ନନ୍ଦିଘୋଷ ବ୍ୟୁରୋ : ଆମେରିକା ଆଗରେ କେନ୍ଦ୍ର ସରକାର ପୂରା ଫସିଯାଇଛନ୍ତି । ଆମେରିକା ଚାଲ ଆଗରେ ସରକାର ହୋଲସେଲ ସରେଣ୍ଡର କରିଛନ୍ତି । କେନ୍ଦ୍ର ସରକାରଙ୍କ ଗଳାକୁ ଚିପି ଧରି ଆମେରିକା ତାର ମନମାନି ଚଳାଇଛି । ସେଥିପାଇଁ ସରକାର ଆମେରିକା କଥାରେ ଦେଶକୁ ବିକ୍ରି କରିବାକୁ ଯୋଜନା କରୁଛନ୍ତି । କହିବାକୁ ଗଲେ ସରକାର ଭାରତକୁ ବିକ୍ରି କରିସାରିଛନ୍ତି । ସରକାର ସେଥିପାଇଁ ତାଙ୍କ ସହ ଆଖି ମିଳାଇପାରୁନାହାଁନ୍ତି । ସରକାରଙ୍କୁ ଲଜ୍ଜାବୋଧ ହେବା ଦରକାର । ନିଜର ବଜେଟ ଆଲୋଚନାରେ ଏପରି ଆରୋପ ଆଣି ସରକାରଙ୍କୁ ଟାର୍ଗେଟ କରିଛନ୍ତି ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ । କହିଛନ୍ତି, ଭାରତ ପାଖରେ ବିଶ୍ବର ସବୁଠୁ ବଡ଼ ଡାଟା-ପୁଲ ରହିଛି । ଯାହାକୁ ଆମେରିକା ଆଖେଇଛି ବୋଲି ରାହୁଲ କହିଛନ୍ତି । ଏହାଦ୍ବାରା ଆମେରିକା ନିଜ ଡଲାର ବଞ୍ଚାଇବାକୁ ସମର୍ଥ ହେବ । ତେଣୁ ଭାରତ ଉପରେ ନିଜର ପ୍ରଭୁତ୍ବ ଜାହିର କରିବାକୁ ଟ୍ରମ୍ପ ସରକାର ଯୋଜନା କରିଛି । ବିଶ୍ବର ସମୀକରଣ ଏବେ ଦ୍ରୁତଗତିରେ ବଦଳିବାରେ ଲାଗିଛି । ବିଶ୍ବ ଏବେ ଯୁଦ୍ଧ ମୋଡକୁ ଚାଲିଆସିଛି । ୟୁକ୍ରେନ ଓ ଗାଜାରେ ଯୁଦ୍ଧ ଚାଲିଛି । ଶକ୍ତି ଓ ଅର୍ଥକୁ ଅସ୍ତ୍ର କରିବାର ସମୟ ଆସିଛି । ବିଶ୍ବରେ ଆମେରିକାର ଦାଦାଗିରି ଏବେ ବଡ଼ ଚ୍ଯାଲେଞ୍ଜ ସାବ୍ୟସ୍ତ ହୋଇଛି । ଏଆଇ ଆସିବା ପରେ ବିଶ୍ବ ଏକ ବିପଜ୍ଜନକ ଦୁନିଆଁରେ ପରିଣତ ହୋଇଛି । ସବୁଠି ଅନିଶ୍ଚିତତା ବୃଦ୍ଧି ପାଇବାରେ ଲାଗିଛି । ଏଥିରୁ ବର୍ତ୍ତିବା ପାଇଁ ଶକ୍ତି କ୍ଷେତ୍ର ଓ ଆର୍ଥିକ କ୍ଷେତ୍ରକୁ ସୁଦୃଢ କରିବା ଜରୁରୀ ବୋଲି ରାହୁଲ କହିଛନ୍ତି । ପିଏମ କହୁଛନ୍ତି ଏବେ ଯୁଦ୍ଧର ଯୁଗ ଶେଷ ହୋଇଯାଇଛି । ହେଲେ ତାହା ଭୁଲ । ସରକାରଙ୍କ ପ୍ରଥମ କାମ ହେଉଛି, ଆମ ଚାଷୀଙ୍କ ହିତର ସୁରକ୍ଷା । ସେହିପରି ଟ୍ରେଡ ଡିଲ ନେଇ ରାହୁଲ ସରକାରଙ୍କୁ ଘେରିଛନ୍ତି । କହିଛନ୍ତି,
ଟ୍ରମ୍ପ ଟାରିଫକୁ ୩ ପ୍ରତିଶତରୁ ବଢାଇ ୧୮ ପ୍ରତିଶତ କରିଛନ୍ତି । ଏବେ ଆମେରିକା ନିଷ୍ପତ୍ତି ନେଉଛି ଯେ ଆମେ କାହାଠୁ ତୈଳ କ୍ରୟ କରିବା । ଟ୍ରେଡ ଡିଲ ଆମେରିକାର ଆମଦାନୀ ବୃଦ୍ଧି ଲାଗି କରାଯାଇଛି । ଡିଲରୁ ଭାରତକୁ କ୍ଷତି, ଆମେରିକାକୁ ଲାଭ ମିଳିବ । ତେଲ କିଣିବା ଲାଗି ଆମେରିକା ଆମ ଉପରେ କଟକଣା ଲଗାଇଛି । ତେଳ ଅନ୍ୟ କାହାଠୁ କିଣିଲେ ଆମେରିକା ଆକ୍ସନ ନେବ । ଏଥିପାଇଁ ସରକାରଙ୍କ ଲଜ୍ଜାବୋଧ କରିବା ଜରୁରୀ ବୋଲି କହିଛନ୍ତି ରାହୁଲ ।
‘ଶକ୍ତି ଓ ଅର୍ଥକୁ ଏବେ ଅସ୍ତ୍ର କରିବାର ସମୟ ଆସିଛି’
