ରିଷଭ ପନ୍ତ ଗୁରୁତର ଆହତ, ଗ୍ରାଉଣ୍ଡ ଆମ୍ବୁଲାନ୍ସରେ ପଡ଼ିଆ ବାହାରକୁ ନିଆଗଲା

ନନ୍ଦିଘୋଷ ବ୍ୟୁରୋ : ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡରେ ଚାଲିଥିବା ଚତୁର୍ଥ ଟେଷ୍ଟ ମ୍ୟାଚ୍ ସମୟରେ ଭାରତୀୟ କ୍ରିକେଟ୍ ଟିମକୁ ବଡ଼ ଝଟକା ଲାଗିଛି। ଭାରତୀୟ ଦଳର ଷ୍ଟାର ୱିକେଟକିପର-ବ୍ୟାଟସମ୍ୟାନ୍ ରିଷଭ ପନ୍ତଙ୍କ ଡାହାଣ ଗୋଡରେ ଆଘାତ ଲାଗିଛି । ଫଳରେ ତାଙ୍କୁ ପଡ଼ିଆ ଛାଡିବାକୁ ପଡିଛି । ଏହି ଘଟଣା ଭାରତୀୟ ଇନିଂସର ୬୮ତମ ଓଭରରେ ଘଟିଥିଲା, ଯେତେବେଳେ ପନ୍ତ ଇଂଲଣ୍ଡର ଦ୍ରୁତ ବୋଲର କ୍ରିସ୍ ୱକ୍ସଙ୍କ ସାମ୍ନା କରୁଥିଲେ। ଏହି ଆଘାତ ଭାରତୀୟ ପ୍ରଶଂସକଙ୍କ ଚିନ୍ତା ବଢାଇଛି ।

ଭାରତୀୟ ଇନିଂସର ୬୮ତମ ଓଭରରେ, କ୍ରିସ୍ ୱକ୍ସଙ୍କ ଏକ ଦ୍ରୁତ ୟର୍କର ବଲ ପନ୍ତଙ୍କୁ ଅସୁବିଧାରେ ପକାଇଥିଲା। ପନ୍ତ ଏହି ବଲ୍ ଉପରେ ରିଭର୍ସ-ସ୍ୱାଇପ୍ ଖେଳିବାକୁ ଚେଷ୍ଟା କରିଥିଲେ, କିନ୍ତୁ ବଲଟି ସିଧାସଳଖ ତାଙ୍କ ଜୋତାରେ ବାଜିଥିଲା। ଏହି ଶକ୍ତ ଆଘାତ ପରେ ପନ୍ତ ଯନ୍ତ୍ରଣାରେ କାନ୍ଦୁଥିବା ଦେଖାଯାଇଥିଲା। ପଡ଼ିଆରେ ଉପସ୍ଥିତ ଫିଜିଓ ତୁରନ୍ତ ତାଙ୍କୁ ପରୀକ୍ଷା କରିଥିଲେ ଓ ଦେଖାଯାଇଥିଲା ଯେ ତାଙ୍କ ପାଦରୁ ରକ୍ତ ବାହାରିଥିଲା। ଯନ୍ତ୍ରଣା ଏବଂ ଆଘାତର ଗମ୍ଭୀରତାକୁ ଦେଖି ପନ୍ତ ଆଉ ବ୍ୟାଟିଂ କରିପାରି ନଥିଲେ। ଏହା ପରେ, ତାଙ୍କୁ ଏକ ଗ୍ରାଉଣ୍ଡ ଆମ୍ବୁଲାନ୍ସରେ ପଡ଼ିଆ ବାହାରକୁ ନିଆଯାଇଥିଲା।

ଏହି ସିରିଜରେ ରିଷଭ ପନ୍ତ ଆହତ ହେବା ଏହା ପ୍ରଥମ ଥର ନୁହେଁ। ସେ ତୃତୀୟ ଟେଷ୍ଟ ମ୍ୟାଚରେ ମଧ୍ୟ ଆଘାତ ପାଇଥିଲେ। ସେହି ମ୍ୟାଚ ସମୟରେ ଜସପ୍ରିତ ବୁମରାହଙ୍କ ଦ୍ରୁତ ବାଉନ୍ସର ପନ୍ତଙ୍କ ଆଙ୍ଗୁଠିରେ ବାଜିଥିଲା, ଯାହା ଫଳରେ ସେ ସମଗ୍ର ମ୍ୟାଚରେ ୱିକେଟକିପିଂ କରିପାରି ନଥିଲେ। ତଥାପି, ସେ ବ୍ୟାଟିଂ କରିଥିଲେ। ଏହା ପରେ ମାଞ୍ଚେଷ୍ଟର ଟେଷ୍ଟରେ ତାଙ୍କ ଖେଳିବା ଉପରେ ସସପେନ୍ସ ଥିଲା। କିନ୍ତୁ ଲମ୍ବା ବ୍ୟବଧାନ ଯୋଗୁଁ ସେ ସୁସ୍ଥ ହୋଇପାରିଥିଲେ।