ଗୋଟିଏ ମାଲବାହୀ ଟ୍ରେନ ଦୁଇ ଥର ଦୁର୍ଘଟଣା

ଚମ୍ପୁଆ : ଗୋଟିଏ ମାଲବାହୀ ଟ୍ରେନର ଦୁର୍ଘଟଣାର କିଛି ଘଣ୍ଟା ପରେ ପୁଣି ଆଉ ଥରେ  ଦୁର୍ଘଟଣା। ଦକ୍ଷିଣ ପୂର୍ବ ରେଳପଥ ଦେଓଝର ଏବଂ ମୂର୍ଗା ମହାଦେବ ରୋଡ଼ ଷ୍ଟେସନ ମଧ୍ୟରେ ଏହି ଦୁର୍ଘଟଣା ଘଟିଛି। ମାଲବାହୀ ଟ୍ରେନଟି ଦେଓଝର ସାଇଡିଂରୁ ଆଇରନ୍ ଓର୍ ବୋଝେଇ କରି ପାରାଦୀପ ଅଭିମୁଖେ ଯାଉଥିବା ବେଳେ ମୂର୍ଗା ମହାଦେବ ରୋଡ଼ ଷ୍ଟେସନ ନିକଟରେ ଗୋଟିଏ ୱାଗନ ଚକରୁ ଅଲଗା ହୋଇ ଲାଇନଚ୍ୟୁତ ହୋଇଥିଲା। ସନ୍ଧ୍ୟାରେ ଦୁର୍ଘଟଣାଗ୍ରସ୍ତ ୱାଗନକୁ ଅଲଗା କରି ଦେଓଝର ପଟକୁ ଥିବା ୱାଗନ ଗୁଡ଼ିକୁ ନେଇ ଟ୍ରେନଟି ଦେଓଝର ଷ୍ଟେସନକୁ ଫେରୁଥିଲା। ତେବେ ଷ୍ଟେସନର କିଛି ବାଟ ପୂର୍ବରୁ ଆଉ ୨ଟି ୱାଗନ ଡିରେଲ୍ ହୋଇ ଓଲଟି ପଡ଼ିଥିଲା। ପୁରୀ-ବଡବିଲ ଇଣ୍ଟରସିଟି ଏକ୍ସପ୍ରେସ ଓ ଟାଟାନଗର-ବ୍ରହ୍ମପୁର ବନ୍ଦେ ଭାରତ ଏକ୍ସପ୍ରେସ ଓ ଅନ୍ୟ ସାପ୍ତାହିକ ଟ୍ରେନ ଏହି ରୁଟ ଦେଇ ଯା-ଆସ କରୁଛି। ଏହି ଘଟଣା ପରେ ରେଳ ସୁରକ୍ଷା ନେଇ ପ୍ରଶ୍ନ ଉଠିଛି। ତେବେ ଗୋଟିଏ ଲାଇନରେ ଗୋଟିଏ ଟ୍ରେନ ଦୁଇ ଦୁଇ ଥର ଦୁର୍ଘଟଣା ଗ୍ରସ୍ତ କାହିଁକି ହେଲା ସେନେଇ ରେଳବାଇ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଯଥାଶୀଘ୍ର ରେଳ ଟ୍ରାଫିକ ସ୍ଵାଭାବିକ କରିବା ପାଇଁ ରେଳ କର୍ତ୍ତୃପକ୍ଷ ଚେଷ୍ଟା ଚଳାଇଛନ୍ତି ।