ବାଲେଶ୍ୱର : ବାଲେଶ୍ବର ପବନରେ ବିଷ । ପ୍ରଦୂଷଣ କମାଇବାକୁ ଜାରି ହୋଇଛି କଟକଣା । ସକାଳ ସଂଧ୍ଯା ୬ଟାରୁ ସକାଳ ୧୦ଟା ନିର୍ମାଣ କାର୍ଯ୍ଯ ବନ୍ଦ । ମୁଖ୍ୟ ରାସ୍ତା, ଜାତୀୟ ରାଜପଥରେ ୩ ଥର ସିଞ୍ଚନ ହେବ ପାଣି । ଭଙ୍ଗାରୁଜା ଓ ମାଟିକାମ ସଂପୂର୍ଣ୍ଣ ବନ୍ଦ । ସହରକୁ ଭାରି ଯାନ ପ୍ରବେଶ କଟକଣା । ବର୍ଜ୍ୟବସ୍ତୁ ଓ ଢ଼ାବାରେ କୋଇଲା ଜଳାଇବାରେ ରୋକ୍ । ଖଣିଜ ବା ଲଘୁ ଖଣିଜ ଚାଲାଣବେଳେ ଘୋଡ଼ାଇ ନେବାକୁ ନିର୍ଦ୍ଦେଶ । ୭ ଦିନ ଯାଏଁ ଜିଲ୍ଲାପାଳ ଏପରି ନିର୍ଦ୍ଦେଶ ଜାରି କରିଥିବା ସତ୍ତ୍ବେ ମାନୁ ନାହାନ୍ତି ଅମାନିଆ । ମୁହଁରେ ଗାମୁଛା ଘୋଡାଇ ଶୀତୁଆ ସକାଳରେ ଧୂଳିରେ କାର୍ଯ୍ୟ କରୁଛନ୍ତି ଶ୍ରମିକ । ଯାହା ଖୋଦ୍ ବାଲେଶ୍ଵର ଜିଲ୍ଲାପାଳଙ୍କ ନିଜସ୍ଵ କାର୍ଯ୍ୟଳୟରେ ଦେଖିବାକୁ ମିଳିଛି ଏପରି ବ୍ଯତିକ୍ରମ ।
ବାଲେଶ୍ଵର ଜିଲ୍ଲା ବାୟୁ ପ୍ରଦୂଷଣରେ ଗତ କିଛି ମାସ ଧରି ସମଗ୍ର ଦେଶରେ ଏକ ଚିନ୍ତାଜନକ ସ୍ଥିତି ସୃଷ୍ଟି କରିଛି । ଜାନୁଆରୀ ପହିଲାରେ QI ୩୩୭, ୨ ତାରିଖରେ ୩୧୮, ୩ରେ ୨୯୭, ୪ ରେ ୩୦୬ ରହିଛି । ସ୍ଥିତି ଏପରି ହୋଇଛି ମର୍ଣ୍ଣିଂୱାକ ବି ଲୋକଙ୍କ ପାଇଁ ବିପଦର କାରଣ ସାଜିଛି । ବୟସ୍କ ଓ ସ୍ବାସ ରୋଗୀଙ୍କ ପାଇଁ ନିଃଶ୍ବାସ ପାଲଟିଛି ବିଷ । ଏଥିପାଇଁ ଜିଲ୍ଲା ପ୍ରଶାସନ କଟକଣା ଜାରି କରିଥିଲେ ସୁଦ୍ଧା ଏହାକୁ ବେଖାତିର କରି କୋଠା ଭଙ୍ଗା ଓ ନିର୍ମାଣ କାର୍ଯ୍ଯ ଜାରି ରହିଛି । ଯାହାକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ । ୭ଦିନ ବାଲେଶ୍ୱର ପୌରପାଳିକା ଏବଂ ଅନ୍ୟ ଏନଏସି ଓ ମ୍ୟୁନିସିପାଲଟି ଅଞ୍ଚଳରେ କଟକଣା ଲାଗୁ ହୋଇଛି । ତେବେ ଅମାନିଆଙ୍କ ବିରୋଧରେ କାର୍ଯ୍ଯାନୁଷ୍ଠାନ ନେବାକୁ ବିଭିନ୍ନ ମହଲରେ ହୋଇଛି ଦାବି ।
