ନନ୍ଦିଘୋଷ ବ୍ୟୁରୋ: ସାମ୍ନାକୁ ଆସିଲା ଡାକ୍ତରୀ ଛାତ୍ରୀ ଚନ୍ଦ୍ରିକା ହେମ୍ବ୍ରମଙ୍କ ମୃତ୍ୟୁ ଘଟଣାରେ ଆଉ ଏକ ତଥ୍ୟ। ଭଉଣୀ ଚନ୍ଦ୍ରିକାଙ୍କ ବାବଦରେ ମୁହଁ ଖୋଲିଛନ୍ତି ମାମୁ ପୁଅ ଭାଇ । ତାଙ୍କ ଭଉଣୀକୁ ମାରି କାଠଯୋଡିରେ ଫୋପାଡ଼ି ଦିଆଯାଇଛି ବୋଲି ମାମୁ ପୁଅ ଭାଇ ଭଗବାନ ହାଁସଦା ଅଭିଯୋଗ କରିଛନ୍ତି ।
ଏହାସହ ଭୁବନେଶ୍ୱରରେ ରହୁଥିବା ଭଗବାନ କହିଛନ୍ତି ଭଉଣୀ ମନର କଥା । ସବୁବେଳେ ହସଖୁସିରେ ରହୁଥିବା ଚନ୍ଦ୍ରିକା ଘଟଣା ପୂର୍ବରୁ ଭୁବନେଶ୍ୱର ଯାଇଥିବା ବେଳେ ସେଠାରେ ତାଙ୍କ ଭାଇଙ୍କ ସହିତ ୪ ତାରିଖରେ ମୁଭି ଦେଖିବାକୁ ଯିବେ ବୋଲି ଫାଇନାଲ କରିଥିଲେ, ଏବଂ ଚନ୍ଦ୍ରିକା ମୁହଁ ଶୁଖାଇ ବସିଥିବା ବେଳେ ଭାଇ କାରଣ ପଚାରିବାରୁ ଜୀବନରେ କାହାକୁ ସହଜରେ ବିଶ୍ୱାସ କରିବୁ ନାହିଁ ବୋଲି ତାଙ୍କ ଭାଇଙ୍କୁ କହିଥିଲେ ଚନ୍ଦ୍ରିକା।
କେବଳ ସେତିକି ନୁହେଁ ନିଜ ବାହାଘରକୁ ନେଇ ବେଶ ଖୁସି ରହିବା ସହିତ କିଭଳି ବାହାଘର ହେବ ସେ ନେଇ ମଧ୍ୟ ତାଙ୍କ ସହିତ ଆଲୋଚନା କରୁଥିଲେ । ଏପରିକି ଅନେକ ଥର ଚନ୍ଦ୍ରିକା ତାଙ୍କ ପୁରୁଷ ବନ୍ଧୁଙ୍କ ସହିତ ଭୁବନେଶ୍ୱର ବୁଲିବାକୁ ଯାଇଥିବା କଥା କହିବା ସହ ଚନ୍ଦ୍ରିକାଙ୍କ ମୃତ୍ୟୁକୁ ନେଇ ପ୍ରଶ୍ନ ଉଠାଇଛନ୍ତି ଭଗବାନ ।
ସେପଟେ କଟକ ଡିସିପି ମଧ୍ୟ ନୂଆ ସୂଚନା ଦେଇ କହିଛନ୍ତି, ଚନ୍ଦ୍ରିକା ସେ ଦିନ ଓଲା ଗାଡିରେ ଆସି ତ୍ରିଶୂଳିଆରେ ଓହ୍ଲାଇଥିଲେ। ପରେ ସେ ବ୍ରିଜ ଉପରକୁ ଆସିଥିବା ସନ୍ଦେହ କରାଯାଉଛି । ତ୍ରିଶୂଳିଆ ବଜାରରୁ ସିସିଟିଭି ଫୁଟେଜ୍ ମିଳିଥିବା ବେଳେ ଯୁବତୀଙ୍କ ପ୍ରାଥମିକ ଶବ ବ୍ୟବଚ୍ଛେଦ ରିପୋର୍ଟ ମିଳିଛି।
ମୋବାଇଲରୁ କିଛି ତଥ୍ୟ ମିଳୁଛି । ସେ ଆହୁରି ମଧ୍ୟ କହିଛନ୍ତି ଯେ ପରିବାରର ଅଭିଯୋଗ ଉପରେ ପୁରୁଷ ବନ୍ଧୁଙ୍କୁ ଖୋଜା ଚାଲିଛି । ମିଳିଥିବା କାଗଜପତ୍ର ଯାଞ୍ଚ ଚାଲିଛି। ସ୍ୱତନ୍ତ୍ର ଟିମ ତଦନ୍ତ କରୁଛନ୍ତି ଓ ତଦନ୍ତରେ ଭଲ ଅଗ୍ରଗତି ହେଉଛି ବୋଲି କଟକ ଡିସିପି କହିଛନ୍ତି।
