ତ୍ରିସ୍ତରୀୟ ସୁରକ୍ଷା ବ୍ୟବସ୍ଥାରେ ଷ୍ଟ୍ରଙ୍ଗରୁମରେ ଇଭିଏମ୍, ୧୦ ସକାଳ ୮ଟାରୁ ଗଣତି
ବାଲେଶ୍ୱର/ଜଗତସିଂହପୁର: ଆସନ୍ତା ୧୦ ତାରିଖରେ ବାଲେଶ୍ୱର ସଦର ଓ ତିର୍ତ୍ତୋଲ ଉପନିର୍ବାଚନ ଭୋଟ୍ ଗଣତି । ଏଥିପାଇଁ ବାଲେଶ୍ୱର ଓ ଜଗତସିଂହପୁର ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଷ୍ଟ୍ରଙ୍ଗରୁମ୍ରେ ଇଭିଏମ୍କୁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ମଧ୍ୟରେ ରଖାଯାଇଛି । ୧୦ ତାରିଖ ସକାଳ ୮ଟାରୁ ଭୋଟ୍ ଗଣତି ଆରମ୍ଭ ହେବ । ବାଲେଶ୍ୱର ସଦର ପାଇଁ ୧୪ଟି ଟେବୁଲରେ ୩୪୬ଟି ବୁଥରୁ ସଂଗ୍ରହ କରାଯାଇ ଥିବା ୩୪୬ଟି ଇଭିଏମ୍ର କାଉଣ୍ଟିଂ କରାଯିବ ।
ମୋଟ ୨୫ଟି ରାଉଣ୍ଡ ଗଣତି କରାଯିବ । ପ୍ରାର୍ଥୀଙ୍କ ପ୍ରତିନିଧି ଓ ଜିଲ୍ଲା ନିର୍ବାଚନ ଅଧିକାରୀଙ୍କ ଉପସ୍ଥିତିରେ ପ୍ରଥମେ ସଂଗ୍ରହ କରାଯାଇଥିବା ୧୬୩୧ଟି ପୋଷ୍ଟାଲ ବାଲଟ୍ ଗଣତି କରାଯିବ । ବାଲେଶ୍ୱର ସଦର ନିର୍ବାଚନ ମଣ୍ଡଳୀରେ ମୋଟ୍ ଭୋଟର ସଂଖ୍ୟା ୨ ଲକ୍ଷ ୩୦ ହଜାର ୨୯୭ ଥିବା ବେଳେ ୧ ଲକ୍ଷ ୬୨ ହଜାର ୮୦୫ ଜଣ ମତଦାନ କରିଛନ୍ତି ।
ତିର୍ତ୍ତୋଲରେ ମଧ୍ୟ ଭୋଟ୍ ଗଣତି ପାଇଁ ଜିଲ୍ଲା ପ୍ରଶାସନ କଡ଼ା ସୁରକ୍ଷା ବ୍ୟବସ୍ଥା କରିଛି । ଜଗତସିଂହପିର ଏସ୍ଭିଏମ୍ କଲେଜ ପରିସରରେ ୧୦ ତାରିଖ ସକାଳ ୮ଟାରୁ ଗଣତି ଆରମ୍ଭ ହେବ । କୋଭିଡ୍ କଟକଣା ଭିତରେ ଭୋଟ୍ ଗଣତି କରାଯିବ ବୋଲି ଜିଲ୍ଲା ନିର୍ବାଚନ ଅଧିକାରୀ ସରୋଜ କୁମାର ମିଶ୍ର କହିଛନ୍ତି ।
