ନନ୍ଦିଘୋଷ ବ୍ୟୁରୋ : ପାକିସ୍ତାନ କରୁଛି ଆଣବିକ ବୋମା ପରୀକ୍ଷଣ। ଏହି ବିସ୍ଫୋରକ ବୟାନ ଦେଇଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସେ କହିଛନ୍ତି, ପାକିସ୍ତାନ ସମେତ ଅନେକ ଦେଶ ଆଣବିକ ବୋମା ପରୀକ୍ଷଣ କରୁଛନ୍ତି। ରୁଷିଆ, ଚୀନ, ଉତ୍ତର କୋରିଆ ପରି ଦେଶ ଆଣବିକ ପରୀକ୍ଷଣ କରୁଛନ୍ତି। ଏଥିପାଇଁ ମୃଦୁ ଭୂମିକମ୍ପ ହେଉଛି। ଏ ସଂପର୍କରେ କିନ୍ତୁ ଚୀନ କି ରୁଷିଆ କିଛି କହୁ ନାହାନ୍ତି। ମାଟି ତଳେ କେଉଁଠି ଟେଷ୍ଟ କରାଯାଉଛି, ତାହା ଜଣାପଡୁନି। ଆମେରିକା ବି ଏପରି ଟେଷ୍ଟ କରିବା ଦରକାର ବୋଲି କହିଛନ୍ତି ଟ୍ରମ୍ପ। ଆମେ ଯଦି ଟେଷ୍ଟ କରିବୁ, ତାହା କହିବୁ। ଅନ୍ୟ ଦେଶ ଯେହେତୁ ଆଣବିକ ପରୀକ୍ଷା କରୁଛନ୍ତି, ଆମେରିକା ବି ଏପରି କରିବ ବୋଲି କହିଛନ୍ତି ଟ୍ରମ୍ପ। କିଛି ତିନ ତଳେ ରୁଷିଆ ଆଣବିକ ଶକ୍ତି ସଂପନ୍ନ ମିସାଇଲ ଟେଷ୍ଟ କରିଥିଲା। ଏହା ପରେ ସାରା ବିଶ୍ଵରେ ପୁଣି ଥରେ ଆଣବିକ ଅସ୍ତ୍ର ପ୍ରତିଯୋଗିତା ଆରମ୍ଭ ହୋଇଯିବ ବୋଲି ଆଶଙ୍କା ପ୍ରକାଶ ପାଇଛି। ରୁଷିଆର ପରୀକ୍ଷଣ ପରେ ଟ୍ରମ୍ପ କହିଲେଣି ୩୦ ବର୍ଷ ପରେ ପୁଣି ଆମେରିକା ବି ଏପରି ଟେଷ୍ଟ କରିବ। ତେବେ ବିଶ୍ଵରେ ଯେତେ ଆଣବିକ ଅସ୍ତ୍ର ଅଛି, ତାହା ସାରା ବିଶ୍ଵକୁ ଶତାଧିକ ଥର ଧ୍ଵଂସ କରିପାରିବ। ତେଣୁ ବିଶ୍ଵକୁ ଆଣବିକ ନିରସ୍ତ୍ରୀକରଣ ପାଇଁ ମଧ୍ୟ ଆହ୍ଵାନ ଦେଇଛନ୍ତି ଟ୍ରମ୍ପ। ଏ ସଂପର୍କରେ ସେ ରୁଷିଆ ଓ ଚୀନ ରାଷ୍ଟ୍ରପତିଙ୍କ ସହିତ ଆଲୋଚନା କରିଥିବା କହିଛନ୍ତି ଟ୍ରମ୍ପ।
