ନନ୍ଦିଘୋଷ ବ୍ୟୁରୋ: ବୁଧବାର ଆମେରିକା ରାଷ୍ଟ୍ରପତି ଡୋଲାନ୍ଡ ଟ୍ରମ୍ପ ସଂସଦରେ ସମ୍ବେଧିତ କରିଛନ୍ତି । ନିଜର ଦ୍ବିତୀୟ କାର୍ଯ୍ୟକାଳର ପ୍ରଥମ ଅଧିବେଶନରେ ବହୁ ଗୁରୁତ୍ବପୂର୍ଣ୍ଣ ଅଭିଭାଷଣମାନ ଦେଇଥିବା ଦେଖିବାକୁ ମିଳିଛି । ବାକ୍ ସ୍ବାଧିନତା ଏବଂ ଶୁଳ୍କ ଉପରେ ଗୁରୁତ୍ବାରୋପ କରିଛନ୍ତି । ତେବେ ଟ୍ୟାକ୍ସ ନିଷ୍ପତ୍ତିକୁ ଖୋଲାଖୋଲି ଭାବେ ସମର୍ଥନ କରିଛନ୍ତି । ତେବେ ସେ ଭାରତର ନାମ ମଧ୍ୟ ନେଇଛନ୍ତି । କହିଛନ୍ତି କି, ଭାରତ-ଚୀନ-କାନାଡ଼ା- ମେକ୍ସିକୋ ଆମ ଉପରେ ଉପରେ ଅଧିକ ଟିକସ ଲଗାନ୍ତି । କିନ୍ତୁ ଭାରତ ଦ୍ବାରା ଲାଗୁ କରାଯାଇଥିବା ଟିକସ ନ୍ୟାୟସଙ୍ଗତ ନୁହେଁ । ଏହାଏକ ଭଲ ନୁହେଁ । ଯେଉଁ ଦେଶ ଆମ ଉପରେ ଅଧିକ ଟିକସ ଲାଗୁ କରିବ ଆମେ ମଧ୍ୟ ସେମାନଙ୍କ ଉପରେ ଅଧିକ ଟିକସ ଲାଗୁ କରିବୁ ।
ବିଜୁ ବାବୁଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ: ବିଜୁ ବାବୁଙ୍କ ଜୟନ୍ତୀରେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ। ସୋସିଆଲ ମିଡିଆ ଏକ୍ସ ରେ ସେ ଲେଖିଛନ୍ତି, ମହାନ ଜନନାୟକ, ପ୍ରବାଦ ପୁରୁଷ ତଥା ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଉଛି। ତାଙ୍କ ପରାକ୍ରମ, ପଞ୍ଚାୟତିରାଜ ବ୍ୟବସ୍ଥାକୁ ସୁଦୃଢ଼ କରିବାରେ ବଳିଷ୍ଠ ଅବଦାନ, ନାରୀ ସଶକ୍ତିକରଣ ଏବଂ ଓଡ଼ିଶାକୁ ଅଗ୍ରଣୀ ରାଜ୍ୟରେ ପରିଣତ କରିବାରେ ବହୁମୂଲ୍ୟ ଯୋଗଦାନ ଆମକୁ ପ୍ରେରଣା ଯୋଗାଇ ଆସିଛି। ତାଙ୍କ ପ୍ରଦର୍ଶିତ ମାର୍ଗରେ ଓଡ଼ିଆ ସ୍ୱାଭିମାନ ରକ୍ଷା ସହ ଲୋକଙ୍କ ସ୍ୱାର୍ଥର ସୁରକ୍ଷା ପାଇଁ ଆମେ ବଦ୍ଧପରିକର ।
ବିଜୁ ବାବୁଙ୍କ ଜୟନ୍ତୀରେ କଟକରେ ମିନି ମାରାଥନ
ନନ୍ଦିଘୋଷ ବ୍ୟୁରୋ: ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀ ଅବସରରେ ଓଡ଼ିଶା ଭେଟରାନ ସ୍ପୋର୍ଟସ ପର୍ସନ୍ସ ଆସୋସିଏସନ ଆନୁକୂଲ୍ୟରେ କଟକରେ ଏକ ମିନି ମାରାଥନ ଓ ୱାକାଥନ ପ୍ରତିଯୋଗିତା ଆୟୋଜିତ ହୋଇଛି। ୧୯ ବର୍ଷ ହେବ ଆୟୋଜିତ ହୋଇ ଆସୁଥିବା ଏହି ମାରାଥନରେ କଟକର ବିଭିନ୍ନ ସ୍କୁଲର ସପ୍ତମରୁ ଦଶମ ଶ୍ରେଣୀର ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ବୟସ୍କ ପୁରୁଷ ଓ ମହିଳାଙ୍କ ପାଇଁ ୱାକଥନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ବିଜୁ ପଟ୍ଟନାୟକ ଜଣେ ଭଲ କ୍ରୀଡାବିତ ଥିବାରୁ ଯୁବପୀଢିକୁ ଅନୁପ୍ରାଣିତ କରିବା ପାଇଁ ଏଭଳି ମିନି ମାରାଥନ ଆୟୋଜନ କରାଯାଇଥିବା କହିଛନ୍ତି, ବରିଷ୍ଠ ବିଜେଡି ନେତା ରଣେନ୍ଦ୍ର ପ୍ରତାପ ସ୍ବାଇଁ ।
ଗୁଣି ଗାରେଡ଼ିକୁ କେନ୍ଦ୍ରକରି ୨ ପରିବାର ମୁହାଁମୁହିଁ : ଜଣେ ମୃତ
ନନ୍ଦିଘୋଷ ବ୍ୟୁରୋ: ବଲାଙ୍ଗୀରରେ ଗୁଣି ଗାରେଡ଼ିକୁ କେନ୍ଦ୍ରକରି ୨ ପରିବାର ମୁହାଁମୁହିଁ ହୋଇଛନ୍ତି । ଏଥରେ ଜଣଙ୍କର ମୃତ୍ୟୁ ହୋଇଛି। ଅନ୍ୟ ୪ ଜଣ ଗୁରୁତର ହୋଇଛନ୍ତି । ତୁଷୁରା ଥାନା ଆଠଗାଁରେ ଘଟିଛି ଏଭଳି ଆଭାବନୀୟ ଘଟଣା । ମୃତକ ଜଣକ ହେଲେ ଶ୍ୟାମ ବାଗ । ଗୁରୁତର ମାନଙ୍କୁ ଉଦ୍ଧାର କରି ବଲାଙ୍ଗୀର ଭୀମଭୋଇ ମେଡିକାଲକୁ ପଠାଇଛି ପୋଲିସ । ଘଟଣାସ୍ଥଳରେ ଛାନଭିନ ଆରମ୍ଭ କରିଛି ତୁଷୁରା ପୋଲିସ । ଗୁଣି ଗାରେଡ଼ି ସନ୍ଦେହରେ ଘଟିଛି ଏଭଳି ଅଘଟଣ।
ଚାମ୍ପିୟନ୍ସ ଟ୍ରଫି ପରେ ଅବସର ନେବେ କି ରୋହିତ ? ଜାଣନ୍ତୁ କଣ କହିଲେ ଗମ୍ଭୀର
ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିଆକୁ ହରାଇ ଚାମ୍ପିୟନ୍ସ ଟ୍ରଫିର ଫାଇନାଲ ଟିକେଟ୍ ହାତେଇଛି ଭାରତ । ତେବେ ଦୀର୍ଘଦିନ ଧରି ରୋହିତଙ୍କ ଅବସର ଘୋଷଣାକୁ ନେଇ ଗଣମାଧ୍ୟମରେ ବେଶ ଚର୍ଚ୍ଚା ହେଉଥିଲା । ଯଦିଓ ସେ ସେତେବେଳେ ଖରାପ ଫର୍ମ ଦେଇ ଗତି କରୁଥିଲେ । ମାତ୍ର ଏବେ ଆଭରେଜ ଖେଳ ପ୍ରଦର୍ଶନ କରୁଥିବାବେଳେ ଦଳ ଚାମ୍ପିୟନ୍ସ ଟ୍ରଫିରେ ଟାଇଟଲ ହାତେଇବା ପରେ ଅବସର ନେବେ ବୋଲି କୁହାଯାଉଛି । ଟି-୨୦ ବିଶ୍ବକପ ପରେ ରୋହିତ ଟି-୨୦ରୁ ଅବସର ଘୋଷଣା କରିଥିଲେ । ଆଉ ଏବେ ଦିନିକିଆରୁ ଅବସର ନେବେ ବୋଲି ଚର୍ଚ୍ଚା ହେଉଥିବାବେଳେ ଏହାକୁ ନେଇ ମୁହଁ ଖୋଲିଛନ୍ତି ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର । ଏବେ ଦଳ ତାଙ୍କ ଅଧିନାୟକତ୍ବରେ ଦଳ ଯେଭଳି ପ୍ରଦର୍ଶନ କରୁଛି ଏହାକୁ ନେଇ ଆପଣମାନେ କୁହନ୍ତୁ ସେ ଅବସର ନେବା ଉଚିତ୍ କି ? ଗୌତମ ଗମ୍ଭୀର କହିଛନ୍ତି ଯେ ଚାମ୍ପିଅନ୍ସ ଟ୍ରଫିର ଫାଇନାଲ୍ ପାଖେଇ ଆସୁଛି… ଏବେ ଏହା ବିଷୟରେ ମୁଁ କ’ଣ କହିବି? କିନ୍ତୁ ମୁଁ ଗୋଟିଏ କଥା କହିବି ଯେ ଯଦି ତୁମର ଅଧିନାୟକ ଏହି ପ୍ରକାରର ଗତିରେ ବ୍ୟାଟିଂ କରନ୍ତି, ତେବେ ଏହା ଡ୍ରେସିଂ ରୁମକୁ ଏକ ବାର୍ତ୍ତା ଯେ ତାଙ୍କ ଭିତରେ ଏବେ ବି କ୍ରିକେଟ୍ ବାକି ଅଛି। ଗମ୍ଭୀର କହିଛନ୍ତି ଯେ ରୋହିତ ବଡ଼ ଇନିଂସ ଖେଳି ନଥିଲେ ମଧ୍ୟ ତାଙ୍କର ଇନିଂସ ପ୍ରଭାବଶାଳୀ ଥିଲା। ଆମେ ସମାନ ଆଧାରରେ ଆମର ଖେଳାଳିମାନଙ୍କୁ ମୂଲ୍ୟାଙ୍କନ କରୁ।
ସ୍କିଥ୍ କହିଲେ କାହିଁକି ହାରିଲା ଅଷ୍ଟ୍ରେଲିଆ
ନନ୍ଦିଘୋଷ ବ୍ୟୁରୋ: ମଙ୍ଗଳବାର ଆଇସିସି ଚମ୍ପିୟନ୍ସ ଟ୍ରଫିର ପ୍ରଥମ ସେମିଫାଇନାଲରେ ଅଷ୍ଟ୍ରେଲିଆକୁ ହରାଇ ଫାଇନାଲରେ ପହଞ୍ଚିଛି ଟିମ ଇଣ୍ଡିଆ । ଗତ ବିଶ୍ବକପ ଫାଇନାଲର ବଦଲା ନେଇଛି ଭାରତ । ଭାରତ ଆଗରେ ୨୬୫ ରନର ବିଜୟ ଲକ୍ଷ୍ୟ ରଖିଥିବାବେଳେ ୧୧ ବଲ ପୂର୍ବରୁ ଏହାକୁ ହାସଲ କରିଛି ରୋହିତ ବାହିନୀ । ତେବେ ଅଷ୍ଟ୍ରେଲିଆ ଦଳର ପରାଜୟକୁ ନେଇ ଅନେକ କାରଣ ସମ୍ପର୍କରେ ଆଲୋଚନା ହେଉଥିବାବେଳେ ମୁହଁ ଖୋଲିଛନ୍ତି ଅଧିନାୟକ ଷ୍ଟିଭ୍ ସ୍ମିଥ୍ । ପରାଜୟର କାରଣ କହିଛନ୍ତି ସ୍ମିଥ୍ । ସେ କହିଛନ୍ତି କି, ଦଳ ପରାଜୟର ଅନେକ ଗୁଡ଼ିକ କାରଣ ରହିଛି । ଆମେ ୨୮୦ ପରେ ସ୍କୋର କରିଥିଲେ ଫଳାଫଳ କିଛି ଭିନ୍ନ ହୋଇଥଆନ୍ତା । ସେପଟେ ଦଳର ଅଭିଜ୍ଞ ଖେଳାଳି ପାଟ କମିନ୍ସଙ୍କ ଅନୁପସ୍ଥିତି ବହୁତ କ୍ଷତି ପହଞ୍ଚାଇଛି । ବିଶ୍ବକପ ଜିତାଇଥିବା କମିନ୍ସଙ୍କ ଆହତ କାରଣରୁ ମୋତେ ଦଳର ଅଧିନାୟକ ପଦ ସମ୍ଭାଳିବାକୁ ପଡ଼ିଛି ।
📸📸 Snapshots after a phenomenal win 🙌#TeamIndia | #INDvAUS | #ChampionsTrophy pic.twitter.com/e8SLCT4Ob5
— BCCI (@BCCI) March 4, 2025
ଏହାସହ ସ୍ମିଥ କହିଛନ୍ତି କି, ବୋଲରମାନେ କଠିନ ପରିଶ୍ରମ କରିଛନ୍ତି । ଆମକୁ କିଛି ସ୍କୋର କରିବାର ଥିଲା । କିନ୍ତୁ ବ୍ୟାଟିଂ କରିବା ଏତେ ସହଜ ନଥିଲା । ହୁଏତ ଆମେ ଆଉ କିଛି ସ୍କୋର ଯୋଡ଼ି ପାରିଥାନ୍ତୁ । ମାତ୍ର ଆମର ଓ୍ବିକେଟର ପତନ ଘଟିଲା । ବଡ଼ ପାର୍ଟନରସିପ ହେଲାନି । ଆମେ ଇଂଲଣ୍ଡ ବିପକ୍ଷ ବଡ଼ ସ୍କୋରକୁ ଅତି ସହଜରେ ଚେଜ୍ କରିଥିଲୁ । ଆମର ବ୍ୟାଟ୍ସମ୍ୟାନମାନେ ଭଲ ପ୍ରଦର୍ଶନ କରିଥିଲେ । ମାତ୍ର ଏଥରକ ବ୍ୟାଟ୍ସମ୍ୟାନମାନେ ସେମିତି ଆଖିଦୃଷ୍ଟିଆ ପ୍ରଦର୍ଶନ କରିନାହାନ୍ତି । ସେପଟେ ରୋହିତ କୋହଲିଙ୍କୁ ବେଶ ପ୍ରଶଂସା କରିଛନ୍ତି । କହିଛନ୍ତି କି, ଆମେ ଯେଉଁ ଭାଗିଦାରୀ ଚାହୁଁଥିଲୁ ତାହା ହୋଇଛି । ଶ୍ରେୟସ ଏବଂ କୋହଲିଙ୍କ ପାର୍ଟନରସିପ ଆମକୁ ବେଶ ଲାଭଦାୟକ ହୋଇଛି ।
ନବୀନଙ୍କୁ ଭେଟିଲା ନବ ନିର୍ମାଣ କୃଷକ ସଂଗଠନ
ନନ୍ଦିଘୋଷ ବ୍ୟୁରୋ: ଧାନ କିଣା ଦୁର୍ନୀତିକୁ ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟିଲା ନବ ନିର୍ମାଣ କୃଷକ ସଂଗଠନ। ନବୀନ ନିବାସକୁ ଯାଇ ସଂଗଠନ ପକ୍ଷରୁ ଏକ ସ୍ମାରକ ପତ୍ର ବି ଦିଆଯାଇଛି। ଧାନ କିଣାରେ ବ୍ୟାପକ କଟନୀ ଛଟନୀ ହେଉଥିବାର ଅଭିଯୋଗ କରି ନବନିର୍ମାଣ କୃଷକ ସଂଗଠନ ଜଗତସିଂହପୁର, କଟକ, ଖୋର୍ଦ୍ଧା, ନୟାଗଡ଼, ଗଜପତିରେ ଜିଲ୍ଲା ସ୍ତରରେ ବିକ୍ଷୋଭ କରିଛି। ସଂଗଠନ ଅଭିଯୋଗ କରିଛି ଜିଲ୍ଲା ପ୍ରଶାସନ ଓ ମିଲରମାନେ ଗରିବ ଚାଷୀଙ୍କ ୫ ରୁ ୧୦ କେଜି ପର୍ଯ୍ୟନ୍ତ ଧାନ କାଟି ନେଉଛନ୍ତି। ପ୍ରତିବାଦ ସତ୍ତ୍ଵେ ସରକାର କି ପ୍ରଶାସନ ଆଦୌ ଧ୍ୟାନ ଦେଉ ନାହାନ୍ତି। ଏହା ବିରୁଦ୍ଧରେ ସଂଗଠନର ରାଷ୍ଟ୍ରୀୟ ସଂଯୋଜକ ୧୮ ଦିନ ହେଲା ଅନଶନ କରୁଛନ୍ତି। ନବୀନ ପଟ୍ଟନାୟକଙ୍କୁ ଭେଟି ଏ ସଂପର୍କରେ ଅବଗତ କରିଛନ୍ତି ନବନିର୍ମାଣ ସଂଗଠନର ରାଜ୍ୟ ସଂଯୋଜକ ଶେଷଦେବ ନନ୍ଦ ଓ ଯୁବ ଛାତ୍ର ସଂଗଠନ ରାଜ୍ୟ ସଂଯୋଜକ ମନଓ୍ବର ଅଲ୍ଲୀ। ବିଧାନସଭାରେ ଚାଷୀଙ୍କ ଏହି ସମସ୍ୟା ଉଠାଇବାକୁ ନବୀନ ପଟ୍ଟନାୟକ ପ୍ରତିଶୃତି ଦେଇଥିବା କହିଛନ୍ତି ଚାଷୀ ନେତା। ଅକ୍ଷୟ କୁମାରଙ୍କ ଅନଶନ ସ୍ଥଳକୁ ଏକ ପ୍ରତିନିଧି ମଣ୍ଡଳୀ ଯିବେ ବୋଲି ମଧ୍ୟ ନବୀନ ପଟ୍ଟନାୟକ କହିଛନ୍ତି।
ସବୁଠି ଉତ୍ସାହର ମାହୋଲ, ଆଜି ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୦୯ତମ ଜୟନ୍ତୀ
ନନ୍ଦିଘୋଷ ବ୍ୟୁରୋ: ଆଜି ମାର୍ଚ୍ଚ ୫ ତାରିଖ। ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୦୯ତମ ଜୟନ୍ତୀ। ରାଜ୍ୟସ୍ତରରୁ ଆରମ୍ଭ କରି, ନିର୍ବାଚନମଣ୍ଡଳୀ, ପୌରାଞ୍ଚଳ ଏବଂ ପଞ୍ଚାୟତ ସ୍ତରରେ ବିଜୁ ଜୟନ୍ତୀ ପାଳନ ଲାଗି ବିଜେଡି ପକ୍ଷରୁ ପ୍ରସ୍ତୁତି କରାଯାଇଛି। ଶଙ୍ଖ ଭବନରେ ମଧ୍ୟ ବିଜୁବାବୁଙ୍କ ଜୟନ୍ତୀ ପାଳନ କରାଯିବ। ଗାଁର ବିକାଶ ସହ ଘରେ ଘରେ ପାନୀୟ ଜଳ, ଶିକ୍ଷା, ସ୍ବାସ୍ଥ୍ୟ ଓ ମହିଳା ସଶକ୍ତୀକରଣ ପାଇଁ ସ୍ବପ୍ନ ଦେଖିଥିଲେ ବିଜୁ ପଟ୍ଟନାୟକ। ବିଜୁବାବୁଙ୍କର ସ୍ବପ୍ନକୁ ପୂରଣ କରିବାକୁ ବିଜୁ ଜନତା ଦଳ ପକ୍ଷରୁ ପ୍ରୟାସ ଜାରି ରହିଛି। ମା’କୁ ସମ୍ମାନ, ଗାଁକୁ କାମ କଥା କହିଥିଲେ ସ୍ଵର୍ଗତ ବିଜୁ ପଟ୍ଟନାୟକ। ଏହି ନୀତି ଆଦର୍ଶକୁ ନେଇ ବିଜୁ ଜନତା ଦଳ ପକ୍ଷରୁ ରାଜ୍ୟର ବିକାଶ ଲାଗି ସର୍ବଦା ପ୍ରୟାସ ଜାରି ରହିଛି। ରାଜ୍ୟର ବିଭିନ୍ନ ସ୍ଥାନରେ ବିଜୁ ବାବୁଙ୍କ ଜୟନ୍ତୀ ପାଳନ ଲାଗି ବିଜେଡି ପକ୍ଷରୁ ବ୍ଯାପକ ପ୍ରସ୍ତୁତି କରାଯାଇଛି। ପ୍ରତି ବର୍ଷ ପରି ଆଜି ଶଙ୍ଖ ଭବନ ଓ ସମସ୍ତ ନିର୍ବାଚନ ମଣ୍ଡଳୀରେ ବିଜୁ ଜୟନ୍ତୀ ପାଳନ କରିବ ବିଜୁ ଜନତା ଦଳ। ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ବି ଏହାକୁ ଜନସେବା ଓ ବିଜୁ ଆଦର୍ଶର ସ୍ମୃତିଚାରଣ ଭାବେ ପାଳନ କରିବ ବିଜେଡି। ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ସହ ବିଜୁ ବାବୁଙ୍କ ଅବଦାନ ବିଷୟରେ ଆଲୋଚନାର କାର୍ଯ୍ୟକ୍ରମ ରଖିଛି ବିଜୁ ଜନତା ଦଳ।
ଘରୋଇ ସ୍କୁଲରେ ପ୍ରହସନ ପାଲଟିଛି ଗରିବ ଛାତ୍ରଛାତ୍ରୀଙ୍କ ପାଇଁ ୨୫ ପ୍ରତିଶତ ସିଟ୍ ସଂରକ୍ଷଣ
ଭୁବନେଶ୍ବର: ଘରୋଇ ସ୍କୁଲଗୁଡ଼ିକରେ ଏବେ କେବଳ ପ୍ରହସନ ପାଲଟିଛି ଗରିବ ଛାତ୍ରଛାତ୍ରୀଙ୍କ ପାଇଁ ୨୫ ପ୍ରତିଶତ ସିଟ ସଂରକ୍ଷଣ । ଘରୋଇ ସ୍କୁଲ ଗୁଡିକ ଛାତ୍ରଛାତ୍ରୀଙ୍କୁ ମାଗଣା ଆଡମିଶନ କରାଇବା ବଦଳରେ ଜାଣିଶୁଣି ପ୍ରକ୍ରିୟାକୁ ବିଳମ୍ବିତ କରୁଥିବା ଅଭିଭାବକ ମହାସଂଘ ଅଭିଯୋଗ କରିଛି । ଏହାସହ ଏହି ଅନ୍ୟାୟକୁ ବିରୋଧ କରି ଜାତୀୟ ମାନବାଧିକାର କମିଶନଙ୍କ ଦ୍ୱାରସ୍ଥ ହୋଇଛନ୍ତି । ସେପଟେ ଶିକ୍ଷା ଅଧିକାର ଆଇନ କ୍ଷେତ୍ରରେ କାର୍ଯ୍ୟ କରୁଥିବା ଅନୁଷ୍ଠାନ ଗୁଡ଼ିକ ଏ ପ୍ରସଙ୍ଗରେ ସରକାର ବିଶେଷ ଦୃଷ୍ଟି ଦେବାକୁ ଦାବି କରିଛନ୍ତି ।
ପାରଦର୍ଶୀ ପୋର୍ଟାଲରେ ଆବେଦନରେ ମହାଘୋଟଲା । ଆବେଦନ ଓ ରେଜିଷ୍ଟ୍ରେସନ ସମୟ ଅବଧିକୁ ବିରୋଧ । ଗରିବ ପିଲାଙ୍କୁ ଆଡମିଶନରୁ ବାହାର କରିଦେବାକୁ ଚକ୍ରାନ୍ତ । ଜାତୀୟ ମାନବାଧିକାର କମିଶନଙ୍କ ଦ୍ଵାରସ୍ଥ ହେଲା ଅଭିଭାବକ ମହାସଂଘ । ଶିକ୍ଷା ଅଧିକାର ଆଇନ ବଳରେ ଘରୋଇ ସ୍କୁଲରେ ଗରିବ ପିଲାମାନେ ପାଠ ପଢ଼ିବା ପାଇଁ ପାରଦର୍ଶୀ ପୋର୍ଟାଲରେ ଆବେଦନରେ ବଡ଼ ଘୋଟଲା ଅଭିଯୋଗ ହୋଇଛି । ଏହି ପୋର୍ଟାଲରେ ଗରିବ ପିଲାଙ୍କ ଆବେଦନ ପାଇଁ ମାତ୍ର ୧୭ ଦିନ ରଖାଯିବା ଓ ଘରୋଇ ସ୍କୁଲର ରେଜିଷ୍ଟ୍ରେସନ ପାଇଁ ୭୦ ଦିନ ଦିଆଯିବାକୁ ଜୋରଦାର ବିରୋଧ କରିଛି ଅଭିଭାବକ ମହାସଂଘ । ଏହି ଅନ୍ୟାୟ ବିରୋଧରେ ଜାତୀୟ ମାନବାଧିକାର କମିଶନଙ୍କ ଦ୍ୱାରସ୍ଥ ହୋଇଛି ମହାସଂଘ । ମାନବାଧିକାର କମିଶନ ଏ ପ୍ରସଙ୍ଗରେ ହସ୍ତକ୍ଷେପ କରି ପିଲାଙ୍କ ଆବେଦନ ପ୍ରକ୍ରିୟାକୁ ତୁରନ୍ତ ଆରମ୍ଭ କରିବା ଦିଗରେ ପଦକ୍ଷେପ ନେବାକୁ ଅନୁରୋଧ କରାଯାଇଛି । ଗରିବ ପିଲାଙ୍କ ପାଇଁ ଉଦ୍ଦିଷ୍ଟ ଏହି ଶିକ୍ଷା ଅଧିକାର ଆଇନର ବିପରୀତ କାମ କରୁଥିବା ସରକାରୀ ଅଧିକାରୀଙ୍କ ବିରୋଧରେ ଲଢ଼େଇର ଚେତାବନୀ ଦିଆଯାଇଛି । କାରଣ ପୂର୍ବ ପ୍ରକ୍ରିୟା ଅପେକ୍ଷା ନୂତନ ପ୍ରକ୍ରିୟାରେ ପିଲାମାନଙ୍କର ଆଡମିସନ ସରିବା ବେଳକୁ ଜୁନ ଶେଷ ହୋଇଯିବ l ପିଲାଙ୍କ ତିନି ମାସ ସମୟ ବରବାଦ ହେବ । ପ୍ରକ୍ରିୟା ଯେତିକି ବିଳମ୍ବ ହେବ ଘରୋଇ ସ୍କୁଲମାନେ ତାର ସୁଯୋଗ ନେଇ ଅନ୍ୟ ପିଲାଙ୍କୁ ଆଡମିସନ କରାଇ ନେବେ ।
ପୂର୍ବ ବର୍ଷମାନଙ୍କରେ ମଧ୍ୟ ସରକାରୀ ଅଧିକାରୀଙ୍କ ପରୋକ୍ଷ ସହାୟତାରେ ଘରୋଇ ବିଦ୍ୟାଳୟ ଗୁଡ଼ିକ ଏଭଳି ଘୋଟାଲା କରିଆସୁଛନ୍ତି । ଶହ ଶହ ଅଭିଭାବକ ଆଡମିସନ ପାଇଁ ସ୍କୁଲ ଦୌଡ଼ି ଦୌଡ଼ି ନୟାନ୍ତ ହୋଇଥିଲେ । ଅସାଧୁ ବା ମୁନାଫାଖୋର ମନୋଭାବ ଥିବା ଅଫିସରଙ୍କ ଯୋଗୁଁ ଏହି ଯୋଜନା ବାଟବଣା ହେଉଥିବା ଅଭିଯୋଗ ହୋଇଛି । ଗରିବ ପିଲାମାନେ ସଠିକ ସ୍କୁଲ ଓ ସଠିକ ସମୟରେ ଆଡମିସନ ପାଇବାରୁ ବଞ୍ଚିତ ହେଉଛନ୍ତି । ତେଣୁ ଶିକ୍ଷା ଅଧିକାର ଆଇନ କିଭଳି ସଠିକ ଢଙ୍ଗରେ ରାଜ୍ୟରେ କାର୍ଯ୍ୟକାରୀ ହେବ ସେ ଦିଗରେ ଧ୍ୟାନ ଦେଇ ସରକାର କାର୍ଯ୍ୟ କରନ୍ତୁ ବୋଲି ଦାବି ହୋଇଛି ।
ଘରୋଇ ସ୍କୁଲରେ ସ୍ୱଚ୍ଛ ଓ ପର୍ଯ୍ୟାପ୍ତ ଭାବେ ଅଭିଭାବକଙ୍କ ସ୍ୱାର୍ଥରେ ଯୋଜନାର ଶତ ପ୍ରତିଶତ ରୂପାୟନ ପାଇଁ ସରକାର ସ୍ୱତନ୍ତ୍ର ମନିଟରିଂ ବ୍ୟବସ୍ଥା ପାଇଁ ଦାବି ହୋଇଛି । ସ୍କୁଲମାନଙ୍କର ସ୍ୱୀକୃତି ତିନି ବର୍ଷରୁ ପାଞ୍ଚ ବର୍ଷ ପାଇଁ ପାଇଥାନ୍ତି । ସେମାନେ ପୋର୍ଟାଲ ମାଧ୍ୟମରେ ପୂର୍ବରୁ ବର୍ଷ ବର୍ଷ ଧରି ପିଲାଙ୍କୁ ମଧ୍ୟ ଆରଟିଇ କୋଟାରେ ପାଠ ପଢ଼ାଉଛନ୍ତି । ସେମାନଙ୍କୁ ପୁଣି ଏପରି ପଞ୍ଜିକରଣ ଆବଶ୍ୟକ କଣ ବୋଲି ପ୍ରଶ୍ନ ହୋଇଛି ।
ବିଜେଡି ସରକାରରେ ସଶକ୍ତ, ବିଜେପି ସରକାରରେ କୋମା…
ଭୁବନେଶ୍ବର: ବିଜେଡ଼ି ସରକାରରେ ସଶକ୍ତ ଓରେରା ବିଜେପି ସରକାରରେ କୋମା ଅବସ୍ଥାରେ । ରିଏଲ ଇଷ୍ଟେଟ କାରବାରକୁ ସ୍ବଚ୍ଛ କରିବାକୁ କେନ୍ଦ୍ରୀୟ ଆଇନ ରେରା ଓଡ଼ିଶା କାର୍ଯ୍ୟକାରୀ କରିବାରେ ପ୍ରଥମ ରାଜ୍ୟ ଥିଲା । ହେଲେ ଏବେ ଓରେରାରେ କେହି ଅଧ୍ୟକ୍ଷ ନାହାନ୍ତି, ସରକାର କାହାକୁ କାମଚଳା ଅଧ୍ୟକ୍ଷ ବି କରିନାହାନ୍ତି । ଅଧ୍ୟକ୍ଷଙ୍କ ବିନା ରେରା କୋର୍ଟ ଅଚଳ ହୋଇପଡ଼ିଛି । ପୁଣି ଓରେରାରେ ସଚିବ ନିଯୁକ୍ତିକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ଏନେଇ ସରକାରଙ୍କ ଆନ୍ତରିକତାର ଅଭାବ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ରିଏଲ ଇଷ୍ଟେଟ ରେଗୁଲେଟୋରୀ ଆକ୍ଟ କାର୍ଯ୍ୟକାରୀ କରିବାରେ ଓଡ଼ିଶା ସାରା ଦେଶରେ ଆଗୁଆ ଥିବା ବେଳେ ଏବେ ଏହା ଅଚଳ ଅବସ୍ଥାରେ । ଓରେରା ଅଧ୍ୟକ୍ଷ ସିଦ୍ଧାନ୍ତ ଦାସ ପଦ ଛାଡ଼ିବା ପରେ କାହାକୁ ଅଧ୍ୟକ୍ଷ ପଦରେ ନିଯୁକ୍ତି ଦେଇନାହାନ୍ତି ରାଜ୍ୟ ସରକାର । ସିଦ୍ଧାନ୍ତ ଦାସ ପଦ ଛାଡ଼ିବା ପାଇଁ ୩ ମାସ ତଳୁ ନୋଟିସ ଦେଇଥିଲେ ବି ସରକାର ନୂଆ ଅଧ୍ୟକ୍ଷ ପାଇଁ ପ୍ରକ୍ରିୟା ଆରମ୍ଭ କଲେ ନାହିଁ । ନୂଆ ଅଧ୍ୟକ୍ଷ ଚୟନ ପାଇଁ ହାଇକୋର୍ଟ ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ଏକ କମିଟି ହୋଇଛି, ଯେଉଁଥିରେ ନଗର ଉନ୍ନୟନ ସଚିବ ଆବାହକ ଓ ଆଇନ ସଚିବ ସଦସ୍ୟ ଅଛନ୍ତି । ଅଧ୍ୟକ୍ଷ ନିଯୁକ୍ତ ପ୍ରକ୍ରିୟା ସାରିବାକୁ ସର୍ବନିମ୍ନ ୪ ମାସ ସମୟ ଲାଗିବ । ରିଏଲ ଇଷ୍ଟେଟ କାରବାରକୁ ସ୍ବଚ୍ଛ କରିବା ସହ କ୍ରେତାଙ୍କୁ ସଶକ୍ତ କରିବାକୁ ସରକାରଙ୍କ ଆନ୍ତରିକତାର ଅଭାବ ସ୍ପଷ୍ଟ ହୋଇଛି । ଏପରିକି ଜଣେ କାମଚଳା ଅଧ୍ୟକ୍ଷ ନିଯୁକ୍ତି ଦେବାକୁ ବି ସରକାର ଉଚିତ ମନେ କରିନାହାନ୍ତି ।
ଓରେରା କୋର୍ଟରେ ଅଧ୍ୟକ୍ଷ ନଥିଲେ ରେରାର କୌଣସି ମିଟିଂ ସମ୍ଭବ ନୁହେଁ । ବିଲଡ଼ରମାନେ ମଧ୍ୟ ପ୍ରକଳ୍ପ ପଞ୍ଜୀକରଣ କରିପାରିବେ ନାହିଁ । ଠକାମିର ଶିକାର କ୍ରେତାମାନେ ମଧ୍ୟ କୌଣସି ମାମଲା ରୁଜୁ କରିପାରିବେ ନାହିଁ । ରେରାରେ ଏପରି ଅଚଳବସ୍ଥା ଥିବା ବେଳେ ଓରେରା ସଚିବ ନିଯୁକ୍ତି ବି ବିବାଦ ଘେରରେ । ଜାନୁଆରୀ ୨୨ରେ ଓରେରାରେ ଖାଲିଥିବା ସଚିବ ପଦବୀ ଓ ୪ ବର୍ଷ ହେଲା ଯୁଗ୍ମ ସଚିବ ପଦବୀରେ ଜଣେ ଥିବାରୁ ଏହି ଦୁଇଟି ପଦ ପାଇଁ ଅଫିସର ଦେବା ପାଇଁ ସାଧାରଣ ପ୍ରଶାସନ ବିଭାଗକୁ ଚିଠି ଲେଖିଲେ ନଗର ଉନ୍ନୟନ ସଚିବ । ୩ ବର୍ଷରୁ ଅଧିକ ଜଣେ ଗୋଟିଏ ପଦବୀରେ ରହିବାର ବ୍ୟବସ୍ଥା ନଥିବାରୁ ଯୁଗ୍ମ ସଚିବଙ୍କୁ ବି ବଦଳି କରିବାକୁ ସୁପାରିଶ କରିଥିଲେ ବିଭାଗୀୟ ସଚିବ । ହେଲେ ନଗର ଉନ୍ନୟନ ସଚିବଙ୍କ ସୁପାରିଶକୁ ଅଣଦେଖା କରି ୪ ବର୍ଷ ହେଲା ଯୁଗ୍ମ ସଚିବ ପଦବୀରେ ଥିବା ଅଧିକାରୀଙ୍କୁ ସଚିବ ପଦରେ ବସାଇ ଦେଲେ ସରକାର । ଏହା କାହା ସ୍ବାର୍ଥରେ ହୋଇଛି ବୋଲି ପ୍ରଶ୍ନ ଉଠିବାରେ ଲାଗିଛି ।
ଆଇନର ଫାଶରେ ଛନ୍ଦି ହୋଇଥିବା ଯୋଗୁଁ ଆପାର୍ଟମେଣ୍ଟ କିଣାବିକା ପ୍ରାୟ ଦୁଇ ବର୍ଷ ହେଲା ବନ୍ଦ ରହିଛି । ପାର୍ଟ ପ୍ଲଟ ନେଇ ବି କିଛି ବାଟ ଫିଟୁନାହିଁ । ଏନେଇ ସରକାରଙ୍କ ଆନ୍ତରିକତାର ଅଭାବ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।