ଭୁବନେଶ୍ବର : ନଭେମ୍ବର ୨୫ରୁ ବରଗଡ଼ ଜିଲ୍ଲାରୁ ଆରମ୍ଭ ହେବ ଖରିଫ ଋତୁ ପାଇଁ ଧାନ କିଣା। ଧାନକିଣା ପାଇଁ ପଞ୍ଜୀକରଣରୁ ବଞ୍ଚିତ ଚାଷୀଙ୍କ ପାଇଁ ଚିନ୍ତା କରୁଛନ୍ତି ସରକାର। ଏଥର ସମସ୍ତ ସୁବିଧା ସହିତ ୩୨ଟି ମଡେଲ ମଣ୍ଡିରେ ଧାନ କିଣାଯିବ। କେନ୍ଦ୍ରୀୟ ଢାଞ୍ଚାରେ ରାଜ୍ୟ ସରକାର ଆଣିବେ ସ୍ବତନ୍ତ୍ର ସମବାୟ ନୀତି। ଏହା ପୂର୍ବରୁ ରାଜ୍ୟବ୍ୟାପୀ ମତାମତ ସଂଗ୍ରହ ପରେ ଭୁବନେଶ୍ବରରେ ଅନୁଷ୍ଠିତ ହୋଇଛି କର୍ମଶାଳା। ଖୁବଶୀଘ୍ର ଏହାକୁ କ୍ୟାବିନେଟରେ ଅନୁମୋଦନ କରାଯିବ। ଉନ୍ନତ ଭିତ୍ତିଭୂମି, ଟେକ୍ନୋଲୋଜିର ବ୍ୟବହାର, ସମସ୍ତ ପ୍ୟାକ୍ସ ଓ ଲ୍ୟାମ୍ପସକୁ ଏକତ୍ରୀକରଣ ଜରିଆରେ ଉନ୍ନତ ସମବାୟ ସେବା ପହଞ୍ଚାଇବା ନୂଆ ନୀତିର ମୁଖ୍ୟ ଉଦ୍ଦେଶ୍ୟ ବୋଲି କହିଛନ୍ତି ବିଭାଗୀୟ ମନ୍ତ୍ରୀ।
ନୂଆ କରି ଆସିବାକୁ ଥିବା ସମବାୟ ନୀତିରେ ସ୍ବଚ୍ଛତାକୁ ଅଧିକ ଗୁରୁତ୍ବ ଦିଆଯାଉଛି। ଚାଷୀଙ୍କ ଋଣ ସହ ଆଧାର ଲିଙ୍କ, ସବୁ ସମବାୟ ସମିତିର ନିଜସ୍ବ ଗୃହ, ସିସିଟିଭି କ୍ୟାମେରା ଲାଗାଇବାକୁ ନୂଆ ନୀତିରେ ବ୍ୟବସ୍ଥା ହୋଇଛି। ହେଲେ ସମସ୍ତ ସମବାୟ ବିଭାଗ କର୍ମଚାରୀଙ୍କୁ ସରକାର ଦରମା ଦେବାକୁ ଦାବି କରିଛି ସମବାୟ ଫେଡେରେସନ। ସମବାୟ କର୍ମଚାରୀଙ୍କୁ କ୍ୟାଡରଭୁକ୍ତ କରି ସେମାନଙ୍କ କାର୍ଯ୍ୟଧାରାକୁ ସରକାର ଅନୁଧ୍ୟାନ କରିବାକୁ ଦାବି ହୋଇଛି। ଏବେ ଖରିଫ ଧାନ କିଣା ଗୁରୁତ୍ବପୂର୍ଣ୍ଣ ଥିବାରୁ ମଣ୍ଡିରେ କିପରି ଚାଷୀଙ୍କ ପାଇଁ ସମସ୍ତ ସୁବିଧା ଉପଲବ୍ଧ ହେବ, ତା ଉପରେ ଗୁରୁତ୍ବ ଦିଆଯାଉଛି ବୋଲି କହିଛନ୍ତି ବିଭାଗୀୟ ସଚିବ। ୨୦୨୧ରେ କେନ୍ଦ୍ର ସରକାର ସମବାୟକୁ ସ୍ବତନ୍ତ୍ର ମନ୍ତ୍ରାଳୟର ମାନ୍ୟତା ଦେଇଛନ୍ତି। ଗାଁ ଗାଁରେ ସମବାୟ ଜରିଆରେ ଉଦ୍ୟୋଗୀ ସୃଷ୍ଟି କରିବା, ସେମାନଙ୍କ ପାଇଁ ମାର୍କେଟ ସ୍ଥିର କରିବା ସହ ଗ୍ରାମ୍ୟ ଅର୍ଥନୀତିକୁ ସୁଦୃଢ଼ କରିବାକୁ ରୋଜଗାର ବଢ଼ାଇବା ଉଦ୍ଦେଶ୍ୟରେ ରାଜ୍ୟ ସରକାର ଆଣୁଛନ୍ତି ସ୍ବତନ୍ତ୍ର ନୀତି।
