ପୁରୀ : କେବେ ତୁଟିବ ଶ୍ରୀକ୍ଷେତ୍ରବାସୀଙ୍କ ଜମିଜମା ଦ୍ବନ୍ଦ୍ବ । ବ୍ଯାପକ ଆନ୍ଦୋଳନ ସତ୍ତ୍ବ ଦୂର ହେଉନି ସମସ୍ଯା । ୟୁନିଫର୍ମ ପଲିସି ଓ ଆଇନ ସଂଶୋଧନ ଆଳରେ ଗଡୁଛି ସମୟ । ଜମି ମାଫିଆଙ୍କୁ ପରୋକ୍ଷରେ ସହାୟତା ମିଳୁଥିବା ଅଭିଯୋଗ । ପୁରୀ ବର୍ଷ ବର୍ଷ ଧରି ରହି ଆସୁଛନ୍ତି ଲୋକେ । ମ୍ୟୁନିସପାଲଟି ଓ ଦେବୋତ୍ତର ସହ ରାଜସ୍ୱ ବିଭାଗ ଅଧୀନରେ ରହିଛି ଜମି । ଅନେକ ବର୍ଷ ଧରି ମହାପ୍ରଭୁଙ୍କ ଜମିରେ ବସବାସ କରୁଛନ୍ତି ସାଧାରଣ ଲୋକେ । ଏହାକୁ ସେମାନଙ୍କ ନାଁରେ କରିବାକୁ ଦୀର୍ଘ ଦୁଇ ଦଶନ୍ଧି ହେଲା ଚାଲିଛି କସରତ । ୟୁନିଫର୍ମ ପଲିସି ଆଇନର ସଂଶୋଧନ ନେଇ ରାସ୍ତା ବାହାରିଥିବା ସତ୍ତ୍ବେ ଏହାକୁ କାର୍ଯ୍ଯକାରୀ କରାଯାଉ ନାହିଁ । ସେପଟେ ସରକାରୀ ଓ ଶ୍ରୀମନ୍ଦିର ଜମିରେ ମାଫିଆ ଓ ଜମି ଦଲାଲ କୋଟିକୋଟି ଟଙ୍କା ଆଦାୟ କରୁଥିବା ଅଭିଯୋଗ ହୋଇଛି ।
ନିଜ ନାମରେ ହୋଇପାରୁ ନଥିବାରୁ ଜରୁରୀ ପରିସ୍ଥିତିରେ ଜାଗା ବନ୍ଧକ କିମ୍ବା ବିକ୍ରି କରିପାରୁ ନାହାନ୍ତି ଲୋକେ । ଭିଟାମାଟି ସମସ୍ୟା ଦୂର କରିବା ନେଇ ସରକାରଙ୍କ ପକ୍ଷରୁ ଇତି ମଧ୍ୟରେ ବିଭିନ୍ନ ବିଭାଗକୁ ନେଇ ବୈଠକ ପରେ ବୈଠକ ହୋଇଛି । ପୁରୀ ଜିଲ୍ଲା ଓ ସହରର ଜମି ଜମା ସମସ୍ୟା ଏକ ଜଟିଳ ରାଜସ୍ୱ ସମସ୍ୟା ହୋଇଥିବାବେଳେ ଏହାର ଏକ ସ୍ଥାୟୀ ସମାଧାନର ଆବଶ୍ଯକତା ରହିଛି । ଲୋକଙ୍କ ସମସ୍ଯାକୁ ଦୃଷ୍ଟିରେ ରଖି ସରକାର ଏକ ସମାଧାର ସୂତ୍ର ବାହାର କରିବାକୁ ଲକ୍ଷ୍ୟ ରଖିଥିବା କହିଛନ୍ତି ରାଜସ୍ବ ମନ୍ତ୍ରୀ । ସରକାର ଓଡ଼ିଶାରେ ଗୋଟିଏ ରାଜସ୍ୱ ଆଇନ ଓଡିଶା ଗଭର୍ଣ୍ଣମେଣ୍ଟ ଲ୍ୟାଣ୍ଡ ମ୍ୟାନେଜମେଣ୍ଟ ଆକ୍ଟ ଲାଗୁ କରିବା ନେଇ ବ୍ୟବସ୍ଥା କରୁଥିବାବେଳେ ସେହି ବ୍ୟବସ୍ଥାରେ ପୁରୀବାସୀଙ୍କ ସମସ୍ୟା କେତେ ସମଧାନ ହେବ ସେନେଇ ସୃଷ୍ଟି ହୋଇଛି ଦ୍ବନ୍ଦ୍ବ।
