ଜନ୍ମବେଦୀକୁ ବିଜେ ହେଲେ ଚତୁର୍ଦ୍ଧା ମୂରତି, ଭକ୍ତଶୂନ୍ୟ ଶରଧାବାଲି
ପୁରୀ: ଜନ୍ମବେଦୀକୁ ବିଜେ ହେଲେ ଚତୁର୍ଦ୍ଧା ମୂରତି । ସମସ୍ତ ରୀତିନୀତି ଅନୁସାରେ ପ୍ରଥମେ ଆଡ଼ପ ମଣ୍ଡପକୁ ଆସିଥିଲେ ଚକ୍ରରାଜ ଶ୍ରୀସୁଦର୍ଶନ । ପରେ ବଡ଼ଠାକୁର ବଳଭଦ୍ର ଓ ଦେବୀ ସୁଭଦ୍ରା ଆଡ଼ପ ମଣ୍ଡପରେ ବିଜେ କରିଥିଲେ । ଏହା ପରେ ଗୋଟି ପହଣ୍ଡିରେ ବିଜେ କରିଥିଲେ ପ୍ରଭୁ ଶ୍ରୀଜଗନ୍ନାଥ । ରଥରୁ ଆଡ଼ପ ମଣ୍ଡପକୁ ଶ୍ରୀଜିଉଙ୍କୁ ବିଜେ କରାଯାଇଛି ।
ଭକ୍ତଶୂନ୍ୟ ଥିଲା ଶରଧାବାଲି । ଯେମିତି ଭକ୍ତଙ୍କୁ ଖୋଜୁଥିଲେ ରଥାରୂଢ଼ ଭାବଗ୍ରାହୀ। ରଥ ଉପରେ ଶ୍ରୀଜିଉଙ୍କ ସମସ୍ତ ନୀତିକାନ୍ତି କରାଯାଇଥିଲା । ଅପରାହ୍ନରେ ଆରମ୍ଭ ହୋଇଥିଲା ଜନ୍ମବେଦୀ – ଶ୍ରୀଗୁଣ୍ଡିଚା ମନ୍ଦିରର ଆଡ଼ପମଣ୍ଡପକୁ ବିଜେ ନୀତି। ଆସନ୍ତାକାଲିଠାରୁ ଆଡ଼ପ ଅବଢ଼ା ବାହାରିବ । ଶ୍ରୀଗୁଣ୍ଡିଚା ମନ୍ଦିର ପାଖ ନୃସିଂହ ମନ୍ଦିର ଓ ବସ୍ଷ୍ଟାଣ୍ଡରେ ଆଡ଼ପ ଅବଢ଼ା ବିକ୍ରି ପାଇଁ ନିଯୋଗ ଓ ପ୍ରଶାସନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
