ରାୟଗଡା : ହଷ୍ଟେଲରେ ରହିବାକୁ ନେଇ ଦେଖାଦେଇଛି ବିବାଦ । ବାରମ୍ବାର ତାଗିଦ୍ ସତ୍ତ୍ୱେ ହଷ୍ଟେଲ ଛାଡୁନାହାନ୍ତି ଏନସିସି କର୍ମଚାରୀ । ହଷ୍ଟେଲରେ ରହୁଥିବା ଛାତ୍ରୀ ମାନଙ୍କୁ ଅଶ୍ଳୀଳ ଇଙ୍ଗିତ ମଧ୍ୟ କରୁଥିବା ଅଭିଯୋଗ ହୋଇଛି । ଫଳରେ କଲେଜ ଆଗରେ ଧାରଣାରେ ବସିଛନ୍ତି ଶତାଧିକ ଛାତ୍ରୀ । ଏଭଳି ଘଟଣା ଦେଖିବାକୁ ମିଳିଛି ରାୟଗଡା ବ୍କକ ଅମଳାଭଟ୍ଟା ଠାରେ ଥିବା ମଡେଲ ଡିଗ୍ରୀ କଲେଜରେ । ଏନସିସିର ଏକ ଟିମ୍ ସେପ୍ଟେମ୍ବର ୨୧ରୁ ୨୯ତାରିଖ ଯାଏଁ ଏଠାରେ କ୍ଯାମ୍ପ କରିଥିଲେ । ତେବେ କ୍ଯାମ୍ପ ସରିବାର ୪ ଦିନ ବିତିଯାଇଥିଲେ ସୁଦ୍ଧା ଯବାନ ମାନେ ହଷ୍ଟେଲ ଛାଡୁନଥିବା ବେଳେ ଛାତ୍ରୀ ନିବାସ ଯାଇ ପିଲାମାନଙ୍କୁ ଅଶ୍ଳୀଳ ଇଙ୍ଗିତ କରୁଥିବା ଅଭିଯୋଗ ହୋଇଛି । ଏପରିକି ହଷ୍ଟେଲର ଲାଇନ୍ କାଟିଦେବା ସହ ପାଣି ମଟର ମଧ୍ଯ ବନ୍ଦ କରିଦେଇଛନ୍ତି । ଯାହାକୁ ନେଇ ଏବେ କଲେଜ ପରିସରରେ ଉତ୍ତେଜନା ତୀବ୍ର ହେବାରେ ଲାଗିଛି । ଏନସିସି ଯବାନ ମାନେ ତୁରନ୍ତ ହଷ୍ଟେଲ ନଛାଡିଲା ପର୍ଯ୍ଯନ୍ତ ଆନ୍ଦୋଳନ ଜାରି ରହିବ ବୋଲି ଛାତ୍ରୀ ମାନେ ଚେତାବନୀ ଦେଇଛନ୍ତି ।
