କେନ୍ଦୁଝର: କେନ୍ଦୁଝରରେ ଫେଲ ମାରିଛି ହରଘର ଜଳ ଯୋଜନା । ଚୁନାବାଟି ବାସିନ୍ଦାଙ୍କୁ ମିଳୁନି ପିଇବା ପାଣି । ଭରସା ସାଜିଛି ଚୁଆ । ହରିଚନ୍ଦନପୁର ବ୍ଲକ ଭଙ୍ଗାମୁଣ୍ଡା ପଞ୍ଚାୟତ ଚୁନାବାଟି ସାହିରେ ୮୦ରୁ ଉର୍ଦ୍ଧ୍ଵ ଲୋକେ ବସବାସ କରୁଛନ୍ତି । ହେଲେ ଏଯାଏଁ ଲୋକଙ୍କ ପାଖରେ ପହଞ୍ଚିନି ବିଶୁଦ୍ଧ ପାନୀୟ ଜଳ । ସାହିରେ ଗୋଟିଏ ହେଲେ ନଳକୂପ ବି ନାହିଁ । ଫଳରେ ଚୁଆ ପାଣି ଉପରେ ନିର୍ଭର କରୁଛନ୍ତି ପୂରା ଗ୍ରାମବାସୀ । ଚୁଆର ଦୂଷିତ ପାଣି ପିଇ ଅନେକ ଲୋକ ବିଭିନ୍ନ ରୋଗରେ ଆକ୍ରାନ୍ତ ହେଉଥିବା ଅଭିଯୋଗ ହୋଇଛି ।
ଚୁଆଟି ମୁକୁଳା ପଡ଼ିଥିବା ବେଳେ ସେଥିରୁ ପଶୁପକ୍ଷୀ ମଧ୍ୟ ପାଣି ପିଉଛନ୍ତି । ବାଧ୍ୟ ହୋଇ ସେହି ପାଣିକୁ ଗ୍ରାମବାସୀ ଆଣି ଚଳୁଛନ୍ତି । ସମସ୍ୟା ସଂପର୍କରେ ଗ୍ରାମବାସୀ ପଞ୍ଚାୟତ ଠାରୁ ଆରମ୍ଭ କରି ବ୍ଲକ ପ୍ରଶାସନ ଯାଏଁ ବାରମ୍ବାର ଜଣାଇଥିଲେ ସୁଦ୍ଧା ଫଳ ଶୂନ । କେବେ ପ୍ରଶାସନର ନିଦ ଭାଙ୍ଗିବ ? କେବେ ଚୁନାବାଟି ସାହିକୁ ହେବ ପାନୀୟ ଜଳ ଯୋଗାଣ ? ନା ଚୁଆ ପାଣି ହିଁ ଲୋକଙ୍କ ବଞ୍ଚିବାର ରାହା ପାଲଟିବ । ତାକୁ ନେଇ ଉଠିଛି ବଡ଼ ପ୍ରଶ୍ନବାଚୀ ।
