କେବେ ୧୦ ଆକବର ରୋଡରେ କ୍ଷୀର ବିକ୍ରି କରୁଥିଲେ ରାଜେଶ ପାଇଲଟ୍
1 min read
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଜେପିର ସେହି ନେତା, ଯିଏ ତାଙ୍କ ଅତୀତ ବିଷୟରେ ସର୍ବସାଧାରଣରେ ଜଣାଇ ନିଜକୁ ଏକ ‘ଚାଏୱାଲା’ ବୋଲି ପରିଚୟ ଦେଇଥିଲେ। ଏମିତି ଏକ ସମୟ ଥିଲା ଯେତେବେଳେ କଂଗ୍ରେସର ଜଣେ ନେତା ରାଜେଶ ପାଇଲଟ୍ ଅତୀତକୁ ମନେ ରଖି ନିଜକୁ ଏକ ‘ଦୁଗ୍ଧଚାଷୀ’ ବୋଲି ପରିଚୟ ଦେଉଥିଲେ। ରାଜସ୍ଥାନରେ କଂଗ୍ରେସ ସରକାର ଉପରେ ଆସିଥିବା ସଙ୍କଟ ଭିତରେ ସଚିନ ପାଇଲଟ ଏମିତି ଘେରି ରହିଛନ୍ତିକି ତାଙ୍କୁ ତାଙ୍କ ପିତା ରାଜେଶ ପାଇଲଟଙ୍କ ସହ ତୁଳନା କରାଯାଉଛି।
୧୯୯୭ ରେ କଂଗ୍ରେସ ସଭାପତି ପଦକୁ ନେଇ ହୋଇଥିବା ରାଜନୀତି ଦୌଡ଼ରେ ସୀତାରାମ କେସରୀ ଅଧ୍ୟକ୍ଷ ହେବେ ବୋଲି ଜାଣି ମଧ୍ୟ ରାଜେଶ ପାଇଲଟ୍ ନିଜରସମସ୍ତ ସାମର୍ଥ୍ୟ ସହିତ କେସରୀଙ୍କୁ ସାମ୍ନା କରିବାକୁ ପ୍ରସ୍ତୁତ ଥିଲେ । ବର୍ତ୍ତମାନ ସଚ୍ଚିନ ପାଇଲଟଙ୍କ ଜୀବନରେ ଏଭଳି କିଛି ପରିସ୍ଥିତି ସୃଷ୍ଟି ହୋଇଛି । ରାଜସ୍ଥାନରେ ସିଏମ ଅଶୋକ ଗେହଲୋଟଙ୍କ ବିରୋଧରେ ଛିଡା ହୋଇଥିବା ସଚିନଙ୍କୁ କଂଗ୍ରେସର ଶତ୍ରୁ ଭାବରେ ବିବେଚନା କରାଯାଉଛି । ପୂର୍ବରୁ ରାଜସ୍ଥାନରେ କଂଗ୍ରେସ ସରକାର ଗଠନ ସମୟରେ ମଧ୍ୟ ସଚିନଙ୍କୁ ତାଙ୍କ ବାପାଙ୍କ ସହ ତୁଳନା କରାଯାଇଥିଲା ।
ସେହି ବଙ୍ଗଳାରେ ରହିଲେ ଯେଉଁଠାରେ ଦୁଗ୍ଧ ବିକ୍ରି କରୁଥିଲେ
ରାଜେଶ ପାଇଲଟଙ୍କ ସଫଳତା କାହାଣୀରେ ଏହା ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରତୀକ | ସେ ତାଙ୍କ ସଂପର୍କୀୟ ମାମୁଁଙ୍କ ପାଖରେ ଦୁଗ୍ଧ ବିକ୍ରେତା ଭାବରେ କାମ କରିବାକୁ ଦିଲ୍ଲୀ ଆସିଥିଲେ ଏବଂ ତା’ପରେ ସେ ଆକବର ରୋଡରେ ଥିବା ବଙ୍ଗଳା ନମ୍ବର ୧୦କୁ କ୍ଷୀର ଦେବାକୁ ଯାଉଥିଲେ । କିନ୍ତୁ ତାଙ୍କର ମହତ୍ୱକାଂକ୍ଷା ଏହି ବୃତ୍ତିରେ ଅଧିକ ସମୟ ରହିବାକୁ ଦେଇ ନଥିଲା ।
ପାଇଲଟ୍ ଫ୍ଲାଇଙ୍ଗ୍ ସ୍କୁଲରେ ନାମ ଲେଖାଇ ଭାରତୀୟ ବାୟୁସେନାରେ ପାଇଲଟ୍ ଭାବେ ଯୋଗ ଦେଇଥିଲେ। ୧୯୭୧ ମସିହାରେ ହେଇଥିବା ଭାରତ-ପାକିସ୍ଥାନ ଯୁଦ୍ଧରେ ସେ ସ୍କ୍ୱାଡ୍ରନ୍ ଲିଡର ଭାବରେ ଅଂଶଗ୍ରହଣ କରିଥିଲେ । ୧୯୭୯ ମସିହାରେ ପାଇଲଟ ତତ୍କାଳୀନ କଂଗ୍ରେସ ଅଧ୍ୟକ୍ଷା ଇନ୍ଦିରା ଗାନ୍ଧୀଙ୍କୁ ଭେଟି ନିର୍ବାଚନ ଲଢିବାକୁ ଇଚ୍ଛା ପ୍ରକାଶ କରିଥିଲେ । ଏହାପରେ ଇନ୍ଦିରା ଗାନ୍ଧୀ ତା’ଙ୍କୁ ଏକ ଟିକେଟ ଦେଇଥିଲେ । ଟିକେଟ୍ ପାଇବା ପରେ ପାଇଲଟ ଫୋର୍ସ ଛାଡି ନିର୍ବାଚନ ଲଢିଲେ ଏବଂ ଭରତପୁରରୁ ପ୍ରଥମେ ଓ ପରେ ଦୌସା ଠାରୁ ନିର୍ବାଚନ ଜିତିଥିଲେ । ରାଜେଶ ପାଇଲଟଙ୍କ ପ୍ରକୃତ ନାମ ଥିଲା ରାଜେଶ୍ୱର ପ୍ରସାଦ ସିଂ ବିଧୁଡୀ । କିନ୍ତୁ ଯେତେବେଳେ ସେ ଭରତପୁର ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପୂର୍ବରୁ ଗାଁ ଗସ୍ତରେ ଯାଇଥିଲେ, ସେତେବେଳେ ସେ ସେଠାରେ ଶୁଣିଥଲେ ଭରତପୁରରେ ଆଲୋଚନା ହେଉଛି ‘କେହି ଜଣେ ପାଇଲଟ୍ ଆସୁଛନ୍ତି’ । ଏହି ଆଲୋଚନା ଯୋଗୁଁ ସେ ତାଙ୍କ ନାମ ରାଜେଶ ପାଇଲଟ ରଖିଦେଲେ । ୧୯୮୦ ଦଶକରେ ଗାନ୍ଧୀ ପରିବାର ସହିତ ପାଇଲଟଙ୍କ ନିକଟତରତା ବୃଦ୍ଧି ପାଇଲା ଏବଂ ଏହା ପରେ ସେ ରାଜୀବ ଗାନ୍ଧୀ ସରକାରରେ ମନ୍ତ୍ରୀ ହୋଇଥିଲେ ।
ଗୋଟିଏ ପଟେ ରାଜେଶ ପାଇଲଟ ତାଙ୍କ ସମୟରେ ଗୋଟେ ହସ୍ତୀ ଭାବରେ ଜଣାଶୁଣା ହୋଇଥିବାବେଳେ ବର୍ତ୍ତମାନ ସଚିନଙ୍କ କାହାଣୀ ପୂରା ଭିନ୍ନ । ୨୦୦୦ ମସିହାରେ ପିତାଙ୍କ ଅକାଳ ମୃତ୍ୟୁ ପରେ ତାଙ୍କୁ ରାଜନୀତିରେ ପ୍ରବେଶ କରିବାକୁ ପଡିଲା । ୨୬ ବର୍ଷ ବୟସରେ ଜଣେ ସାଂସଦ, ୩୧ ବର୍ଷ ବୟସରେ କେନ୍ଦ୍ର ମନ୍ତ୍ରୀ, ୩୬ବର୍ଷ ବୟସରେ ରାଜ୍ୟ କଂଗ୍ରେସ ସଭାପତି ଏବଂ ୪୦ ବର୍ଷ ବୟସରେ ଡେପୁଟି ସିଏମ ହୋଇଥିଲେ ।
ବାପାଙ୍କ ଛାପ ସହିତ ରାଜନୀତିରେ ପରିଚିତ ସଚିନଙ୍କୁ କୃଷକ ଏବଂ ଗୁଜ୍ଜୋରର ନେତା ଭାବେ ବିବେଚନା କରାଯାଉଥିଲା । ସୂଚନା ଅନୁସାରେ ସଚିନ ନିଜର ଅଲଗା ପରିଚୟ ପାଇଁ ଗୁଜ୍ଜୋର ନିର୍ବାଚନମଣ୍ଡଳୀର ଅଜମେରକୁ ବାଛିଥିଲେ ଏବଂ୨୦୦୯ରେ ନିର୍ବାଚନ ଜିତିଲେ | ଏହି ବିଜୟ ତାଙ୍କୁ ଏକ ବଡ ନେତାର ପରିଚୟ ଦେଇଥିଲା | ୨୦୧୪ ପରାଜୟ ପରେ ସଚିନ୍ ଦିଲ୍ଲୀ ରାଜନୀତି ଛାଡି ରାଜସ୍ଥାନ କଂଗ୍ରେସର ଦାୟିତ୍ୱ ନେବାକୁ ମନୋନୀତ ହୋଇଥିଲେ ଏବଂ ପରବର୍ତ୍ତୀ ବିଧାନସଭା ନିର୍ବାଚନରେ କଂଗ୍ରେସର ବିଜୟ ରଥ ଭାବରେ ଉଭା ହୋଇଥିଲେ।
ରାଜେଶ ପାଇଲଟ ଏବଂ ସଚିନଙ୍କ ମଧ୍ୟରେ ତୁଳନା କରିବାବେଳେ ଏହା ବୁଝିବା ଜରୁରୀ କି ଉଭୟଙ୍କ ସମୟ ଏବଂ ପରିସ୍ଥିତି ଭିନ୍ନ ଥିଲା । ରାଜେଶ ପାଇଲଟଙ୍କ ସମୟରେ କଂଗ୍ରେସ କ୍ଷମତାରେ ଥିଲା ଏବଂ ଦେଶର ସବୁଠାରୁ ବଡ ଦଳ ଥିଲା କିନ୍ତୁ ସଚିନଙ୍କ ସମୟରେ କଂଗ୍ରେସ ଏକ ଛୋଟ ଦଳ ଏବଂ କ୍ଷମତା ତାଙ୍କ ପାଇଁ ଏକ ସୁଦୂରପ୍ରସାରୀ ସ୍ଥିତି ବୋଲି ପ୍ରମାଣ କରୁଛି।
ସାମ୍ପ୍ରତିକ ପରିସ୍ଥିତି ଏବଂ ଇତିହାସକୁ ଯଦି ଧ୍ୟାନରେ ରଖାଯାଏ ତେବେ ପିତା ଏବଂ ପୁଅ ମଧ୍ୟରେ ସବୁଠାରୁ ବଡ଼ ସମାନତା ହେଉଛି ଅଭିଳାଷ ଏବଂ ବିଦ୍ରୋହ | ରାଜେଶ ପାଇଲଟ ଏବଂ ସଚିନଙ୍କ କ୍ୟାରିୟର ଉପରେ ଆଧାରିତ ଏକ ଆର୍ଟିକିଲରେ ସାମ୍ବାଦିକ ରାଜଦୀପ ସରଦେଶାଇ ଲେଖିଛନ୍ତି, କଂଗ୍ରେସରେ ଯେଉଁ ଖୋସାମତିଆ ପରମ୍ପରା ରହିଛି, ପିତା ଏବଂ ପୁଅ ଉଭୟ ଏଥିରୁ ରକ୍ଷା ପାଇବାରେ ସଫଳ ହୋଇଛନ୍ତି । ଏହି କାରଣରୁ ଉଭୟ ଧକ୍କା ଖାଇବାପରେ ପୁଣି ଉଠିବାରେ ଉଦାହରଣ ପାଲଟିଛନ୍ତି।
