ନନ୍ଦିଘୋଷ ବ୍ୟୁରୋ : ଭକ୍ତି, ଶ୍ରଦ୍ଧା ଓ ନିଷ୍ଠାର ଉତ୍ସବ ଛଟ୍ । ସୂର୍ଯ୍ଯଦେବ ଓ ଛଟୀ ମୟାଙ୍କୁ ଶ୍ରଦ୍ଧାଳୁ ଦେଲେ ନୈବେଦ୍ଯ । ଭୁବନେଶ୍ବର କୁଆଖାଇ ବାଲିଯାତ୍ରା ପଡ଼ିଆରେ ସକାଳୁ ସକାଳୁ ଜମିଲା ଭିଡ଼ । ଉଦିତ ସୂର୍ଯ୍ଯଙ୍କୁ ଅର୍ଘ୍ଯ ପ୍ରଦାନ କଲେ ବିହାରୀ ଭାଷାଭାଷୀ ଶ୍ରଦ୍ଧାଳୁ । ସୂର୍ଯ୍ୟଦେଵ ଓ ଛଟୀ ମେୟାଙ୍କୁ ପୂଜା କରି ଆଶିଷ ଗ୍ରହଣ କରିଛନ୍ତି ସଭିଏ । ଏଥିପାଇଁ କୁଆଖାଇ ନଦୀ ପଠାରେ ବିଶ୍ବାସ ଅନୁଷ୍ଠାନ ପକ୍ଷରୁ ଆୟୋଜିତ ହୋଇଥିଲା ଭବ୍ଯ ଉତ୍ସବ । ମାଆ ମାନେ ଏହି ବ୍ରତ ପାଳନ କରି ପରିବାର ସୁସ୍ଥତା, ସୁଖ, ସମୃଦ୍ଧି, ସୁରକ୍ଷା କାମନା କରିଛନ୍ତି । ବିହାର, ଝାଡ଼ଖଣ୍ଡ, ଛତିଶଗଡ଼ ଅଧିବାସୀମାନେ ଏକାଠି ହୋଇ ଏହି ଉତ୍ସବକୁ ପାଳନ କରିଥିବାବେଳେ ଏଥିରେ ସାମିଲ ହୋଇଥିଲେ ମୁଖ୍ଯମନ୍ତ୍ରୀ ମୋହନ ଚରଣ ମାଝୀ ।
ରାଉରକେଲା ସହରର ବିଭିନ୍ନ ନଦୀ କୂଳ ଓ ପୋଖରୀ କୂଳରେ ଭକ୍ତମାନେ ଆଜି ସକାଳେ ଶ୍ରଦ୍ଧା ଓ ନିଷ୍ଠାର ସହ ଛଟପୂଜା ପାଳନ କରିଛନ୍ତି । ଭକ୍ତମାନେ ଆଜି ଉଦିତ ସୂର୍ଯ୍ୟ ଦେବତାଙ୍କୁ ପୁଜାର୍ଚ୍ଚନା କରିଛନ୍ତି । ଗତକାଲି ସନ୍ଧ୍ୟାରେ ଭକ୍ତମାନେ ବିଭିନ୍ନ ଫଳମୂଳ ଆଣି ଅସ୍ତ ଗାମୀ ସୁର୍ଯ୍ୟ ଦେବତାଙ୍କୁ ଅର୍ଘ୍ଯ ଅର୍ପଣ କରି ବିଦାୟ ଜଣାଇଥିଲେ । ଏଥିପାଇଁ କୋଏଲ ନଦୀ ଓ ବ୍ରାହ୍ମଣୀ ନଦୀ କୁଳ ସହ ଶଙ୍ଖ ନଦୀ କୂଳ ଓ ପୋଖରୀ କୂଳରେ ଜମିଥିଲା ଭିଡ଼ । ଗତ ୪ଦିନ ଧରି ଏହି ବ୍ରତ ଆରମ୍ଭ ହୋଇଥିବା ଏହି ପୂଜାର ଶେଷ ଦିନରେ ଉଦିତ ସୂର୍ଯ୍ଯଙ୍କୁ ଅର୍ଘ୍ୟ ପ୍ରଦାନ କରିଛନ୍ତି ଶ୍ରଦ୍ଧାଳୁ ।
