ମୁନିଗୁଡ଼ା : ମୌଳିକ ସୁବିଧାରୁ ବଞ୍ଚିତ ଡଙ୍ଗରିଆ । ନା ଅଛି ଭଲ ରାସ୍ତା ନା ପାନୀୟ ଜଳର ସୁବିଧା। ଶିକ୍ଷା, ସ୍ବାସ୍ଥ୍ୟ, ବିଜୁଳି ସୁବିଧା ଏଠାରେ ଅପହଞ୍ଚ । ସରକାରଙ୍କ ଯୋଜନା କାଗଜ କଲମରେ ସୀମିତ। ଆମେ କହୁଛି ଖଣି ଖାଦାନରେ ଭରା ନିୟମଗିରି ପାର୍ବତ୍ୟମାଳାରେ ବସବାସ କରୁଥିବା ଡଙ୍ଗରିଆ କନ୍ଧଙ୍କ କଥା । ସରକାରୀ ଯୋଜନାରୁ ବଞ୍ଚିତ ଏହି ନିରୀହ ଡ଼ଙ୍ଗରିଆଙ୍କୁ ଲୁଟୁଛନ୍ତି ଦଲାଲ ।ପରିଶ୍ରମ କରି ପାହାଡି ଗଡ଼ାଣିରେ ଲକ୍ଷାଧିକ ଚାରା ରୋପଣ କରି ସପୁରୀ ଫଳାଇଛନ୍ତି। ହେଲେ ଅମଳ କରିଥିବା ଲକ୍ଷାଧିକ ସପୁରୀକୁ ଅଳ୍ପ ଦରରେ କିଛି ବ୍ୟବସାୟୀ ଓ ଦଲାଲଙ୍କ ହାତରେ ଟେକିଦେବାକୁ ବାଧ୍ୟ ହେଉଛନ୍ତି ଏମାନେ। ଦଲାଲମାନେ ରାଜ୍ୟ ବାହାରେ ସପୁରୀଗୁଡିକୁ ଅତ୍ୟଧିକ ଲାଭରେ ବିକ୍ରିକରି ବେଶ ଲାଭବାନ ହେଉଛନ୍ତି।
ଡଙ୍ଗରିଆଙ୍କ ବିକାଶ ତଥା ପାହାଡି ଉତ୍ପାଦର ବାସ୍ତବ ମୂଲ୍ୟ ଯେପରି ସେମାନେ ପାଇବେ ସେଥିପାଇଁ ନବୀନ ସରକାର ପଦକ୍ଷେପ ନେଇଥିଲେ। ଲକ୍ଷାଧିକ ଟଙ୍କା ବ୍ୟୟରେ ବିଷମକଟକ ବ୍ଲକର ଚାଟିକଣା ଶିବ ମନ୍ଦିର ପାର୍ଶ୍ଵରେ ଏକ ମାର୍କେଟ ୟାର୍ଡ ଖୋଲାଯାଇଥିଲା । ଏବେ ତାହା ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି । ସେହିପରି ଉଭୟ ମୁନିଗୁଡା ଓ ବିଷମକଟକ ବ୍ଲକ ଅଞ୍ଚଳରେ ରହୁଥିବା ମୋଟ ୬୩ଟି ଗାଁର ବାସିନ୍ଦାଙ୍କ ପାଇଁ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ଏବଂ OPELIP ସଂସ୍ଥା ତରଫରୁ ବିକାଶ କରାଯାଇଥିଲା। ଗାଁରେ କମ୍ୟୁନିଟି ହଲ, ପାନୀୟ ଜଳ ବ୍ୟବସ୍ଥା, ଷ୍ଟ୍ରିଟ ଲାଇଟ, ସୋଲାର ଲାଇଟ ତଥା ବେକାରୀ ଓ ବିଧବାଙ୍କ ପାଇଁ ବିଭିନ୍ନ ଆୟ ପନ୍ଥା ଯୋଗାଇ ଦିଆଯାଇଥିଲା । କିନ୍ତୁ ବର୍ତ୍ତମାନ ସରକାର OPELIP ସଂସ୍ଥାକୁ ବନ୍ଦ କରିଦେଇଛନ୍ତି । ଫଳରେ ଡ଼ଙ୍ଗରିଆଙ୍କ ବିକାଶରେ ଲାଗିଛି ବ୍ରେକ। ଷ୍ଟ୍ରବେରୀ ଚାଷ ମାଧ୍ୟମରେ ଡଙ୍ଗରିଆଙ୍କୁ ସ୍ୱାବଲମ୍ବୀ କରିବାକୁ ବହୁ ଉଦ୍ୟମ କରାଯାଇଥିଲେ ମଧ୍ୟ ତାହା ଫଳପ୍ରଦ ହୋଇନାହିଁ । ବିକାଶଠାରୁ ବହୁ ପଛରେ ଡଙ୍ଗରିଆ କନ୍ଧ । କେବେ ସରକାରଙ୍କ ନଜର ନିୟମଗିରିର ଏହି ଆଦିମ ଜନଜାତି ଉପରେ ପଡ଼ୁଛି? କେବେ ସେମାନେ ମୌଳିକ ସୁବିଧା ପାଉଛନ୍ତି? ତାକୁ ଅପେକ୍ଷା।
