ନନ୍ଦିଘୋଷ ବ୍ୟୁରୋ: ଆଜି ପବିତ୍ର ଅଁଳା ନବମୀ। କାର୍ତ୍ତିକ ମାସ ଶୁକ୍ଳ ପକ୍ଷ ନବମୀ ତିଥିରେ ଏହି ପର୍ବ ପାଳନ କରାଯାଏ। ଏହି ଦିନ ଅଁଳା ଗଛକୁ ପୂଜା କରିବା ସହ ଭଗବାନ ବିଷ୍ଣୁଙ୍କ ଆରାଧନା କରିଥାନ୍ତି ଶ୍ରଦ୍ଧାଳୁ। ଓଡ଼ିଶାରେ ଏହି ଦିନର ରହିଛି ସ୍ୱତନ୍ତ୍ର ମହତ୍ତ୍ୱ। ବିଶେଷକରି ସାକ୍ଷୀଗୋପାଳ ମନ୍ଦିରରେ ମା’ ରାଧାରାଣୀଙ୍କ ଦୁର୍ଲଭ ପାଦ ଦର୍ଶନ ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ରହିଥାଏ ବେଶ୍ ଉତ୍ସାହ।
ଅଁଳା ନବମୀ ପାଇଁ ଚଳଚଞ୍ଚଳ ହୋଇଉଠିଛି ଶ୍ରୀ ଗୋପାଳଜୀଉ ମନ୍ଦିର। ଓଡିଆଣୀ ବେଶରେ ଦର୍ଶନ ଦେଉଛନ୍ତି ମା’ ରାଧାରାଣୀ। କାଣିଆଁ କଛା ମାରି ମଠା ବସ୍ତ୍ର ପରିଧାନ କରିଛନ୍ତି ମା’ ରାଧାରାଣୀ। ସେପଟେ ନଟବର ବେଶରେ ସଜେଇ ହୋଇଛନ୍ତି ଶ୍ରୀ କୃଷ୍ଣ। ମା’ ରାଧାରାଣୀଙ୍କ ଦୁର୍ଲଭ ବେଶ ଦର୍ଶନ କରିବାକୁ ଲାଗିଛି ଭକ୍ତଙ୍କ ଭିଡ଼। ୧୧ ଥାକିଆ ବ୍ୟାରିକେଟ୍ ମାଧ୍ୟମରେ ଶୃଙ୍ଖଳିତ ଭାବେ ମା’ଙ୍କ ପାଦ ପଦ୍ମ ଜୁଗଳକୁ ଦର୍ଶନ କରି କୋଟି ଜନ୍ମର ପୂଣ୍ଣ୍ୟ ଅର୍ଜନ କରୁଛନ୍ତି ଲକ୍ଷ ଲକ୍ଷ ଭକ୍ତ। ରାତି ୧ଟାରେ ଦ୍ବାର ଫିଟା ନୀତି ପରେ ମଙ୍ଗଳ ଆଳତି ପରେ ପରେ ବେଶ,ମୈଲମ, ସୂର୍ଯ୍ୟପୂଜା,ଦ୍ବାରପାଳ ପୂଜା,ବଲଭ,ସକାଳ ଧୂପ,ବାଳଭୋଗ ନିତି ଶେଷ ହୋଇ ରାତି ୨ଟାରୁ ସାହଣମେଲା ଦର୍ଶନ ଆରମ୍ଭ ହୋଇଛି। ସେପଟେ ମନ୍ଦିର ଭିତରେ ମୋବାଇଲ ପ୍ରବେଶ କଟକଣାକୁ କଡାକଡି କରାଯାଇଛି । ନିୟମ ଉଲଗ୍ନ କଲେ ହଜାର ଟଙ୍କା ଜୋରିମାନା ଆଦାୟ କରାଯିବ ବୋଲି ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।

