ନନ୍ଦିଘୋଷ ବ୍ୟୁରୋ : ମହାରାଷ୍ଟ୍ର ନାସିକରେ ଜଣେ ତଥାକଥିତ ବାବା ଗିରଫ। ଦୁଷ୍କର୍ମ ଓ ଅନ୍ୟାନ୍ୟ ଅଭିଯୋଗ କ୍ରମେ ଗଡମ୍ୟାନ ଅଶୋକ ଖରାତ ଓରଫ କ୍ୟାପଟେନ ଖରାତଙ୍କୁ ଗିରଫ କରିଛି ନାସିକ କ୍ରାଇମ ବ୍ରାଞ୍ଚ। ଧାର୍ମିକ ଭାବନା ଆଳରେ ସେ ମହିଳାଙ୍କୁ ଯୌନ ନିର୍ଯାତନା ଦେବା ଅଭିଯୋଗରେ ସେ ଗିରଫ ହୋଇଛନ୍ତି। ଜଣେ ମହିଳାଙ୍କୁ ଖାଦ୍ୟରେ ନିଶାଦ୍ରବ୍ୟ ମିଶାଇ ତାଙ୍କୁ ଦୁଷ୍କର୍ମ କରିବା ନେଇ ଅଭିଯୋଗ ହୋଇଥିଲା। ନଭେମ୍ବର ୨୦୨୨୨ରୁ ଡିସେମ୍ବର ୨୦୨୫ ମଧ୍ୟରେ ମହିଳାଙ୍କୁ ବାବା ବାରମ୍ବାର ଯୌନ ନିର୍ଯାତନା ଦେଉଥିଲେ ବୋଲି ଅଭିଯୋଗ ହୋଇଥିଲା। ଏପରିକି ଏହି ଖବର ପ୍ରଘଟ କଲେ ତାଙ୍କ ସ୍ବାମୀଙ୍କୁ ଫଳ ଭୋଗିବାକୁ ପଡିବ ଏବଂ ତାଙ୍କ ଜୀବନ ବରବାଦ କରିଦିଆଯିବ ବୋଲି ବାବା କୁଆଡ଼େ ଧମକ ଦେଉଥିଲେ। ନାସିକର କାନାଡା କର୍ଣ୍ଣରସ୍ଥିତ ବାବାଙ୍କ କାର୍ଯ୍ଯାଳୟ ଓକସ ପ୍ରପର୍ଟି ଡିଲର ଆଣ୍ଡ ଡେଭଲପରରେ ପୋଲିସ ରେଡ କରି ଏକ ପେନ ଡ୍ରାଇଭ ଜବତ କରିଥିଲା। ଏଥିରୁ ୫୮ଟି ଅଶ୍ଳୀଳ ଭିଡିଓ ଜବତ ହୋଇଥିଲା। ଏହି ରାକେଟରେ କିଛି ହାଇପ୍ରୋଫାଇଲ ଲୋକ ସାମିଲ ଥିବା ସୂଚନା ମିଳିଛି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି। ବାବା ଜଣକର ଘର ସିନାର ତାଲୁକାରେ ହୋଇଥିବାବେଳେ ସେ ଶ୍ରୀ ଈଶାନେଶ୍ବର ମନ୍ଦିର ଟ୍ରଷ୍ଟର ସଭାପତି ଥିଲେ। ମିରାଗାଓସ୍ଥିତ ମନ୍ଦିରକୁ ଗତ ୨୦୨୨ ନଭେମ୍ବରରେ ତତକାଳୀନ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ପରିଦର୍ଶନ କରିବାକୁ ଯାଇଥିବାବେଳେ ବାବା ଚର୍ଚ୍ଚାର ପରିସରକୁ ଆସିଥିଲେ।
