ହିଞ୍ଜିଳିକାଟୁ : ବଢୁଛି ମଶାଙ୍କ ପ୍ରାଦୁର୍ଭାବ । କଲବଲ ସହରବାସୀ । ମଶା ଦମନ କରିବାରେ ଫେଲ ମ୍ୟୁନିସିପାଲିଟି । ଟିକିଏ ନଜର ପକାନ୍ତୁ ଏ ଦୃଶ୍ୟ ଉପରେ କେମିତି ଚାରିଆଡ଼େ ପଡିଛି କୁଢକୁଢ ଅଳିଆ ଆବର୍ଜନା । ମୁକୁଳା ପଡିଛି ଡ୍ରେନ । ଏ ହେଉଛି ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ସହରର ଅବସ୍ଥା । ନା ଅଳିଆ ଆବର୍ଜନା ସଫା ହେଉଛି ନା ଡ୍ରେନରେ ସ୍ଲାପ ପଡୁଛି । ଫଳରେ ସହରରେ ମଶାଙ୍କ ପ୍ରାଦୁର୍ଭାବ ବଢିବାରେ ଲାଗିଛି । ଘରେ କିମ୍ବା ବାହାରେ ସବୁଠି ଭଣଭଣ ହେଉଛନ୍ତି ମଶା । ମଶାବତୀ ଓ ଲିକ୍ୟୁଡି ମଧ୍ୟ ଖାତିରି କରୁନାହାନ୍ତି ମଶା ପଲ । ସଞ୍ଜ ନଇଁବା କ୍ଷଣି ମଶା ଦାଉରୁ ବଞ୍ଚିବା ଲୋକଙ୍କ ପାଇଁ ମୁସ୍କିଲ ହୋଇପଡୁଛି । ହେଲେ ମ୍ୟୁନିସିପାଲିଟି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସ୍ଥାନୀୟ ବୁଦ୍ଧିଜୀବୀ ।
ସହରର ୨୧ଟି ୱାର୍ଡର ସାହି ଓ ଗଳି କନ୍ଦିରେ ନିୟମିତ ଭାବେ ଡ୍ରେନ ସଫା ହେଉନଥିବାରୁ ମଶାଙ୍କ ପ୍ରାଦୁର୍ଭାବ ବଢିବାରେ ଲାଗିଛି । ମ୍ୟୁନିସିପାଲିଟି ପକ୍ଷରୁ ଲୋକ ଦେଖାଣିଆ ଭାବେ ଟିଫା ମେସିନରେ ଧୂଆଁ ଛଡାଯାଉଛି । ହେଲେ ସେଥିରେ କୌଣସି ଔଷଧୀୟ ସାମଗ୍ରୀ ମିଶୁନଥିବା ଅଭିଯୋଗ ହୋଇଛି । ସହରରେ ଡେଙ୍ଗୁ ଓ ମ୍ୟାଲେରିଆ ରୋଗ ବ୍ୟାପିବା ପୂର୍ବରୁ ମ୍ୟୁନିସିପାଲିଟି ପକ୍ଷରୁ ଡ୍ରେନ ସଫା କରାଯିବା ସହ ମଶା ତେଲ ସିଞ୍ଚନ କରିବାକୁ ଦାବି ହୋଇଛି । ଅନ୍ୟପଟେ ଏ ସଂପର୍କରେ କ୍ୟାମେରା ଆଗରେ ମୁହଁ ଖୋଲିଲେ ନାହିଁ ପୌର କାର୍ଯ୍ୟନିର୍ବାହୀ ଅଧିକାରୀ ।
ହିଞ୍ଜିଳିକାଟୁରେ ବଢିବାରେ ଲାଗିଛି ମଶାଙ୍କ ପ୍ରାଦୁର୍ଭାବ, କଲବଲ ସହରବାସୀ
