ନନ୍ଦିଘୋଷ ବ୍ୟୁରୋ : ଭାରତକୁ ଦୁଇ ଦୁଇଟି ବଡ଼ ଆଶ୍ବସ୍ତି । ଗୋଟିଏ ପଟେ ଭାରତ ପାଇଁ ଲାଗୁନୁହେଁ ହର୍ମୁଜ ପ୍ରଣାଳୀରେ ଇରାନ୍ ଲଗାଇଥିବା କଟକଣା । ଅନ୍ୟପଟେ ମଧ୍ୟପ୍ରାଚ୍ୟ ଯୁଦ୍ଧ ଜାରି ରହିଲେ ମଧ୍ୟ ଭାରତରେ ସୃଷ୍ଟି ହେବନି ତୈଳ ଅଭାବ । ମଧ୍ୟପ୍ରାଚ୍ୟରେ ଯୁଦ୍ଧ ଯୋଗୁ ଇରାନ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତଥା ବ୍ୟସ୍ତବହୁଳ ପଣ୍ୟବାହୀ ଜଳପଥ ହର୍ମୁଜ ପ୍ରଣାଳୀକୁ ବନ୍ଦ କରିଥିବା ଘୋଷଣା କରିଥିଲା। ଏହି ମାର୍ଗକୁ ଅତିକ୍ରମ କରିବାକୁ ଚେଷ୍ଟା କରୁଥିବା ଜାହାଜଗୁଡ଼ିକୁ ଜାଳି ଦିଆଯିବ ବୋଲି ଚେତାବନୀ ଦେଇଥିଲା।ଫଳରେ ଭୟରେ ଉଭୟ ପଟରେ ଶତାଧିକ ଜାହାଜ ଅଟକି ରହିଥିଲା । ହେଲେ ଆମେରିକା, ଇସ୍ରାଏଲ, ୟୁରୋପ ଓ ସେମାନଙ୍କ ପଶ୍ଚିମ ସହଯୋଗୀ ଦେଶଗୁଡ଼ିକ ପାଇଁ ହିଁ ଏହି କଟକଣା ଲାଗୁ ବୋଲି ଘୋଷଣା କରିଛି ଇରାନ୍ । ଏହା ଭାରତ ପାଇଁ ଲାଗୁ ନୁହଁ ବୋଲି ସୂଚାଇଛି ଇରାନ୍ । ଏହାରି ଭିତରେ ଭାରତ ପୁଣି ରୁଷଠାରୁ ଅଶୋଧିତ ତେଲ ଆମଦାନି କରିବାକୁ ଯାଉଛି । ପୂର୍ବ ଏସିଆ ଅଭିମୁଖେ ଯାଉଥିବା କିଛି ରୁଷୀୟ ଅଶୋଧିତ ତୈଳ ବୋଝେଇ ଜାହାଜ ଭାରତ ଆଡିକି ମୁହାଁଇଛି । ଏହି ସପ୍ତାହରେ ଭାରତୀୟ ବନ୍ଦରଗୁଡ଼ିକରେ ଜାହାଜ ଗୁଡିକ ଅନଲୋଡ୍ କରାଯାଇପାରିବ।
