ନନ୍ଦିଘୋଷ ବ୍ୟୁରୋ : ମଙ୍ଗଳବାର। ରାତି ୮ଟା। ଇଷ୍ଟର୍ନ ଟାଇମ। ଏହା ହେଉଛି ଇରାନକୁ ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ ଦେଇଥିବା ଡେଡଲାଇନ। ଏହି ସମୟ ଭିତରେ ହର୍ମୁଜ ପ୍ରଣାଳୀ ଖୋଲ। ଆମ ସହିତ ଡିଲ୍ କର। ଆମର ସବୁ ସର୍ତ୍ତ ମାନିନିଅ। ନ ହେଲେ ଇରାନକୁ ନର୍କରେ ପରିଣତ କରିଦେବୁ ବୋଲି ନୂଆ ଚରମ ଚେତାବନୀ ଦେଇଛନ୍ତି ଟ୍ରମ୍ପ। କୁହାଯାଉଛି ଟ୍ରମ୍ପଙ୍କ କଥା ନ ମାନିଲେ, ଇରାନର ବେସାମରିକ ଅନୁଷ୍ଠାନ, ଭିତ୍ତିଭୂମିକୁ ଟାର୍ଗେଟ କରିବ ଆମେରିକା। ଟ୍ରମ୍ପଙ୍କର ପୂର୍ବ ଡେଡଲାଇନ ଆଜି ସରିବାର ଥିଲା। ତାକୁ ମଙ୍ଗଳବାର ଯାଏ ବୃଦ୍ଧି କରିଛନ୍ତି ଟ୍ରମ୍ପ। ତାଙ୍କର ଏହି ଧମକକୁ ପୁରା ବେଖାତିର କରିଛି ଇରାନ। ତେହେରାନ ପକ୍ଷରୁ କୁହାଯାଇଛି, ପ୍ରତ୍ଯେକ ପରିସ୍ଥିତିର ମୁକାବିଲା କରିବାକୁ ଆମେ ପ୍ରସ୍ତୁତ। ଯାହା ହେବ ଦେଖାଯିବ। ଇରାନ ଯୁଦ୍ଧ ଷଷ୍ଠ ସପ୍ତାହରେ ପହଞ୍ଚି ଥିବା ବେଳେ ଉଭୟ ପକ୍ଷରୁ ଜୋରଦାର ଆକ୍ରମଣ ପ୍ରତି ଆକ୍ରମଣ ଜାରି ରହିଛି।
ପଡ଼ୋଶୀ ଦେଶରେ ଥିବା ଆମେରିକାର ବିଭିନ୍ନ ଶିବିର ଓ ଇସ୍ରାଏଲର ବିଭିନ୍ନ ସହର, ବନ୍ଦର, ବିମାନ ବନ୍ଦର ଓ ଶକ୍ତି କେନ୍ଦ୍ରକୁ ଟାର୍ଗେଟ କରି ଧ୍ଵଂସ କରିଦେଇଛି ତେହେରାନ। ଟ୍ରମ୍ପଙ୍କୁ ପାଲଟା ଚେତାବନୀ ଦେଇଛି ଇରାନ। କୁହାଯାଇଛି, ଇସ୍ରାଏଲ କଥାରେ ପଡ଼ି କାମ କଲେ, ପୁରା ଅଞ୍ଚଳରେ ଭୟାବହ ପରିସ୍ଥିତି ସୃଷ୍ଟି ହେବ। ସେପଟେ ଇରାନର ସହଯୋଗୀ ରୁଷିଆ କହିଛି, ଟ୍ରମ୍ପ ଏମିତି ଧମକ ଦିଅନ୍ତୁ ନାହିଁ। ବରଂ ଦୁଇ ଦେଶ ଆଲୋଚନା କରନ୍ତୁ। ସେପଟେ ତେହେରାନ ଉପରେ ଇସ୍ରାଏଲର ବୋମା ବର୍ଷଣ ଜାରି ରହିଛି। ବେସାମରିକ ଅଞ୍ଚଳରେ ବୋମା ପଡ଼ିବାରୁ ଅନେକ ଲୋକ ମୃତାହତ ହୋଇଛନ୍ତି। ସେହିପରି କୋମ୍ କୁ ବି ଟାର୍ଗେଟ କରିଛି ଇସ୍ରାଏଲ। ତେହେରାନରେ ଥିବା ଇରାନ ୟୁନିଭରସିଟି ଉପରେ ବୋମା ବର୍ଷଣ କରିଛି ଇସ୍ରାଏଲ। ଏଥିରେ ବହୁତ କ୍ଷୟକ୍ଷତି ହୋଇଛି। ଏପରିକି ପ୍ରାକୃତିକ ଗ୍ଯାସ ବିତରଣ କେନ୍ଦ୍ରର ପାଖରେ ବୋମା ପଡ଼ିଥିଲା। ବେରୁତ ଉପରେ ଇସ୍ରାଏଲ ଆକ୍ରମଣରେ ୧୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ୬୦ରୁ ଅଧିକ ଆହତ ହୋଇଛନ୍ତି।
ଇରାନକୁ ଟ୍ରମ୍ପଙ୍କ ନୂଆ ଡେଡଲାଇନ, ଡିଲ୍ କର ନ ହେଲେ ପୁରା ଉଡା଼ଇ ଦେବୁ
