CWG 2022: ରିଲେ ଫାଇନାଲରେ ଆଜି ଦୌଡିବେ ଦୂତୀ-ଶ୍ରାବଣୀ

ବର୍ମିଂହାମ: ଆଜି ରାଜ୍ୟଗୋଷ୍ଠୀ କ୍ରୀଡ଼ାରେ ଟ୍ରାକରେ ଦୌଡ଼ିବେ ଦୁଇ ଓଡ଼ିଆ  । ସ୍ପ୍ରିଣ୍ଟର ଦୂତୀଚାନ୍ଦ ଓ ଶ୍ରାବଣୀ ନନ୍ଦଙ୍କ ଉପରେ ଦେଶବାସୀଙ୍କ ନଜର । ସନ୍ଧ୍ୟା ୫ଟା ୨୦ରେ ଟ୍ରାକରେ ଦୌଡ଼ିବେ ଦୁଇ ଓଡ଼ିଆ  । ୪×୧୦୦ ରିଲେ ଫାଇନାଲରେ ଦୌଡ଼ିବେ । ଦୂତୀଚାନ୍ଦ ଓ ଶ୍ରାବଣୀଙ୍କ ସହ ହିମା ଦାସ ଓ ଜ୍ୟୋତି ୟାରାଜି ମଧ୍ୟ ୪×୧୦୦ ରିଲେ ଫାଇନାଲରେ ଭାରତ ପାଇଁ ପ୍ରତିନିଧିତ୍ବ କରିବେ । ରିଲେ ପ୍ରଥମ ହିଟରେ ଭାରତ ଭଲ ପ୍ରଦର୍ଶନ କରି ଦ୍ବିତୀୟ ସ୍ଥାନରେ ରହି ଫାଇନାଲ ଟିକେଟ୍ ହାତେଇଛି  ।

ରାଜ୍ୟଗୋଷ୍ଠୀ କ୍ରୀଡାରେ ଭାରତକୁ ମିଳିଚାଲିଛି ସଫଳତା । ମୋଟ୍ ୪୦ଟି ପଦକ ସହ ମେଡାଲ ତାଲିକାରେ ପଞ୍ଚମ ସ୍ଥାନରେ ଭାରତ । ଏ ପର୍ଯ୍ୟନ୍ତ ମୋଟ୍ ୧୩ଟି ସୁନା, ୧୧ଟି ରୂପା ଓ ୧୬ଟି ବ୍ରୋଞ୍ଜ ପଦକ ଦେଶ ନାଁରେ ହୋଇଛି । କମନୱେଲ୍ଥ ଗେମ୍ସର ନବମ ଦିନରେ ସର୍ବାଧିକ ୧୪ଟି ମେଡାଲ ଜିତି ରେକର୍ଡ କରିଛି ଦେଶ ।

ସେପଟେ ମହିଳା କ୍ରିକେଟ୍ ଟିମ୍, ପୁରୁଷ ହକି ଟିମ୍ ଫାଇନାଲରେ ପହଞ୍ଚିଛନ୍ତି । ହକି ସେମିଫାଇନାଲରେ ଦକ୍ଷିଣ ଆଫ୍ରିକାକୁ ୩-୨ ଗୋଲରେ ହରାଇ ଫାଇନାରେ ପହଞ୍ଚିଛି ଭାରତ । ସେପଟେ କ୍ରିକେଟ ଫାଇନାଲରେ ଆଜି ରାତି ସାଢେ ୯ଟାରେ ମହିଳା ଇଣ୍ଡିଆ ଟିମ୍  ଅଷ୍ଟ୍ରେଲିଆ ଟିମ୍କୁ ଭେଟିବ ।