ବଂଲାଦେଶ ଫେରିବେ ଶେଖ ହସିନା, ନୂଆ ପାସପୋର୍ଟ ଓ ପରିଚୟ ପତ୍ର ପାଇଁ କେଲେ ଆବେଦନ
ନନ୍ଦିଘୋଷ ବ୍ୟୁରୋ: ୨୦୨୪ ଛାତ୍ର ଆନ୍ଦୋଳନ ହିଂସାତ୍ମକ ପ୍ରଦର୍ଶନ ପରେ ଭାରତ ପଳାଇ ଆସିଥିବା ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ପୁଣି ଥରେ ନିଜ ଦେଶକୁ ଫେରିବାକୁ ପ୍ରସ୍ତୁତ ହେଉଛନ୍ତି । ଏଥିପାଇଁ ସେ ନୂଆଦିଲ୍ଲୀ ସ୍ଥିତ ବାଂଲାଦେଶ ଦୂତାବାସରେ ନୂଆ ପାସପୋର୍ଟ ଓ ଜାତୀୟ ପରିଚୟ ପତ୍ର (NID) ଯୋଗାଇ ଦେବାକୁ ଅନୁରୋଧ କରିଛନ୍ତି । ସୂଚନାଯୋଗ୍ୟ, ଭାରତ ଆସିବା ପରେ ହସିନା ପ୍ରଥମ ଥର ପାଇଁ ନିଜ ଦେଶର ଦୂତାବାସ ସହ ଔପଚାରିକ ସମ୍ପର୍କ କରିଛନ୍ତି ।
ଲଣ୍ଡନ ସ୍ଥିତ ମାଟ୍ରିକ୍ସ ଚ୍ୟାମ୍ବରର ପ୍ରତିନିଧି ଦିଲ୍ଲୀର ବାଂଲାଦେଶ କାର୍ଯ୍ୟବାହାକ ଉଚ୍ଚାୟୁକ୍ତ ପ୍ରୀତି ରହମାନଙ୍କୁ ଏହି ପତ୍ର ଦ୍ରପାଦ କରିଛନ୍ତି । ଏଥିରେ କୁହାଯାଇଛି, ବାଂଲାଦେଶର ଅନ୍ତରିଣ ସରକାର ଦ୍ବାରା ହସିନାଙ୍କ ପ୍ରମାଣପତ୍ର ରଦ୍ଦ କରାଯାଇଥିବା ରିପୋର୍ଟକୁ ନଜରରେ ରଖି ନୂଆ ପାସପୋର୍ଟ ଓ ପରିଚୟ ପତ୍ର ଶୀଘ୍ର ପ୍ରଦାନ କରାଯାଉ । ବାଂଲାଦେଶୀ ନାଗରିକତା ଓ ଅନ୍ତରାଷ୍ଟ୍ରୀୟ ମାନବାଧିକାର ଆଇନର ଉଦାହାରଣ ଦିଆଯାଇ ଏହି ପତ୍ର ଦିଆଯାଇଛି ।
ହସିନାଙ୍କୁ ମିଳିଛି ମୃତ୍ୟୁଦଣ୍ଡ
ରିପୋର୍ଟ ଅନୁସାରେ ଶେଖ ହସିନା ଆଗାମୀ ଡିସେମ୍ବରରେ ବାଂଲାଦେଶ ଫେରି କୋର୍ଟରେ ଆତ୍ମସମର୍ପଣ କରିବାକୁ ଯୋଜନା କରୁଛନ୍ତି । ହେଲେ, ହସିନା ବାଂଲାଦେଶ ଫେରିବା ସେଠାରେ ରାଜନୈତିକ ଓ ଆଇନଗତ ଅସ୍ଥିରତା ସୃଷ୍ଟି କରିପାରେ । କାରଣ, ୨୦୨୫ ନଭେମ୍ବରରେ ବାଂଲାଦେଶର ଏକ କୋର୍ଟ ୨୦୨୪ ହିଂସକ ଆନ୍ଦୋଳନ ସମୟରେ ନିଆଯାଇଥିବା କାର୍ଯ୍ୟାନୁଷ୍ଠାନ ମାମଲାରେ ତାଙ୍କ ଅନୁପସ୍ଥିତିରେ ତାଙ୍କୁ ମୃତ୍ୟୁଦଣ୍ଡର ରାୟ ଶୁଣାଇଛନ୍ତି ।
୨୦୨୪ରୁ ରହୁଛନ୍ତି ଭାରତରେ
ସରକାରୀ ଚାକିରିରେ ସ୍ବାଧୀନତା ଆନ୍ଦୋଳନ କୋଟାରେ ୩୦ ପ୍ରତିଶତ ସଂରକ୍ଷଣକୁ ବିରୋଧ କରି ୨୦୨୪ ଜୁନରେ ଛତ୍ର ଆନ୍ଦୋଳନ ଦେଖା ଦେିଥିଲା । ଯାହା ପରବର୍ତ୍ତି ସମୟରେ ଜନ ଆନ୍ଦୋଳନରେ ପରିଣତ ହୋଇଯାଇଥିଲା । ଏହାପରେ ୨୦୨୪ ଅଗଷ୍ଟ ୫ରେ ଶେଖ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଭାରତ ପଳାଇ ଆସିଥିଲେ । ଏହାପରେ ତାଙ୍କ ଦଳ ଆଓ୍ବାମୀ ଲିଗ ଉପରେ ପ୍ରତିବନ୍ଧକ ଲଗାଇ ଦିଆଯାଇଥିଲା ।
