ଏହି ପାଞ୍ଚଟି କାରଣ ପାଇଁ କିଡନୀରେ ପଥର ସୃଷ୍ଟି ହୋଇପାରେ
ମଣିଷର ଶରୀର ପାଇଁ କିଡନୀ ଷ୍ଟୋନ ଏକ ଭୟଙ୍କର ସମସ୍ୟା । ଆଜିର ସମୟରେ ଯେ କୌଣସି ବୟସର ଲୋକଙ୍କୁ ଏହା ଆକ୍ରାନ୍ତ କରିବାର ସମ୍ଭାବନା ରହିଥାଏ । ଯେତେବେଳେ ୟୁରିନ (ମୂତ୍ର)ରେ ରହିଥିବା ଖଣିଜ ଓ ଏସିଡି ସଲଟସ୍ ପରସ୍ପର ସହ ମିଶି ଛୋଟ ଛୋଟ କଣ ବା କ୍ରିଷ୍ଟଲ ସୃଷ୍ଟି କରନ୍ତି, ସେତେବେଳେ ଏହା ଦେଖିବାକୁ ମିଳିଥାଏ । ତା’ପରେ ତାହା ଧୀରେଧୀରେ ବଢ଼ି ପଥରର ରୂପ ନେଇଥାଏ । ଅନେକ ସମୟରେ ଏହି ପଥରଗୁଡ଼ିକ ଆପେଆପେ ୟୁରିନ ରାସ୍ତା ଦେଇ ବାହାରକୁ ବାହାରି ଯାଇଥାନ୍ତି । ମାତ୍ର କିଛି କ୍ଷେତ୍ରରେ ଏହା ମୂତ୍ର ମାର୍ଗକୁ ବ୍ଲକ କରିଦେଇଥାନ୍ତି । ଫଳରେ ଅସହ୍ୟ ଯନ୍ତ୍ରଣା, ରକ୍ତ ପରୀସ୍ରା ଓ ବାନ୍ତି ପରି ସମସ୍ୟା ସୃଷ୍ଟି ହୋଇଥାଏ ।
କିଡନୀ ଷ୍ଟୋନ ଧୀରେଧୀରେ ହୋଇଥାଏ ଓ ଏହା ଆମର ଜୀବନଶୈଳୀ ଓ ଖାଦ୍ୟପେୟ କାରଣରୁ ମଧ୍ୟ ହୋଇଥାଏ । ଯଦି ସମୟ ପୂର୍ବରୁ ସଠିକ ମାତ୍ରାରେ ପାଣି ପିଇବେ, ସନ୍ତୁଳିତ ଭୋଜନ ନେବେ ଓ ଶରୀରର ଆବଶ୍ୟକତାକୁ ଧ୍ୟାନରେ ରଖିବେ, ତେବେ ଏହି ସମସ୍ୟାକୁ ଦୂରେଇହେବ । କିଛି ଛୋଟ ଛୋଟ ଅଭ୍ୟାସକୁ ଆମେ ଧ୍ୟାନରେ ରଖିନଥାଉ । ଫଳରେ ଆମକୁ କିଡନୀ ଷ୍ଟୋନ ପରି ଗମ୍ଭୀର ସମସ୍ୟାକୁ ସାମ୍ନା କରିବାକୁ ପଡ଼ିଥାଏ ।
ଏହିସବୁ କାରଣ ପାଇଁ କିଡନୀରେ ଷ୍ଟୋନ ସୃଷ୍ଟି ହୋଇଥାଏ….
ପାଣି କମ୍ ପିଇବା: ଶରୀରକୁ ଡିଟକ୍ସ ରଖିବା ଓ ମୂତ୍ରକୁ ପତଳା ରଖିବା ପାଇଁ ପର୍ଯ୍ୟାପ୍ତ ପାଣିର ଆବଶ୍ୟକତା ରହିଥାଏ । ମାତ୍ର କମ୍ ପାଣି ସେବନ ଫଳରେ ୟୁରିନ ଗାଢ଼ା ହୋଇଥାଏ ଓ ପଥର ସୃଷ୍ଟି ହେବାର ସମ୍ଭାବନା ବଢ଼ିଯାଇଥାଏ ।
ଅଧିକ ନମକିନ ଖାଦ୍ୟ ଖାଇବା: ଅତ୍ୟଧିକ ନମକିନ ଖାଦ୍ୟ ସେବନ କରିବା ଫଳରେ ଶରୀରରେ ସୋଡିୟମର ମାତ୍ରା ବଢ଼ିଯାଇଥାଏ । ଫଳରେ ୟୁରିନରେ ଅଧିକ କ୍ୟାଲସିୟମ ନିର୍ଗତ ହୋଇଥାଏ । ଏହା ପଥର ସୃଷ୍ଟିରେ ସହାୟତା କରିଥାଏ ।
ଅଧିକ ଅକ୍ସାଲେଟ ଯୁକ୍ତ ଖାଦ୍ୟ ସେବନ: ପାଲକ, ଚା’, ଚକୋଲେଟ, ବୀଟ ମୂଳ ପରି ଅଧିକ ଅକ୍ସାଲେଟ ଯୁକ୍ତ ଜିନିଷ ଖାଇବା ଫଳରେ ୟୁରିନରେ ଅକ୍ସାଲେଟର ମାତ୍ରା ବଢ଼ିଯାଇଥା । ଏହା କ୍ୟାଲସିୟମ ସହ ମିଶି ପଥର ସୃଷ୍ଟି କରିଥାଏ ।
ଅଧିକ ମାତ୍ରାରେ ପ୍ରୋଟିନ ନେବା: ଅଧିକ ମାତ୍ରାରେ ପ୍ରୋଟିନ ନେବା ଯେପରିକି, ରେଟ ମିଟ, ଅଣ୍ଡା, ପ୍ରୋସେସଡ ଫୁଡସ ଆଦି ୟୁରିକ ଏସିଡର ମାତ୍ରାକୁ ବଢ଼ାଇଥାଏ । ଏହା ୟୁରିନକୁ ଅଧିକ ଅମ୍ଲୀୟ କରିଦେବା ଫଳରେ ପଥର ହେବାର ସମ୍ଭାବନା ବଢ଼ିଯାଇଥାଏ ।
ପରିସ୍ରାକୁ ରୋକିବା: ପରିସ୍ରାକୁ ରୋକି ରଖିବା ଫଳରେ ୟୁରିନ ଟ୍ରାକ୍ଟରେ ଖଣିଜ ଜମିଥାଏ ଓ କିଡନୀରେ ପଥର ସୃଷ୍ଟି ପ୍ରକ୍ରିୟା ବଢ଼ିଯାଇଥାଏ ।
