ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗକୁ କାହିଁକି ଟାର୍ଗେଟ କରାଯାଉଛି ? ଆସାମକୁ କାହିଁକି ନୁହେଁ ? ରୁଦ୍ଧ ଦ୍ବାର ପଛପଟେ କାନ୍ଦୁଛି ନ୍ୟାୟ । ପଶ୍ଚିମବଙ୍ଗରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ- SIRରେ ଘୋର ପକ୍ଷପାତିତାକୁ ନେଇ ସୁପ୍ରିମକୋର୍ଟରେ ଏପରି ଗର୍ଜିଛନ୍ତି ବେଙ୍ଗଲ ଟାଇଗର ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ । ଆଜି ଏସଆଇରକୁ ନେଇ ସୁପ୍ରିମକୋର୍ଟରେ ଶୁଣାଣି ଥିବାବେଳେ ନିଜେ ଓକିଲ ସାଜି ରାଜ୍ୟ ପାଇଁ ଯୁକ୍ତି ଉପସ୍ଥାପନ କରି ସମସ୍ତଙ୍କୁ ଚମକାଇ ଦେଇଛନ୍ତି ମମତା ଦିଦି । ନିଜେ ନିଜ ପକ୍ଷ ରଖିବାକୁ ସର୍ବୋଚ୍ଚ ଅଦାଲତଙ୍କ ଖଣ୍ଡପୀଠକୁ ଗୁହାରୀ କରି ସେ ତାଙ୍କ ପକ୍ଷ ରଖିଥିଲେ । ପ୍ରଧାନ ବିଚାରପତି ଆଗରେ ସେ ଠିଆ ହୋଇ ପକ୍ଷ ରଖିବାକୁ ମାତ୍ର ୫ ମିନିଟ ସମୟ ମାଗିବାରୁ ପ୍ରଧାନବିଚାରପତି ଜଷ୍ଟିସ ସୂର୍ଯ୍ୟକାନ୍ତ ତାଙ୍କୁ ୧୫ ମିନିଟ ଲାଗି ସମୟ ଦେଇଥିଲେ । ଭାରତୀୟ ନିର୍ବାଚନ କମିଶନଙ୍କୁ ସେ କାଠଗଡାରେ ଠିଆ କରାଇ ଦିଦି ତାଙ୍କ ପକ୍ଷ ରଖିବା ଆରମ୍ଭ କରିଥିଲେ । ନିର୍ବାଚନ କମିଶନ ତାଙ୍କ ଅନୁରୋଧକୁ ଅଣଦେଖା କରିଛନ୍ତି । ୬ ଥର ଚିଠି ଲେଖିବା ପରେ ବି କମିଶନ ତାଙ୍କୁ ଉତ୍ତର ଫେରାଇନଥିଲେ । କଥା ହେଉଛି ଆମେ କୌଣସି ସ୍ଥାନରେ ନ୍ୟାୟ ପାଉନାହୁଁ । ତେବେ ଖଣ୍ଡପୀଠ ସ୍ୱୀକାର କରିଛନ୍ତି ଯେ, ମମତାଙ୍କ ଆବେଦନ ସତ୍ୟ ଏବଂ ପ୍ରତ୍ୟେକ ପ୍ରସଙ୍ଗର ସମାଧାନ ଅଛି ବୋଲି କହି ଆଶ୍ୱସ୍ତ କରିଛନ୍ତି । କୋର୍ଟ ମମତାଙ୍କ ଆବେଦନ ଉପରେ ନିର୍ବାଚନ କମିଶନକୁ ଏକ ନୋଟିସ ମଧ୍ୟ ଜାରି କରିଛନ୍ତି। ପରବର୍ତ୍ତୀ ଶୁଣାଣି ସୋମବାର ପାଇଁ ରଖାଯାଇଛି ।
