ମାଙ୍ଗାଲୁରୁ : କର୍ଣ୍ଣାଟକର ମାଙ୍ଗାଲୁରୁରେ ଡାକ୍ତରମାନେ ଏକ ଅସ୍ତ୍ରୋପଚାର କରି ଜଣେ ୧୨ ବର୍ଷର ବାଳକର ଜୀବନ ବଞ୍ଚାଇଛନ୍ତି । ଯେଉଥିପାଇଁ ସମସ୍ତେ ତାଙ୍କୁ ପ୍ରଶଂସା କରୁଛନ୍ତି। ରବିବାର ମାଙ୍ଗାଲୁରୁର ସରକାରୀ ୱେନଲକ୍ ହସ୍ପିଟାଲର କାର୍ଡିଓଥୋରାସିକ୍ ଏବଂ ଭାସ୍କୁଲାର ସର୍ଜନଙ୍କ ଏକ ଦଳ ଏକ ଅସ୍ତ୍ରୋପଚାର କରି ଜଣେ ୧୨ ବର୍ଷୀୟ ବାଳକର ବେକରୁ ଏକ ବଡ଼ ୨୦ ସେମି ଲମ୍ବା କାଠ ଖଣ୍ଡ ଏବଂ ଏକ ଭଙ୍ଗା ବ୍ଲେଡ୍ ଚେନ୍ ବାହାର କରିଛନ୍ତି।
ଜିଲ୍ଲା ସର୍ଜନ ଏବଂ ହସ୍ପିଟାଲ ସୁପରିଣ୍ଟେଣ୍ଡେଣ୍ଟ ଡିଏସ ଶିବପ୍ରକାଶ କହିଛନ୍ତି, ଆସାମର ମୂଳ ବାସିନ୍ଦା ବାଳକଟି ମାଡିକେରୀର ଏକ ଚା ବଗିଚାରେ ତାଙ୍କ ପିତାମାତାଙ୍କ ସହିତ ରୁହନ୍ତି। ଶନିବାର ସନ୍ଧ୍ୟାରେ ନଡ଼ିଆ ଗଛରୁ ପଡ଼ି ସେ ଗୁରୁତର ଆହତ ହୋଇଥିଲେ। ଏହି ସମୟରେ, ଏକ କାଠ ଖଣ୍ଡ ଏବଂ ଏକ ଭଙ୍ଗା ବ୍ଲେଡ୍ ସହିତ ଏକ ଚେନ୍ ତାଙ୍କ ବେକରେ ଦେଇ ତାଙ୍କ ଛାତିରେ ଫସି ଯାଇଥିଲା। ଶନିବାର ସଂଧ୍ୟା ୭.୩୦ ମିନଟରେ ଏହି ଘଟଣା ଘଟିଥିବା ମେଡିକାଲ ହସ୍ପିଟାଲ ସୁପରିଣ୍ଟେଣ୍ଡେଣ୍ଟ କହିଛନ୍ତି । ଏପରି ପରିସ୍ଥିତିରେ ପୁଅଟିକୁ ଶନିବାର ରାତି ୧୨. ୧୫ ମିନଟ ସମୟରେ ହସ୍ପିଟାଲକୁ ଅଣାଯାଇଥିଲା । ହସ୍ପିଟାଲରେ, ଡାକ୍ତର ସୁରେଶ ପାଇଙ୍କ ନେତୃତ୍ୱରେ ଏକ ଟିମ୍ ରାତି ୧.୩୦ ରୁ ୩.୩୦ ମଧ୍ୟରେ ବାଳକର ଅସ୍ତ୍ରୋପଚାର କରିଥିଲେ ଏବଂ କାଠ ଖଣ୍ଡ ଏବଂ ଭଙ୍ଗା ଚେନ ବାହାର କରିଥିଲେ।
ପୁଅଟି ଏବେ ସୁସ୍ଥ ଥିବା କଥା କହିଛନ୍ତି ଡାକ୍ତର ସୁରେଶ ପାଇ । ଏବେ ତା’ ଉପରେ କଡା ନଜର ରଖାଯାଇଛି । ଏହି ଅସ୍ତ୍ରୋପଚାର ମାଙ୍ଗାଲୋରର ୱେନଲକ୍ ସରକାରୀ ହସ୍ପିଟାଲରେ ମାଗଣାରେ କରାଯାଇଥିଲା। ସରକାରୀ ଡାକ୍ତରମାନଙ୍କ କାର୍ଯ୍ୟକୁ ପ୍ରଶଂସା କରାଯାଉଛି। ସ୍ୱାସ୍ଥ୍ୟମନ୍ତ୍ରୀ ଦିନେଶ ଗୁଣ୍ଡୁ ରାଓ ଡାକ୍ତରମାନଙ୍କୁ ସେମାନଙ୍କ କାର୍ଯ୍ୟ ପାଇଁ ଅଭିନନ୍ଦନ ଜଣାଇଛନ୍ତି।
