ହାଥରସ୍ ଲଜ୍ଜା: ପୋଲିସ ଓ ପ୍ରଶାସନର ଭୂମିକାକୁ କୋର୍ଟଙ୍କ ନିନ୍ଦା: ନଭେମ୍ୱର ୨ରେ ପରବର୍ତ୍ତୀ ଶୁଣାଣି
ଲକ୍ଷ୍ମୌ: ଉତ୍ତରପ୍ରଦେଶ ହାଥରସ ଗଣଦୁଷ୍କର୍ମ ମାମଲାରେ ଆହ୍ଲାବାଦ ହାଇକୋର୍ଟରେ ଆରମ୍ଭ ହୋଇଛି ପ୍ରାଥମିକ ଶୁଣାଣି। ହାଇକୋର୍ଟର ଲକ୍ଷ୍ନୌ ବେଞ୍ଚରେ ଶୁଣାଣି ହୋଇଥିଲା । ଦୁଇଜଣିଆ ଖଣ୍ଡପୀଠ ମାମଲାର ଶୁଣାଣି କରି ଘଟଣାରେ ଦୁଃଖ ପ୍ରକାଶ କରିବା ସହ ପ୍ରଶାସନ ଓ ପୋଲିସର ଆଚରଣକୁ ନିନ୍ଦା କରିଛନ୍ତି ।
ହାଇକୋର୍ଟ ପୀଡିତାଙ୍କ ପରିବାର ଓ ସରକାରଙ୍କ ପକ୍ଷରୁ ବୟାନ ଶୁଣିଥିଲେ । ବିନା ଅନୁମତିରେ ଶବ ଦାହ କରାଯାଇଥିବା ଅଭିଯୋଗ କରିବା ସହ ସୁରକ୍ଷା ଓ ତଦନ୍ତର ଦିଗ ନେଇ ପ୍ରଶ୍ନ ଉଠାଇଥିଲେ ପରିବାର ସଦସ୍ୟ । ଏପରିକି ପୋଡା ଯାଇଥିବା ଶବ କାହାର ସେମାନେ ଜାଣି ନଥିବା କହିଥିଲେ । ସୁରକ୍ଷା ଦୃଷ୍ଟିରୁ ମାମଲାକୁ ଉତ୍ତରପ୍ରଦେଶରେ ପରିଚାଳନା ନକରି ଅନ୍ୟ କେଉଁ କୋର୍ଟରେ କରିବାକୁ ଜଜଙ୍କୁ ଅନୁରୋଧ କରିଥିଲେ ପୀଡିତାଙ୍କ ପରିବାର ପକ୍ଷରୁ ଲଢୁଥିବା ଓକିଲ ସୀମା ଖୁସଓ୍ବା। ସମସ୍ତ ବିଷୟରେ ଅବଗତ ହେବାପରେ ଆଗାମୀ ଶୁଣାଣି ନଭେମ୍ବର ୨ ତାରିଖକୁ ଧାର୍ଯ୍ୟ କରିଛନ୍ତି ହାଇକୋର୍ଟ ।
