ଭୁବନେଶ୍ୱର : ବିହାରୀ ମାଫିଆଙ୍କୁ ଧରିବାକୁ ବିହାର ଗଲା ସ୍ପେଶାଲ କ୍ରାଇମ୍ ୟୁନିଟ୍ । ରିମାଣ୍ଡରେ ଆସି ମାଫିଆ କହିବେ ସିଣ୍ଡିକେଟ ପଛର ସତ । ପୋଲିସ ହାତରେ କାର୍ବାଇନ ଓ ମାଉଜର ଗରାଖଙ୍କ ଲିଷ୍ଟ । ଭୁବନେଶ୍ୱର ଷ୍ଟେସନ ଆଉ ମାତ୍ର ୫ ଶହ ମିଟର । ଟ୍ରେନ ସ୍ଲୋ ହେବା କ୍ଷଣି ଠିକ ଏହି ଜାଗାରେ ଡେଇଁ ପଡ଼ି ଚମ୍ପଟ ମାରିବାକୁ ବସିଥିଲେ ବିହାରୀ ବନ୍ଧୁକ ମାଫିଆ ଦିବ୍ୟାନ୍ସୁ କୁମାର ଓ ଚନ୍ଦନ କୁମାର । କିନ୍ତୁ ପୂର୍ବରୁ ପିଛା କରୁଥିବା ସ୍ପେଶାଲ କ୍ରାଇମ ୟୁନିଟ, ମାଳିସାହି ଯିବା ବାଟରେ ଗତ ଶନିବାର ଅଭିଯୁକ୍ତଙ୍କୁ କାବୁ କରିଥିଲା । ସେମାନଙ୍କ ଠାରୁ ଜବତ ହୋଇଥିଲା କାର୍ବାଇନ ସହ ୫ଟି ସେମି ଅଟୋମେଟିକ ପିସ୍ତଲ ଓ ଗୁଳି । ଏବେ ସେହି ୨ ଅଭିଯୁକ୍ତଙ୍କୁ ୫ ଦିନିଆ ରିମାଣ୍ଡରେ ଆଣିବା ପାଇଁ ଆବେଦନ କରିଛି ଟିମ । ସେପଟେ ବନ୍ଧୁକ ନେଟୱର୍କ ସମ୍ଭାଳୁଥିବା ମାଷ୍ଟରମାଇଣ୍ଡକୁ କାବୁ କରିବା ପାଇଁ ବିହାର ଗସ୍ତ କରିଛି ସ୍ପେଶାଲ କ୍ରାଇମ ୟୁନିଟ । ଗତ ୮ ମାସରେ ୮ ଜଣ ବନ୍ଧୁକ ମାଫିଆଙ୍କୁ ଧରିବା ସହ ୨୫ ବନ୍ଧୁକ ଜବତ କରିଛି ସ୍ପେଶାଲ କ୍ରାଇମ ୟୁନିଟ ।
ସାରା ରାଜ୍ୟରୁ ମିଳିଥିବା ତଥ୍ୟ ମୁତାବକ ଓଡିଶା ପୋଲିସ ଦ୍ୱାରା ୨୦୨୩ ଓ ୨୦୨୪ ରେ ୫ଶହ ରୁ ଅଧିକ ବନ୍ଧୁକ, ୨୦୨୨ରେ ୯୩ ଟି, ୨୦୨୧ରେ ୩୪୫ ଟି , ୨୦୨୦ରେ ଟି ବନ୍ଧୁକ ଜବତ ହୋଇଛି । କମିଶନରେଟ ପୋଲିସ ତଥ୍ୟ ଗତ ୩ ବର୍ଷରେ କମିଶନରେଟ ପୋଲିସ ଜବତ କଲାଣି ପାଖାପାଖି ୨୫୦ ବନ୍ଧୁକ କରିଛି । ବିହାର, ଝାଡଖଣ୍ଡ ସହ ୟୁପି ବନ୍ଧୁକର ଡିମାଣ୍ଡ ଓଡ଼ିଶାରେ ବଢୁଥିବା ଦେଖାଯାଉଛି । ଆରପିଏଫ କୁ ଚକମା ଦେବାକୁ ଯାଇ ଟ୍ରେନରେ ବ୍ୟାଗ ଭିତରେ ଲୁଚାଇ ଚାଲିଛି ବନ୍ଧୁକ କାରବାର । ସେପଟେ ମାଷ୍ଟର ମାଇଣ୍ଡ ଧରାପଡିବା ପରେ ପୁରା ମେସିନ ସିଣ୍ଡିକେଟର ଗୁମର ଖୋଲିବ ବୋଲି ସୂଚନା ଦେଇଛନ୍ତି କମିଶନର । କିନ୍ତୁ ଏସବୁ କମିଶନରେଟ ପୋଲିସ ପାଇଁ ନିହାତି ଚାଲେଞ୍ଜିଂ ହେବ ବୋଲି କହିଛନ୍ତି ବିଶେଷଜ୍ଞ। ନିଶା ସିଣ୍ଡିକେଟ, ବାଲି ଘାଟ, ଲଘୁ ଖଣିଜ ଲୁଟ, ଦେହ ବେପାର ଭଳି ଅନୈତିକ କାମ ପାଇଁ ଅଣ୍ଟାରେ ମାଉଜର ଖୋସି ବୁଲୁଛନ୍ତି ଯୁବପିଢି । ଯାହାକି ଏବେ ପୋଲିସ ପାଇଁ ପାଲଟିଛି ଚିନ୍ତାର କାରଣ ।
