ମୁମ୍ବାଇକୁ ହରାଇ ଫାଇନାଲରେ ଗୁଜରାଟ, କାଲି ଚେନ୍ନାଇ ସହ ଟ୍ରଫି ପାଇଁ ହେବ ଲଢ଼େଇ
1 min read
ଅହମଦାବାଦ: IPLରୁ ୫ ଥରର ଚାମ୍ପିଅନ ମୁମ୍ବାଇ ଆଉଟ୍ । ଦ୍ୱିତୀୟ କ୍ୱାଲିଫାୟର ମ୍ୟାଚରେ ମୁମ୍ବାଇକୁ ପରାସ୍ତ କରି ଫାଇନାଲରେ ଏଣ୍ଟ୍ରି ମାରିଲା ଗୁଜରାଟ ଟାଇଟନ୍ସ । ଶୁଭମନ ଗିଲଙ୍କ ବିସ୍ଫୋରକ ଶତକ ଆଗରେ ହାର ମାନିଲା ମୁମ୍ବାଇ । ମୁମ୍ବାଇକୁ ଦ୍ୱିତୀୟ କ୍ୱାଲିଫାୟରରେ ୬୨ ରନରେ ପରାସ୍ତ କରିଛି ଗୁଜରାଟ ଟାଇଟନ୍ସ । ଏବେ ରବିବାର ଫାଇନାଲରେ ଗୁଜରାଟ ଓ ଚେନ୍ନାଇ ସୁପରକିଙ୍ଗସ ମଧ୍ୟରେ ହେବ ଲଢ଼େଇ ।
ଗତକାଲି ଖେଳାଯାଇଥିବା ଦ୍ୱିତୀୟ କ୍ୱାଲିଫାୟର ମ୍ୟାଚରେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ମୁମ୍ବାଇ । ପ୍ରଥମ ବ୍ୟାଟିଂ କରିଥିବା ଗୁଜରାଟ ମୁମ୍ବାଇ ସାମ୍ନାରେ ବିଶାଳ ସ୍କୋର ଛିଡ଼ା କରିଥିଲା । ଶୁଭମନ ଗିଲଙ୍କ ଧୁଆଁଧାର ଶତକ ଫଳରେ ହାର୍ଦ୍ଦିକ ଆଣ୍ଡ କୋ ମୁମ୍ବାଇ ସାମ୍ନାରେ ୨୩୪ ରନର ଟାର୍ଗେଟ ଦେଇଥିଲା । ତେବେ ୨୩୪ ରନର ଟାର୍ଗେଟକୁ ପଡ଼ିଆକୁ ଓହ୍ଲାଇଥିଲା ମୁମ୍ବାଇ । ଆରମ୍ଭରୁ ଓ୍ୱିକେଟ ପଡ଼ିଥିଲେ ମଧ୍ୟ ସୂର୍ଯ୍ୟ କୁମାର ଯାଦବ ଓ କେମରନ ଗ୍ରୀନଙ୍କ ପାର୍ଟନରସିପ୍ ମୁମ୍ବାଇକୁ ବିଜୟର ଏକ ଆଶା ଦେଇଥିଲେ । କିନ୍ତୁ ମୁମ୍ବାଇର ଏହି ଆଶାକୁ ଧୂଳିଶାତ୍ କରିଥିଲେ ମୋହିତ ଶର୍ମା । ମୁମ୍ବାଇର ୫ ଜଣ ବ୍ୟାଟ୍ସମ୍ୟାନଙ୍କୁ ଆଉଟ କରି ମୁମ୍ବାଇକୁ ବ୍ୟାକଫୁଟରେ ରଖିଥିଲେ । ଯାହାଫଳରେ ମୁମ୍ବାଇ ୧୮.୨ ଓଭରରେ ମାତ୍ର ୧୭୧ ରନ କରି ଆଲଆଉଟ ହୋଇଥିଲା ।
