ଚିଟଫଣ୍ଡ ଅଭିଯୁକ୍ତଙ୍କୁ ଜେଲରେ ମଦ, ମାଂସ, ବିରିୟାନି ଦିଆଯାଉଥିବା ଅଭିଯୋଗ
1 min read
ଭୁବନେଶ୍ୱର: ଜେଲ୍ କାନ୍ଥରେ ପୋଷ୍ଟର । କୌଣସି ଦୁର୍ଦ୍ଦାନ୍ତ ଅପରାଧୀ କି ଡକାୟତକୁ ଧରାଇ ଦେବାକୁ ନୁହେଁ । ବରଂ ଜେଲ୍ କର୍ତ୍ତୃପକ୍ଷଙ୍କ ମନମାନି ନେଇ ଝାରପଡ଼ା ଜେଲ କାନ୍ଥରେ ପୋଷ୍ଟର ଲାଗିଛି । ଯେଉଁଥିରେ ଉଲ୍ଲେଖ ଅଛି- ଚିଟଫଣ୍ଡ ଆସାମୀଙ୍କୁ ଜେଲରେ ରାଜକୀୟ ସମ୍ମାନ ଦିଆଯାଉଥିଛି । ଚିଟଫଣ୍ଡ ଅଭିଯୁକ୍ତଙ୍କୁ ମଦ, ମାଂସ, ବିରିୟାନି ଦିଆଯାଉଥିବା ଅଭିଯୋଗ ହେଉଛି । ଏପରିକି ଚିଟଫଣ୍ଡ ଅଭିଯୁକ୍ତଙ୍କ କଥା ରେ ନିମ୍ନ ଶ୍ରେଣୀର ଅଭିଯୁକ୍ତ ଙ୍କୁ ଶାରୀରିକ ଓ ମାନସିକ ନିର୍ଯାତନା ମଧ୍ୟ ଦିଆଯାଉଥିବା ଅଭିଯୋଗ ଆସିଛି ।
ଏହାକୁ ବିରୋଧ କରି ଜେଲ୍ କାନ୍ଥରେ କେହି ଅଜଣା ବ୍ୟକ୍ତି ପୋଷ୍ଟର ମାରିଥିବା ସନ୍ଦେହ କରାଯାଉଛି । କେବଳ ସେତିକି ନୁହେଁ, ଜେଲରେ ଲାଞ୍ଚ କାରବାର ହେଉଥିବା ଅଭିଯୋଗ ମଧ୍ୟ ଆସିଛି । ଜେଲ ସୁପରିଟେଣ୍ଡେଣ୍ଟ ଓ ଜେଲର ମୋଟା ଅଙ୍କର ଅର୍ଥ କାରବାର କରି ଅଭିଯୁକ୍ତଙ୍କୁ ସୁରକ୍ଷା ଯୋଗାଉଥିବା ଏଥିରେ ଉଲ୍ଲେଖ ରହିଛି । ଲକ୍ଷ୍ମୀସାଗର ଥାନାରେ ଏ ନେଇ ଅଭିଯୋଗ ଆସିବା ପରେ ତଦନ୍ତ ଆରମ୍ଭ କରିଛି ପୋଲିସ । ତେବେ କିଏ କେଉଁ ଉଦ୍ଦେଶ୍ୟରେ ପୋଷ୍ଟର ଲଗାଇଛି ଜଣାପଡ଼ିନାହିଁ ।
