ନନ୍ଦିଘୋଷ ବ୍ୟୁରୋ : ଓଡ଼ିଶା – ଝାଡଖଣ୍ଡ ସୀମାନ୍ତ ପଶ୍ଚିମ ସିଂହଭୂମ ଜିଲ୍ଲାର ସରଣ୍ଡା ଜଙ୍ଗଲରେ ନକ୍ସଲ ଏନକାଉଣ୍ଟର । ସୁରକ୍ଷାକର୍ମୀଙ୍କ ସହିତ ଚାଲିଛି ଗୁଳି ବିନିମୟ। ଗତ କାଲି ସଂଧ୍ୟାରୁ ଏହି ଅପରେସନ ଆରମ୍ଭ ହୋଇଛି। ଏହି ଅଞ୍ଚଳରେ ୧୫ରୁ ୨୦ ଜଣ ନକ୍ସଲ ଲୁଚି ରହିଥିବାର ଖବର ପରେ ସୁରକ୍ଷା କର୍ମୀମାନେ ଅପରେସନ ଆରମ୍ଭ କରିଥିଲେ। ସରଣ୍ଡାର ଚାରାଡେରା ଓ ଡୋଲାଇଗଡ଼ା ଜଙ୍ଗଲରେ ସର୍ଚ୍ଚ ଅପରେସନ ବେଳେ ଗୁଳି ବିନିମୟ ହୋଇଛି। ସନ୍ଧ୍ୟା ପ୍ରାୟ ୬ ଟା ପର୍ଯ୍ୟନ୍ତ ଜଙ୍ଗଲ ଅଞ୍ଚଳରେ ରହି ରହି କରି ଗୁଳିବର୍ଷା ଓ ବିସ୍ଫୋରଣର ଶବ୍ଦ ଶୁଣାଯାଉଥିଲା।
ସ୍ଥାନୀୟ ଲୋକମାନଙ୍କ କହିବା ଅନୁଯାୟୀ ପ୍ରାୟ ୧୦ କିଲୋମିଟର ଅଞ୍ଚଳ ପର୍ଯ୍ୟନ୍ତ ଏହି ଶବ୍ଦ ଶୁଭୁଥିଲା । ଏଥିରେ କେତେକ ନକ୍ସଲ ନିହତ ହୋଇଥିବାର ଅନୁମାନ କରାଯାଉଛି । ଏପର୍ଯ୍ୟନ୍ତ କାହାର ମୃତଦେହ ଉଦ୍ଧାର ହୋଇନି । ଲ୍ୟାଣ୍ଡମାଇନ ବିସ୍ଫୋରଣରେ ୫ ଯବାନ ଆହତ ହୋଇଛନ୍ତି। ସେମାନଙ୍କୁ ରାଞ୍ଚିକୁ ଏୟାରଲିଫଟ କରାଯାଇଛି ।
