ମୁଖ୍ୟ ରାସ୍ତା ଜରାନିବାସ ନିକଟରେ ମର୍ମନ୍ତୁଦ ଦୁର୍ଘଟଣା। ଦୁଇ ବାଇକ୍ ମୁହାଁମୁହିଁ ଧକ୍କା ହେବା ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଛି। ୩ ଜଣ ଗୁରୁତର ହୋଇଛନ୍ତି। ମୃତକ ହେଉଛନ୍ତି ମୁହାଁଣପଡା ଗାଁର ୨୧ ବର୍ଷିୟ ଶୁଭପ୍ରକାଶ ସେଠି। ଗୁରୁତରଙ୍କୁ ପ୍ରଥମେ ଧାମନଗର ମେଡିକାଲ ଓ ପରେ କଟକ ବଡମେଡିକାଲକୁ ସ୍ଥାନାନ୍ତର କରାଯାଇଛି । ଗତକାଲି ଧାମନଗର ବଜାରରେ ବିଜୟା ଦଶମୀ ନଗର ପରିକ୍ରମା ଓ ଶୋଭାଯାତ୍ରା ଦେଖି ଫେରୁଥିବା ବେଳେ ଦୁର୍ଘଟଣା ଘଟିଛି।