ପୁତ୍ର ପ୍ରେମରେ ଜିଲ୍ଲାପାଳଙ୍କ କାର୍ଯ୍ୟାଳୟରେ ଅଧିଆ ପଡ଼ିଲେ ମାଆ ଯଶୋଦା । ଜିଲ୍ଲାପାଳଙ୍କ ଅଫିସରେ କାନ୍ଦି କାନ୍ଦି ଗଡିବା ସହ ଆତ୍ମହତ୍ୟା ଉଦ୍ୟମ କରିଛନ୍ତି ଲାଳିତ ପିତା ଓ ମାତା । ଦମ୍ପତିଙ୍କୁ ବୁଝାଇବାକୁ ଯାଇ ନାକେଦମ ପୋଲିସ ପ୍ରଶାସନ । ଢେଙ୍କାନାଳ ଜିଲ୍ଲାପାଳଙ୍କ ଅଫିସରୁ ଆସିଛି ଏଭଳି ହୃଦୟ ବିଦାରକ ଦୃଶ୍ୟ । ଢେଙ୍କାନାଳ ଜିଲ୍ଲା ଓଡ଼ାପଡ଼ା ବ୍ଲକ ବାଙ୍ଗୁରସିଂହ ପଞ୍ଚାୟତ ବାଛୁରୀବାଙ୍କ ଗାଁର ମୁଷା ନାଏକ ଛେଳି ଚରାଇବାକୁ ଡିସେମ୍ବର ୯ ତାରିଖରେ ବେଡାପଡା ଗାଁ ଜଙ୍ଗଲକୁ ଯାଇଥିଲେ । ସେଠାରୁ ମୁର୍ମୁଷୁ ଅବସ୍ଥାରେ ଏକ ଜନ୍ମିତ ଶିଶୁପୁତ୍ରକୁ ପଡିଥିବା ଦେଖି ତାକୁ ଘରକୁ ଆଣିଥିଲେ । ମୁଷା ନାଏକ ଓ ବାସନ୍ତୀ ନାଏକଙ୍କ ୩୦ ବର୍ଷ ହେବ ବାହାଘର ହୋଇଥିଲେ ସୁଦ୍ଧା ତାଙ୍କର କେହି ପିଲା ଛୁଆ ନଥିବାରୁ ସେ ଜନ୍ମିତ ଶିଶୁଟିକୁ ଲାଲନ ପାଳନ କରି ରଖିଥିଲେ । ଖବର ପାଇ ଗାଁକୁ ଯାଇ ଶିଶୁଟିକୁ ଉଦ୍ଧାର କରିଛି ଶିଶୁ ମଙ୍ଗଳ କମିଟି ଓ ଶିଶୁ ସୁରକ୍ଷା ବିଭାଗ । ଏନେଇ ମୋଟଙ୍ଗା ଥାନାରେ ଲିଖିତ ଅଭିଯୋଗ କରିଛି ଶିଶୁ ମଙ୍ଗଳ କମିଟି । କିନ୍ତୁ ଲାଳିତ ପିତା ମାତା ଶିଶୁଟିକୁ ପାଇବା ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟରେ ଅଧିଆ ପଡିଛନ୍ତି । ଗୋଟିଏ କଥା ଆମ ଛୁଆକୁ ଫେରାଇ ଦିଅ । ନହେଲେ ଆତ୍ମହତ୍ୟା କରିବୁ । ଏଠି ପ୍ରଶ୍ନ ଉଠୁଛି- ଯଦି ସେ ମାଆଟି ସେଦିନ ନବଜାତ ଶିଶୁକୁ ଜଙ୍ଗଲରୁ ଉଦ୍ଧାର କରି ନଥାନ୍ତା ତାହାଲେ କଣ ଶିଶୁଟି ବଞ୍ଚି ପାରିଥାନ୍ତା ?
