ନୂତନ ସଂସଦ ଭବନର ନିର୍ମାଣ କରିବ ଟାଟା ପ୍ରୋଜେକ୍ଟ ଲିମିଟେଡ୍, ଖର୍ଚ୍ଚ ହେବ ୮୬୧.୯୦ କୋଟି ଟଙ୍କା

ନୂଆଦିଲ୍ଲୀ: ଟାଟା ପ୍ରୋଜେକ୍ଟସ୍ ଲିମିଟେଡ୍ ନୂତନ ସଂସଦ ଭବନର ନିର୍ମାଣ କରିବ । ୮୬୧.୯୦ କୋଟି ଟଙ୍କା ବ୍ୟୟରେ ନିର୍ମାଣ ହେବ ସଂସଦ ଭବନ । ବିଡିଂ ଜରିଆରେ ହୋଇଥିବା ଚୟନରେ ୮୬୧.୯୦ ଟଙ୍କା ଖର୍ଚ୍ଚ ସହ ଟାଟା ପ୍ରୋଜେକ୍ଟକୁ ମିଳିଛି ସଂସଦ ଭବନ ନିର୍ମାଣ କାର୍ଯ୍ୟ । କେନ୍ଦ୍ରୀୟ ଲୋକ ନିର୍ମାଣ ବିଭାଗ ବୁଧବାର ବିଡ୍ ଖୋଲିଥିଲା । ଯେଉଁଥିରେ ଟାଟା ପ୍ରୋଜେକ୍ଟ ୮୬୧.୯୦ କୋଟି ଟଙ୍କା ବିଡ୍ କରିଥିବା ବେଳେ ଲାର୍ସନ ଓ ଟୁବ୍ରୋ ଲିମିଟେଡ୍ ୮୬୫ କୋଟି ଟଙ୍କା ବିଡ୍ କରିଥିଲା ।

ନୂଆଦିଲ୍ଲୀରେ ନୂଆ ସଂସଦ ଭବନରେ କେନ୍ଦ୍ରୀୟ ଭିଷ୍ଟାର ପୁନଃବିକାଶ କରିବା ପାଇଁ ମୋଦି ସରକାର ଏହି ଯୋଜନା ପ୍ରସ୍ତୁତ କରିଥିଲେ । ମିଳିଥିବା ସୂଚନା ଅନୁସାରେ ସଂସଦର ମୌସୁମୀ ଅଧିବେଶନ ସରିବା ପରେ ନୂଆ ବିଲ୍ଡିଂର ନିର୍ମାଣ କାର୍ଯ୍ୟ ଆରମ୍ଭ ହେବ ।

ଗତ ମାସରେ ନୂଆ ସଂସଦ ଭବନ ନିର୍ମାଣ ପାଇଁ ବିଡ୍ କରିବାକୁ ସରକାର ମୁମ୍ବାଇର ତିନୋଟି କମ୍ପାନୀ- ଲାର୍ସନ ଏଣ୍ଡ ଟୁବ୍ରୋ, ଟାଟା ପ୍ରୋଜେକ୍ଟ ଓ ଶାପୁରଜୀ ପଲୋନଜି ଏଣ୍ଡ କମ୍ପାନୀର ଏକ ଛୋଟ ତାଲିକା ପ୍ରସ୍ତୁତ କରିଥିଲେ ।