ଓଡ଼ିଶା ବନ୍ଦରେ ହଟହଟା ରୋଗୀ ଓ ସାଧାରଣ ଜନତା

ନନ୍ଦିଘୋଷ ବ୍ୟୁରୋ : ମାଲକାନଗିରି କୁଡୁମୁଲୁଗୁମ୍ମାର ସୋମନ୍ତ ବଟେ । ହାତଗୋଡ଼ ଭାଙ୍ଗିଯାଇଥିବାରୁ ଏମସରେ ଚିକିତ୍ସା ଲାଗି କୋରାପୁଟରୁ ଟ୍ରେନରେ ଆସିଲେ ଭୁବନେଶ୍ବର। ହେଲେ ଭୁବନେଶ୍ବରରେ ଓହ୍ଲାଇବା ପରେ ଯାଇପାରି ନଥିଲେ ଏମ୍ସ। ସାରା ଦିନ ଷ୍ଟେସନରେ ରହି ହୋଇଥିଲେ ଛଟପଟ। ସେ ଜାଣି ନଥିଲେ ଆଜି ଓଡ଼ିଶା ବନ୍ଦ। ଚିକିତ୍ସା ଲାଗି ଏତେ ବାଟରୁ ସେ ଧାଇଁ ଆସିଥିଲେ ବି ହୋଇଥିଲେ ନିରାଶ। ସେପଟେ ଏହି ମହିଳାଙ୍କୁ ଦେଖନ୍ତୁ। ଏ ହେଉଛନ୍ତି ଝାରସୁଗୁଡାର ଶାନ୍ତିପ୍ରଭା ଲାକ୍ରା। ମାରାତ୍ମକ କ୍ୟାନସରରେ ପଡ଼ି ହେଉଛନ୍ତି ଛଟପଟ। ଏମସରେ ଚିକିତ୍ସା ଲାଗି ଭୁବନେଶ୍ବର ଆସିଥିଲେ। ହେଲେ ସବୁକିଛି ହୋଇଯାଇଥିଲା ଓଲଟପାଲଟ। ବନ୍ଦ ଯୋଗୁ ଷ୍ଟେସନରେ ସାରା ଦିନ ପଡି ହୋଇଥିଲେ ଛଟପଟ। ଏହି ଦୁଇ ରୋଗୀଙ୍କ ପରି ଷ୍ଟେସନରେ ଦୂରଦୂରାନ୍ତର ଲୋକଙ୍କ ସମସ୍ୟାକୁ କ୍ୟାମେରାଫ୍ରେମରେ ତୋଳି ଧରିଥିଲା ନନ୍ଦିଘୋଷ ଟିଭି।

ବାଲେଶ୍ବର ଛାତ୍ରୀ ମୃତ୍ୟୁ ଘଟଣାକୁ ନେଇ କଂଗ୍ରେସର ଓଡ଼ିଶା ବନ୍ଦ। ପଲ୍ଲୀରୁ ରାଜଧାନୀ ଯାନବାହନ ଚଳାଚଳ ଠପ୍। ଅଭୂତପୂର୍ବ ଜନସମର୍ଥନ। ସରକାରୀ ସ୍ଥାଣୁତା ବିରୋଧରେ ରାଜ୍ୟବାସୀ ଏକ। ମୁଖ୍ୟମନ୍ତ୍ରୀ ଓ ଉଚ୍ଚଶିକ୍ଷାମନ୍ତ୍ରୀଙ୍କ ଇସ୍ତଫା ଦାବିରେ ବନ୍ଦ ହେଲା ରାଜ୍ୟ। ନାରୀ ନିର୍ଯାତନା , ଦୁଷ୍କର୍ମ, ଛାତ୍ରୀମୃତ୍ୟୁ ଆଦି ଘଟଣା ବିରୋଧରେ ସବୁଠି ସମାନ ସ୍ବର। ଯାନବାହନ, ଶିକ୍ଷାନୁଷ୍ଠାନ, ବାଣିଜ୍ୟ ପ୍ରତିଷ୍ଠାନ ବନ୍ଦ। ସବୁଠି ସ୍ବତଃସ୍ଫୂର୍ତ୍ତ ବନ୍ଦ ପାଳନ। ସେପଟେ ଓଡ଼ିଶାରେ ମହିଳାଙ୍କ ପ୍ରତି ହେଉଥିବା ଅତ୍ୟାଚାର ବିରୋଧରେ ଏକ ହୋଇଛନ୍ତି ବସ୍ ମାଲିକ, ଡ୍ରାଇଭର ଓ କର୍ମଚାରୀ। ରାସ୍ତାଘାଟ, ବସଷ୍ଟାଣ୍ଡ ଜନଶୂନ୍ୟ ସତ୍ତ୍ବେ ନାରୀମାନଙ୍କ ସ୍ବାଭିମାନ ଲାଗି ବନ୍ଦକୁ ସମସ୍ତେ କରିଛନ୍ତି ସ୍ବାଗତ। ନ୍ୟାୟ ପାଇଁ ଲଢ଼ି ଲଢ଼ି ଶେଷରେ ଆଖି ବୁଜିଲେ ପୀଡ଼ିତା। ନ୍ୟାୟ ଦାବିରେ ସାରା ରାଜ୍ୟବାସୀ ହୋଇଛନ୍ତି ଏକ। ବାଲେଶ୍ବର ବନ୍ଦରୁ ଓଡ଼ିଶା ବନ୍ଦ- ରାଜ୍ୟ ଦେଖିଲା ଅନ୍ୟାୟ ପ୍ରତିବାଦରେ ନ୍ୟାୟର ଯୁଦ୍ଧ।