ଜୟପୁର : ସହି ପାରିଲାନି ମାଆର ମୃତ୍ୟୁ । ମାଆ ସହ ଏକାଠି ଉଠିଲା ପୁଅର କୋକେଇ । ଏମତି ମୃତ୍ୟୁ ଆସିବ କିଏ ବା ଭାବିଥିଲା । ସବୁଦିନ ପରି ସକାଳୁ ସକାଳୁ ଜମିକୁ ବାହାରି ଯାଇଥିଲେ ଜୟପୁର ସୁନାରୀ ସାହିର ୫୨ ବର୍ଷୀୟ ଏସ ରବି । ଜମିରୁ ଫେରି ମାଆକୁ ଡାକିଥିଲା । ହେଲେ ସେ ଉତ୍ତର ନଦେବାରୁ ପାଖ ପଡ଼ୋଶୀଙ୍କୁ ଡାକିଥିଲେ । ପଡ଼ୋଶୀ ଘର ଭିତରକୁ ଯାଇ ଦେଖିବା ବେଳକୁ ଖଟଉପରେ ଶୋଇଥିବା ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ । ଏହା ଜାଣିବା ପରେ ମାଆକୁ କୋଳରେ ଧରି ବିକଳରେ କାନ୍ଦି ଉଠିଥିଲେ ରବି । ଆଉ ଏହି ଦୁଃଖ ତାଙ୍କୁ ଏତେ ପରିମାଣରେ ମ୍ରିୟମାଣ କରିଥିଲା ଯେ, କାନ୍ଦି କାନ୍ଦି ମାଆ ନିକଟରେ ଟଳି ପଡ଼ିଥିଲେ ।
ଜୟପୁର ସୁନାରୀ ସାହିରେ ରହୁଥିଲେ ୭୮ ବର୍ଷୀୟ ମାଆ ଏସ ସାବିତ୍ରୀ, ୫୨ ବର୍ଷୀୟ ପୁଅ ଏସ ରବି ଓ ଝିଅ ଏସ ସୁକାନ୍ତି । ପରିବାର ଅତ୍ଯନ୍ତ ଗରିବ । ଜମିବାଡ଼ି କାମ କରି ପରିବାର ଚଳାଉଥିଲେ ରବି । ହେଲେ ପରିବାରର ଦୁଇ ଦୁଇଜଣଙ୍କ ମୃତ୍ଯୁ ପରେ ଏବେ ଝିଅ ଏକା ରହିଯାଇଛି । ଅଞ୍ଚଳରେ ଏପରି ଏକ ଅଭାବନୀୟ ଘଟଣା ପରେ ଶୋକାକୂଳ ପରିବବେଶ ସୃଷ୍ଟି ହୋଇଥିବାବେଳେ ସରକାରୀ ଯୋଜନାରେ ଯାହା ବ୍ଯବସ୍ଥା ରହିଛି ସେନେଇ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି ଉପଜିଲ୍ଲାପାଳ । ଏପରି ଏକ ଦୁଃଖଦ ଘଟଣା ଏବେ ଜୟପୁର ଅଞ୍ଚଳରେ ଚର୍ଚ୍ଚାର ବିଷୟ ପାଲିଟିଛି ।
