ଭଦ୍ରକ: ରାଜ୍ୟରେ ସାମାଜିକ ସୁରକ୍ଷା ଯୋଜନାକୁ ନେଇ ବଡ଼ ବଡ଼ ଦାବି କରାଯାଉଥିବା ବେଳେ ସାମ୍ନାକୁ ଆସିଛି ଏକ ଚିନ୍ତା ଜଣକ ତଥ୍ୟ । ମିଳୁନି ଭତ୍ତା, ଯାହାଫଳରେ ବଢୁଛି ବିଧବା, ବୃଦ୍ଧବୃଦ୍ଧା ଓ ଭିନ୍ନକ୍ଷମଙ୍କ ଯନ୍ତ୍ରଣା। ପଞ୍ଚାୟତ ଅଫିସ ଠାରୁ ଆରମ୍ଭ କରି ବ୍ୟାଙ୍କ ପର୍ଯ୍ୟନ୍ତ ଦୌଡ଼ି ଦୌଡ଼ି ହିତାଧିକାରୀମାନେ ନିରାଶ ହେଉଛନ୍ତି। ୩ ମାସ ହେଲାଣି ଆକାଉଣ୍ଟକୁ ଭତ୍ତା ଟଙ୍କା ଆସୁନଥିବାରୁ ସେମାନେ ନାହିଁ ନଥିବା ଅସୁବିଧାର ସମୁଖୀନ ହେଉଛନ୍ତି।ଭତ୍ତା ଟଙ୍କା ମିଳିଲେ ହିଁ ସେମାନଙ୍କ ପେଟକୁ ଦାନା ମିଳେ ଓ ରୋଗ ପାଇଁ ଔଷଧ କିଣାହୁଏ।
ଏଭଳି ଏକ ଦୁଃଖଦ ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ତିହିଡି ବ୍ଲକ ଗୁଡ଼ୁପାଳ ଅଂଚଳରେ। ରଘୁନାଥ ମହାଳିକଙ୍କ ବୟସ ୯୨ ବର୍ଷ ଏବଂ ସେ ବିଗତ ୪ ବର୍ଷ ହେଲା ଶଯ୍ୟାଶାୟୀ ଅଛନ୍ତି। ତାଙ୍କ ପାଇଁ ସରକାରୀ ଭତ୍ତା ଟଙ୍କା ହିଁ ଥିଲା ଔଷଧପତ୍ର କିଣିବାର ମୁଖ୍ୟ ମାଧ୍ୟମ। ମାତ୍ର ଦୀର୍ଘ ତିନି ମାସ ଧରି ଟଙ୍କା ନମିଳୁଥିବାରୁ ତାଙ୍କ ପରିବାର ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି।
ସେହିପରି ଗାଁର ଆଉ ଜଣେ ବିଧବା ବୃଦ୍ଧା ବାସନ୍ତି ନାୟକଙ୍କ କାହାଣୀ ମଧ୍ୟ ତାଙ୍କର ଅତ୍ୟନ୍ତ ଦୟନୀୟ। ତାଙ୍କ ଘରେ ଜଣେ ଭିନ୍ନକ୍ଷମ ପୁଅ ମଧ୍ୟ ଅଛନ୍ତି। ସଂସାର ଚଳାଇବା ପାଇଁ ଭତ୍ତା ଟଙ୍କା ହିଁ ତାଙ୍କର ଏକମାତ୍ର ଆଶା ଭରସା ଥିଲା। ହେଲେ ବାସନ୍ତିଙ୍କୁ ଦୀର୍ଘ ୯ ମାସ ହେବ ଭତ୍ତା ମିଳିନାହିଁ।
ତେବେ ବୃଦ୍ଧବୃଦ୍ଧା ଓ ଅସହାୟମାନଙ୍କ ଜୀବନ ଜିଇଁବାର ସାହାରା ପାଲଟିଥିବା ଏହି ଭତ୍ତା ଟଙ୍କାକୁ ତୁରନ୍ତ ପ୍ରଦାନ କରିବା ସହ ସମସ୍ୟାର ସମାଧାନ କରିବାକୁ ବିଭିନ୍ନ ମହଲରେ ଦାବି ହୋଇଛି। ଅନ୍ୟପଟେ ଏହି ବିଳମ୍ବ ପାଇଁ ପ୍ରଶାସନ ପକ୍ଷରୁ ଟେକନିକାଲ ତ୍ରୁଟିକୁ ଦୋଷ ଦିଆଯାଇଛି।
ଅନ୍ୟପଟେ ବିଡିଓଙ୍କ କହିବା ଅନୁଯାୟୀ, ଗ୍ରାମ୍ୟ ବ୍ୟାଙ୍କର ଆଇଏଫସି (IFSC) କୋଡ୍ ପରିବର୍ତ୍ତନ ହୋଇଥିବାରୁ ଏହି ସମସ୍ୟା ସୃଷ୍ଟି ହୋଇଛି। ଖୁବଶୀଘ୍ର ସମସ୍ତ ତ୍ରୁଟି ସୁଧାରି ହିତାଧିକାରୀଙ୍କୁ ଭତ୍ତା ଟଙ୍କା ପ୍ରଦାନ କରାଯିବ।
