କେନ୍ଦ୍ର ସରକାରଙ୍କୁ ଚେତାବନୀ ଦେଲେ ଚାଷୀ, କହିଲେ ନମାନିଲେ ଦିଲ୍ଲୀ ଅଚଳ ହେବ…
ନୂଆଦିଲ୍ଲୀ: ଦିଲ୍ଲୀ ସୀମା ସିନ୍ଧୁରେ ଚାଷୀଙ୍କ ଆନ୍ଦୋଳନ ଜାରି ରହିଛି । ସେମାନଙ୍କର ଗୋଟିଏ ଜିଦ୍ କେନ୍ଦ୍ର ସରକାର ବିନା ସର୍ତ୍ତରେ ସମସ୍ୟାର ସମାଧାନ କରନ୍ତୁ । ଏଥିସହ ବିନା କୌଣସି ଆଲୋଚନାରେ ତିନୋଟି ଯାକ କୃଷି ବିଲ୍କୁ ପ୍ରତ୍ୟାହାର କରିବା ପାଇଁ ସେମାନେ ଦାବି କରିଛନ୍ତି । ନହେଲେ ଦିଲ୍ଲୀକୁ ସଂଯୋଗ କରୁଥିବା ୫ଟି ଯାକ ରାସ୍ତାକୁ ବନ୍ଦ କରିଦିଆଯିବ । ଏଥିସହ ଯେଉଁଠି ଆନ୍ଦୋଳନ କରୁଛନ୍ତି ସେଇଠି କ୍ୟାମ୍ପ କରି ଆସନ୍ତା ଜାନୁୟାରୀ ୨୬ ପର୍ଯ୍ୟନ୍ତ ଡେରା ପକାଇବାକୁ ଚାଷୀ ଯୋଜନା କରୁଛନ୍ତି ବୋଲି ଜଣାପଡିଛି । ଚାଷୀଙ୍କ ଏଭଳି ଚେତାବନୀକୁ ଗୁରୁତ୍ୱର ସହ ନେଇଛନ୍ତି କେନ୍ଦ୍ର ସରକାର ।
ରବିବାର ଜେପି ନଡ୍ଡାଙ୍କ ଅଧ୍ୟକ୍ଷତାରେ ଏକ ରୁଦ୍ଧଦ୍ୱାର ବୈଠକ ହୋଇଥିବା ବେଳେ ସୋମବାର କୃଷିମନ୍ତ୍ରୀଙ୍କ ସହ ଅମିତ ଶାହା ବୈଠକ କରିଛନ୍ତି । ଆସନ୍ତା ୩ରେ ସରକାରଙ୍କ ସହ ଆଲୋଚନାରେ ଚାଷୀଙ୍କ ସାମ୍ନାରେ କେଉଁ କେଉଁ ପ୍ରସ୍ତାବ ରଖାଯିବ ସେ ପ୍ରସଙ୍ଗରେ ଆଲୋଚନା ହୋଇଛି ।
ସେପଟେ ଚାଷୀଙ୍କ ଆନ୍ଦୋଳନକୁ ନେଇ ଚିନ୍ତା ବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସରକାରଙ୍କ ଏହି ଆଇନ ଚାଷୀଙ୍କ ବିକାଶ ପାଇଁ ହୋଇଛି । ଏଥିରେ ସାମାନ୍ୟତମ ଚାଷୀଙ୍କୁ ହଇରାଣ କଲାଭଳି ପ୍ରାବଧାନ ରଖାଯାଇନାହିଁ । ନିଜ ସାମଗ୍ରୀ ବିକ୍ରି କରିବା ପାଇଁ ସେମାନଙ୍କୁ ସମ୍ପୂର୍ଣ୍ଣ ସ୍ୱାଧିନତା ଦିଆଯାଇଛି । କିଛି ରାଜନୈତିକ ସ୍ୱାର୍ଥସମ୍ପୃକ୍ତି ବ୍ୟକ୍ତିଙ୍କ ଅପପ୍ରଚାର ଯୋଗୁଁ ଚାଷୀ ଆନ୍ଦୋଳନ କରୁଛନ୍ତି ବୋଲି ମୋଦି କହିଛନ୍ତି ।
ପୂର୍ବରୁ ବୁରାଡିରେ ଆନ୍ଦୋଳନ କଲେ ଚାଷୀଙ୍କ ସହ ସରକାର ଆଲୋଚନା କରିବେ ବୋଲି ସର୍ତ୍ତ ରଖିଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ହେଲେ ବୁରାଡିକୁ ଖୋଲା ଜେଲ ବୋଲି କହି ଚାଷୀ ଏହି ସର୍ତ୍ତକୁ ଖଣ୍ଡନ କରିଥିଲେ ।
