ଦେଶରେ ଦିନକରେ ଚିହ୍ନଟ ହେଲେ ୩୫ହଜାର ସଂକ୍ରମିତ
ନୂଆଦିଲ୍ଲୀ: ଦେଶରେ ଗତ ୨୪ଘଣ୍ଟାରେ ୩୪ହଜାର ୮୮୪ଜଣଙ୍କ କରୋନା ନମୁନା ପରୀକ୍ଷଣ ରିପୋର୍ଟ ପଜିଟିଭ ଆସିଛି । ୬୭୧ ଜଣଙ୍କ ଜୀବନ ନେଇଛି କରୋନା ଭାଇରସ । ଏଥିସହ ଦେଶରେ ସଂକ୍ରମିତଙ୍କ ସଂଖ୍ୟା ୧୦ଲକ୍ଷ ୩୮ ହଜାର ପାର୍ କରିଛି । ସେହିଭଳି ମୋଟ୍ କରୋନା ମୃତ୍ୟୁସଂଖ୍ୟା ୨୬ହଜାର ଟପିଛି ।
ଦେଶରେ ଏବେ ୩ଲକ୍ଷ ୫୮ ହଜାର ୬୯୨ ଆକ୍ଟିଭ୍ କେସ ରହିଥିବା ବେଳେ ଚିକିତ୍ସା ପରେ ୬ଲକ୍ଷ ୫୩ ହଜାର ୭୫୧ ଜଣ ସୁସ୍ଥ ହୋଇଛନ୍ତି । ସେପଟେ ବେଙ୍ଗାଳୁରୁ, ହାଇଦ୍ରାବାଦ ଓ ପୁନେ ପାଲଟିଛି ଦେଶର ନୂଆ କୋଭିଡ୍ ହଟ୍ସ୍ପଟ୍ । ମୁମ୍ବାଇ, ଦିଲ୍ଲୀ, ଚେନ୍ନାଇ, ଅହମ୍ମଦାବାଦରେ ଧୀରେଧୀରେ ସଂକ୍ରମଣ କମୁଥିବା ବେଳେ ଅନ୍ୟ ୩ ସହରରେ ବଢୁଛି । ବେଙ୍ଗାଳୁରୁରେ ଗତ ୪ ସପ୍ତାହର ତଥ୍ୟ ଅନୁସାରେ ଦିନକୁ ପ୍ରାୟ ୧୨ ପ୍ରତିଶତ କରୋନା ମାମଲା ବଢିବାରେ ଲାଗିଛି। ଏହାସହ ଦୈନିକ ମୃତ୍ୟୁ ସଂଖ୍ୟା ୮ପ୍ରତିଶତରୁ ଅଧିକ ବଢୁଛି ।
ଟପ୍ ୫ଟି ଆକ୍ଟିଭ୍ ମାମଲା ଥିବା ରାଜ୍ୟ
ସମୁଦାୟ ଚିହ୍ନଟ ହୋଇଥିବା ସଂକ୍ରମିତଙ୍କ ମଧ୍ୟରୁ ପାଖାପାଖି ୩ଲକ୍ଷରୁ ଅଧିକ ସଂକ୍ରମିତ ଦେଶରେ ସକ୍ରିୟ ଅଛନ୍ତି । ଏବଂ ସବୁଠୁ ଅଧିକ ସକ୍ରିୟ ମାମଲା ମହାରାଷ୍ଟ୍ରରେ ଚିହ୍ନୟ ହୋଇଛି । ମହାରାଷ୍ଟ୍ରରେ ଲକ୍ଷେରୁ ଅଧିକ ସଂକ୍ରମିତଙ୍କ ଚିକିତ୍ସା ବିଭିନ୍ନ କୋଭିଡ ହସ୍ପିଟାଲରେ ଚାଲିଛି । ଦ୍ୱିତୀୟ ସ୍ଥାନରେ ରହିଛି ତାମିଲନାଡ଼ୁ ଏବଂ ତୃତୀୟ ସ୍ଥାନରେ କର୍ଣ୍ଣାଟକ । ଏହାସହ ଚତୁର୍ଥ ସ୍ଥାନରେ ଆନ୍ଧ୍ରପ୍ରଦେଶ ରହିଥିବା ବେଳେ ୫ମ ସ୍ଥାନରେ ରହିଛି ରାଜଧାନୀ ଦିଲ୍ଲୀ । ଏହି ୫ଟି ରାଜ୍ୟରେ ସବୁଠୁ ଅଧିକ ସକ୍ରିୟ ମାମଲା ରହିଛି । ତେବେ ସକ୍ରିୟ ସଂକ୍ରମିତଙ୍କ ମାମଲା ବିଶ୍ୱରେ ୪ର୍ଥ ସ୍ଥାନରେ ରହିଛି ଭାରତ ।
