ଭୁବନେଶ୍ବର : ରାଜ୍ଯରେ ଦକ୍ଷିଣ ଓଡିଶା ମଡେଲ ଆପଣାଇବ କଂଗ୍ରେସ। ପୂର୍ବ ନିର୍ବାଚନରେ ଯେଉଁ ରଣନୀତି ଆପଣାଇ ଦଳ ଦକ୍ଷିଣ ଓଡ଼ିଶାରେ ୧୦ ବିଧାନସଭା ହାତେଇଥିଲା ସେହି ରଣନୀତି ଆପଣାଇବ ସାରା ରାଜ୍ଯରେ। କଂଗ୍ରେସ ଭବନରେ ଦଳୀୟ ପ୍ରଭାରୀ ଅଜୟ କୁମାର ଲଲୁ, ସାଂସଦ ସପ୍ତଗିରି ଉଲ୍ଲାକା, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମଙ୍କ ସମେତ ଅନ୍ୟ ବିଧାୟକ, ଜିଲ୍ଲା ସଭାପତିମାନଙ୍କ ଉପସ୍ଥିତିରେ ପ୍ରସ୍ତୁତ ହୋଇଛି ବ୍ଲୁପ୍ରିଣ୍ଟ। ଆଗକୁ ଦକ୍ଷିଣ ଓଡ଼ିଶାର ୧୪ ବିଧାୟକ ସହ ଦୁଇଟି ସାଂସଦ କିଭଳି ଜିତିବେ ତାହା ଉପରେ ବି କରାଯାଇଛି ଫୋକସ। ସାରା ରାଜ୍ୟରେ ଭଲ ପ୍ରଦର୍ଶନ ପାଇଁ ଆରମ୍ଭ ହୋଇଛି ଯୋଜନା।
ଲୋକଙ୍କ ପାଇଁ ଲଢେଇ କରିବାକୁ ବି ଦଳୀୟ ବିଧାୟକଙ୍କୁ ଦିଆଯାଇଛି ଆହ୍ବାନ। ଗତକାଲି ସବୁ ବିଧାୟକଙ୍କ ସହ ୱାନ ଟୁ ୱାନ ଆଲୋଚନା କରି ଗୁରୁମନ୍ତ୍ର ଦେଇଥିଲେ ପ୍ରଭାରୀ। ଏହା ସହ ସଭାପତି ଓ ପ୍ରଭାରୀଙ୍କ ଆଗରେ ନିଜ ନିଜ ମତ ରଖିଛନ୍ତି ବିଧାୟକ। ବୁଥ ସ୍ତର ଯାଏ ଯିବାକୁ ନେତାଙ୍କୁ ସଭାପତି ପରାମର୍ଶ ଦେବା ସହ ବିଧାୟକଙ୍କୁ ଦିଆଯାଇଛି ଗୁରୁ ଦାୟିତ୍ୱ। ଗତକାଲି ବିଧାୟକଙ୍କ ସହ ପିସିସି ସଭାପତି ଭକ୍ତ ଚରଣ ଦାସ, ପ୍ରଭାରୀ ଅଜୟ କୁମାର ଲଲୁ ବୈଠକ ପରେ ବିଧାୟକଙ୍କ ମହଲରେ ଭରିଛି ଜୋଶ। ନବନିଯୁକ୍ତ ସଭାପତି ଓ ପ୍ରଭାରୀଙ୍କୁ ନେଇ ରାଜ୍ୟ କଂଗ୍ରେସ ଉତ୍ସାହିତ। ତେବେ ଅନ୍ତଃକନ୍ଦଳକୁ କିପରି ଦଳ ମୁକାବିଲା କରିବ ତାହାକୁ ନେଇ ଜାରି ରହିଛି ଚର୍ଚ୍ଚା।
