ପୁରୀ: ଆଜି ହେବ ବଳଙ୍ଗା ପୀଡ଼ିତାଙ୍କ ଶେଷକୃତ୍ୟ । ରୀତିନୀତି ଅନୁଯାୟୀ ନିଜ ଗାଁ ଗୋପାଳପୁରରେ ଶେଷକୃତ୍ୟ ହେବ। ଗତ ରାତିରେ ହିଁ ପୀଡ଼ିତାଙ୍କ ମୃତଦେହ ଦିଲ୍ଲୀରୁ ଆସି ଭୁବନେଶ୍ଵର ବିମାନ ବନ୍ଦରରେ ପହଞ୍ଚିବା ପରେ ସିଧା ଗାଁକୁ ଅଣାଯାଇଥିଲା। ଦିଲ୍ଲୀ ଏମସରେ ପୋଷ୍ଟମର୍ଟମ ସରିବା ପରେ ମରଶରୀରକୁ ବିମାନ ଯୋଗେ ଅଣାଯାଇଥିଲା ଭୁବନେଶ୍ବର । ସେଠାରୁ ପୋଲିସ ସୁରକ୍ଷାରେ ଜନ୍ମମାଟିକୁ ନିଆଯାଇଥିଲା ମୃତଦେହ । ସେଥିଲାଗି ଏକ କାରକେଡ ବି ପ୍ରସ୍ତୁତ ହୋଇଥିଲା । ରାତି ପ୍ରାୟ ୧୧ଟାରେ ମର ଶରୀର ପହଞ୍ଚିବା ପରେ ଭୁବନେଶ୍ବର ବିମାନ ବନ୍ଦରରେ ବିଭିନ୍ନ ଦଳର ନେତାମାନେ ଜଣାଇଥିଲେ ଶ୍ରଦ୍ଧାଞ୍ଜଳି । ସେଠାରୁ ଭୁବନେଶ୍ବର ପୋଲିସ କାରକେଡରେ ତାଙ୍କ ମୃତଦେହ ନିଆଯାଇଥିଲା ଉତ୍ତରା ଛକ ଯାଏ। ସେଠାରୁ ପୁରୀ ପୋଲିସର କାରକେଡ ନେଇଥିଲା ବଳଙ୍ଗା।
ମରଶରୀର ଗାଁରେ ପହଞ୍ଚିବା ପରେ ସେଠାରେ ସମ୍ପର୍କୀୟ, ବିଭିନ୍ନ ଦଳର ନେତା, ଗ୍ରାମବାସୀ ପ୍ରମୁଖ ଉପସ୍ଥିତ ଥିଲେ। ମରଶରୀର ପହଞ୍ଚିବା ପରେ ସୃଷ୍ଟି ହୋଇଥିଲା ଶୋକାକୁଳ ପରିବେଶ । ଗାଁରେ ବିଭିନ୍ନ ରୀତିନୀତି ସଂପନ୍ନ ହୋଇଥିଲା । ଏହା ପରେ ଆଜି ସକାଳୁ କବର ଦିଆଯିବା ଲାଗି ସ୍ଥିର ହୋଇଛି ।
