କଂଗ୍ରେସ ବିଧାୟକଙ୍କ ବିସ୍ଫୋରକ ବୟାନ, ଝାଡଖଣ୍ଡର ହେମନ୍ତ ସୋରେନ ସରକାରକୁ ଭାଙ୍ଗିବାକୁ ଉଦ୍ୟମ
ଝାଡଖଣ୍ଡ: ଝାଡଖଣ୍ଡର ହେମନ୍ତ ସୋରେନ ସରକାରକୁ ଭାଙ୍ଗିବା ଲାଗି ହୋଇଥିଲା ବଡ଼ ଷଡଯନ୍ତ୍ର । ଜଣେ କଂଗ୍ରେସ ବିଧାୟକ ଦେଇଛନ୍ତି ଚାଞ୍ଚଲ୍ୟକର ବୟାନ । ସେ କହିଛନ୍ତି ଜେଏମଏମ, କଂଗ୍ରେସ, ଆରେଜେଡି ମେଣ୍ଟ ସରକାରକୁ ଭାଙ୍ଗିବା ଲାଗି ତାଙ୍କୁ ୧ କୋଟି ଟଙ୍କା ଯଚା ଯାଇଥିଲା । ଏହା ସହ ନୂଆ ସରକାର ହେଲେ ତାଙ୍କୁ ମନ୍ତ୍ରୀପଦ ମିଳିବ ବୋଲି କୁହାଯାଇଥିଲା । ସରକାର ଭାଙ୍ଗିବା ଲାଗି କିଛି ଦିନ ତଳୁ ଉଦ୍ୟମ ହେଉଥିଲା ଏବଂ ୩ ଅଜଣା ବ୍ୟକ୍ତି ତାଙ୍କ ନିକଟକୁ ବାରମ୍ବାର ଅନୁରୋଧ କରିଥିଲେ ବୋଲି କହିଛନ୍ତି କୋଲେବିରା ଆସନର ବିଧାୟକ ନମନ ବିକ୍ସାଲ କୋଙ୍ଗାରି ।
ସେ କହିଛନ୍ତି ଏହି ୩ ବ୍ୟକ୍ତି ବିଭିନ୍ନ ଦଳୀୟ ସମର୍ଥକଙ୍କ ଜରିଆରେ ତାଙ୍କୁ ୬ ଥରରୁ ଅଧିକ ଥର ଅନୁରୋଧ କରିଥିଲେ ସରକାର ଭାଙ୍ଗିବା ଷଡଯନ୍ତ୍ରରେ ସାମିଲ ହେବା ଲାଗି । ଏହା ସହ ନାନା ଲୋଭନୀୟ ପ୍ରତିଶ୍ରୁତି ମଧ୍ୟ ଦେଇଥିଲେ । ଏହି ୩ ବ୍ୟକ୍ତି ଥରେ ନଗଦ ୧ କୋଟି ଟଙ୍କା ଦେବାକୁ କହିବା ପରେ ସେ ଏନେଇ କଂଗ୍ରେସ ବିଧାୟକ ଦଳ ନେତା ଆଲମଗିର ଆଲାମ, ଝାଡଖଣ୍ଡ ଦାୟିତ୍ୱରେ ଥିବା ଦଳର ନେତା ଆରପିଏନ ସିଂହ ଓ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଅବଗତ କରାଇଥିଲେ ।
କୋଙ୍ଗାରି ଆହୁରି ଅଭିଯୋଗ କରିଛନ୍ତି ଏହି ୩ ବ୍ୟକ୍ତି ବିଜେପି ଲାଗି କାମ କରୁଥିଲେ ବୋଲି କହିଥିଲେ । ସରକାରକୁ ଭାଙ୍ଗିବା ଷଡଯନ୍ତ୍ରରେ ପୂର୍ବରୁ ଗିରଫ ହୋଇଥିଲେ ଅଭିଷେକ ଦୁବେ, ଅମିତ ସିଂ ଓ ନିବାରଣ ପ୍ରସାଦ ମହାତୋ । କଂଗ୍ରେସ ନେତା ତଥା ବେର୍ମୋ ବିଧାୟକ କୁମାର ଜୟମଙ୍ଗଳଙ୍କ ଅଭିଯୋଗ କ୍ରମେ ପୋଲିସ ମାମଲା ରୁଜୁ କରିଥିଲା ।
